Read Nzema 2 Arl 15 Bible Online

2 Arl 15 - Nzema bible

2 Arl 15

¹Gyɛlɔbowam mɔɔ tɔ zo Nwiɔ la lile ɛvolɛ abulanwiɔ nee nsuu wɔ Yizilayɛ ebia ne azo la, yɛɛ Amazaya ara Yuzaya bɔle ɔ bo kɛ ɔdi belemgbunli wɔ Dwuda a.

²Ɔlile ɛvolɛ bulu nee nsia la yɛɛ bɛvale ye bɛziele Dwuda belemgbunli a, yɛɛ ɔdɛnlanle Gyɛlusalɛm ɔlile belemgbunli ɛvolɛ abulanlu nee nwiɔ. Bɛfɛlɛ ɔ nli Gyɛkɔlaya; ɔvi Gyɛlusalɛm.

³Yuzaya vale ɔ ze Amazaya agyakɛ na ɔzɔle Ɛdɛnkɛma anye.

⁴Noko yeammaa bɛanzɛkye ɛleka ne mɔ mɔɔ bɛsonle awozonle la, yemɔti menli ne hɔle zo kpunle ɛyɛlɛ wɔ ɛleka zɔhane mɔ na bɛbɔle azu wɔ ɛkɛ.

⁵Ɛdɛnkɛma manle ewule kokobɛ dilale Yuzaya toonwo ɔhɔle ewule nu. Yemɔti ɔdɛnlanle sua gyɛne nu, ɔyele ɔ sa wɔ maanle ne ɛbulɛ nwo. Ɔ ra Dwɔtam yɛle ɔ ze gyima ne manle ye na ɔziele maanle ne.

⁶Gyima biala mɔɔ Yuzaya lile, nee nyɛleɛ mɔɔ ɔyɛle la bɛhɛlɛ bɛ muala wɔ Dwuda Arelemgbunli Tetedwɛkɛ Mbuluku ne mɔ anu.

⁷Belemgbunli Yuzaya hɔle ayile nu na bɛwulale ye mrɛlatɛlɛ nu wɔ Devidi Suakpole zo alehelɛ alaleɛ ne.

⁸Yuzaya lile ɛvolɛ abulasa nee mɔtwɛ wɔ Dwuda ebia ne azo la yɛɛ Gyɛlɔbowam mɔɔ tɔ zo Nwiɔ la ara Zɛkalaya ralile Yizilayɛ belemgbunli a. Ɔdɛnlanle Samɛlea, yɛɛ ɔlile ebia ne siane nsia ala.

⁹Ɔvale ɔ ze mɔ agyakɛ ɔbɔle ɛbɛla ɛtane ɔtiale Ɛdɛnkɛma. Yeandwe ɔ nwo yeanvi Nibate ara Gyɛlɔbowam ɛbɛla ne mɔɔ ɔbɔle a ɔmanle Yizilayɛma yɛle ɛtane la anwo.

¹⁰Gyeebɛhye ara Hyalɛm vuale ɔ ti; ɔ sa hanle ye wɔ Yebelɛyam ɔhunle ye na ɔlile ebia ne.

¹¹Debie biala mɔɔ Zɛkalaya yɛle la bɛhɛlɛ bɛ muala wɔ Yizilayɛ Arelemgbunli Tetedwɛkɛ Mbuluku ne mɔ anu.

¹²Yemɔti ɛwɔkɛ ne mɔɔ Ɛdɛnkɛma bɔle Belemgbunli Gyihu kɛ, “Ɛ bo zo amra bali Yizilayɛ ebia ne bie toonwo yeahɔdwu awolɛndoazo nna ne azo” la, yɛle nɔhalɛ.

¹³Yuzaya lile ɛvolɛ abulasa nee ngɔnla wɔ Dwuda ebia ne azo la yɛɛ Gyeebɛhye ara Hyalɛm bɔle belemgbunlililɛ bɔ wɔ Yizilayɛ a. Ɔdɛnlanle Samɛlea ɔlile belemgbunli siane ko.

¹⁴Geedae ara Mɛnahɛm vi Tɛza rale Samɛlea rahunle ye na ɔlile ebia ne.

¹⁵Debie biala mɔɔ Hyalɛm yɛle nee ye maamɔvo ɛbɛla ne, bɛhɛlɛ bɛ muala wɔ Yizilayɛ Arelemgbunli Tetedwɛkɛ Mbuluku ne mɔ anu.

¹⁶Mɔɔ Mɛnahɛm vi Tɛza kɔ la ɔzɛkyele Tapua bɔkɔɔ na ɔhunle menli mɔɔ wɔ zolɛ la amuala, ɔtulutulule mraalɛ mɔɔ ɛlɛnrenzɛ bɔbɔ la anyalɛ, ɔboalekɛ bɛanli bɛamboa ye.

¹⁷Yuzaya lile ɛvolɛ abulasa nee ngɔnla wɔ Dwuda ebia ne azo la yɛɛ Geedae ara Mɛnahɛm ralile Yizilayɛ belemgbunli ebia ne a. Ɔdɛnlanle Samɛlea na ɔlile ebia ne ɛvolɛ bulu.

¹⁸Ɔyɛle ɛtane ɔtiale Ɛdɛnkɛma. Ɔvale Nibate ara Gyɛlɔbowam agyakɛ, ɔbɔle ye ɛbɛla ɛtane ne mɔɔ manle Yizilayɛma amuala yɛle ɛtane la bie.

¹⁹Belemgbunli Tegelate Paelisɛ vi Aselea ralile Yizilayɛma nvunu, ɔvale konle ɔdoale bɛ. Mɛnahɛm vale dwɛtɛ fufule kilo apenle ngoko abulasa nee nna manle Paelisɛ, amaa yeaboa ɔdaye Mɛnahɛm wɔ ye maanle ne ɛbulɛ nu.

²⁰Mɛnahɛm liele ezukoa ne vile Yizilayɛ sukoavolɛma ɛkɛ ne. Ɔmanle ko biala duale dwɛtɛ fufule abulanlu. Yemɔti Tegelate Paelisɛ nee ye ɛlɔnema ne ziale hɔle bɛ sua zo.

²¹Debie biala mɔɔ Mɛnahɛm yɛle la bɛhɛlɛ bɛ kɔsɔɔti wɔ Yizilayɛ Arelemgbunli Tetedwɛkɛ Mbuluku ne mɔ anu.

²²Ɔhɔle ayile nu na bɛwulale ye mrɛlatɛlɛ nu, na ɔ ra Pɛkahaya lile ebia ne.

²³Yuzaya lile ɛvolɛ abulanlu wɔ Dwuda ebia ne azo la yɛɛ Mɛnahɛm ara Pɛkahaya bɔle ɔ bo kɛ ɔdi belemgbunli wɔ Yizilayɛ a. Ɔdɛnlanle Samɛlea, yɛɛ ɔlile ebia ne ɛvolɛ nwiɔ.

²⁴Ɔyɛle ɛtane ɔtiale Ɛdɛnkɛma. Ɔvale Nibate ara Gyɛlɔbowam agyakɛ, ɔbɔle ye ɛbɛla ɛtane ne mɔɔ manle Yizilayɛma yɛle ɛtane la bie.

²⁵Na Relɛmalaya ara Pikaa, Mɛnahɛm ɔdaye ye safohyenle ne vuale ɔ ti na ɔvale Geleadema abulanlu ɔhɔhunle belemgbunli ne wɔ Samɛlea suakunlu ɛkɛ ne na ɔlile ebia ne.

²⁶Debie biala mɔɔ Pɛkahaya yɛle, nee ye nyɛleɛ, bɛhɛlɛ bɛ kɔsɔɔti wɔ Yizilayɛ Arelemgbunli Tetedwɛkɛ Mbuluku ne mɔ anu.

²⁷Yuzaya lile ɛvolɛ abulanlu nee nwiɔ wɔ Dwuda ebia ne azo la yɛɛ Relɛmalaya ara Pikaa bɔle ɔ bo kɛ ɔdi belemgbunli wɔ Yizilayɛ a. Ɔdɛnlanle Samɛlea na ɔlile belemgbunli ɛvolɛ abulanwiɔ.

²⁸Ɔyɛle ɛtane ɔtiale Ɛdɛnkɛma. Ɔvale Nibate ara Gyɛlɔbowam agyakɛ, ɔbɔle ye ɛbɛla ɛtane ne mɔɔ manle Yizilayɛma yɛle ɛtane la bie.

²⁹Wɔ Belemgbunli Pikaa mekɛ zo, Aselea Belemgbunli Tegelate Paelisɛ vale ɛlɔne rahonle vale Ayedwɔn, Ebɛle Bɛte Meeyaka, Gyanowa, Kidɛhye, yɛɛ Heezɔ nee Galeli, Geleade nee Nafetalae maanzinli ne mɔ amuala, na ɔhyele menli ne bie mɔ nuokɛ ɔhɔle nlɔnu wɔ Aselea.

³⁰Belemgbunli Yuzaya ara Dwɔtam lile Dwuda ebia ne ɛvolɛ abulanwiɔ la, Yila ara Hohyia vuale Yizilayɛ Belemgbunli Pikaa ati na ɔhunle ye ɔlile ebia ne.

³¹Debie biala nee nyɛleɛ biala mɔɔ Pikaa yɛle la bɛhɛlɛ bɛ wɔ Yizilayɛ Arelemgbunli Tetedwɛkɛ Mbuluku ne mɔ anu.

³²Relɛmalaya ara Pikaa lile ɛvolɛ nwiɔ wɔ Yizilayɛ ebia ne azo la yɛɛ Belemgbunli Yuzaya ara Dwɔtam bɔle ɔ bo kɛ ɔdi belemgbunli wɔ Dwuda a.

³³Dwɔtam bɔ belemgbunlililɛ bo la ɛnee yeli ɛvolɛ abulanwiɔ nee nnu, yɛɛ ɔdɛnlanle Gyɛlusalɛm ɔlile belemgbunli ɛvolɛ bulu nee nsia. Ɔ nli a le Zeedɔko ara raalɛ Gyɛluhya.

³⁴Ɔvale ɔ ze Yuzaya agyakɛ na ɔzɔle Ɛdɛnkɛma anye.

³⁵Noko bɛanzɛkye ɛleka ne mɔ mɔɔ bɛsonle awozonle la, yemɔti menli hɔle zo kpunle ɛyɛlɛ wɔ ɛkɛ bɔle azu. Dwɔtam a zile Ɛzonlenlɛ Sua ne Sɔlɔ Anlenkɛ kpole ne a.

³⁶Debie biala nee nyɛleɛ biala mɔɔ Dwɔtam yɛle la bɛhɛlɛ bɛ wɔ Dwuda Arelemgbunli Tetedwɛkɛ Mbuluku ne mɔ anu.

³⁷Belemgbunli Dwɔtam mekɛ zo yɛɛ Ɛdɛnkɛma lumuale manle adenle manle Selea Belemgbunli Rilizen nee Yizilayɛ Belemgbunli Pikaa vale konle radoale Dwudama a.

³⁸Dwɔtam hɔle ayile nu na bɛwulale ye mrɛlatɛlɛ nu wɔ Devidi suakpole zo alehelɛ alaleɛ ne na ɔ ra Ehaze lile ebia ne.