Read Nzema 1 Edk 12 Bible Online

1 Edk 12 - Nzema bible

1 Edk 12

¹Mekɛ mɔɔ Devidi hɔveale Zekelage, na Kehye ara Sɔɔlo ati ɔngola ɔnvi sua ne azo ɔngɔ ɛleka biala la, menli ɛhye mɔ rale ɔ nwo ɛkɛ. Bɛbokale ɛlɔnema mɔɔ ze konle nye zo kpalɛ la na bɛboale ye wɔ konle nu.

²Bɛvi Bɛngyaman abusua ekpunli ne anu na bɛle Sɔɔlo ɔdaye ɔ nwo amra mɔɔ ze ɛda to kpalɛ a; eza bɛkola bɛfa bɛ sa bɛne anzɛɛ fema bɛto totoabɔ.

³Bɛ kpanyinli a le Ehayizɛ, yɛɛ Dwowahye doa ye. Bɛ ze a le Hyɛmaa mɔɔ vi Gebɛya la. Ɛlɔnema ne mɔ ɛne: Gyizeɛle nee Pilɛte mɔɔ bɛ ze a le Azemeevɛte la Bɛleeka nee Gyihu mɔɔ vi Anato Yehyemaya mɔɔ vi Gebɛyɔn, “Abulasa Ne” kpanyinli ɔ, yɛɛ yemɔ a anwo yɛ ɛzulolɛ wɔ “Abulasa Ne ” anu a. Gyɛlɛmaya, Gyaheezeɛle, Dwoheenan, yɛɛ Dwozabade mɔɔ vi Gɛdɛla Yiluzae, Gyɛlemo, Bialaya, Hyamalaya, yɛɛ Hyɛfataya mɔɔ vi Halefe Ɛlekeena, Yehyaya, Azalii, Dwoyizɛ, yɛɛ Gyahyɔbɛyam mɔɔ vi Kɔla abusua nu Dwoyila nee Zɛbadaya mɔɔ bɛ ze a le Gyɛloham mɔɔ vi Gidɔ la.

⁸Akee Gaade abusua ekpunli ne anu amra bie mɔ mɔɔ anwo yɛ se kpalɛ la rale Devidi anwo ɛkɛ ne wɔ ye ɛvealeka ne wɔ ɛsɛlɛ ne azo. Menli ne ze konle nye zo kpalɛ na bɛbe atwɛ ɛdolɛ nee bɛ sa nu enyinlike konle nu. Bɛ nyunlu ɛzulolɛ le kɛ awenade, yɛɛ bɛ nwo yɛ ndɛ kɛ boka zo kɛtɛboɛ.

⁹Bɛ kpanyinli a le Yizɛ, mɔɔ doa ye la a le Obadaya, Yilayabe tɔ zolɛ nsa, Mehyemana tɔ zolɛ nna, Gyɛlɛmaya tɔ zolɛ nnu, Ateeyae tɔ zolɛ nsia, Yilayɛle tɔ zolɛ nsuu, Dwoheenan tɔ zolɛ mɔtwɛ, Ɛlezeebade tɔ zolɛ ngɔnla, Gyɛlɛmaya tɔ zolɛ bulu, yɛɛ Makebeenae tɔ zolɛ bulu nee ko.

¹⁴Gaadema ɛhye mɔ ɛnee le Gaade ɛlɔne nu mgbanyinli mɔɔ ko nea ɛlɔnema mɔɔ anloa dwu apenle la anwo zo. Mɔɔ le safohyenle kakula la nea ɛlɔnema ɛya ko anwo zo.

¹⁵Siane ne mɔɔ lumua la anu, mɔɔ ɛnee Azule Dwɔdan ne ɛyi ɛbu aze la yɛɛ bɛpɛle azule ne a. Bɛhɔhanle menli mɔɔ wɔ mbɔnza ne mɔ anu, aduduleɛ nee adɔleɛ la bɛguale ɛbɔ nu.

¹⁶Kenle ko menli bie vi Bɛngyaman nee Dwuda mbusua ekpunli ne mɔ anu hɔle Devidi ɛkɛ ne wɔ ɛleka mɔɔ ɔde na bɛbɔ ɔ nwo bane la.

¹⁷Devidi nwunle bɛ la ɔhɔle kɛ ɔkayia bɛ. Na ɔzele bɛ kɛ, “Saa bɛra kɛ agɔnwolɛma mɔɔ ɛra baboa me la a, ɛnee melie bɛ; me nee bɛ le ko. Na saa bɛra kɛ bɛbaye me bɛamaa me kpɔvolɛma, wɔ mekɛ mɔɔ metɛyɛle ɛtane la ɛdeɛ a, ɛnee yɛ ze mɔ Nyamenle ne ɛdua bɛ kakɛ.”

¹⁸Ɛkɛ ne ala Nyamenle Sunsum ne dwule Ameesae mɔɔ le “Abulasa Ne” kpanyinli la anwo zo na ɔzele kɛ, “O Devidi, yɛle wɔ ɛdeɛ, O Gyɛsi ara, yɛ nee wɔ le ko! Anzonudwolɛ ɛha wɔ, anzonudwolɛ ɛha wɔ boavolɛma! Wɔ Nyamenle ne li ɛ nzi.” Akee Devidi liele bɛ na ɔyɛle bɛ ye ɛlɔne nu safohyenlema.

¹⁹Mekɛ bie Devidi nee ye ɛlɔnema hɔle kɛ bɛkaboa Filisitiama bɛamaa bɛaho bɛatia Sɔɔlo. Ɛlɔnema vi Manasɛ abusua ekpunli ne anu rale Devidi afoa. Noko akee Filisitiama ammaa Devidi amboa bɛ, ɔluakɛ Filisitia arelemgbunli zulole na bɛnyianle adwenle kɛ, “Ɔkɛbɔ yɛ tɔ! Sonla ɛyeka, ɛhyema ɛnee yezia yehɔ ɔ menle Sɔɔlo anwo lɔ.” Ɛhye ati bɛanlie ye.

²⁰Na mɔɔ ɔsia yeahɔ Zekelage la yɛɛ Manasɛma ɛhye mɔ rabokale ɔ nwo a. Bɛmɛ a le: Adena, Dwozabade, Gyɛdeyeeyɛle, Maekeɛle, Dwozabade, Ɛlaehu, yɛɛ Zelɛtae. Bɛle safohyenlema mɔɔ ko biala nea Manasɛ ɛlɔnema apenle nwo zo a.

²¹Bɛboale Devidi bɛmanle ɔzile nwule akpolane aze, ɔluakɛ bɛle menli mɔɔ anwo yɛ se kpalɛ a. Nzinlii bɛyɛle bɛ safohyenlema wɔ Yizilayɛ ɛlɔnema ne anu.

²²Alehyenlɛ biala menli rabokale Devidi ɛlɔnema ne anwo hɔdwule kɛ akee ɛlɔne ne yɛle kpole kpalɛ kɛ Nyamenle ɛlɔnema la.

²³Mekɛ mɔɔ Devidi wɔ Hibulɔn la, menli dɔɔnwo mɔɔ ze konle nye zo la rabokale ye ɛlɔnema ne anwo kɛ bɛbaboa bɛamaa bɛadu Sɔɔlo na bɛava belemgbunlililɛ ne bɛamaa Devidi, kɛmɔ Ɛdɛnkɛma ɛwɔkɛ ne se la. Bɛ dodo ɛne: Dwudama: menli apenle nsia, ɛya mɔtwɛ mɔɔ to atwɛ na bɛdɛ enyinlike; Semɛyɔnoma: menli apenle nsuu, ɛya ko; Livaema: menli apenle nna, ɛya nsia; Aalɔn abo zo amra mɔɔ li Gyɛhɔyada anzi la le apenle nsa, ɛya nsuu; Kpavolɛ katakyie Zeedɔko sua nu amra: menli abulanwiɔ nee nwiɔ; Bɛngyamanema (Sɔɔlo ɔdaye ye mbusuafoɔ): menli apenle nsa (menli ɛhye mɔ anu dɔɔnwo kpalɛ lile Sɔɔlo anzi); Yifelaemma: apenle ngoko abulanwiɔ, ɛya mɔtwɛ, mɔɔ di munli wɔ bɛ mbusua ekpulike ne mɔ anu la; Manasɛ Adɔleɛma: menli apenle ngoko bulu nee mɔtwɛ. Bɛkpale nu bɛyele bɛ kɛ bɛhɔboa bɛmaa bɛzie Devidi belemgbunli. Yesakaama: safohyenlema ɛya nwiɔ nee bɛ ɛlɔnema mɔɔ wɔ bɛ bo la. (Safohyenlema ɛhye mɔ ze debie mɔɔ ɔwɔ kɛ Yizilayɛma yɛ a, yɛɛ eza bɛze mekɛ kpalɛ mɔɔ ɔwɔ kɛ bɛfa bɛ(...)

³⁸Ɛlɔnema ɛhye mɔ amuala gyinlanle ye mrenyazo, na bɛrale Hibulɔn kɛ bɛbava Devidi bɛazie Yizilayɛ maanle ne belemgbunli. Yizilayɛma kɔsɔɔti noko nee bɛ yɛle adwenle ko kɛ ɔwɔ kɛ bɛfa Devidi bɛsie belemgbunli.

³⁹Bɛlile kenle nsa wɔ Devidi anwo ɛkɛ ne, bɛlile, bɛnlonle,

⁴⁰ɔluakɛ menli mɔɔ wɔ Yesakaa, Zɛbulɛn yɛɛ Nafetalae la vale aleɛ ngakyile mɔɔ le kɛ ɛdɔkɛ, feege ma, keeki, nwanye, nwole, yɛɛ vanye ma welera dɔɔnwo kpalɛ wulale bɛ ahodoku ahodoku guale bɛ asoaso, afunlumu, mgbɔnwɔndua, yɛɛ nlankɛ nyinli nzi rɛlɛle bɛ. Eza bɛrɛlɛle bɛ nlankɛ nee mboane dɔɔnwo kɛ bɛhu bɛ bɛli, ɔluakɛ ɛnee anyelielɛ ɛra Yizilayɛ.