Read Nzema 2 Arl 6 Bible Online

2 Arl 6 - Nzema bible

2 Arl 6

¹Kenle ko Nyamenle kpɔmanvolɛma asa azo ne mɔɔ Yilaehya a nea bɛ nwo zo la hanle hilele ye kɛ, “Ɛleka mɔɔ yɛde la le ekyi maa yɛ.

²Maa yɛ adenle maa yɛhɔ Dwɔdan ne anloa lɔ yɛhɔpɛ mbaka yɛrabu awuke yɛdɛnla nuhua.” Na Yilaehya zele bɛ kɛ, “Bɛhɔ.”

³Bɛ nuhua ko zele Yilaehya kɛ, “Yɛbodo wɔ, maa yɛhɔ.” Na ɔkponlenle zolɛ

⁴ɔ nee bɛ hɔle. Bɛrale Dwɔdan ne anloa na bɛpɛle mbaka dɔɔnwo.

⁵Mɔɔ bɛgua zo bɛlɛpɛ mbaka ne la, nuhua ko akuma ɛdeɛ ne ati dule dɔle azule ne anu, na ɔdeanle nu kɛ, “Aa, me menle, yɛvɛnenle akuma ne.”

⁶Yilaehya bizale ye kɛ, “Nienwu a ɔdɔle a?” Nrenya ne hilele ye ɛleka mɔɔ ɔdɔle la. Yilaehya pɛle baka ekyi ko vuandinle dole azule ne anu na akuma tile ne tulule.

⁷Yilaehya zele ye kɛ, “Tende ɛ sa fa.” Na nrenya ne vale.

⁸Mekɛ bie mɔɔ ɛnee Selea belemgbunli ne zo konle doa Yizilayɛma la, ɔ nee ye mgbanyima yiale nuhua na bɛvale adwenle bɛhilele ɛleka mɔɔ bɛbayɛ bɛ azokoɛleɛ ne la.

⁹Na Yilaehya zoanle manle bɛhɔdinle Yizilayɛ belemgbunli ne aze amaa yeangɔ ɛleka mɔɔ bɛwɔ la.

¹⁰Na Yizilayɛ belemgbunli ne noko manle menli mɔɔ wɔ ɛkɛ ne afoa nu la lale bɛ nwo zo. Ɛhye hɔle zo fane dɔɔnwo manle Yizilayɛma nyianle bɛ ti.

¹¹Ɛhye manle Selea belemgbunli ne adwenle zɛkyele dɔɔnwo manle ɔvɛlɛle ye mgbanyima ne na ɔbizale bɛ kɛ, “Bɛ nuhua boni a wɔ Yizilayɛ belemgbunli ne anzi a?”

¹²Mgbanyima ne mɔ ko buale kɛ, “Nana, yɛ nuhua biala ɛnle ɔ nzi na Nyamenle kpɔmanvolɛ Yilaehya ne mɔɔ wɔ Yizilayɛ ɛkɛ ne la yɛɛ edwɛkɛ mɔɔ ɛkɛvea wɔ sua ne akunlu bɔbɔ ɛkɛha la, ɔka ɔkile Yizilayɛ belemgbunli ne a.”

¹³Belemgbunli ne zele kɛ, “Bɛhɔkpondɛ ye bɛnwu ɛleka mɔɔ ɔde la na menzoa menli memaa bɛhɔhye ye.” Bɛhɔle na bɛrahanle bɛhilele ye kɛ ɔde Dotan.

¹⁴Yemɔti belemgbunli ne manle ɛlɔnema mɔɔ tɛnla mgbɔnwɔ zo nee mɔɔ tɛnla ehwili nu ko la dɔɔnwo nee ɛlɔnema dɔɔnwo kpalɛ rale nɔɔzo na bɛrabɔle bɛyiale suakpole ne.

¹⁵Mɔɔ Nyamenle kpɔmanvolɛ ne sonvolɛ ne dwazole nwonlomɔ mangyee ne na ɔtudu agyakɛ la, ɔnwunle kɛ ɛlɔne ɛva sua ne. Na ɔbizale Yilaehya kɛ, “O, me menle, na duzu yɛɛ yɛkɛyɛ a? Yɛwu bɔkɔbɔkɔ.”

¹⁶Yilaehya zele ye kɛ, “Mmasulo, ɛlɔnema mɔɔ nee yɛ lua la zonle tɛla bɛ.”

¹⁷Akee ɔzɛlɛle kɛ, “Ɛdɛnkɛma, buke me sonvolɛ ye anye maa ɔnwu debie.” Ɛdɛnkɛma diele nzɛlɛlɛ ne na ɔbukele kpavolɛ ne anye na ɔnwunle kɛ ɛlɔnema mɔɔ de senle mgbɔnwɔ zo nee senle ehwili nu la ɛbɔ ɛyia Yilaehya na bɛ somaa ɛva boka ne amuala.

¹⁸Mɔɔ Selea ɛlɔnema ne dule kɛ bɛba bɛ nwo zo la, Yilaehya zɛlɛle Ɛdɛnkɛma kɛ, “Mesɛlɛ wɔ, bili menli ɛhye mɔ anye zo.” Yemɔti ɔbilile bɛ nye zo, kɛmɔ Yilaehya zɛlɛle ala la.

¹⁹Yilaehya hɔle bɛ nwo ɛkɛ na ɔzele bɛ kɛ, “Ayi mɔ, bɛminli. Tɛ adenle ne ɛne yɛɛ tɛ suakpole ne mɔɔ bɛkɔ zo la ɛne. Bɛdoa me na me nee bɛ ɛhɔ ahenle mɔɔ bɛkpondɛ ye la ɛkɛ ne.” Na ɔlile bɛ nyunlu ɔ nee bɛ hɔle Samɛlea.

²⁰Bɛdwule Samɛlea ala la Yilaehya zɛlɛle bieko kɛ, “O Ɛdɛnkɛma, maa bɛ nye zo ɛtete bɛ na bɛnwu ɛleka mɔɔ bɛwɔ la.” Yemɔti Ɛdɛnkɛma manle bɛ nye zo tetele bɛ na bɛnwunle kɛ bɛwolo bɛra Samɛlea suakpole ne azo.

²¹Mɔɔ Yizilayɛ belemgbunli ne nwunle Selea ɛlɔnema ne la, ɔbizale Yilaehya kɛ, “Egya, mengu bɛ ɔ? Mengu bɛ ɔ?”

²²Yilaehya buale kɛ, “Saa ɛhyele bɛ donvula wɔ konle nu bɔbɔ a anrɛɛ ɛnrɛhu bɛ. Yemɔti mmaku bɛ. Maa bɛ debie bɛli, maa bɛ nzule bɛnlo na gyakyi bɛ maa bɛhɔ bɛ menle anwo lɔ.”

²³Yemɔti belemgbunli ne manle bɛdole bɛ ɛkponle kpole bie. Bɛlile debie bɛ ko yile na bɛnlonle nza la, akee ɔmanle bɛ adenle bɛziale bɛhɔle Selea belemgbunli ne ɛkɛ. Ɔvi mekɛ zɔhane Seleama anli bɛ edwɛkɛ ambɔ Yizilayɛma anwo zo ɛralɛ bieko.

²⁴Nzinlii mɔɔ mekɛ guale nu ekyii la, Selea belemgbunli Bɛneheedade boɔboale ye ɛlɔnema amuala anloa na ɔhɔtetale Samɛlea. Ɔvale ye ɛlɔnema ne ɔnwinwinle Samɛlea mɔɔ ɛnee awie biala ɛnnyia adenle ɛnvi suakpole ne azo ɛnvinde yɛɛ awie ɛngɔ zolɛ.

²⁵Ɔlua ɛhye ati aleɛ wiele na ɛhɔne rale suakpole ne azo manle bɛdɔle asoaso tile dwɛtɛ fufule abulatwɛ yɛɛ bɛ anweɛ nyinli ngyikyi bie mɔɔ bɛfɛlɛ ye “Kaabe” la ɛkyɛ nu nna a bɛtɔ ko dwɛtɛ fufule nnu.

²⁶Kenle ko Yizilayɛ belemgbunli ne lua suakpole ne bane ne sinli nyunlu ɛlɛtudu agyakɛ la, raalɛ bie vɛlɛle ye hanle kɛ, “O Nana, boa me.”

²⁷Belemgbunli ne buale kɛ, “Saa Ɛdɛnkɛma amboa wɔ a ɛnee kɛ mame mesi meboa wɔ memaa ɔyɛ boɛ ɛ? Menlɛ awule yɛɛ menlɛ nwanye.

²⁸Duzu debie a ɛkpondɛ kɛ meyɛ memaa wɔ a?” Raalɛ ne buale kɛ, “Ɛkenle bie raalɛ ɛhye zele me kɛ menva me ra nrenya ne memaa yɛhu ye yɛli wɔ demua ne na kenle fofolɛ yɛahu ɔdaye noko ye ɛdeɛ ne yɛali.

²⁹ Yemɔti yɛhunle me ra nrenya ne yɛdonle yɛlile. Akee ye alehyenlɛ nu menzele ye kɛ ɔhu ɔ ra nrenya ne ɔmaa yɛdo yɛli a, ɔse ɔnrɛyɛ, yeva ɔ ra ne yehɔvea.”

³⁰Mɔɔ Belemgbunli ne dele ɛhye la, ɛya ngome manle ɔsuosuanle ye tɛladeɛ ne mɔɔ ɔwula la anu. Na menli mɔɔ bikye ɛkɛ ne la nwunle kɛ ɛnee ɔwula ɛrele tɛladeɛ wɔ ɔ bo.

³¹Na ɔzele kɛ, “Saa ɛnɛ kenle ye meammaa bɛanye Hyeefate ara Yilaehya ati ne bɛanvi zo a, Nyamenle ɛdua me kakɛ ɛgua me bie zo.”

³²Na ɔzoanle sonla kɛ ɔhɔva Yilaehya ɔrɛlɛ ye. Mekɛ ne anu ɛnee Yilaehya nee mgbanyima bie mɔɔ ɛra ye ɛkpɔlalɛ la gua ɛlɛdi adwelie wɔ ye sua ne anu. Na ɔzele bɛ kɛ, “Bɛnlea, kɔdiawu ne ɛzoa kɛ bɛrahu me. Saa ɔdwu ɛke a bɛdo anlenkɛ ne anu bɛzua ɔ nzi kpundii; bɛmmamaa ɔwolo ɔba ɛke. Belemgbunli mumua ne li ɔ nzi ɛlɛba.” Yilaehya hanle ɛhye kolaa na sonla ne mɔɔ belemgbunli ne zoanle ye la ara.

³³Ɔ nloa ampe bɔbɔ yɛɛ belemgbunli mumua ne yele ɔ nyunlu a, na ɔzele kɛ, “Ngyegyelɛ ɛhye vi Ɛdɛnkɛma. Duzu ati a ɔwɔ kɛ eza mekendɛ dedee ɛ?”