Read Nzema 2 Arl 16 Bible Online

2 Arl 16 - Nzema bible

2 Arl 16

¹Pikaa lile ɛvolɛ bulu nee nsuu wɔ Yizilayɛ ebia ne azo la yɛɛ Dwɔtam ara Ehaze bɔle ɔ bo kɛ ɔdi belemgbunli wɔ Dwuda a.

²Ɔlile ɛvolɛ abulanwiɔ la yɛɛ ɔbɔle ɔ bo kɛ ɔdi belemgbunli a. Ɔdɛnlanle Gyɛlusalɛm ɔlile belemgbunli ɛvolɛ bulu nee nsia. Yeanva ɔ nlenya Devidi agyakɛ; ɛhye ati ɔyɛle ɛtane ɔtiale Ɛdɛnkɛma ye Nyamenle ne.

³Ɔvale Yizilayɛ arelemgbunli agyakɛ, yɛɛ ɔbɔle bɛ ɛbɛla ɛtane ne bie. Ɔbɔle munzule ɛbɛla ne mɔɔ menli mɔɔ ɛnee de azɛlɛ ne azo la bɔ la bie, na ɔvale ɔdaye ɔ ra nrenya ɔyelale ye ɔzɔle amonle. Ɛbɛla ɛtane zɛhae a manle Ɛdɛnkɛma dule menli zɔhane mɔ wɔ mekɛ mɔɔ Yizilayɛma ba azɛlɛ ne azo la.

⁴Ɔbɔle azu wɔ awozonle ɛzonlenlɛ ɛleka ne mɔ mɔɔ wɔ awoka zo, nee mbaka bo na ɔkpunle ɛyɛlɛ wɔ ɛkɛ.

⁵ Selea Belemgbunli Rilizen nee Yizilayɛ Belemgbunli Pikaa yɛle Gyɛlusalɛm anwo ɛlɔne na bɛratetale Ehaze, noko bɛangola ye.

⁶(Mekɛ ne anu Yidɔm belemgbunli ne rahonle liele Yilate. Bɛdule Dwudama mɔɔ wɔ zolɛ la na Yidɔmma dɛnlanle ɛkɛ. Ɛnɛ nee ɛnɛ bɛtɛte ɛkɛ.)

⁷Ehaze zoanle menli wɔ Aselea Belemgbunli Tegelate Paelisɛ ɛkɛ ne kɛ, “Mele wɔ sonvolɛ nee ɛ ra nrenya. Bɛla balie me fi Selea nee Yizilayɛ arelemgbunli ne mɔ mɔɔ zo konle doa me la asa anu.”

⁸Ehaze vale dwɛtɛ fufule nee ezukoa nvutuke mɔɔ wɔ Ɛzonlenlɛ Sua ne anu nee belemgbunli ne gya nu la yɛle ahyɛlɛdeɛ hɔmanle Aselea belemgbunli ne.

⁹Tegelate Paelisɛ diele Ehaze modolɛ ne na ɔvale ye ɛlɔnema ɔrale Dɛmasekɛse ɔrahonle ɔvale suakpole ne, ɔhunle Belemgbunli Rilizen na ɔhyele menli ne bie mɔ nuokɛ ɔ nee bɛ hɔle Kɛɛ.

¹⁰Belemgbunli Ehaze hɔle Dɛmasekɛse kɛ ɔkayia Belemgbunli Tegelate Paelisɛ la, ɔnwunle azukponle ne mɔɔ ɔwɔ ɛkɛ ne la na ɔmanle bɛyɛle bie kɛ yemɔ ala la bɛhɔmanle Sɛlɛvolɛ Yulaya.

¹¹Yemɔti Sɛlɛvolɛ Yulaya zile azukponle ne bie mɔɔ le kɛ ɛhendeɛ ne la pɛpɛ. Ɔzile ɔwiele na Ehaze vi Dɛmasekɛse azia ara.

¹²Ehaze ziale rale la ɔnwunle kɛ bɛwie azukponle ne si,

¹³yemɔti ɔyelale nane azubɔdeɛ nee ma azubɔdeɛ wɔ zolɛ na ɔguale nwanye azubɔdeɛ nee anzonudwolɛ azubɔdeɛ mogya wɔ zolɛ.

¹⁴ Kɔbele azukponle ne mɔɔ bɛdu bɛzie ɛkɛ bɛmaa Ɛdɛnkɛma la gyi azukponle fofolɛ ɛhye nee Ɛzonlenlɛ Sua ne avinli, na Ehaze manle bɛyele ye ɛkɛ bɛhɔziele azukponle fofolɛ ne sɔlɔ.

¹⁵Akee ɔzele Yulaya kɛ, “Fa me azukponle kpole ɛhye, yela nwonlomɔ ɛyelalɛ azubɔdeɛ nee nɔsolɛ ma azubɔdeɛ ne mɔ, yɛɛ belemgbunli nee menli ne ɛyelalɛ nee ma azubɔlɛ ninyɛne ne mɔ wɔ zolɛ. Wola nane mɔɔ bɛkɛva bɛkɛbɔ azu la mogya ne gua zo. Na gyakyi kɔbele azukponle ne maa me na meabiza wɔ zolɛ.”

¹⁶Na sɛlɛvolɛ Yulaya yɛle, kɛmɔ belemgbunli ne zele la.

¹⁷ Belemgbunli Ehaze dudule kɔbele ehwili ngyikyi ne mɔ mɔɔ bɛfa bɛyɛ gyima wɔ Ɛzonlenlɛ Sua ne anu la, na ɔyeyele ahyɛnze ne mɔ mɔɔ gyigyi nuhua la. Eza ɔmanle angola ne mɔɔ gyi kɔbele nlankɛ bulu nee nwiɔ zo la zo ɔziele ye bolɛ bama zo.

¹⁸Akee ɔmaa Aselea belemgbunli ne anye alie la, Ehaze eza dudule sɛlɛdwee ne mɔɔ bɛbo ye wɔ ɛleka mɔɔ belemgbunli ne tɛnla wɔ Ɛzonlenlɛ Sua ne anu la na ɔmanle bɛduale anuhɔlɛ ne mɔɔ belemgbunli ala a fa nu ba Ɛzonlenlɛ Sua ne anu la.

¹⁹Debie biala mɔɔ Belemgbunli Ehaze yɛle la bɛhɛlɛ bɛ wɔ Dwuda Arelemgbunli Tetedwɛkɛ Mbuluku ne mɔ anu.

²⁰ Ehaze hɔle ayile nu na bɛwulale ye mrɛlatɛlɛ nu wɔ Devidi Suakpole zo alehelɛ alaleɛ ne. Ɔ ra Hɛzikaya lile ebia ne.