Read Nzema 2 Arl 12 Bible Online

2 Arl 12 - Nzema bible

2 Arl 12

¹Gyihu dɛnlanle Yizilayɛ ebia ne azo ɛvolɛ nsuu la yɛɛ bɛvale Dwowahye bɛziele Dwuda belemgbunli a, na ɔdɛnlanle Gyɛlusalɛm ɛkɛ ne ɔlile ebia ne ɛvolɛ abulanla. Bɛfɛlɛ ɔ nli Zaebaya. Ɔvi Biyɛhyiba.

²Wɔ ye ɛbɛla ɛbɔlɛ nu ɔyɛle mɔɔ sɔ Ɛdɛnkɛma anye la, ɔboalekɛ sɛlɛvolɛ Gyɛhɔyada hilehilele ye.

³Noko akee bɛanzɛkye awozonle ɛzonlenlɛ ɛleka ne mɔ; menli hɔle zo bɔle azu na bɛkpunle ɛyɛlɛ wɔ ɛleka zɔhane mɔ.

⁴ Kenle ko Dwowahye vɛlɛle sɛlɛvolɛma ne mɔ na ɔzele bɛ kɛ, anrɛɛ bɛzie ezukoa ne mɔɔ menli batua maa bɛbɔ azu, adwule mɔɔ menli ne tua ye dahudahu, nee ezukoa mɔɔ menli ne yeye bɛ ahonle nu fa kyɛ Ɛdɛnkɛma la bie.

⁵Sɛlɛvolɛ ko biala ɔdaye ɔbava ezukoa mɔɔ menli mɔɔ ɔnea bɛ nwo zo la kɛva kɛrɛlɛ ye la yeazie. Zɛhae ezukoa mɔɔ bɛbazie la, yemɔ yɛɛ bɛbava bɛayɛ Ɛzonlenlɛ Sua ne ɛleka mɔɔ kɛzɛkye la boɛ a.

⁶Noko mɔɔ Dwowahye lile ɛvolɛ abulanwiɔ nee nsa wɔ ebia ne azo la ɛnee sɛlɛvolɛma ne ɛtɛyɛle Ɛzonlenlɛ Sua ne anwo gyima biala.

⁷Yemɔti ɔvɛlɛle sɛlɛvolɛ Gyɛhɔyada nee sɛlɛvolɛma mɔɔ ɛha la, na ɔbizale bɛ kɛ, “Duzu ati a bɛnyɛ Ɛzonlenlɛ Sua ne boɛ a? Ɔvi ɛnɛ mɔɔ kɔ la, bɛ biala ɛnzie ezukoa mɔɔ kɛrali ɔ sa nu la bieko. Bɛva bɛrɛla amaa bɛava bɛayɛ Ɛzonlenlɛ Sua ne ɛleka mɔɔ ɛlɛsɛkye la boɛ.”

⁸Sɛlɛvolɛma ne kponlenle ɛhye azo na eza bɛliele bɛdole nu kɛ tɛ bɛmɛ a ɔwɔ kɛ bɛyɛ Ɛzonlenlɛ Sua ne boɛ a.

⁹Zɔhane ati sɛlɛvolɛ Gyɛhɔyada bobɔle ɛlɛka, ɔfitile ɔ ti zo na ɔvale ɔziele azukponle ne anwo mɔɔ kɛ ɛwolo Sua ne anu ala la ɛnee ɔgyi fema zo ɛkɛ. Sɛlɛvolɛma mɔɔ kɛrayɛ gyima wɔ nlenkɛ ne mɔ anloa la fa ezukoa biala mɔɔ bɛkɛnyia ye wɔ menli mɔɔ rale ɛzonlenlɛ la lɔ la gua ɛlɛka ne anu.

¹⁰Saa ezukoa ne so ɛlɛka ne anu a, ɛnee belemgbunli kɛlɛhɛlɛvolɛ ne nee Sɛlɛvolɛ Kpanyinli ne banea maa bɛtia bɛwulowula ye ahodoku nu.

¹¹Bɛwie a bɛkɛlɛ mɔɔ bɛnyianle la bɛwula buluku nu na bɛfa ezukoa ne bɛmaa sonla ne mɔɔ nea Ɛzonlenlɛ Sua ne gyima zo la, yɛɛ ɔdaye noko ɔfa ɔtua kapentama, menli mɔɔ si sua la,

¹²menli mɔɔ gua belekese nee menli mɔɔ kpukekpuke awolɛ la kakɛ a. Ɔfa bie ɔtɔ mbaka mgbole nee awolɛ mɔɔ bɛfa bɛayɛ sua ne boɛ la na ɔtua sua ne anwo kakɛ biala.

¹³Bɛnva ezukoa ne bie bɛndua dwɛtɛ fufule ahɔpo, ahyɛnze kuloonwu, aweɛne anzɛɛ ahɛnlaneɛ nwo ninyɛne, anzɛɛ debie biala mɔɔ bɛva dwɛtɛ fufule anzɛɛ ezukoa nvutuke bɛyɛ la kakɛ.

¹⁴Bɛvale ye kpokpoti bɛduale sua ne gyimayɛvoma nee ninyɛne mɔɔ bɛkɛdɔ kɛ bɛfa bɛayɛ sua ne boɛ la kakɛ.

¹⁵ Menli mɔɔ nea gyima ne azo la lile nɔhalɛ kpalɛ manle ɔrale kɛ ɛnee ɔngyia bɔbɔ kɛ awie kɛvɛlɛ bɛ kɛ bɛrabu mgbonda.

¹⁶ Ezukoa mɔɔ bɛkɛva bɛkɛdua azubɔdeɛ kakɛ, anzɛɛ mɔɔ bɛkɛva bɛkɛyɛ ɛtane nwo azubɔdeɛ la, yemɔ bɛnva bɛmba Ɛzonlenlɛ Sua ne anu. Ɔle sɛlɛvolɛma ne mɔ ɛdeɛ.

¹⁷Mekɛ ne anu Selea Belemgbunli Hazeeyɛle vale konle doale suakpole Gate azo amra na ɔlile bɛ nwo zo konim. Ɔyɛle ye adwenle kɛ ɔkateta Gyɛlusalɛmma noko.

¹⁸Na Dwuda Belemgbunli Dwowahye sesale azubɔlɛ ninyɛne mɔɔ ɔ nlenya mɔ, Gyɛhɔhyafate, Gyɛhɔlam nee ɔ ze Ehazaya ɛboɔboa bɛ nloa ɛva ɛzie ɛkɛ ɛmaa Ɛdɛnkɛma, yɛɛ ɔdaye Dwowahye ye azubɔlɛ ninyɛne, ezukoa nvutuke mɔɔ wɔ Ɛzonlenlɛ Sua ne nee belemgbunli suakunlu ɛkɛ ne gya nu la amuala kɔsɔɔti manle bɛhɔmanle Belemgbunli Hazeeyɛle, na Belemgbunli Hazeeyɛle vale ye ɛlɔnema ne vile Gyɛlusalɛm hɔle.

¹⁹Debie biala mɔɔ Belemgbunli Dwowahye yɛle la bɛhɛlɛ bɛ wɔ Dwuda Arelemgbunli Tetedwɛkɛ Mbuluku ne mɔ anu.

²⁰Belemgbunli Dwowahye safohyenlema ne hɔle ɔ ti akpamo, na nuhua nwiɔ, Hyemɛyate ara Dwozaka yɛɛ Hyomɛ ara Gyɛhozabade, hyele ye hunle ye wɔ sua bie mɔɔ gyi kuma ne mɔɔ bɛduale ye wɔ Gyɛlusalɛm aduduleɛ la azo la anwo wɔ Sela adenle zo. Na bɛziele ye wɔ arelemgbunli azie ne mɔɔ wɔ Devidi Suakpole zo la azo. Ɔ ra Amazaya a lile ebia ne a.