Read Nzema 2 Arl 25 Bible Online

2 Arl 25 - Nzema bible

2 Arl 25

¹ Zɛdikaya dele Babelonia Belemgbunli Nɛbukadenɛza anwo atua. Yemɔti Nɛbukadenɛza vale ye ɛlɔnema rabɛnrale yiale Gyɛlusalɛm kɛ bɛ nee menli mɔɔ wɔ ɛkɛ ne la baho. Ɛhye zile mekɛ mɔɔ ɛnee Zɛdikaya ɛli ɛvolɛ ngɔnla siane bulu, kenle bulu wɔ ebia ne azo la. Nɛbukadenɛza ɛlɔnema ne yɛle bɛ azokoɛleɛ wɔ suakpole ne kandiba, bɛpɛle ahuma na bɛhyele ɛhane bɛlale nu.

²Bɛyɛle ɛhye toonwo Zɛdikaya lile ɛvolɛ bulu nee ko wɔ ebia ne azo.

³Ɛvolɛ zɔhane siane nna ne anu kenle ngɔnla ne azo, mɔɔ akee ɛhɔne ɛmaa Gyɛlusalɛm amra ɛwie debie yɛ, na bɛnlɛ ɛhwee bɛnli la

⁴ yɛɛ Babeloniama bule suakpole ne bane ne hɔle sua ne azo a. Ɛnee Babelonia ɛlɔnema ɛbɛnra ɛyia suakpole ne ɛdeɛ, noko Dwuda ɛlɔnema ne amuala holale nriandile hɔle nɔe ne. Bɛvale arelemgbunli tola ne anu bɛhɔvale anuhɔlɛ kpole ne mɔɔ wɔ suakpole ne bane nwiɔ ne ayia zo la, bɛvale Dwɔdan Bɔnza ne adenle zo bɛnriandile.

⁵Noko Babelonia ɛlɔnema ne voanle Belemgbunli Zɛdikaya hɔhyele ye wɔ fienemgbole bie mɔɔ bikye Gyɛleko la anu, na ye ɛlɔnema ne bɔle asande.

⁶Bɛvale Zɛdikaya bɛhɔmanle Belemgbunli Nɛbukadenɛza; ɛnee ɔwɔ suakpole bie mɔɔ bɛfɛlɛ ye Relebela la azo, na ɛkɛ ne yɛɛ ɔbuale Zɛdikaya fɔlɛ a.

⁷ Bɛmanle Zɛdikaya gyinlanle nleanle ɔ mra mrenya ne mɔ ɛhunlɛ nu, na akee Nɛbukadenɛza manle bɛzinle ɔ nye, bɛguale ye nwɔnzɔnwɔnzɔ na bɛ nee ye hɔle Babelɔn.

⁸Mɔɔ Belemgbunli Nɛbukadenɛza lile ɛvolɛ bulu nee ngɔnla siane nnu, kenle nsuu wɔ Babelɔn ebia ne azo la, ye Safohyenlema Kpanyinli ne, Nɛbuzaladan, mɔɔ yemɔ a tu belemgbunli ne folɛ la ravole Gyɛlusalɛm.

⁹Ɔyelale Ɛzonlenlɛ Sua ne, belemgbunli suakunlu nee menli mɔɔ anwo hyia Gyɛlusalɛm la azua ne mɔ kɔsɔɔti.

¹⁰Akee ye ɛlɔnema bubule Gyɛlusalɛm bane ne mɔ guale aze.

¹¹Na Nɛbuzaladan vale menli mɔɔ hale suakpole ne azo mɔɔ ze gyima, nee bɛdabɛ mɔɔ bɛva bɛ nwo bɛmaa Babeloniama la amuala hɔle Babelonia.

¹²Ɔgyakyile Dwudama mɔɔ yɛ anwunvɔne, na bɛnlɛ ɛhwee la ɛkɛ kɛ bɛyɛ gyima wɔ vanye egyinli ne mɔ anu.

¹³ Babeloniama akee bubule kɔbele mpila ne mɔ, nee kɔbele ehwili ne mɔ mɔɔ wɔ Ɛzonlenlɛ Sua ne anu la, nee kɔbele angola kpole ne, na bɛvale bɛ muala bɛhɔle Babelɔn.

¹⁴ Eza bɛsesale sofi ne mɔ, ahyɛnze ne mɔ mɔɔ bɛgua azukponle ne azo nzonle ne wɔ nu, ninyɛne ne mɔ mɔɔ bɛfa bɛka ahɛnlaneɛ ne mɔ anu bɛnua anzɛɛ bɛsɔ la, dwora ne mɔ mɔɔ bɛfa bɛsɔ azubɔlɛ mogya ne, dwora ne mɔ mɔɔ bɛfa bɛyela ɛyɛlɛ, nee kɔbele debie biala mɔɔ bɛfa bɛyɛ gyima wɔ Ɛzonlenlɛ Sua ne anu la bɛhɔle.

¹⁵Debie biala mɔɔ bɛvale ezukoa nvutuke, anzɛɛ dwɛtɛ fufule a bɛyɛle, dwora nee ahyɛnze mralɛ anu kuloonwu, nee ahyɛnze ne mɔ mɔɔ bɛfa bɛfa senle la, bɛvale bɛ muala bɛhɔle.

¹⁶Kɔbele adile ne mɔ mɔɔ Belemgbunli Sɔlɔmɔn manle bɛyɛle bɛduoduale kɔbele mpila ne mɔ azo, ehwili ne mɔ, nee angola kpole ne, bɛyɛ ɛnlomboɛ somaa mɔɔ bɛsuzu a ɔnyɛ boɛ a.

¹⁷Mpila nwiɔ ne zɔho bɛ nwo, ko biala anwumahɔlɛ le mita mɔtwɛ, yɛɛ ye kɔbele tile ne anwumahɔlɛ le mita ko nee ekyi. Wɔ adile ne mɔ azo bɛyɛ debie bie mɔɔ bɛnwo ye kɛ avonle la zolɛ, na bɛyɛ debie mɔɔ le kɛ akutue la bɛgua zolɛ. Bɛvale kɔbele a bɛyɛle bɛ muala a.

¹⁸Babelonia Safohyenlema Kpanyinli ne, Nɛbuzaladan eza hyele Sɛlɛvolɛ Kpanyinli Sɛlaya, ye boavolɛ Zɛfanaya, nee Ɛzonlenlɛ Sua ne anu sonvolɛma nsa ne mɔɔ anwo hyia la.

¹⁹Wɔ suakpole ne azo noko, ɔhyele Safohyenle Kpanyinli ne mɔɔ nea ɛlɔnema ne anwo zo la, menli nnu bie mɔɔ boka bɛdabɛ mɔɔ bɛtu belemgbunli folɛ na bɛtɛbɔ sua ne azo la, safohyenle kpanyinli boavolɛ ne mɔɔ nea ɛlɔnema ninyɛne zo, yɛɛ menli abulasia bie mɔɔ anwo hyia la.

²⁰Nɛbuzaladan vale bɛ hɔmanle Babelonia belemgbunli ne wɔ Relebela,

²¹mɔɔ wɔ Heemate maanzinli nu la. Babelonia belemgbunli ne manle bɛbobɔle bɛ na bɛhunle bɛ. Yemɔti bɛhyele menli mɔɔ wɔ Dwuda la nuokɛ bɛ nee bɛ hɔle nlɔnu.

²²Belemgbunli Nɛbukadenɛza vale Ahaekam ara Gɛdalaya, mɔɔ ɔ nlenya a le Hyeefan la yɛle Dwuda amɛnlado, kɛ ɔnlea bɛdabɛ mɔɔ bɛ nee bɛ angɔ Babelonia la anwo zo.

²³Mɔɔ Dwuda ɛlɔnema nee bɛ safohyenlema mɔɔ anva bɛ nwo ammaa Babeloniama la dele la bɛvale bɛ nwo bɛhɔbɔle Gɛdalaya wɔ Mezepa. Safohyenlema ne mɔ a le Nɛtanaya ara Yehyemeeyɛle, Kalia ara Dwoheenan yɛɛ Tanehumɛte ara Sɛlaya mɔɔ vi Nɛtofa, yɛɛ Gyɛzanaya mɔɔ vi Meeyaka la.

²⁴Gɛdalaya zele ɛlɔnema ne kɛ, “Mebɔ bɛ ɛwɔkɛ kɛ ɔngyia biala kɛ bɛkɛzulo Babelonia belemgbunli ne. Bɛdɛnla ɛke bɛbɔ bɛ ɛbɛla na bɛzonle Babelonia belemgbunli ne na bɛ nzo nu kɛdwo bɛ.”

²⁵Noko wɔ ɛvolɛ zɔhane anu, siane nsuu ne anu, Nɛtanaya ara Yehyemeeyɛle mɔɔ ɔ nlenya a le Yilaehya, na ɔbɔ Dwuda belemgbunli ne abusua ne bie la vale menli bulu lile ɔ nzi hɔle Gɛdalaya anwo zo hɔhunle ye wɔ Mezepa. Eza ɔhunle Yizilayɛma nee Babeloniama mɔɔ nee Gɛdalaya wɔ ɛkɛ ne la.

²⁶Akee Yizilayɛma kɔsɔɔti, sukoavolɛma nee ehyianvolɛma, nee bɛ safohyenlema ne amuala nriandile hɔle Yigyibiti, ɔboalekɛ ɛnee bɛsulo Babeloniama.

²⁷Bɛhyele Dwuda Belemgbunli Gyɛhɔyakɛn nuokɛ bɛ nee ye hɔle nlɔnu la ye ɛvolɛ abulasa nee nsuu, siane bulu nee nwiɔ ne anu kenle abulanwiɔ nee nsuu ne azo yɛɛ Babelonia Belemgbunli Yivelemɛlodake nwunle Gyɛhɔyakɛn anwunvɔne na ɔmanle bɛyele ye bɛvile efiade a. Ɛvolɛ ne anu ala a bɛvale Yivelemɛlodake bɛziele Babelonia belemgbunli a.

²⁸Ɔdendɛle kɛnlɛma ɔhilele Gyɛhɔyakɛn na ɔmanle ye gyinlabelɛ mɔɔ enililɛ wɔ nwo la ɔdɛlale arelemgbunli mɔɔ bɛhyele bɛ nuokɛ bɛhɔle nlɔnu wɔ Babelonia la.

²⁹Yemɔti bɛmanle Gyɛhɔyakɛn yele ye efiadedolɛ adɛladeɛ ne mɔ na ɔ nee Babelonia belemgbunli ne dɛnlanle ɛkponle ko anwo lile debie wɔ mekɛ mɔɔ ɛnee ɔde ngoane nu la.

³⁰Alehyenlɛ biala mɔɔ ɔkɛkpusu ɔ ti na ɔdua zolɛ la, bɛmanle ye ninyɛne mɔɔ ɔkɛhyia nwolɛ la anwo ezukoa.