Read Nzema 1 Edk 10 Bible Online

1 Edk 10 - Nzema bible

1 Edk 10

¹Filisitiama nee Yizilayɛma honle wɔ Gelebowa Boka na bɛhunle Yizilayɛma dɔɔnwo wɔ ɛkɛ, yɛɛ bie mɔ guale ɛbɔ nu.

²Filisitiama voanle Belemgbunli Sɔɔlo nee ɔ mra ne mɔ dedee bɛ sa hanle ɔ mra ne mɔ anu nsa bɛhunle bɛ. Bɛmɛ a le Dwɔnatan, Abenadabe, yɛɛ Malekaehyua.

³Konle ne akee telele Sɔɔlo asa azo, na ɛda hanle ye manle ɔbodale kpole bie.

⁴Yemɔti Sɔɔlo zele ye sonvolɛ ne mɔɔ soa ye konle ninyɛne ne la kɛ, “Twe wɔ dadeɛ ne wɔ me maa menwu, anrɛɛ menli ɛhye mɔ mɔɔ ɛnze Nyamenle la kɛragolo me nwo.” Na ye sonvolɛ ne anyɛ, ɔluakɛ ɛnee ɔsulo kpole. Yemɔti Sɔɔlo vale ɔdaye ye dadeɛ ne wɔle ɔ nwo.

⁵Mɔɔ ye sonvolɛ ne nwunle kɛ Sɔɔlo ɛwu la, ɔdaye noko ɔvale ye dadeɛ ne ɔwɔle ɔ nwo na ɔwule.

⁶Ɛnee kɛ Sɔɔlo zile wule la ɛne: ɔdaye, ɔ mra nsa ne nee ye sua nu amra amuala gulule nu wule.

⁷Mɔɔ Yizilayɛma mɔɔ wɔ bɔnza ne anu la nwunle kɛ bɛ ɛlɔnema ne ɛnriandi na Sɔɔlo nee ɔ mra nsa ne ɛdɔ la, bɛdabɛ bɛnriandile bɛvile bɛ azuamgbole ne mɔ azo, na Filisitiama radɛnlanle zolɛ.

⁸Bɛhonle konle ne na aleɛ hyenle la, Filisitiama rale kɛ bɛbayeye menli mɔɔ ɛwu la anwo ninyɛne ne mɔ, na bɛnwunle Sɔɔlo nee ɔ mra nsa ne kɛ bɛwu bɛgua Gelebowa Boka.

⁹Bɛpɛle ɔ ti na bɛyeyele ye konle ninyɛne ne mɔ, na bɛvale nrɛlaleɛ bɛhɔle bɛ maanle ne anu amuala kɛ bɛbɔ edwɛkɛ fɛlɛko ɛhye nolo bɛhile ezuavolɛ ne nee bɛ mmonle ne mɔ.

¹⁰Bɛvale Sɔɔlo konle tɛladeɛ ne bɛhɔguale bɛ mmonle sua bie anu, na bɛvale ɔ ti bɛhendanle bɛ bozonle ne mɔɔ bɛfɛlɛ ye Deegɔn la sua ne anu.

¹¹Mɔɔ Geleadema mɔɔ wɔ Gyeebɛhye la dele mɔɔ Filisitiama ɛva ɛyɛ Sɔɔlo la,

¹²bɛ bie mɔ mɔɔ anwo yɛ se la zile bɛ ahonle hɔvale Sɔɔlo nee ɔ mra nsa ne avunli ne mɔ hɔle Gyeebɛhye. Bɛziele bɛ wɔ oku baka bie mɔɔ gyi Gyeebɛhye la abo na bɛlile buada kenle nsuu.

¹³ Sɔɔlo wule, ɔboalekɛ yeanli nɔhalɛ yeammaa Ɛdɛnkɛma. Yeanli Ɛdɛnkɛma mɛla ne mɔ azo, yɛɛ eza ɔbizale moalɛ ɔvile mɔwuamra lɔ.

¹⁴Yeambiza Ɛdɛnkɛma moalɛ, ɛhye ati Ɛdɛnkɛma manle bɛhunle ye na ɔhakyile belemgbunlililɛ ne ɔmanle Gyɛsi ara Devidi.