Read Nzema 2 Arl 4 Bible Online

2 Arl 4 - Nzema bible

2 Arl 4

¹Nyamenle kpɔmanvolɛma asa azo ne mɔ anu sonla ko mɔɔ ɛwu la aye hɔzele Yilaehya kɛ, “Me hu ɛwu. Kɛmɔ ɛdawɔ ɛze la, ɛnee ɔsulo Nyamenle kpole kpalɛ, noko kɛkala, awie mɔɔ yɛtua ye kakɛ la ɛra kɛ ɔbava me mra mrenya nwiɔ ne yeahɔzie nu awoba.”

²Yilaehya bizale ye kɛ, “Duzu a ɛkpondɛ kɛ meyɛ memaa wɔ a? Duzu a ɛlɛ ye wɔ sua nu a? Ka mɔɔ ɛlɛ ye la kile me.” Kunlanvolɛ raalɛ ne zele ye kɛ, “Menlɛ ɛhwee. Yeha me nwole buakɛ ko.”

³Yilaehya zele ye kɛ, “Finde kɔ, kɔzɛlɛzɛlɛ mbuakɛ mgbane dɔɔnwo wɔ ɛ gɔnwo mɔ ɛkɛ ne

⁴Akee kɔ na ɛ nee ɛ mra ne mɔ bɛdo bɛ nwo anlenkɛ nu na bɔ ɔ bo kɛ ɛwola nwole ne wɔagua mbuakɛ ne mɔ anu; ko biala mɔɔ kɛyi la ɛnee wɔye wɔzie ahane.”

⁵Yemɔti raalɛ ne hɔle na ɔ nee ɔ mra ne mɔ hɔdole bɛ nwo anlenkɛ nu, yɛɛ mɔɔ ɔbubu nwole ne la ɛnee bɛlɛtwe bɛkɔsie na bɛfa mbuakɛ fofolɛ bɛba.

⁶Mbuakɛ ne mɔ yiyile la ɔbizale bɛ kɛ saa buakɛ bieko tɛbɔ ɛkɛ ne a. Na ɔ mra ne mɔ ko buale kɛ, “Bieko ɛnle ɛkɛ.” Na ɛkɛ ne ala nwole ne abo pɛle.

⁷Raalɛ ne hɔle Yilaehya ɛkɛ ne hɔbɔle ye amaneɛ na Yilaehya zele ye kɛ, “Kɔdɔne nwole ne fa bie tua wɔ kakɛ ne na ɛ nee ɛ mra ne mɔ bɛva mɔɔ ɛha la bɛnlea bɛ nwo.”

⁸Kenle ko Yilaehya hɔle Hyunɛm na raalɛ sukoavolɛ bie mɔɔ wɔ ɛkɛ ne la vɛlɛle ye manle ɔrakpulale ɔ sa. Ɛhye ati kenle biala mɔɔ ɔkɛva ɛkɛ ne adenle zo la, ɔmakyi ɛkɛ ne ɔdi debie.

⁹Raalɛ ne hanle hilele ɔ hu kɛ, “Yɛmenle, menwu kɛ nrenya ye mɔɔ ba ɛke dahuu la le Nyamenle sonla mɔɔ anwo te a.

¹⁰Maa yɛzi sua ekpumgbunli ekyi ko wɔ sua ye ati zo lɔ na yɛva ɛsokpa, ɛkponle, ebia nee kɛnlaneɛ yezie nuhua amaa kenle biala mɔɔ ɔkɛra ɛke la yeahɔla ɛkɛ.”

¹¹Kenle ko Yilaehya hɔle Hyunɛm na ɔhɔle ye sua ne anu kɛ ɔkadenrɛ ɔ nwo.

¹²Na ɔvɛlɛle ye sonvolɛ Gɛheezae na ɔzele ye kɛ, “Fɛlɛ Hyunɛm raalɛ ne maa me.” Mɔɔ raalɛ ne rale la,

¹³ɔzele Gɛheezae kɛ, “Ka kile raalɛ ye kɛ yevɛ yɛ nwo somaa. Duzu yɛɛ ɔkpondɛ kɛ yɛyɛ yɛmaa ye a?” Ɛkɛhulo kɛ yɛkɛnwu belemgbunli anzɛɛ safohyenlema kpanyinli ne yɛkɛmaa wɔ ɔ? Raalɛ ne buale kɛ, “Me tɛnlabelɛ nu le kpalɛ, mewɔ medame me maanle nu.”

¹⁴Yilaehya bizale Gɛheezae kɛ, “Ɛnea a duzu a ɔwɔ kɛ yɛyɛ yɛmaa ye a?” Gɛheezae zele ye kɛ, “Ɔnlɛ ralɛ nrenya yɛɛ ɔhu noko ɛyɛ kpanyinli.”

¹⁵Yilaehya zele kɛ, “Fɛlɛ ye maa me.” Raalɛ ne ragyinlanle sua ne anlenkɛ ne anloa,

¹⁶ na Yilaehya zele ye kɛ, “Ɛvolɛ bieko bekezɛ ɛnee ɛvia ralɛ nrenya.” Raalɛ ne buale kɛ, “Yɛmenle, Ɛle Nyamenle sonla, mmabɛlɛbɛla me.”

¹⁷Na kɛmɔ Yilaehya hanle ala la, raalɛ ne nrenzɛle na ɔwole ralɛ nrenya wɔ nyenyensuo mekɛ ne anu.

¹⁸Mɔɔ kakula ne dule zo ekyii la, kenle ko ɔ nee ɔ ze, nee ɔ ze ɛkpama ne hɔle ye ɛya nu lɔ kɛ bɛkade bɛyɔba.

¹⁹Na ɔzele ɔ ze kɛ, “O me ti, me ti.” Ɔ ze zele ye sonvolɛ ne kɛ, “Dwu ye kɔmaa ɔ nli.”

²⁰Sonvolɛ ne vale kakula ne hɔmanle ɔ nli. Raalɛ ne vale kakula ne dole ɔ gyakɛ azo na ɔkadwu sɛnzɛngyinla la, kakula ne wule.

²¹Raalɛ ne vale funli ne hɔdole Nyamenle sonla ne ɛsokpa ne azo na ɔdole anlenkɛ ne anu ɔvindele.

²²Akee ɔzele ɔ hu kɛ, “Maa me sonvolɛma ne mɔ ko nee asoaso maa mengɔ Nyamenle sonla ne ɛkɛ ne ndɛndɛ menzia membɛla.”

²³Ɔ hu bizale ye kɛ, “Duzu ati a ɛkɔ Nyamenle sonla ne ɛkɛ ne ɛnɛ ɛ? Ɛnɛ ɛnle ɛnwomenlelielɛ kenle yɛɛ siane ɛtɛfile.” Raalɛ ne buale kɛ, “Tɛ debie ɔ.”

²⁴Akee ɔvole asoaso ne azo na ɔzele ye sonvolɛ ne kɛ, “Maa nane ne ɛhɔ ndɛndɛ. Mmamaa ɔto ye ɛnriandilɛ ne anu, kyesɛ mese wɔ kɛ ɛdo nu.”

²⁵Yemɔti ɔzile nu na ɔhɔle Nyamenle sonla ne ɛkɛ wɔ Kamɛle Boka. Mɔɔ Yilaehya nwunle kɛ raalɛ ne ɛlɛba la, ɔzele Gɛheezae kɛ, “Nea nehane, Hyunɛm raalɛ ne a ɛlɛba la.

²⁶Nriandi kɔyia ye na biza ye kɛ, ‘Kɛ ɛ nwo de ɛ? Ɛ hu te kpɔkɛ ɔ? Ɛ ra ne te kpɔkɛ ɔ?’ ” Na ɔzele Gɛheezae kɛ, “Yɛ muala yɛte kpɔkɛ.”

²⁷Na mɔɔ ɔdwule Yilaehya anwo ɛkɛ ne wɔ boka ne azo la ɔhotole ɔbɔle ɔ ti aze, ɔzɔle Yilaehya agyakɛ. Gɛheezae rale kɛ ɔbahwe ye ahane na Yilaehya zele ye kɛ, “Gyakyi ye na nyane kpole ɛha ye, yemɔ a Ɛdɛnkɛma ɛva ɛvea me mɔɔ yeanga yeangile me la.”

²⁸Raalɛ ne zele ye kɛ, “Me menle, menzele wɔ kɛ ɛmaa menwo ralɛ nrenya ɔ? Se menganle mengilele wɔ kɛ ɛmmabɛlɛbɛla me.”

²⁹Yilaehya zele Gɛheezae kɛ, “Ka ɛ nwo na die me kpɔma ye kɔ. Saa ɛ nee awie yia a, mmabiza ye ahye, yɛɛ saa awie biza wɔ ahye a mmagyinla ɛdie zolɛ, na fa me kpɔma ye kɔdo kakula ne anwoma azo.”

³⁰Raalɛ ne zele Yilaehya kɛ, “Meka Ɛdɛnkɛma nee ɛdawɔ kɛ menrɛgyakyi wɔ ɛlɛ.” Yemɔti bɛ mu nwiɔ bɛdwazole bɛhɔle.

³¹Gɛheezae lumuale bɛ nyunlu vale kpɔma ne hɔdole kakula ne anwoma azo, noko kakula ne anzu yɛɛ yeanga ɔ nwo. Zɔhane ati ɔziale kɛ ɔkabɔ amaneɛ na ɔyiale ye la, ɔzele Yilaehya kɛ, “Kakula ne andunwue.”

³²Yilaehya dwule sua nu ɛkɛ ne la ɔnwunle kɛ kakula ne ɛwu na bɛdo ye wɔ ye ɛsokpa ne azo.

³³Yemɔti ɔwolole sua ne anu, ɔdole anlenkɛ ne anu na ɔhale ye nee kakula ne ala na akee ɔzɛlɛle Ɛdɛnkɛma.

³⁴ Akee ɔhɔvole ɔdenrɛle ɔ nwo wɔ kakula ne funli ne azo, ɔvale ɔ nloa ɔkpulale kakula ne anloa, ɔvale ɔ nye ɔbutule kakula ne anye zo, ɔvale ɔ sa ɔguale kakula ne asa azo. Ɔbutule ɔ nwo zo zɛhae la kakula ne anwo yɛle wuluwulu.

³⁵Ɔdwazole ɔkpɔsale sua ne anu ekyii na eza ɔhɔbutule kakula ne anwo zo bieko. Kakula ne nwuasinle fane nsuu na ɔbukele ɔ nye.

³⁶Akee Yilaegya vɛlɛle Gɛheezae kɛ ɔvɛlɛ Hyunɛm raalɛ ne ɔmaa ye. Ɔvɛlɛle ye na ɔrale la, Yilaehya zele ye kɛ, “Die ɛ ra ne, yede kpɔkɛ.”

³⁷Raalɛ ne radule dɔle ɔ gyakɛ anu ɛkɛ, ɔbɔle ɔ ti azɛlɛ nwo na ɔdwazole ɔvale ɔ ra ne ɔhɔle.

³⁸Ɛhɔne zile maanle ne anu, azɛlɛ ne azo, na Yilaehya rale Gelegale. Nyamenle kpɔmanvolɛma asa azo ne bie mɔ radɛnlanle ɔ nwo ɛkɛ na ɔzele ye sonvolɛ ne kɛ, “Fa ɛzɛne kpole ne sie senle zo na to aleɛ maa Nyamenle kpɔmanvolɛ asa azo ne mɔ.”

³⁹Bɛ nuhua ko dwazole hɔle kɛ ɔkatete nwolɛ nya nya, na ɔnwunle vanye nyinli bie la ɔtetele ye nya ne dɔɔnwo na ɔrapepɛle ɔguale aleɛ ne anu. Ɛnee ɔnze kɛ awa nyinli nya ɔ.

⁴⁰Na bɛyeyele bɛmanle bɛ kɛ bɛli. Bɛdi la bɛdeanle nu kɛ, “O Nyamenle sonla, debie mɔɔ ku sonla la wɔ nu.” Yemɔti bɛanli.

⁴¹Na Yilaehya zele bɛ kɛ, “Bɛva aleɛ ne bɛrɛlɛ me.” Ɔvale aleɛ ne ɔguale siase ne anu na ɔzele kɛ, “Bɛyeye bie bɛmaa bɛli.” Na ɔyɛle kpalɛ bɔkɔɔ mɔɔ bɛdi a bɛnwu a.

⁴²Mekɛ bie noko, nrenya bie vi Beeyale-Hyalehya vale kpanwo ahunguma abulanwiɔ yɛɛ abɛlɛ mɔɔ bɔ zo mɔɔ bɛlɛbu zolɛ la kodoku nu rɛlɛle Yilaehya. Na Yilaehya zele ye sonvolɛ ne kɛ, “Fa maa Nyamenle kpɔmanvolɛma asa azo ne mɔ maa bɛli.”

⁴³Ye sonvolɛ ne bizale kɛ, “Asoo ɛhye kɛza menli ɛya ko ye di.” Yilaehya zile zolɛ bieko kɛ, “Fa maa menli ne maa bɛli na Ɛdɛnkɛma se: Bɛbali, bɛ ko ayi, bie aha.”

⁴⁴Yemɔti ɔvale ɔmanle bɛlile na bie dɔɔnwo hale kɛmɔ Ɛdɛnkɛma hanle ala la.