Read Nzema 2 Arl 13 Bible Online

2 Arl 13 - Nzema bible

2 Arl 13

¹Belemgbunli Dwowahye lile ɛvolɛ abulanwiɔ nee nsa wɔ Dwuda ebia ne azo la yɛɛ Gyihu ara Gyɛhowahaze bɔle ɔ bo kɛ ɔdi belemgbunli wɔ Yizilayɛ a. Ɔdɛnlanle Samɛlea a ɔlile belemgbunli ne a, yɛɛ ɔlile belemgbunli ɛvolɛ bulu nee nsuu.

²Ɔyɛle ɛtane ɔtiale Ɛdɛnkɛma. Ɔvale Nibate ara Gyɛlɔbowam agyakɛ na ɔmanle Yizilayɛma kɔsɔɔti yɛle ɛtane. Yeangyakyi ye ninyɛndane ne ɛyɛlɛ.

³Ɛdɛnkɛma vale Yizilayɛma anwo ɛya, ɔlua zo ɔyele bɛ ɔmanle Selea Belemgbunli Hazeeyɛle nee ɔ ra Bɛneheedade manle bɛlile bɛ nwo zo konim wɔ mekɛ biala mɔɔ bɛkɛnyia konle la.

⁴Nzinlii Gyɛhowahaze zunle vɛlɛle Ɛdɛnkɛma, na ɔdiele ye, ɔboalekɛ ɛnee akee Seleama ɛlɛsisi Yizilayɛma somaa.

⁵Ɛdɛnkɛma manle Yizilayɛma nyianle awie lile bɛ ti na bɛhonle bɛliele bɛ nwo bɛvile Seleama asa anu. Yemɔti akee Yizilayɛma anzo nu dwole bɛ kɛ dɛba ne la.

⁶Noko bɛangyakyi ɛtane ne mɔ mɔɔ Gyɛlɔbowam manle Yizilayɛma yɛle la ɛyɛlɛ, na bɛhɔle zolɛ bɛbɔle zɔhane ɛbɛla ne mɔ; yɛɛ bɛ bozonle raalɛ Ahyela ananze ne noko woale Samɛlea.

⁷Ɛnee Gyɛhowahaze ɛnlɛ ɛlɔnema mɔɔ ko maa ye kɛ ɛlɔnema mɔɔ tɛnla mgbɔnwɔ zo ko la abulanlu, menli mɔɔ fa ehwili ko la bulu yɛɛ ɛlɔnema mɔɔ dua aze la apenle bulu ala. Ɔboalekɛ ɛnee Seleama ɛhu Yizilayɛ ɛlɔnema ne amuala; bɛdinle bɛ kɛ sianlɛ.

⁸Bɛhɛlɛ nyɛleɛ mɔɔ Belemgbunli Gyɛhowahaze yɛle, ninyɛne mɔɔ ɔyɛle, nee ye akɛnrasesebɛ mɔɔ ɔyɛle la amuala wɔ Yizilayɛ Arelemgbunli Tetedwɛkɛ Mbuluku ne mɔ anu.

⁹Ɔhɔle ayile nu na bɛwulale ye mrɛlatɛlɛ nu wɔ Samɛlea. Ɔ ra Gyɛhowahye lile ebia ne ziele Yizilayɛma.

¹⁰Belemgbunli Dwowahye lile ɛvolɛ abulasa nee nsuu wɔ Dwuda ebia ne azo la yɛɛ Gyɛhowahaze ara Gyɛhowahye bɔle ɔ bo kɛ ɔdi belemgbunli wɔ Yizilayɛ a. Ɔdɛnlanle Samɛlea a ɔlile belemgbunli ne a na ɔlile ebia ne ɛvolɛ bulu nee nsia.

¹¹Ɔdaye noko ɔyɛle ɛtane ɔtiale Ɛdɛnkɛma. Yeandwe ɔ nwo yeanvi Belemgbunli Gyɛlɔbowam nyɛleɛ ɛtane ne mɔ mɔɔ vale Yizilayɛma hɔle munzule nu la anwo.

¹²Debie biala mɔɔ Belemgbunli Gyɛhowahye yɛle nee ye anwosesebɛ mɔɔ ɔhilele wɔ Yizilayɛma nee Dwuda Belemgbunli Amazaya bɛ konle ne anu la, bɛhɛlɛ bɛ kɔsɔɔti wɔ Yizilayɛ Arelemgbunli Tetedwɛkɛ Mbuluku ne mɔ anu.

¹³Gyɛhowahye hɔle ayile nu na bɛwulale ye mrɛlatɛlɛ nu wɔ Samɛlea alehelɛ alaleɛ ne na ɔ ra Gyɛlɔbowam a lile Yizilayɛ ebia ne a, na bɛvɛlɛle ye Gyɛlɔbowam mɔɔ tɔ zo nwiɔ.

¹⁴ Anwonyane mɔɔ rale Nyamenle kpɔmanvolɛ Yilaehya ɛhunlɛ la bɔle ye. Na mɔɔ ɔla anwonyane ne anu la, Yizilayɛ Belemgbunli Gyɛhowahye rakpɔlale ye. Ɔnwunle Yilaehya la ɔzunle na ɔzele kɛ, “O egya, egya! Yizilayɛ konle ehwili ne nee menli mɔɔ ka mgbɔnwɔ ne mɔ la, bɛmɛ ɛhye o!”

¹⁵Yilaehya zele ye kɛ, “Fa ɛda nee nwolɛ mbaka bɛla.” Gyɛhowahye vale rale.

¹⁶Yilaehya zele ye kɛ, “Sua wɔ ɛda ne.” Na Gyɛhowahye zuale ɛda ne. Yilaehya vale ɔ sa guale belemgbunli ne asa azo.

¹⁷Akee ɔzele ye kɛ, “Buke nvɛnzɛlɛ ne mɔɔ di kɔ aduduleɛ la.” Belemgbunli ne dukuele nvɛnzɛlɛ ne. Akee Yilaehya zele ye kɛ, “To wɔ ɛda ne.” Gyɛhowahye dole ɛda ne ala la Yilaehya deanle nu, “Wɔmɔ a ɛle Ɛdɛnkɛma ɛda ne mɔɔ ɔbava yeali Seleama anwo zo konim la. Ɛ nee Selea baho wɔ Efɛke toonwo kɔkpula kɛ ɛkɛbɔ bɛ bo zo bɔkɔɔ la.”

¹⁸Akee Yilaehya zele belemgbunli ne kɛ, “Fula ɛda mbaka ne mɔ.” Na Gyɛhowahye vulale. Yilaehya zele belemgbunli ne kɛ, “Fa ɛda mbaka ne mɔ fi azɛlɛ nwo.” Na belemgbunli ne vale finle azɛlɛ nwo fane nsa na ɔgyakyile.

¹⁹Yilaehya vale ɔ nwo ɛya na ɔzele kɛ, “Anrɛɛ ɔwɔ kɛ ɛfi ye aze fane nnu anzɛɛ nsia; anrɛɛ ɛnee wɔzɛkye Seleama wɔwie ala ɛne, mɔɔ bɛ bo zo ɔwɔ kɛ minli bɔkɔɔ a. Kɛkala ɛdeɛ, ɛbali Seleama anwo zo konim fane nsa ala.”

²⁰Yilaehya wule na bɛziele ye. Ɛvolɛ biala Mowabe ɛlɔnema ba Yizilayɛma anwo zo arɛlevilɛ nu wɔ nyenyensuo mekɛ.

²¹Kenle ko Yizilayɛma hɔle kazie nrenya bie mɔɔ ɛwu la, bɛnwunle kɛ Mowabe nwule ɛlɔnema ɛlɛba bɛ nwo zo. Yemɔti bɛvuandinle funli ne bɛdole Yilaehya nla ne anu na bɛnriandile bɛhɔle. Funli ne dɔle Yilaehya mbowule ne azo ala la ɔdunwuele na ɔdwazole ɔgyinlanle.

²²Selea Belemgbunli Hazeeyɛle di ye belemgbunli ne la ɔmanle Yizilayɛma anwo hyelele bɛ kpalɛ wɔ mekɛ mɔɔ Gyɛhowahaze a di belemgbunli wɔ Yizilayɛ la.

²³Na Ɛdɛnkɛma nwunle bɛ anwunvɔne. Yeammaa adenle yeammaa bɛanzɛkye Yizilayɛma. Ɔboale bɛ, ɔboalekɛ ɔ nee Ebileham, Ayezeke nee Gyɛkɔbo lɛ ngyekyeleɛ. Yemɔti ɔ rɛle ɛtɛfile ye menli ne.

²⁴Mɔɔ Selea Belemgbunli Hazeeyɛle wule la, ɔ ra Bɛneheedade a lile belemgbunli a.

²⁵Na Yizilayɛ Belemgbunli Gyɛhowahye lile Bɛneheedade anwo zo konim fane nsa na ɔliele Yizilayɛ azuamgbole mɔɔ Seleama honle vale wɔ Belemgbunli Gyɛhowahaze mekɛ zo la. Gyɛhowahye ɔ ze a le Gyɛhowahaze.