Read Nzema 1 Edk 17 Bible Online

1 Edk 17 - Nzema bible

1 Edk 17

¹Belemgbunli Devidi akee ɛbu ye awuke na ɔde nu. Kenle ko ɔzoanle ɔmanle bɛhɔvɛlɛle Nyamenle kpɔmanvolɛ Neetan na ɔzele ye kɛ, “Nea, mame mede sua mɔɔ bɛva sida mbaka bɛzi la anu, na Ɛdɛnkɛma Ngyekyeleɛ Ɛlɛka ne, yemɔ ɔgyi ndanlɛ sua nu.”

²Neetan buale ye kɛ, “Yɛ mɔɔ wɔ wɔ adwenle nu la na Nyamenle nee wɔ lua.”

³Noko kenle ko ne nɔe ne Nyamenle zele Neetan kɛ,

⁴“Kɔha kile me sonvolɛ Devidi kɛ, ‘Kɛ mese la ɛne: Tɛ wɔmɔ yɛɛ ɛsi Ɛzonlenlɛ Sua wɔamaa meadɛnla nuhua a.

⁵Ɔluakɛ ɔvi mekɛ mɔɔ menyele Yizilayɛma menvile Yigyibiti toonwo mɔɔ yeradwu ɛnɛ la, metɛtɛnlanle ɛzonlenlɛ sua nu ɛlɛ. Ndanlɛ sua nu ala yɛɛ dahuu mede a, yɛɛ bɛtwili me bɛba a.

⁶Me nee Yizilayɛma yɛ adendulɛ ne mɔ kɔsɔɔti anu, metɛbizale bɛdabɛ mɔɔ meye bɛ kɛ bɛli menli ne ati la bie kɛ duzu ati yɛɛ ɛtɛsisile sida mbaka ɛzonlenlɛ sua ɛtɛmanle me a.’

⁷“Yemɔti ka kile me sonvolɛ Devidi kɛ, ‘Medame, Tumivolɛ Ɛdɛnkɛma, meka meahile ye kɛ: Ɛnee ɛka mboane wɔ fienemgbole nu yɛɛ menvale wɔ kɛ ɛrazie me menli Yizilayɛma a.

⁸Ɛleka biala mɔɔ ɛhɔle la me nee wɔ a hɔle a. Memaa wɔli wɔ kpɔvolɛma amuala anwo zo konim. Akee mebamaa wɔanyia duma kpole kɛ menli mgbole mgbole mɔɔ wɔ ewiade ye anu la.

⁹Meva ɛleka memaa me menli Yizilayɛma na meva bɛ megua zolɛ kɛ bɛdɛnla ɛkɛ, mɔɔ awie ɛnrɛsisi bɛ bieko ɛlɛ a. Sumunli kɛ bɛradɛnlanle azɛlɛ ye azo la, menli atisesebɛma bie kɛ zo konle doa bɛ ala ɛne. Ɛhye ɛnrɛzi bieko. Mebɔ wɔ ɛwɔkɛ kɛ mebamaa wɔali wɔ kpɔvolɛma anwo zo konim na meamaa ɛ bo zo amra adɛlɛ.

¹¹Saa ɛwu a, mebamaa ɛ kunlu mralɛ mrenya ne mɔ ko ayɛ belemgbunli, na ye belemgbunlililɛ ne bayɛ kpole.

¹²Yemɔ yɛɛ mebamaa yeazi Ɛzonlenlɛ Sua yeamaa me a, na mebanlea noko kɛ ye belemgbunlililɛ ne gyi kpundii dahuu.

¹³Mebayɛ ɔ ze na yeayɛ me ra. Menrɛgyakyi ɔ nzi ɛlilɛ kɛmɔ mengyakyile Sɔɔlo la. Menyele Sɔɔlo ɛkɛ ne, amaa wɔali belemgbunli.

¹⁴Mebava ɛ ra zɔhane meayɛ me menli ne amuala kpanyinli na yeanlea me belemgbunli maanle ne azo dahuu. Ye belemgbunlililɛ ɛnrɛbɔ aze ɛlɛ!’ ”

¹⁵Neetan hanle edwɛkɛ biala mɔɔ Nyamenle hanle hilele ye nee mɔɔ ɔyele ɔhilele ye la amuala hilele Devidi.

¹⁶Akee Belemgbunli Devidi hɔle Ɛdɛnkɛma Ɛzonlenlɛ Ndanlɛ Sua ne anu na ɔdɛnlanle aze, na ɔzɛlɛle kɛ, “O Ɛdɛnkɛma Nyamenle, na mame a le nwane, yɛɛ me sua nu amra a le nwane mɔ, mɔɔ wɔyɛ ninyɛne mgbole ɛhye mɔ wɔmaa me a?

¹⁷Noko ɛhye mɔ bɔbɔ le ɛ nye zo debie ekyi, O Nyamenle, eza wɔbɔ me ɛwɔkɛ mgbole wɔ me bo zo amra anwo wɔ ɛvolɛ dɔɔnwo mɔɔ bara la anu. Wɔmɔ Ɛdɛnkɛma Nyamenle, dahuu ɛyɛ me sonlakpole.

¹⁸Duzu edwɛkɛ bɔbɔ yɛɛ akee menga a. Ɛze me kpalɛ kpalɛ, yɛɛ eza dahuu ɛbu wɔ sonvolɛ ye bie.

¹⁹Ɛdawɔ a wɔhyehyɛ a yɛɛ ɔle wɔ ɛhulolɛ kɛ wɔyɛ ɛhye wɔmaa me, amaa meanwu kenlebie me kpoleyɛlɛ.

²⁰Ɛdɛnkɛma, awie biala nee wɔ ɛnzɛ. Yɛze dahuu kɛ ɛdawɔ ala yɛɛ ɛle Nyamenle a.

²¹Maanle biala ɛnle ewiade ye anu mɔɔ nee Yizilayɛ sɛ a. Ɛyele bɛ ɛvile akɛlɛzonlenlɛ nu na ɛrayɛle bɛ wɔ menli. Ninyɛne mgbole mɔɔ yɛ nwanwane mɔɔ ɛyɛle ɛmanle bɛ la manle wɔ duma kpondenle ewiade ye. Ɛliele wɔ menli ne ɛvile Yigyibiti na ɛvoanle maanle maanle mɔɔ ɛha la wɔ mekɛ mɔɔ wɔ menli ne ɛlɛba la.

²²Wɔyɛ Yizilayɛma wɔ menli dahuu, na wɔmɔ Ɛdɛnkɛma, wɔyɛ bɛ Nyamenle.

²³“O Ɛdɛnkɛma, maa ɛwɔkɛ mɔɔ wɔbɔ me nee me bo zo amra la amuala ɛyɛ zɔhane, na yɛ mɔɔ wɔze kɛ ɛkɛyɛ la.

²⁴Wɔ duma bayɛ kpole, na menli aha ye dahuu kɛ, ‘Tumivolɛ Ɛdɛnkɛma a le Yizilayɛ Nyamenle a.’ Na ɛbamaa me belemgbunlililɛ ne adɛnla ɛkɛ ne dahuu.

²⁵Me Nyamenle, kɛmɔ wɔye ɛhye mɔ amuala wɔhile medame, wɔ sonvolɛ, na wɔha wɔhile me kɛ ɛbamaa me bo zo amra ayɛ arelemgbunli la ati a menyia anwosesebɛ melɛyɛ nzɛlɛlɛ ɛhye a.

²⁶Ɛdawɔ Ɛdɛnkɛma a ɛle Nyamenle a, yɛɛ wɔbɔ me ɛwɔkɛ kpole ɛhye a.

²⁷Mesɛlɛ wɔ, yila me bo zo amra, amaa bɛazɔ ɛ nye dahuu. Ɛdɛnkɛma, ɛdawɔ a wɔyila bɛ a, na wɔ nyilalɛ ne nee bɛ badɛnla dahuu.”