Read Nzema 2 Arl 18 Bible Online

2 Arl 18 - Nzema bible

2 Arl 18

¹Belemgbunli Hohyia lile ɛvolɛ nsa wɔ Yizilayɛ ebia ne azo la yɛɛ bɛvale Ehaze ara Hɛzikaya bɛziele belemgbunli wɔ Dwuda a.

²Ɔlile ɛvolɛ abulanwiɔ nee nnu la yɛɛ ɔbɔle ɔ bo kɛ ɔdi belemgbunli a. Ɔdɛnlanle Gyɛlusalɛm a ɔlile ebia ne a, yɛɛ ɔlile ɛvolɛ abulanwiɔ nee ngɔnla wɔ ebia ne azo. Ɔ nli a le Zɛkalaya ara raalɛ Abaegya.

³Ɔvale ɔ nlenya Devidi agyakɛ na ɔzɔle Ɛdɛnkɛma anye.

⁴ Ɔzɛkyele awozonle ɛzonlenlɛ ɛleka ne mɔ, ɔbubule awolɛ mpila ne mɔ na ɔzɛkyele bozonle raalɛ Ahyela ne ananze ne mɔ. Eza ɔbubule kɔbele ɛwɔlɛ ne mɔɔ Mosisi yɛle mɔɔ bɛvɛlɛle ye Nehɛhyetan la, ɔluakɛ ɛnee menli kɔkpu ɛyɛlɛ wɔ ɛkɛ ne sonle ye.

⁵Hɛzikaya vale ɔ rɛle wulale Ɛdɛnkɛma, Yizilayɛ Nyamenle ne anu. Dwuda annyia belemgbunli bieko mɔɔ le kɛ ɔdaye la, yɛɛ bie anlumua ɔ nyunlu mɔɔ le kɛ ɔdaye la.

⁶Ɔlile nɔhalɛ ɔmanle Ɛdɛnkɛma, yeandu ye edwɛkɛ zo ɛlɛ. Ɔlile mɛla ne mɔ mɔɔ Ɛdɛnkɛma vale manle Mosisi la azo kpalɛ.

⁷Yemɔti ɛnee Ɛdɛnkɛma nee ye lua yɛɛ ɔkpazile wɔ debie biala mɔɔ ɔyɛle la anu. Ɔdele Aselea belemgbunli ne anwo atua na ɔkpole kɛ ɔkɛboa belemgbunli ne abo.

⁸Belemgbunli Hɛzikaya nee Filisitiama honle, ɔlile bɛ nwo zo konim na ɔzɛkyele bɛ azuamgbole nee ngyikyi kɔsɔɔti. Gaza nee ye namunamu ne mɔ boka azua mɔɔ ɔzɛkyele bɛ la anwo.

⁹Hɛzikaya lile ɛvolɛ nna wɔ Dwuda ebia ne azo, mɔɔ ɛnee Belemgbunli Hohyia ɔdaye yeli ɛvolɛ nsuu wɔ Yizilayɛ ebia ne azo la, Aselea Belemgbunli Hyalemanizɛ rale Yizilayɛma anwo zo, ɔtetale Samɛlea na bɛduale bɛ adenle.

¹⁰Ɔkanyia ɛvolɛ nsa la yɛɛ Samɛlea bɔle a. Ɛnee Hɛzikaya ɛli ɛvolɛ nsia wɔ ye ebia ne azo yɛɛ Hohyia ɛli ɛvolɛ ngɔnla.

¹¹Aselea belemgbunli ne hyele Yizilayɛma bie mɔ nuokɛ hɔle Aselea na ɔmanle bie mɔ hɔdɛnlanle Heela, bie mɔ dɛnlanle Azule Heebɔ ne anloa wɔ Gozan maanzinli nu, yɛɛ bie mɔ noko dɛnlanle Midea azuamgbole ne mɔ azo.

¹²Samɛlea bɔle, ɔluakɛ Yizilayɛma anyɛ tieyɛ ammaa Ɛdɛnkɛma bɛ Nyamenle ne. Bɛbulule ngyekyeleɛ ne mɔɔ ɔ nee bɛ yɛle la azo, na bɛdule bɛ gye wɔ Ɛdɛnkɛma mɛla ne mɔɔ ɔvale ɔmanle Mosisi la anwo. Bɛandie ye yɛɛ bɛanyɛ tieyɛ bɛammaa ye.

¹³Belemgbunli Hɛzikaya lile ɛvolɛ bulu nee nna wɔ ebia ne azo la, Aselea Belemgbunli Sɛnakɛlebe rale azuamgbole mɔɔ bɛlie nwolɛ bane mɔɔ wɔ Dwuda la amuala anwo zo, ɔ nee bɛ honle ɔlile bɛ kɔsɔɔti bɛ nwo zo konim.

¹⁴Hɛzikaya zoanle manle bɛvale nrɛlaleɛ bɛhɔmanle Sɛnakɛlebe mɔɔ ɛnee wɔ Leekehye la kɛ, “Meyɛ ɛtane, mekpa wɔ kyɛlɛ, mmaba ɛ nyunlu bieko na menwɔdua ezukoa biala mɔɔ ɛdie la.” Aselea belemgbunli ne buale kɛ Hɛzikaya ɛradua dwɛtɛ fufule kilo apenle bulu yɛɛ ezukoa nvutuke kilo apenle ko ɛmaa ye.

¹⁵Hɛzikaya kpokpole Ɛzonlenlɛ Sua ne anu nee suakunlu ɛkɛ ne gya nu dwɛtɛ fufule kɔsɔɔti,

¹⁶ɔwokewokele ezukoa nvutuke mɔɔ bɛholo bɛgua Ɛzonlenlɛ sua ne nlenkɛ ne mɔ anwo la nee mɔɔ ɔdaye mumua ne ɔmanle bɛholole bɛguale nlenkɛ felɛmo ne mɔ anwo la na bɛvale ɔ muala bɛhɔmanle Sɛnakɛlebe.

¹⁷Aselea belemgbunli ne akee vale ɛlɔne ekpunli kpole kpalɛ ko vi Leekehye kɛ bɛ nee Hɛzikaya kaho wɔ Gyɛlusalɛm. Safohyenle mgbanyinli nsa[2] a lile ɛlɔnema ne ati a. Bɛdwule Gyɛlusalɛm la, bɛhɔvale ɛleka mɔɔ menli mɔɔ nwo ndanlɛ la yɛ bɛ gyima la adenle ne. Adenle zɔhane zua kuma ne mɔɔ bɛvu na nzule dua nuhua vi sɔlɔ nzule ne anu ba la.

¹⁸Akee bɛzoanle kɛ bɛhɔvɛlɛ Hɛzikaya na Hɛzikaya mbɔlɔba nsa vindele kɛ bɛkayia bɛ. Bɛmɛ a le Belekaya ara Yilayakem mɔɔ nea suakunlu ɛkɛ ne la, Hyɛbena mɔɔ le kɔɔto kɛlɛhɛlɛvolɛ ne yɛɛ Esafe ara Dwowaa mɔɔ yemɔ a nea suakunlu ɛkɛ ne ngɛlata zo la.

¹⁹Na safohyenle mgbanyinli ne mɔ ko zele bɛ kɛ, Aselea belemgbunli ne kpondɛ kɛ ɔnwu deɛ holɛ ko mɔɔ si Hɛzikaya ahonle la.

²⁰Ɔbizale kɛ, “Ɛnee bɛdwenle kɛ bɛfa bɛ nloa a bɛko a? Saa bɛte Aselea belemgbunli anwo atua a nwane bɔbɔ yɛɛ kɛlie bɛ a?

²¹Bɛ nye la kɛ Yigyibiti baraboa bɛ, na yemɔ bɔbɔ, ɔle baka bie mɔɔ ɛngyɛ na yeabu la. Ɛkomo zolɛ a ɔbabu yeawɔ ɛ sa akunlu. Menli mɔɔ fa bɛ rɛle wula Yigyibiti belemgbunli ne anu la kɛ wie ye la ɛne.”

²²Aselea safohyenle ne eza zɔle zo kɛ, “Anzɛɛ bɛka bɛahile me kɛ bɛ rɛle wɔ Ɛdɛnkɛma bɛ Nyamenle ne anu ɔ? Tɛ Ɛdɛnkɛma azua ne yɛɛ ye azukponle ne mɔ a Hɛzikaya ɛmaa bɛbubu bɛ na yeze Dwudama amuala nee bɛdabɛ mɔɔ bɛwɔ Gyɛlusalɛm ɛke la kɛ azukponle ne mɔɔ wɔ Gyɛlusalɛm ɛke la azo ala a ɔwɔ kɛ bɛbɔ azu na bɛsonle la ɔ?

²³Megyinla Aselea belemgbunli ne agyakɛ anu me nee bɛ ayɛ ngyehyɛlɛ. Saa bɛkɛnyia nwolɛ menli dodo ne a anrɛɛ memaa bɛ mgbɔnwɔ apenle nwiɔ kɛkala.

²⁴Bɛdabɛ mumua ne, bɛndwu Aselea safohyenlema anu kakula kpalɛ bɔbɔ ɛleka bie, noko bɛ nye la kɛ Yigyibitima kɛva konle ehwili nee menli mɔɔ ka mgbɔnwɔ la kɛrɛlɛ bɛ.

²⁵Anzɛɛ bɛdwenle kɛ medame me ti anwo yɛɛ meli mera mebadoa bɛ me nee bɛ aho, wɔ bɛdabɛ bɛ maanle ye anu a, na Ɛdɛnkɛma ɛnze nu? Ɛdɛnkɛma ɔdaye mumua ne a zele me kɛ menva konle mendoa bɛ na menzɛkye maanle ne a.”

²⁶Na Yilayakem, Hyɛbena, yɛɛ Dwowaa hanle hilele safohyenle ne kɛ, “Yɛmenle, yɛsɛlɛ wɔ ka Arelameeyeke kile yɛ na yɛte. Mmaka Hibulu ɛmaa menli mɔɔ gua bane ye ati zo ɛke la te mɔɔ ɛlɛka la.”

²⁷Safohyenle ne zele bɛ kɛ, “Bɛdwenle kɛ bɛ ngome nee bɛ belemgbunli ne ati yɛɛ me menle zoanle me kɛ memanga edwɛkɛ ɛhye mɔ mengile bɛ a, na menli mɔɔ gua bane ne ati la ɛmboka nwolɛ? Metendɛ meahile menli mɔɔ gua bane ne ati la bɛdabɛ noko, ɔluakɛ bɛ muala bɛbali bɛ ebinli, bɛanlo bɛ miene.”

²⁸Akee safohyenle ne dwazole gyinlanle na ɔvale Hibulu aneɛ ɔhanle ye kpole kpalɛ kɛ, “Bɛdie mɔɔ Aselea belemgbunli ne ɛlɛka ahile bɛ la.

²⁹Ɔlɛkakye bɛ kɛ bɛmmamaa Hɛzikaya bɛlɛbɛla bɛ. Hɛzikaya ɛnrɛhola ɛnrɛlie bɛ,

³⁰yɛɛ bɛmmamaa ɔdi bɛ adwenle kɛ bɛva bɛ rɛle bɛwula Ɛdɛnkɛma anu. Bɛmmadwenle kɛ Ɛdɛnkɛma kɛlie bɛ, anzɛɛ ɔkɛzi Aselea ɛlɔnema aze kɛ bɛmmako bɛfa bɛ.

³¹Bɛmmatie Hɛzikaya. Aselea belemgbunli ne se bɛvi suakpole ne azo bɛvinde bɛrabɔ bɛ ti aze bɛmaa ye. Bɛyɛ ye zɔhane a ɔbamaa bɛ adenle yeamaa awie biala ɔdaye yeali ye vanye mbaka zo ma, nee ye feege mbaka ma, na bɛanlo bɛdabɛ bɛ bula nu nzule,

³²kɔdwu mekɛ mɔɔ Aselea belemgbunli ne kɛnyia nwolɛ ɔkɛva bɛ ɔkɛhɔgua maanle mɔɔ ye azɛlɛ ne le kɛ bɛ ɛdeɛ ye la anu la. Ɛkɛ ne, vanye ɛya avule mɔɔ bamaa bɛ nwanye bɛanlo nee abɛlɛ mɔɔ bɛbava bɛayɛ kpanwo la anwo ɛngyia. Ɔlivi mbaka wɔ ɛkɛ, yɛɛ ɔlivi nwole nee wolɛ ɛbu. Saa bɛyɛ mɔɔ ɔlɛka yeahile bɛ la a bɛlɛ bɛ ti, bɛnrɛwu. Bɛmmamaa Hɛzikaya yɛ bɛ koasea ɔmaa bɛdwenle kɛ Ɛdɛnkɛma kɛlie bɛ.

³³Maanle maanle dɔɔnwo awozonle angola anlie bɛ anvi Aselea belemgbunli ne asa anu.

³⁴Menli zɔhane wɔ nienwu kɛkala, Heemate awozonle anzɛɛ Aapade? Sifaveeyem, Hina, yɛɛ Ayeva awozonle hale nienwu? Asoo bɛ bie holale liele Samɛlea?

³⁵Kenlenzu a awozonle mɔɔ wɔ maanle maanle ɛhye mɔ anu la bie holale liele bɛ maanle vile yɛ Maanle Maanle Kpanyinli ne asa anu a? Na ɛnee akee duzu yɛɛ maa bɛdwenle kɛ Ɛdɛnkɛma kɛhola kɛlie Gyɛlusalɛm a?”

³⁶Menli ne mɔ yɛle ngungoonwu, kɛmɔ Belemgbunli Hɛzikaya zele bɛ la. Bɛambuke bɛ nloa.

³⁷Na Yilaya, Hyɛbena, yɛɛ Dwowaa vale nyane suosuanle bɛ adɛladeɛ ne mɔ anu na bɛhɔhanle mɔɔ Aselea Safohyenle ne hanle la bɛhilele belemgbunli ne.