Read Nzema 2 Arl 3 Bible Online

2 Arl 3 - Nzema bible

2 Arl 3

¹Mɔɔ Gyɛhɔhyafate nyianle ɛvolɛ bulu nee mɔtwɛ wɔ Dwuda ebia ne azo la, yɛɛ bɛvale Ehabe ara Dwɔlam bɛziele Yizilayɛ belemgbunli wɔ Samɛlea a. Dwɔlam lile ebia ne ɛvolɛ bulu nee nwiɔ.

²Yeambɔ ɛbɛla ne mɔɔ ɔ ze nee ɔ nli bɔle la bie ɛdeɛ, noko ɔyɛle ɛtane ɔtiale Ɛdɛnkɛma. Ɔbubule ɔ ze sua ne mɔɔ ɔzile ɔmanle bozonle Beeyale la;

³noko ɔyɛle ɛtane ne mɔɔ Belemgbunli Gyɛlɔbowam mɔɔ ɔ ze a le Nibate la yɛle a ɔmanle Yizilayɛma kɔsɔɔti yɛle ɛtane la bie. Yeandwe ɔ nwo yeanvi nwolɛ.

⁴Mowabe Belemgbunli Mihya gyima mɔɔ yɛ la a le mboane ɛzielɛ. Ɛvolɛ biala ɔwɔ kɛ ɔfa mboane mralɛ apenle ngoko ɛya ko, yɛɛ mboane nyinli apenle ngoko ɛya ko anwo enrinli ɔkɔmaa Yizilayɛ belemgbunli ne.

⁵Na mɔɔ Belemgbunli Ehabe wule la, Mowabe belemgbunli ne dele atua wɔ Yizilayɛ belemgbunli ne anwo zo.

⁶Yemɔti Belemgbunli Dwɔlam vale ɛlɔnema vile Samɛlea na ɔboɔboale Yizilayɛma amuala anloa.

⁷Akee ɔvale nrɛlaleɛ ɔmanle bɛhɔmanle Dwuda Belemgbunli Gyɛhɔhyafate kɛ, “Mowabe belemgbunli ne ɛde atua; yemɔti baboa me maa me nee ye ɛhɔho.” Belemgbunli Gyɛhɔhyafate buale kɛ, “Menwɔhɔ. Mewɔ ɛke memaa wɔ yɛɛ me menli nee me mgbɔnwɔ muala le wɔ ɛdeɛ.

⁸Nienwu a yɛpe yeahɔ a?” Dwɔlam buale kɛ, “Yɛpe Yidɔm fienemgbole ne anu.”

⁹Yemɔti Belemgbunli Dwɔlam nee Dwuda nee Yidɔm arelemgbunli zile nu hɔle. Bɛdiale bɛbɔle mgbɔlɔka dedee kenle nsuu la ɛnee akee bɛnnyia nzule. Nzule mɔɔ wɔ bɛ bɔlɛ nu la ɛwie bɔkɔɔ, menli bɔbɔ ɛnnyia bie ɛnno na yeayɛ bɛ nyɛmoa mɔɔ zo bɛ ninyɛne la.

¹⁰Na Yizilayɛ belemgbunli ne zele kɛ, “Aa! amgba Ɛdɛnkɛma ɛvɛlɛ yɛdayɛ arelemgbunli nsa ye wɔ ɛke kɛ ɔbaye yɛ yeamaa Mowabema ahu yɛ! ”

¹¹Gyɛhɔhyafate bizale kɛ, “Na Ɛdɛnkɛma kpɔmanvolɛ biala ɛnle ɛke ɛleka bie mɔɔ yɛkola yɛdua ɔ nwo zo yɛbiza Ɛdɛnkɛma ɔ?” Yizilayɛ belemgbunli ne sonvolɛma ne mɔ ko buale kɛ, “Hyeefate ara Yilaehya wɔ ɛke. Yemɔ yɛɛ anrɛɛ boa Yilaegya wɔ ye gyima ne ɛyɛlɛ nu a.”

¹²Gyɛhɔhyafate zele kɛ, “Ɔle Ɛdɛnkɛma kpɔmanvolɛ bɔkɔɔ”. Yemɔti Dwuda, Yizilayɛ nee Yidɔm arelemgbunli nsa ne hɔle ɔ nwo ɛkɛ.

¹³Yilaehya bizale Yizilayɛ belemgbunli ne kɛ, “Duzu yɛɛ ɛkpondɛ wɔ me ɛkɛ ne a? Toa ɛ ze nee ɛ nli Nyamenle kpɔmanvolɛma ne mɔ kɔbiza bɛ.” Dwɔlam buale kɛ, “Kyɛkyɛ, Ɛdɛnkɛma yɛɛ ɛye yɛdayɛ arelemgbunli nsa ye ɛmaa Mowabema kɛ bɛhu yɛ a.”

¹⁴Yilaehya zele ye kɛ, “Meka Tumivolɛ Ɛdɛnkɛma mɔɔ mesonle ye la kɛ, saa tɛ Dwuda Belemgbunli Gyɛhɔhyafate nidi ti a anrɛɛ menrɛbikye wɔ bɔbɔ na meanlea ɛ nyunlu.

¹⁵Bɛvɛlɛ awie mɔɔ bɔ getaa la bɛmaa me.” Mɔɔ ahenle ne bɔle ɔ bo kɛ ɔbɔ getaa ne ala la yɛɛ Ɛdɛnkɛma Sunsum ne dwule Yilaehya anwo zo a,

¹⁶na ɔzele kɛ, “Kɛ Ɛdɛnkɛma se la ɛne: Mebamaa azudenle ye mɔɔ ɛsesa la ayi.

¹⁷Ɛdɛnkɛma se bɛnrɛde kɛ anwoma ɛlɛtu anzɛɛ ezule ɛlɛtɔ noko azule ne mɔ bayiyi, amaa bɛanyia bie bɛanlo na bɛ nlankɛ nee bɛ nyɛmoa anyia bie anlo.

¹⁸Ɛhye le debie ekyi wɔ Ɛdɛnkɛma anye zo. Eza ɔbaye Mowabema yeamaa bɛ

¹⁹na bɛbali bɛ nwo zo konim bɛava bɛ azuamgbole mɔɔ bɛbɔ bɛ nwo bane nee sua biala mɔɔ hyia la. Bɛbabu baka kpalɛ biala bɛado aze, bɛasisi bɛ azudenle kɔsɔɔti na bɛava awolɛ bɛazɛkye bɛ azɛlɛ kpalɛ biala mɔɔ bɛlɛ la.”

²⁰Aleɛ hyenle nwonlomɔ, kɛyɛ mekɛ mɔɔ bɛfa bɛyɛ nzɛlɛlɛ la, nzule vi Yidɔm afoa nu rabule azɛlɛ nwo kɔsɔɔti faanwo.

²¹Mɔɔ Mowabema dele kɛ arelemgbunli nsa ne ɛra nee bɛ baho la, bɛvɛlɛle awie biala mɔɔ kola konle tɛladeɛ wula la, ngakula nee mgbanyinli kɔsɔɔti na bɛzieziele bɛ kɛ bɛhɔ konle ne anloa.

²²Mɔɔ bɛdwazole nwonlomɔ ne, na sɛnzɛne ne kpɔgyale ɔ nwo zo ekyii la, bɛnwunle kɛ nzule ne mɔɔ nee bɛ nye bɔ zo la anye ɛyɛ kɔkɔlɛ kɛ mogya.

²³Na bɛhanle kɛ, “Nea mogya ngome. Yɛ kpɔvolɛ ɛlɔnema nsa ne ɛpɛ bɛ nwo ɛho ɛhuhu bɛ nwo. Mowabema e, bɛmaa yɛhɔve bɛ ninyɛne ne mɔ.”

²⁴Noko mɔɔ bɛhɔdwule Yizilayɛma azokoɛleɛ ne la, Yizilayɛma dwazole Mowabema ne anwo zo bɛhanle bɛ senle bɛmanle bɛguale ndwɛlɛ aze. Yizilayɛma belele zile bɛ zo na bɛhuhunle dɔɔnwo wɔ adenle nu.

²⁵Yizilayɛma hɔvole Mowabema azuamgbole ne mɔ azo bɛbɔle bɛ na bɛzɛkyele bɛ azɛlɛ kpalɛ biala mɔɔ bɛlɛ la. Bɛsesale awolɛ bɛguale azɛlɛ mɔɔ kye aleɛ la azo bɛzɛkyele bɛ, bɛsisile azudenle mɔɔ bɛlɛ la na bɛbubule mbaka kpalɛ ne mɔ kɔsɔɔti bɛmanle ɔhale awolɛ ne mɔɔ wɔ Kɛɛ Hɛlɛse la ala. Menli mɔɔ to totoabɔ la ratetale suakpole ne na bɛhonle bɛvale ɔdaye noko.

²⁶Mɔɔ Mowabe belemgbunli ne nwunle kɛ akee konle ne ɛtele bɛ sa zo la, ɔvale menli ɛya nsuu mɔɔ ze dadeɛ nu ko kpalɛ kpalɛ la kɛ ɔfa bɛ yealua Yidɔmma avinli yeahɔ; bɛyɛle biala, noko bɛangola.

²⁷Yemɔti ɔvale ɔ ra nrenya kpanyinli ne mɔɔ di ye agya la, ɔmanle bɛyelale ye bɛbɔle azu wɔ azukponle ne bane ne anwo. Ɛhye manle Yizilayɛma ahonle dule; munzule kpole zile Yizilayɛma anwo zo; ɔlua zo bɛhwenle bɛ nzi na bɛziale bɛhɔle bɛ maanle nu.