Read Nzema 1 Edk 15 Bible Online

1 Edk 15 - Nzema bible

1 Edk 15

¹Devidi sisile ɔdaye ɔ ti anwo azua wɔ Devidi Suakpole zo. Eza ɔzieziele ɛleka mɔɔ ɔbava Nyamenle Ngyekyeleɛ Ɛlɛka ne yeazie la, na ɔzile ndanlɛ sua wɔ ɛkɛ ne mɔɔ bɛbava Ɛlɛka ne bɛazie nu a.

²Akee ɔhanle kɛ, “Livaema ala a ɔwɔ kɛ soa Ngyekyeleɛ Ɛlɛka ne a. Awie biala ɛnzoa bie, ɔboalekɛ bɛmɛ yɛɛ Ɛdɛnkɛma yele bɛ kɛ bɛzoa na bɛzonle ye dahuu a.”

³Akee Devidi boɔboale Yizilayɛma amuala anloa wɔ Gyɛlusalɛm kɛ bɛkava Nyamenle Ngyekyeleɛ Ɛlɛka ne bɛarazie ye ɛleka ne mɔɔ yeziezie yemaa ye la.

⁴Eza ɔzoanle ɔmanle bɛhɔvale Aalɔn abo zo amra ne nee Livaema.

⁵Yuleɛle a vi Kohate abusua nu rale a. Ɔlile ye abusua ne anu menli ɛya ko abulanwiɔ ati.

⁶Asaya lile Mɛlɛlae abusua ne ati, ɔlɛ menli ɛya nwiɔ abulanwiɔ.

⁷Dwowɛle vi Gɛhyɔn abusua nu rale, ɔlile menli ɛya ko abulasa ati.

⁸Hyɛmaya vi Yilaezeefan abusua nu rale, ɔlile menli ɛya nwiɔ ati.

⁹Yilayɛle vi Hibulɔn abusua nu rale, ɔlile menli abulatwɛ ati,

¹⁰yɛɛ Amenadabe lile Ɛzeɛle abusua ne ati, ɔlɛ menli ɛya ko bulu nee nwiɔ.

¹¹Akee Devidi vɛlɛle sɛlɛvolɛma Zeedɔko nee Abayata, yɛɛ Livaema nsia, Yuleɛle, Asaya, Dwowɛle, Hyɛmaya, Yileɛle, yɛɛ Amenadabe.

¹²Ɔzele Livaema ne mɔ kɛ, “Bɛmɛ a bɛle Livae mbusua mgbanyinli a, bɛzie bɛ nwo nwuanzanwuanza na bɛnlea bɛmaa bɛ mediema Livaema mɔɔ ɛha la ɛzie bɛ nwo nwuanzanwuanza na bɛhɔva Ɛdɛnkɛma, Yizilayɛ Nyamenle ne Ngyekyeleɛ Ɛlɛka ne bɛrazie ɛleka mɔɔ meziezie memaa ye la.

¹³Kɛmɔ ɛkenle ɛnee bɛnle ɛkɛ ne na bɛazoa la ati, Ɛdɛnkɛma yɛ Nyamenle ne deanle yɛ kɛ yɛanzonle ye wɔ adenle kpalɛ mɔɔ ɔwɔ kɛ yɛdua nu yɛsonle ye la anu.”

¹⁴Na sɛlɛvolɛma ne nee Livaema ne ziele bɛ nwo nwuanzanwuanza, amaa bɛahɔva Yizilayɛ Ɛdɛnkɛma Nyamenle ne Ngyekyeleɛ Ɛlɛka ne.

¹⁵Livaema ne vale mbaka sosɔle ye na bɛzoale ye bɛ kɔme zo, kɛmɔ Ɛdɛnkɛma luale Mosisi anwo zo hanle la.

¹⁶Devidi zele Livae mbusua mgbanyinli ne mɔ kɛ bɛye Livaema ne bie mɔ bɛmaa bɛdo edwɛne, bɛva getaa nee sɔnwosɔnwo bɛbɔ agole anyelielɛ nu bɛdoa bɛ.

¹⁷Bɛnleanle edwɛndolɛ mbusua ne mɔ anu la bɛyele menli ɛhye mɔ kɛ bɛbɔ ayera sɔnwosɔnwo: Dwowɛle ara Himan, ye busuanli Bɛlikaya ara Esafe, yɛɛ Kuhyaya ara Yitan mɔɔ vi Mɛlɛlae abusua nu la. Bɛyele Livaema ɛhye mɔ noko kɛ bɛboa bɛ, na bɛbɔ getaa ane katekate ne: Zɛkalaya, Gyeezeɛle, Hyɛmaelamo, Gyɛhayɛle, Ɛnnae, Yilayabe, Meeyasaya, yɛɛ Bɛnaya. Bɛdabɛ mɔɔ bɛbɔ getaa ane kpole ne la a le Livaema ɛhye mɔ: Matetaya, Yilefɛlihu, Mekenaya, Azazaya, Ɛzonlenlɛ Sua ne sinzavolɛma, Obɛde Yidɔm, yɛɛ Gyiyayɛle.

²²Kɛmɔ ɛnee Kɛnanaya ze edwɛndolɛ nye zo kpalɛ la ati, bɛyele ye bɛmanle ɔlile edwɛndolɛma ne ati.

²³Bɛyele Bɛlikaya nee Ɛlekeena, yɛɛ Obɛde Yidɔm nee Gyihaya kɛ bɛzinza Ngyekyeleɛ Ɛlɛka ne; yɛɛ sɛlɛvolɛma Hyɛbanaya, Dwohyafate, Nɛtanɛle, Ameesae, Zɛkalaya, Bɛnaya, yɛɛ Ɛleyizɛ kɛ bɛbɔ aweɛne ndendenle ne mɔ bɛli Ngyekyeleɛ Ɛlɛka ne anyunlu.

²⁵Yemɔti Belemgbunli Devidi, Yizilayɛ mbusua mgbanyinli, yɛɛ ɛlɔnema safohyenle mgbanyinli hɔle Obɛde Yidɔm sua nu kɛ bɛkava Ngyekyeleɛ Ɛlɛka ne, na ɔdɛlale ɛvoyialilɛ.

²⁶Na bɛvale nlankɛ nsuu nee mboane nsuu bɛbɔle azu bɛmanle Nyamenle, ɔluakɛ ɔboale Livaema ne mɔɔ zoale Ɛdɛnkɛma Ngyekyeleɛ Ɛlɛka ne la.

²⁷Devidi wulale “Lenen” tɛladeɛ kɛnlɛma bie. Zɔhane tɛladeɛ ne ala bie yɛɛ menli mɔɔ bɔ agole ne la, Kɛnanaya mɔɔ yemɔ a ɔli bɛ ti nee Livaema mɔɔ zo Ɛlɛka ne la wulale a. Devidi eza wulale Nyamenle ɛzonlenlɛ tɛladeɛ ne mɔɔ bɛfɛlɛ ye Yifɔdo la.

²⁸Akee Yizilayɛma kɔsɔɔti vale anyelielɛ, aweɛnebɔlɛ, mɛne, sɔnwosɔnwo nee getaa bɔle agole lile Ɛdɛnkɛma Ngyekyeleɛ Ɛlɛka ne anzi toonwo bɛradwule Gyɛlusalɛm.

²⁹Mɔɔ bɛ nee Ɛdɛnkɛma Ngyekyeleɛ Ɛlɛka ne dwule Devidi Suakpole ne azo la, Belemgbunli Sɔɔlo ara raalɛ Maekale nleanle ye nvɛnzɛlɛ ne anu na ɔnwunle kɛ Belemgbunli Devidi anye ɛlie na ɔlɛwuluwulu ɔsi agole la, ɔvale ɛya kpole.