Read Nzema 1 Edk 16 Bible Online

1 Edk 16 - Nzema bible

1 Edk 16

¹Bɛvale Ngyekyeleɛ Ɛlɛka ne bɛhɔziele ndanlɛ sua ne mɔɔ Devidi ɛzi ɛmaa ye la anu. Na bɛbɔle ɛyelalɛ azu nee anzonudwolɛ azu bɛmanle Nyamenle.

²Devidi wiele azu ne bɔ la, ɔyilale menli ne kɔsɔɔti wɔ Ɛdɛnkɛma duma nu,

³na ɔhyɛle aleɛ ɔmanle bɛ muala, ɔmanle Yizilayɛ raalɛ ko nee nrenya ko biala kpanwo kunguma ko, nane ndondo ekyi, yɛɛ vanye ma welera.

⁴Devidi yele Livaema bie mɔ kɛ bɛgyinla Ngyekyeleɛ Ɛlɛka ne anyunlu na bɛli menli ne ati bɛmaa bɛdo moyɛlɛ nee ayɛlɛyelɛ edwɛne bɛmaa Ɛdɛnkɛma, Yizilayɛ Nyamenle ne, wɔ mekɛ biala mɔɔ bɛkɛra ye ɛzonlenlɛ la.

⁵Esafe a lile Livaema ekpunli zɔhane ati a, yɛɛ Zɛkalaya a le ye boavolɛ a. Akee ɔwɔ kɛ Gyiyayɛle, Hyɛmaelamo, Gyɛhayɛle, Matetaya, Yilayabe, Bɛnaya, Obɛde Yidɔm, yɛɛ Gyiyayɛle a bɔ getaa nee ahenle ne mɔ a. Esafe a ɔwɔ kɛ bɔ sɔnwosɔnwo ne a,

⁶yɛɛ ɔwɔ kɛ sɛlɛvolɛma nwiɔ, Bɛnaya nee Gyaheezeɛle bɔ aweɛne ndendenle wɔ Nyamenle Ngyekyeleɛ Ɛlɛka ne anyunlu dahuu.

⁷Kenle ko zɔhane a Devidi lumuale vale edwɛndolɛ gyima ne manle Esafe nee ɔ gɔnwo mɔ Livaema kɛ bɛdo moyɛlɛ nee ayɛlɛyelɛ edwɛne bɛmaa Ɛdɛnkɛma a.

⁸Bɛyɛ Ɛdɛnkɛma mo, bɛbɔ ye duma, bɛha ye nyɛleɛ bɛhile maanle maanle.

⁹Bɛdo edwɛne bɛmaa ye, bɛdo ayɛlɛyelɛ edwɛne bɛmaa ye, bɛha ye nwanwane gyima mɔɔ yeyɛ la!

¹⁰Bɛli fɛlɛko wɔ ye duma nwuanzanwuanza ne ati; bɛmaa bɛdabɛ mɔɔ bɛkpondɛ Ɛdɛnkɛma la anye ɛlie.

¹¹Bɛkpondɛ Ɛdɛnkɛma nee ye anwosesebɛ ne, bɛkpondɛ ɔ nyunlu dahuu.

¹²Bɛhakye ye nwanwane gyima mɔɔ yeyɛ, sɛkɛlɛneɛ mgbole mɔɔ yehile, nee ye ndɛnebualɛ,

¹³O bɛmɛ ye akɛlɛ Ebileham abo zo amra, nee Gyekɔbo abo zo amra mɔɔ yekpa nu yeye bɛ!

¹⁴Yemɔ a ɔle Ɛdɛnkɛma yɛ Nyamenle ne a; yemɔ a ɔbua ewiade amuala ndɛne a.

¹⁵Ɔkakye ye ngyekyeleɛ ne dahuu, ɔkakye ye edwɛkɛ mɔɔ ɔhanle awolɛndoazo apenle nzi,

¹⁶ɔkakye ngyekyeleɛ ne mɔɔ ɔ nee Ebileham yɛle, nee ye ɛwɔkɛ mɔɔ ɔbɔle Ayezeke.

¹⁷Ɔzile ye pi kɛ mɛla ɔmanle Gyekɔbo, kɛ ɔle ngyekyeleɛ mɔɔ bɛntulu ye ɔmaa Yizilayɛma,

¹⁸na ɔzele kɛ, “Mebava Keena azɛlɛ ne meamaa wɔ, kɛ ɔle wɔ agyadeɛ bɔkɔɔ.”

¹⁹Mekɛ mɔɔ ɛnee bɛ nwo anzo, na awie ɛmbu bɛ, bɛle adendulɛma,

²⁰bɛkpɔsɛkpɔsa maanle maanle zo, bɛvi belemgbunli maanle ko anu bɛkɔ ko anu la,

²¹Yeammaa awie adenle ansisi bɛ; bɛ ti, ɔdeanle arelemgbunli,

²²ɔzele kɛ, “Awie biala mmafa ɔ sa ka me menli ne, bɛmmafa bɛ sa bɛka me kpɔmanvolɛma ne!”

²³Ewiade amra, bɛdo edwɛne bɛmaa Ɛdɛnkɛma! Bɛbɔ ye ngoanelielɛ edwɛkpa ne nolo dahuu.

²⁴Bɛbɔ ye anyunlunyia ne nolo bɛhile maanle maanle, bɛbɔ ye nwanwane gyima ne mɔ nolo bɛhile menli kɔsɔɔti!

²⁵Ɔluakɛ Ɛdɛnkɛma le kpole, na ɔwɔ kɛ bɛye ye ayɛlɛ kpalɛ; ɔwɔ kɛ bɛsulo ye bɛtɛla nyamenle gyɛne gyɛne ne mɔ.

²⁶Maanle maanle kɔsɔɔti nyamenle ne mɔ le mmonle, noko Ɛdɛnkɛma a bɔle anwumaneamra a.

²⁷Kpoleyɛlɛ nee anyunlunyia ɛbɔ ɛyia ye, tumi nee anyelielɛ ɛyi ye Ɛzonlenlɛ Sua ne.

²⁸Ewiade amra amuala, bɛwula Ɛdɛnkɛma anyunlunyia, bɛwula ye anyunlunyia na bɛyeyɛ ye tumi ne!

²⁹Bɛmaa anyunlunyia mɔɔ fɛta Ɛdɛnkɛma la ɛha ye; bɛva azubɔdeɛ bɛrɛla ɔ nyunlu. Bɛzie bɛ nwo nwuanzanwuanza bɛyeyɛ Ɛdɛnkɛma, na bɛbɔ bɛ ti aze bɛmaa ye.

³⁰Aleɛabo amra, bɛdu bɛgua ɔ nyunlu; ɛnee azɛlɛ ye gyi kpundii, ɔle tuandu.

³¹Anwuma nee aze, bɛli fɛlɛko, bɛha bɛhile maanle maanle kɔsɔɔti kɛ, “Ɛdɛnkɛma le belemgbunli!”

³²Nyevile nee nuhua ninyɛne muala, bɛheha bɛ nwo; kpɔkɛ nee nuhua ninyɛne kɔsɔɔti, bɛli fɛlɛko.

³³Akee kpɔkɛ nu mbaka bava anyelielɛ ado edwɛne wɔ Ɛdɛnkɛma anyunlu, ɔluakɛ Ɛdɛnkɛma ɛlɛba arabua ewiade amra ndɛne.

³⁴ Bɛyɛ Ɛdɛnkɛma mo, ɔboalekɛ Ɛdɛnkɛma le kpalɛ, ye ɛhulolɛ kpundii ne wɔ ɛkɛ ne dahuu. Gyɛ 33.11

³⁵Bɛmaa yɛha kɛ, “O Nyamenle, yɛ Ngoanedievolɛ, die yɛ; boɔboa yɛ nloa na die yɛ fi maanle maanlema asa anu, amaa yɛayɛ wɔ mo yɛaye wɔ duma nwuanzanwuanza ne ayɛlɛ dahuu.”

³⁶Bɛye Ɛdɛnkɛma, Yizilayɛ Nyamenle ne ayɛlɛ, bɛye ye ayɛlɛ, ɛnɛ nee dahuu. Na menli ne amuala liele zolɛ “Amen,” na bɛyele Ɛdɛnkɛma ayɛlɛ.

³⁷Belemgbunli Devidi akee yele Esafe nee ɔ gɔnwo mɔ Livaema ne ziele ɛkɛ ne kɛ bɛmɛ a ɛzonlenlɛ biala mɔɔ bɛyɛ ye wɔ Ndanlɛ Sua ne mɔɔ Ngyekyeleɛ Ɛlɛka ne gyi nu la anu la wɔ bɛ sa nu a. Ɔwɔ kɛ bɛyɛ bɛ gyima ne alehyenlɛ biala.

³⁸Gyɛdutɛn ara Obɛde Yidɔm nee ye abusua ne anu amra abulasia nee mɔtwɛ a ɔwɔ kɛ boa bɛ a. Akee Hosa nee Obɛde Yidɔm a nlenkɛ ne mɔ ɛzinzalɛ wɔ bɛ sa nu a.

³⁹Sɛlɛvolɛ Zeedɔko nee ɔ gɔnwo mɔ sɛlɛvolɛma yɛɛ Ɛdɛnkɛma ɛzonlenlɛ wɔ Gebɛyɔn wɔ bɛ sa nu a.

⁴⁰Nwonlomɔ nee nɔsolɛ biala ɔwɔ kɛ bɛbɔ ɛyelalɛ azu wɔ ɛyelalɛ azubɔdeɛ ɛkponle ne azo bɛmaa Ɛdɛnkɛma, kɛmɔ bɛhɛlɛ ye wɔ Mɛla ne mɔɔ Ɛdɛnkɛma vale manle Yizilayɛma la anu la.

⁴¹Bɛdabɛ mɔɔ bɛboa la a le Himan nee Gyɛdutɛn, yɛɛ bɛdabɛ mɔɔ bɛboɔboale bɛyele bɛ, bɛbobɔle bɛ aluma kɛ bɛyɛ Ɛdɛnkɛma mo la, ɔluakɛ ye ɛhulolɛ kpundii ne wɔ ɛkɛ dahuu.

⁴²Himan nee Gyɛdutɛn a aweɛne ndendenle ne nee sɔnwosɔnwo ne mɔ nee ninyɛne mɔɔ ɛha mɔɔ bɛbɔ wɔ mekɛ mɔɔ bɛlɛto ayɛlɛyelɛ edwɛne la wɔ bɛ sa nu a. Gyɛdutɛn abusua nu amra yɛɛ nlankɛ ɛzinzalɛ gyima ne wɔ bɛ sa nu a.

⁴³ Akee awie biala hɔle sua nu, na Devidi ɔdaye ɔvale ye nyilalɛ ne ɔhɔle ye sua nu.