Read Nzema 2 Arl 8 Bible Online

2 Arl 8 - Nzema bible

2 Arl 8

¹ Mekɛ bie Yilaehya hanle hilele raalɛ ne mɔɔ ɔ ra ne wule a ɔdunwuele ye la kɛ, “Dwazo na ɛ nee wɔ sua nu amra amuala bɛlɔ nu bɛhɔ ɛleka biala mɔɔ bɛkola la na Ɛdɛnkɛma ɛlɛmaa ɛhɔne ara azɛlɛ ye azo ɛvolɛ nsuu.”

²Yemɔti raalɛ ne hɔle, kɛmɔ Yilaehya hanle la, na ɔ nee ye sua nu amra bɛhɔle Filisitiama maanle nu bɛhɔlile ɛvolɛ nsuu.

³Ɛvolɛ nsuu ne awieleɛ, raalɛ ne vi Filisitiama maanle nu ziale rale sua nu na ɔhɔle kɛ ɔkanwu belemgbunli wɔ ye sua ne nee ye azɛlɛ ne mɔ anwo.

⁴Mekɛ ne anu ɛnee belemgbunli nee Yilaehya sonvolɛ Gɛheezae ɛlɛdi adwelie na yebiza ye kɛ, “Ka ninyɛne mgbole mɔɔ Yilaehya ɛyɛ la amuala kile me.”

⁵Na mɔɔ Gɛheezae anloa wɔ zolɛ ɔlɛka menli mɔɔ wule na Yilaehya dunwuele bɛ la anwo edwɛkɛ yeahile belemgbunli ne la, yɛɛ raalɛ ne mɔɔ ɔ ra wule a Yilaehya dunwuele ye la ravindele ɛkɛ kɛ ɔbaha ye sua nee ye azɛlɛ nwo edwɛkɛ a. Na Gɛheezae zele kɛ, “Nana, me menle, raalɛ ne mɔɔ melɛdi ye edwɛkɛ la yemɔ ɛne, yɛɛ ɔ ra ne mɔɔ wule a Yilaehya dunwuele ye la noko ɛne.”

⁶Belemgbunli ne bizale raalɛ ne edwɛkɛ ne na raalɛ ne dole mɔɔ Gɛheezae hanle la azo. Yemɔti belemgbunli yele kpanyinli ko dole ɔ nwo zo na ɔzele ye kɛ ɔnlea ɔmaa raalɛ ne asa ɛha ye debie biala, na bɛye ezukoa biala mɔɔ bɛnyianle ye wɔ ye azɛlɛ ne azo wɔ ɛvolɛ nsuu ne anu la bɛmaa ye.

⁷Akee Yilaehya rale Dɛmasekɛse. Selea Belemgbunli Bɛneheedade ɛnee ɛnde kpɔkɛ na bɛhanle bɛhilele ye kɛ, Yilaehya ɛra ɛkɛ.

⁸Belemgbunli zele Hazeeyɛle kɛ, “Fa ahyɛlɛdeɛ, na kɔyia Nyamenle kpɔmanvolɛ ne, na maa ɔbiza Ɛdɛnkɛma saa menwɔde kpɔkɛ a.”

⁹Yemɔti Hazeeyɛle vale Dɛmasekɛse ninyɛne dɔɔnwo wulowulale bɛ ahodoku nu zoale afunlumu abulanla na ɔvale ɔhɔyiale Yilaehya kɛ, “Wɔ dehelɛ, Belemgbunli Bɛneheedade ɛnde kpɔkɛ, na yezoa me kɛ membambiza saa ɔkɛde kpɔkɛ a.”

¹⁰Yilaehya buale kɛ, “Ɛdɛnkɛma ɛye ɛhile me kɛ ɔbawu noko kɔze ye kɛ, ɔbade kpɔkɛ bɔkɔɔ.”

¹¹Akee Yilaehya nleanle Hazeeyɛle anyunlu dedee ɔmanle Hazeeyɛle ati zile aze, na Nyamenle kpɔmanvolɛ ne zunle.

¹²Na Hazeeyɛle bizale ye kɛ, “Duzu ati a me menle akee ɛlɛsu a?” Yilaehya buale kɛ, “Ɔboalekɛ menwu ɛtane mɔɔ ɛbali wɔamaa Yizilayɛma la. Ɛbado senle wɔ bɛ aranemgbole ne mɔ anu, wɔahuhu bɛ mgbavolɛ nee ngakula kɔsɔɔti, na wɔatulutulu mraalɛ mɔɔ ɛva ɛkolɛ la anyalɛ.”

¹³Hazeeyɛle zele kɛ, “Medame, na mele duzu? Twea ralɛ mɔɔ le kɛ medame mɔɔ mendo ɛhwee la, mefa nienwu na meayɛ ɛhye?” Yilaehya buale kɛ, “Ɛdɛnkɛma ɛye ɛhile me kɛ wɔmɔ yɛɛ ɛbali belemgbunli wɔ Selea a.”

¹⁴Hazeeyɛle vi Yilaehya anwo ɛkɛ ne hɔle na belemgbunli ne bizale ye kɛ, “Duzu edwɛkɛ a Yilaehya hanle hilele wɔ a?” Hazeeyɛle buale ye kɛ, “Ɔzele me kɛ, ɛbade kpɔkɛ.”

¹⁵Noko aleɛ hyenle la, Hazeeyɛle vale kundu bɔle nzule nu vale hedale belemgbunli ne ati zo manle ye ɛbolɛ kpunle toonwo ɔwule. Na Hazeeyɛle lile Selea ebia ne.

¹⁶Yizilayɛ Belemgbunli Ehabe ara Dwɔlam lile ɛvolɛ nnu wɔ Yizilayɛ ebia ne azo la yɛɛ Gyɛhɔhyafate ara Gyɛhɔlam bɔle ɔ bo kɛ ɔdi belemgbunli wɔ Dwuda a.

¹⁷Ɔlile ɛvolɛ abulasa nee nwiɔ la yɛɛ bɛvale ye bɛziele belemgbunli a. Ɔlile ebia ne ɛvolɛ mɔtwɛ wɔ Gyɛlusalɛm.

¹⁸Ɔvale Yizilayɛ arelemgbunli agyakɛ na ɔbɔle Ehabe sua nu amra ɛbɛla ne bie, ɔluakɛ ɛnee ɔgya Ehabe ara raalɛ. Na ɔyɛle ɛtane ɔtiale Ɛdɛnkɛma.

¹⁹Noko ɛnee ɔnle Ɛdɛnkɛma ɛhulolɛ kɛ ɔkɛzɛkye Dwudama, ɔboalekɛ yebɔ ye akɛlɛ Devidi ɛwɔkɛ kɛ ɔ bo zo amra a bali ebia ne dahuu a.

²⁰Gyɛhɔlam mekɛ zo, Yidɔmma dele atua kɛ bɛnle Dwudama abo bieko; bɛdabɛ bɛziele bɛ belemgbunli na bɛlile bɛ ti anwo.

²¹Yemɔti Gyɛhɔlam vale ye ɛlɔnema mɔɔ fa ehwili ko la hɔle Zeeyɛ na nɔe ne bɛdwazole bɛhanle Yidɔmma mɔɔ ɛnee ɛbɔ ɛyia bɛ la senle manle bɛnriandile bɛhɔle bɛ azua nu.

²²Noko akee Yidɔmma dele atua; bɛli bɛ ti anwo toonwo a yeradwu ɛnɛ a. Lebenama bɛdabɛ noko bɛdele atua wɔ mekɛ ko ne ala anu.

²³Nyɛleɛ mɔɔ Gyɛhɔlam yɛle nee gyima mɔɔ ɔlile la bɛhɛlɛ bɛ muala wɔ Dwuda Arelemgbunli Tetedwɛkɛ Mbuluku ne mɔ anu.

²⁴Yemɔti Gyɛhɔlam hɔle ayile nu na bɛwulale ye mrɛlatɛlɛ nu wɔ ɔ ze mɔ dehelɛ alaleɛ ne wɔ Devidi suakpole zo, na ɔ ra Ehazaya lile ebia ne.

²⁵Yizilayɛ Belemgbunli Dwɔlam, Ehabe ara ne lile ɛvolɛ bulu nee nwiɔ wɔ ebia ne azo la yɛɛ bɛvale Gyɛhɔlam ara Ehazaya bɛziele belemgbunli wɔ Dwuda a.

²⁶Ehazaya lile ɛvolɛ abulanwiɔ nee nwiɔ na yeabɔ ɔ bo kɛ ɔdi belemgbunli yɛɛ ɔlile belemgbunli ɛvolɛ ko pɛ wɔ Gyɛlusalɛm. Bɛfɛlɛ ɔ nli Atalaya; ɔle Yizilayɛ Belemgbunli Ɔmelae anlɔnra.

²⁷Ɔdaye noko ɔvale Belemgbunli Ehabe sua nu amra agyakɛ. Ɔyɛle ɛtane ɔtiale Ɛdɛnkɛma, kɛmɔ Ehabe sua nu amra yɛle la, ɔluakɛ ɔdaye mumua ne ɔle azebia wɔ Ehabe sua nu.

²⁸Ehazaya nee Yizilayɛ Belemgbunli Dwɔlam vale konle doale Selea Belemgbunli Hazeeyɛle wɔ Releemɔto mɔɔ wɔ Geleade la, na Dwɔlam bodale kpole bie wɔ konle ne anu.

²⁹Dwɔlam ziale rale Gyɛzɛlii kɛ ɔbayɛ ɔ nwo ayile, na Dwuda Belemgbunli Ehazaya (Gyɛhɔlam ara ne) rakpɔlale ye.