Read Nzema 2 Arl 22 Bible Online

2 Arl 22 - Nzema bible

2 Arl 22

¹Dwosaya lile ɛvolɛ mɔtwɛ ala la yɛɛ bɛvale ye bɛziele Dwudama belemgbunli a. Ɔlile ebia ne ɛvolɛ abulasa nee ko wɔ Gyɛlusalɛm. Ɔ nli a le Adaya mɔɔ vi Bɔzokate la ara raalɛ Gyɛdaeda.

²Dwosaya yɛle mɔɔ sɔ Ɛdɛnkɛma anye la. Ɔvale ɔ nlenya Devidi agyakɛ na ɔlile Nyamenle Mɛla ne mɔ azo kpalɛ kpalɛ.

³Belemgbunli Dwosaya lile ɛvolɛ bulu nee mɔtwɛ wɔ ebia ne azo la ɔzoanle ye Kɔɔto kɛlɛhɛlɛvolɛ ne, Azalaya ara Hyeefan, mɔɔ ɔ nlenya a le Mɛhyɛlam la wɔ Ɛzonlenlɛ Sua ne anu kɛ,

⁴“Kɔ Sɛlɛvolɛ Kpanyinli Helekaya ɛkɛ kɔbiza ezukoa dodo mɔɔ sɛlɛvolɛma mɔɔ wɔ anlenkɛ ne anloa la ɛnyia ye ɛvi menli ne mɔ lɔ la.

⁵Na ka kile ye kɛ ɔva ezukoa ne ɔmaa menli mɔɔ nea Ɛzonlenlɛ Sua ne boɛyɛlɛ zo la, na bɛva bɛdua

⁶kapentama, menli mɔɔ si sua la, menli mɔɔ gua belekese la, nee menli mɔɔ kpuke awolɛ la, bɛva bie bɛdɔ mgbunla nee awolɛ mɔɔ bɛfa bɛayɛ sua ne boɛ la.

⁷Menli mɔɔ nea gyima ne azo la di nɔhalɛ bɔkɔɔ, yemɔti ɔngyia kɛ bɛkɛze bɛ kɛ bɛrayɛ mgbonda.”

⁸Hyeefan vale belemgbunli ne nrɛlaleɛ ne hɔle na Helekaya hanle hilele Hyeefan kɛ, yenwu Mɛla Buluku ne wɔ Ɛzonlenlɛ Sua ne anu. Helekaya vale buluku ne manle Hyeefan gengale.

⁹Akee Hyeefan ziale hɔle belemgbunli ɛkɛ ne na ɔhanle kɛ, “Wɔ sonvolɛma ne ɛva Ɛzonlenlɛ Sua ne anu ezukoa ne ɛmaa menli mɔɔ nea sua ne boɛyɛlɛ zo la.

¹⁰Na melɛ buluku bie mɔɔ Helekaya ɛva ɛmaa me la wɔ ɛke.” Na ɔgengale ɔhilele belemgbunli ne.

¹¹Belemgbunli ne dele edwɛkɛ mɔɔ wɔ buluku ne anu la, ɔ rɛle bɔle na ɔsuosuanle ye tɛladeɛ ne mɔɔ ɔwula la anu,

¹²na ɔmanle bɛvɛlɛle sɛlɛvolɛ Helekaya, Hyeefan ara Ahaekam, Maekaya ara Akebɔ, Hyeefan ɔdaye mumua ne, yɛɛ belemgbunli sinzavolɛ Asaya, na ɔzele bɛ kɛ,

¹³“Bɛbɔ me ti nee Dwudama amuala ati bɛhɔbiza Ɛdɛnkɛma buluku ɛhye anu ngilehilelɛ ne anu. Ɛdɛnkɛma ɛva yɛ nwo ɛya, ɔboalekɛ yɛ nlenya mɔ anli mɔɔ buluku ɛhye ka la azo.”

¹⁴Yemɔti sɛlɛvolɛ Helekaya, Ahaekam, Akebɔ, Hyeefan, yɛɛ Asaya hɔle Nyamenle kpɔmanvolɛ raalɛ bie mɔɔ bɛfɛlɛ ye Hɛleda, mɔɔ de Gyɛlusalɛm sua fofolɛ zo la anwo ɛkɛ bɛhɔbizale. (Raalɛ ne ɔ hu a le Tekeva ara Hyalɛm, mɔɔ ɔ nlenya a le Haahase la. Hyalɛm a nea Ɛzonlenlɛ Sua ne anu adɛladeɛ ne mɔ azo a.) Bɛhilehilele mɔɔ ɛzi la anu bɛhilele raalɛ ne,

¹⁵na raalɛ ne zele bɛ kɛ, bɛzia bɛhɔ belemgbunli ne ɛkɛ na bɛhɔze ye kɛ,

¹⁶Ɛdɛnkɛma se, “Mebadea Gyɛlusalɛm nee menli mɔɔ wɔ zolɛ la amuala, kɛmɔ bɛhɛlɛ ye wɔ buluku ne mɔɔ belemgbunli ɛgenga la anu la.

¹⁷Bɛkpo me na bɛbɔ azu bɛmaa awozonle. Bɛva bɛ nyɛleɛ bɛha me ɛya kpole kpalɛ. Ɛya mɔɔ meva ye wɔ Gyɛlusalɛm anwo la, ɛnrɛwie ɛlɛ.

¹⁸Dwuda belemgbunli ne mɔɔ zoanle wɔ kɛ ɛrazɛlɛ me ɛmaa ye la, ka kile ye kɛ: Kɛ medame, Yizilayɛ Ɛdɛnkɛma Nyamenle mese la ɛne: Ɛdele edwɛkɛ ne mɔɔ bɛhɛlɛ ye wɔ buluku ne anu

¹⁹na ɛdele kɛ mezi medendɛ metia ɛke, kɛ mebamaa yeadɔ mgbane na bɛazɛkye menli ne amuala la ati ɛvunle ɛ nwo na ɛbɛlɛle ɛ nwo aze wɔ me nyunlu, ɛsuosuanle wɔ tɛladeɛ mɔɔ ɛwula la anu, na ɛzunle. Medame noko mede wɔ nzɛlɛlɛ ne.

²⁰Yemɔti, nea, ɛnrɛnwu, ndeanlɛ ne mɔɔ mebadea Gyɛlusalɛm la ɛnrɛra zolɛ toonwo ɛkɛwu. Mebamaa wɔawu anzonudwolɛ nu, wɔahɔla ɛ ze mɔ akunlu.” Menli ne mɔ ziale rale Belemgbunli Dwosaya ɛkɛ na bɛrahanle ye nrɛlaleɛ ne bɛhilele ye.