Read Nzema 1 Edk 11 Bible Online

1 Edk 11 - Nzema bible

1 Edk 11

¹Yizilayɛma amuala hɔle Devidi anwo ɛkɛ wɔ Hibulɔn hɔzele ye kɛ, “Yɛ muala yɛle menli ko.

²Mekɛ bie mɔɔ ɛze ɛhɔ, mɔɔ ɛnee Sɔɔlo a le belemgbunli la, wɔmɔ yɛɛ ɛlile Yizilayɛma ati ɛ nee bɛ hɔle, rale a, na Ɛdɛnkɛma wɔ Nyamenle ne zele wɔ kɛ, ‘Wɔmɔ yɛɛ ɛbali Yizilayɛma ati na wɔali bɛ belemgbunli a.’ ”

³Yemɔti Yizilayɛ mgbanyima ne kɔsɔɔti hɔle belemgbunli ne ɛkɛ ne wɔ Hibulɔn, na Devidi nee bɛ yɛle ngyehyɛlɛ, bɛkyekyele ɔ bo wɔ Ɛdɛnkɛma anyunlu, na bɛziele Devidi belemgbunli kɛ ɔnlea Yizilayɛma kɔsɔɔti anwo zo, kɛmɔ Ɛdɛnkɛma luale Samoɛle anwo zo hanle la.

⁴Belemgbunli Devidi nee Yizilayɛma amuala hɔle Gyibɛsema mɔɔ de azɛlɛ ne azo la anwo zo wɔ Gyɛlusalɛm. Sua ɛhye ɛnee bɛfɛlɛ ye Gyibɛse.

⁵Menli mɔɔ wɔ Gyibɛse la zele Devidi kɛ, “Ɛnrɛhola sua ye azo fo ɛlɛ.” Noko Devidi honle vale Zayɔn aranemgbole ne, mɔɔ le Devidi Suakpole ne.

⁶Akee Devidi zele kɛ, “Awie biala mɔɔ kɛlumua kɛhu Gyibɛsenli la mebayɛ ye me ɛlɔnema ne safohyenlema kpanyinli. Na Zɛluaya ara Dwowabe lumuale hunle bie, na bɛyɛle ye ɛlɔnema ne safohyenlema kpanyinli.”

⁷Devidi hɔdɛnlanle sua ne azo aranemgbole ne anu, yemɔti bɛvɛlɛle sua ne “Devidi Suakpole.”

⁸Ɔkyekyele sua ne fofolɛ, ɔbɔle ɔ bo wɔ boka ne foa ko ɛleka mɔɔ bɛzoale ɛnwea bɛzile ye la wɔ boka ne aduduleɛ. Dwowabe noko zieziele suakpole ne ɛleka mɔɔ ɛha la.

⁹Na Devidi nyianle ɔ nyunlu na ɔyɛle sonlakpole, ɔluakɛ Tumivolɛ Ɛdɛnkɛma nee ye lua.

¹⁰Devidi safohyenlema mɔɔ di munli na bɛboale ye kpalɛ wɔ ye belemgbunlililɛ nu la, bɛmɛ ɛne. Bɛ nee Yizilayɛma amuala hanle bɔle nuhua ziele ye belemgbunli, kɛmɔ Ɛdɛnkɛma hanle ala la.

¹¹Mɔɔ lumua Devidi safohyenlema ne anu la a le Gyahyɔbɛyam. Ɔvi Hakemo abusua nu. Yemɔ a ɔli “Nsa Ne”[6] ati a. Ɔvale atwɛ ɔ nee menli ɛya nsa honle na ɔhunle bɛ kɔsɔɔti.

¹²Mɔɔ doa Gyahɔbɛyam wɔ “Nsa Ne” anu la a le Dodo mɔɔ vi Aho la ara Ɛlieza.

¹³Mekɛ mɔɔ Filisitiama nee Yizilayɛma yiale nu wɔ Pase Damem konle ne anu la, Ɛlieza honle manle Belemgbunli Devidi. Yizilayɛ ɛlɔnema ne ravindele baale ɛya bie anu na bɛguale ndwɛlɛ aze.

¹⁴Na Ɛlieza nee ɔ sa zo ne gyinlanle kpundii bɛ nee Filisitiama honle na bɛhunle bɛ nuhua dɔɔnwo. Ɛdɛnkɛma manle bɛlile konim kpole kpalɛ.

¹⁵Kenle ko safohyenlema abulasa ne anu nsa hɔle Devidi anwo ɛkɛ wɔ bodane ne mɔɔ Devidi wɔ ye bɔne bie anu wɔ Adulam la anu. Mekɛ ne anu ɛnee Filisitiama ɛradɛ Relɛfeeyem bɔnza ne anu.

¹⁶Mekɛ ne anu ɛnee Devidi wɔ boka bie mɔɔ bɛbɔ nwolɛ bane la azo, na Filisitia ɛlɔnema ɛva Bɛtelɛhɛm.

¹⁷Devidi anwo lɔle sua nu na ɔzele kɛ, “Anrɛɛ meanyia awie ahɔza nzule wɔ Bɛtelɛhɛm bula ne mɔɔ wɔ sua ne anlenkɛ kpole ne anwo ɛkɛ ne la bie arɛlɛ me yeamaa meanlo.”

¹⁸Menli katakyiema nsa ne bɔle vale Filisitiama avinli wɔ ɛleka mɔɔ bɛdɛ la na bɛhɔzale nzule wɔ Bɛtelɛhɛm bula ne mɔɔ wɔ sua ne anlenkɛ kpole ne anloa la bie bɛrɛlɛle Devidi. Noko Devidi anno. Ɔguale ye aze, ɔvale ɔyɛle azubɔdeɛ ɔmanle Ɛdɛnkɛma,

¹⁹na ɔzele kɛ, “Menrɛnlo ye ɛnɛ na meanlo ye ɛhyema! Meno a ɛnee menlo menli ɛhye mɔ mogya. Ɔluakɛ bɛvale bɛ ngoane bɛdole nzeleba yɛɛ bɛ nee nzule ne rale a.” Zɔhane ati yeanno. Ɛnee katakyiema nsa ne gyima mɔɔ lile la ɛne.

²⁰Dwowabe adiema Abehyae a li Katakyiema “Abulasa Ne”[7] ati a. Ɔvale atwɛ ɔhunle menli ɛya nsa, na ɔliele duma.

²¹Ɔliele duma kpole wɔ “Abulasa Ne” anu na ɔlile bɛ nwo zo kpanyinli. Noko yeando “Nsa Ne” gyinlabelɛ.

²²Gyɛhɔyada, nrenya kakanyinli bie mɔɔ vi Kabezili la ara Bɛnaya le katakyie. Ɔyɛle ninyɛne mgbole. Ɔhunle Mowabe ɛlɔnema anu menli mgbole nwiɔ. Eza kenle ko mɔɔ ɛnee “ezukɔtweaba” ɛlɛtɔ kpalɛ la ɔdwule kuma bie anu ɔhɔhunle awenade.

²³Eza ɔhunle Yigyibitinli anyinlima anwo ɛzulolɛ bie. Yigyibitinli ne ɛnee lɛ atwɛ kpole bie, na Bɛnaya vale kokolobaka hɔle ɔ nwo zo, ɔzale ye ɔliele ye atwɛ ne, na ɔvale atwɛ ne ɔhunle ye.

²⁴Ninyɛne ɛhye mɔ a Bɛnaya yɛle liele duma a.

²⁵Bɛbɔ ye duma bɛboka “Abulasa Ne” anwo, noko ɔndo “Nsa Ne.” Devidi yɛle ye menli mɔɔ sinza belemgbunli la kpanyinli.

²⁶Sogyama mɔɔ liele duma la bie mɔ ɛne: Dwowabe adiema Asahɛle Dodo mɔɔ vi Bɛtelɛhɛm la ara Ɛleheenan Hyamo mɔɔ vi Hɛlɔdo Hilɛze mɔɔ vi Pilɛte Yekɛhye mɔɔ vi Tɛkowa la ara Ayela Ebayizɛ mɔɔ vi Anato Sebɛkae mɔɔ vi Huhya Ayeleeyae mɔɔ vi Aho Mahalae mɔɔ vi Nɛtɔfa Beeyana mɔɔ vi Nɛtɔfa la ara Hilɛde Relaebeeyae mɔɔ vi Gebɛya mɔɔ wɔ Bɛngyaman azɛlɛ zo la ara Yetae Bɛnaya mɔɔ vi Paeleetɔn Huleeyae mɔɔ vi mbɔnza ne mɔ mɔɔ zua Geeyahye la anu la Abayɛle mɔɔ vi Aaba Azemeevɛte mɔɔ vi Beehɛlum Yilayaaba mɔɔ vi Hyeeyalebɔn Hahyɛm mɔɔ vi Gaezɔn la amra ne mɔ Hyeegi mɔɔ vi Hɛla la ara Dwɔnatan Seekaa mɔɔ vi Hɛla la ara Ahayam Yule ara Yilaefale Hifɛ mɔɔ vi Mɛkila Ahaegya mɔɔ vi Pilɔn Hɛzelo mɔɔ vi Kamɛle Ɛzebae ara Neeyalae Neetan adiema Dwowɛle Hagelae ara Mebehaa Zilɛke mɔɔ vi Amɔn Neehalae mɔɔ vi Bilo, ɔsoa Zɛluay(...)