Read Nzema 2 Arl 17 Bible Online

2 Arl 17 - Nzema bible

2 Arl 17

¹Belemgbunli Ehaze lile ɛvolɛ bulu nee nwiɔ wɔ Dwuda ebia ne azo la, yɛɛ Yila ara Hohyia bɔle ɔ bo kɛ ɔdi belemgbunli wɔ Yizilayɛ a. Ɔdɛnlanle Samɛlea na ɔlile ebia ne ɛvolɛ ngɔnla.

²Ɔyɛle ɛtane ɔtiale Ɛdɛnkɛma noko yeangɔ ɔ nyunlu dɔɔnwo kɛmɔ Yizilayɛ arelemgbunli mɔɔ lumua ɔ nyunlu la yɛle la.

³Aselea Belemgbunli Hyalemanizɛ vale konle doale ye. Hohyia manle ɔ sa zo na ɔduale adwule ɔmanle Hyalemanizɛ ɛvolɛ biala.

⁴Ɛvolɛ ko bie anu, Hohyia andua ye adwule ne ammaa Aselea belemgbunli ne. Ɔvale nrɛlaleɛ ɔmanle bɛhɔmanle Yigyibiti Belemgbunli Soo kɛ ɔraboa ye. Hyalemanizɛ dele la, ɔmanle bɛhyele Hohyia bɛdole efiade.

⁵Akee Hyalemanizɛ vale ɛlɔne rale Yizilayɛma anwo zo na ɔhɔtetale Samɛlea. Ye ɛvolɛ nsa ne azo,

⁶mɔɔ ɛnee Hohyia ɛli ɛvolɛ ngɔnla wɔ Yizilayɛ ebia ne azo la, Aselea belemgbunli ne honle vale Samɛlea na ɔhyele Yizilayɛma bie mɔ nuokɛ ɔhɔle Aselea maanle nu. Ɔmanle bie mɔ dɛnlanle Aselea suakpole ne mɔɔ bɛfɛlɛ ye Heela la azo nee Azule Heebɔ ne anloa wɔ Gozan maanzinli nu. Ɔvale bie mɔ noko ɔhɔguale Midea azuamgbole ne mɔ azo.

⁷Samɛlea bɔle, ɔboalekɛ Yizilayɛma yɛle ɛtane tiale Ɛdɛnkɛma bɛ Nyamenle ne mɔɔ liele bɛ vile Yigyibiti belemgbunli ne abo na ɔ nee bɛ vi Yigyibiti rale la. Bɛzonlenle awozonle,

⁸bɛzukoale bɛyɛle ninyɛne mɔɔ menli mɔɔ Ɛdɛnkɛma dule bɛ azɛlɛ ne azo la yɛ la bie. Ɛdɛnkɛma dule menli mɔɔ wɔ azɛlɛ ne azo la wɔ mekɛ mɔɔ Yizilayɛma ba la. Eza bɛlile amaamuo mɔɔ bɛ arelemgbunli ne mɔ hyehyɛle manle bɛ la angome azo.

⁹Yizilayɛma yɛle ninyɛne mɔɔ Ɛdɛnkɛma bɛ Nyamenle ne ɛngulo la. Bɛsisile awozonle azua wɔ azuamgbole, azua azua nee namunamu zo.

¹⁰ Bɛyɛle bɛ bozonle raalɛ Ahyela ne ananze na bɛvale awolɛ bɛsisile mpila bɛzieziele ananze ne mɔ zolɛ, wɔ awoka zo nee mbaka bo.

¹¹Bɛkpunle ɛyɛlɛ wɔ ɛleka ɛhye mɔ, na bɛyɛle ninyɛne mɔɔ menli mɔɔ Ɛdɛnkɛma dule bɛ la yɛle la bie. Bɛyɛle ninyɛndane bɛmanle Ɛdɛnkɛma vale ɛya,

¹²na bɛkpole Ɛdɛnkɛma mɛla ne mɔɔ se bɛmmasonle awozonle la.

¹³Ɛdɛnkɛma ɛmaa ye soanvolɛma nee kpɔmanvolɛma ɛrahakye Yizilayɛma nee Dwudama fane dɔɔnwo kɛ, “Bɛgyakyi ninyɛndane ɛyɛlɛ, na bɛli me edwɛkɛ nee me ngyehyɛlɛ ne mɔ mɔɔ wɔ Mɛla ne mɔɔ menvale memanle bɛ nlenya mɔ, na menluale me sonvolɛ kpɔmanvolɛma anwo zo menvale membɛlɛle bɛ la azo.”

¹⁴Noko bɛandie, yɛɛ bɛanli zolɛ. Bɛyɛle anzosesebɛ, kɛmɔ bɛ nlenya mɔ yɛle la; bɛanlie Ɛdɛnkɛma bɛ Nyamenle ne bɛanli.

¹⁵Bɛkpole ye mɛla ne mɔ, bɛanli ngyekyeleɛ ne mɔɔ ɔ nee bɛ nlenya mɔ kyekyele la azo yɛɛ bɛambu ye kɔkɔbɔlɛ ne mɔ bie. Bɛzonlenle mmonle mɔɔ nvasoɛ biala ɛnle zo la na bɛdabɛ mumua ne bɛyɛle mgbane. Bɛlile maanle maanle mɔɔ zuozua bɛ la amaamuo zo, na bɛyɛle anzosesebɛ wɔ Ɛdɛnkɛma Mɛla ne mɔɔ ɔvale ɔmanle bɛ kɛ bɛmmasukoa bɛyɛ mɔɔ menli zɔhane mɔ yɛ la bie la anwo.

¹⁶ Bɛbulule Ɛdɛnkɛma bɛ Nyamenle ne mɛla mɔɔ ɔvale ɔmanle bɛ la kɔsɔɔti azo, na bɛvale ninyɛne bɛholole bɛguale nlankɛ nyinli ananze nwiɔ bɛzonlenle bɛ. Eza bɛyɛle bɛ bozonle raalɛ Ahyela ne ananze, na bɛzonlenle anwomanyunlu ninyɛne nee bozonle Beeyale.

¹⁷ Bɛvale bɛ mra mrenya nee mraalɛ bɛmanle bɛyelale bɛ bɛbɔle azu bɛmanle awozonle, bɛbizale bɛ nwo wɔ menli mɔɔ tendɛ nwomenle nloa zo nee bɛdabɛ mɔɔ bɛtwe adunyi la ɛkɛ, na bɛvale bɛ mekɛ kɔsɔɔti bɛyɛle mɔɔ ɛnzɔ Ɛdɛnkɛma anye la, na bɛmanle Ɛdɛnkɛma vale ɛya.

¹⁸Ɛdɛnkɛma vale Yizilayɛma anwo ɛya kpole na ɔbɔle bɛ bo zo. Yeangyakyi bie kɛ Dwuda abusua ekpunli ne ala.

¹⁹Noko Dwudama bɔbɔ anli Ɛdɛnkɛma bɛ Nyamenle ne mɛla ne mɔ azo. Bɛzukoale bɛbule amaamuo ne mɔɔ Yizilayɛma hɔvale rale la bie.

²⁰Na Ɛdɛnkɛma kpole Yizilayɛ abo zo amra ne kɔsɔɔti, ɔyele bɛ ɔmanle bɛ kpɔvolɛma deanle bɛ atisesebɛ nu ɔhɔdwule kɛ akee bɛ bo zo bɔle bɔkɔɔ la.

²¹Mekɛ mɔɔ Ɛdɛnkɛma dele Dwudama vile Yizilayɛma anwo la, Yizilayɛma yɛle Nibate ara Gyɛlɔbowam bɛ belemgbunli. Gyɛlɔbowam manle bɛkpole Ɛdɛnkɛma na ɔmanle bɛyɛle ɛtane kpole kpalɛ.

²²Yizilayɛma lile Gyɛlɔbowam anzi na bɛhɔle zolɛ bɛyɛle ɛtane ne mɔ mɔɔ ɔyɛle la bie,

²³manle Ɛdɛnkɛma akee zɛkyele bɛ na ɔyele bɛ ɔvile ɔ nye zo, kɛmɔ ɔluale ye sonvolɛ kpɔmanvolɛma anwo zo ɔhakyele bɛ kɛ ɔbayɛ la. Yemɔti bɛhyele Yizilayɛma bie mɔ nuokɛ bɛ nee bɛ hɔle nlɔnu wɔ Aselea. Ɛkɛ ne yɛɛ bɛde kɛkala a.

²⁴Aselea belemgbunli ne vale menli vile azuamgbole Babelɔn, Kuutu, Yeva, Heemate, yɛɛ Sifaveeyem azo na ɔmanle bɛradɛnlanle Samɛlea azuamgbole ne mɔ azo. Menli mɔɔ vi azua ɛhye mɔ azo la radɛnlanle Samɛlea azuamgbole ne mɔ azo kpɔkpɔ.

²⁵Alumua ne mɔɔ bɛradɛnlanle maanle ne anu la bɛanzonle Ɛdɛnkɛma, yemɔti ɔmanle awenade rahyehyele bie mɔ.

²⁶Bɛmanle Aselea belemgbunli ne dele kɛ menli mɔɔ yeva bɛ yeragua azɛlɛ ne azo la ɛnze ɛkɛ ne nyamenle ne mɛla ne mɔ anloa kyi, yemɔti nyamenle ne ɛmaa awenade ɛlɛkyehye bɛ ahu bɛ.

²⁷Na belemgbunli ne zele kɛ, “Bɛmaa sɛlɛvolɛma ne mɔ mɔɔ yɛhyele bɛ yɛ nee bɛ rale la anu ko ɛhɔ ɛhɔdɛnla lɔ na ɔhilehile bɛ azɛlɛ ne azo nyamenle ne mɛla ne mɔ.”

²⁸Yemɔti Yizilayɛnli sɛlɛvolɛ ko bie mɔɔ bɛdule ye bɛvile Samɛlea la ziale hɔdɛnlanle Bɛtɛle na ɔhilehilele menli ne kɛ bɛsi bɛsonle Ɛdɛnkɛma la.

²⁹Noko menli mɔɔ hɔdɛnlanle Samɛlea la hɔle zolɛ yɛle bɛ mmonle na bɛvale bɛ bɛziele awozonle azua mɔɔ Yizilayɛma sisile la anu. Maanle ko biala yɛle ye amonle ɛdeɛ ne mɔɔ bɛsonle ye wɔ bɛ sua zo lɔ la.

³⁰Babelɔnoma yɛle bɛ bozonle Sɛko Bino ananze; Kuutuma yɛle bɛ bozonle Nɛgale ananze; Heematema yɛle bɛ bozonle Ahyaema ananze;

³¹Yevama yɛle bɛ bozonle Nebehaze nee Taatake ananze; yɛɛ Sifaveeyemma yelale bɛ mra bɔle azu manle bɛ awozonle Adelamɛlɛke nee Anamɛlɛke.

³²Menli ɛhye mɔ zonlenle Ɛdɛnkɛma noko bɛyele bɛ bie mɔ bɛyɛle bɛ ahɔmenle bɛmanle bɛhɔbɔle azu wɔ mmonle azua ne mɔ anu.

³³Yemɔti bɛzonlenle Ɛdɛnkɛma bɔbɔ ɛdeɛ, noko eza bɛzonlenle bɛ awozonle ne mɔ, kɛmɔ bɛ maanle ne mɔ mɔɔ bɛvi nuhua bɛrale la amaamuo ne mɔ de la.

³⁴ Kɛkala bɔbɔ bɛtɛbu bɛ amaamuo dɛba ne. Bɛnzonle Ɛdɛnkɛma yɛɛ bɛnli ye mɛla nee ye ngyehyɛlɛ ne mɔ mɔɔ ɔvale ɔmanle Gyekɔbo, mɔɔ nzinlii ɔdonle ye Yizilayɛ la, abo zo amra ne la azo.

³⁵ Ɛdɛnkɛma nee bɛ yɛle ngyekyeleɛ na ɔzele bɛ kɛ, “Bɛmmasonle awozonle biala, bɛmmabɔ bɛ ti aze bɛmaa bɛ, anzɛɛ bɛkoto bɛ, anzɛɛ bɛbɔ azu bɛmaa bɛ.

³⁶ Ɔwɔ kɛ bɛyɛ tieyɛ bɛmaa medame Ɛdɛnkɛma mɔɔ menvale tumi kpole menyele bɛ menvile Yigyibiti la. Bɛbɔ bɛ ti aze bɛmaa me na bɛbɔ azu bɛmaa me.

³⁷Ɔwɔ kɛ bɛdi me mɛla ne mɔ nee me edwɛkɛ mɔɔ mehɛlɛ memaa bɛ la azo. Bɛmmasonle awozonle biala,

³⁸yɛɛ bɛmmamaa bɛ rɛle fi ngyekyeleɛ mɔɔ me nee bɛ kyekyele la.

³⁹Ɔwɔ kɛ bɛyɛ tieyɛ bɛmaa medame, Ɛdɛnkɛma bɛ Nyamenle ne, na mebalie bɛ meavi bɛ kpɔvolɛma asa anu.”

⁴⁰Noko menli zɔhane mɔ andie na bɛhɔle zolɛ bɛyɛle mɔɔ tete ne ɛnee bɛ amaamuo kile la.

⁴¹Yemɔti menli zɔhane zonlenle mmonle, na ɛnɛ nee ɛnɛ ala bɛ bo zo amra tɛyɛ zɔhane debie ko ne ala.