Read Nzema 1 Edk 18 Bible Online

1 Edk 18 - Nzema bible

1 Edk 18

¹Mekɛ guale nu la Belemgbunli Devidi hɔtetale Filisitiama ɔ nee bɛ honle na ɔlile bɛ nwo zo konim. Ɔliele sua ne mɔɔ bɛfɛlɛ ye Gate la nee namunamu mɔɔ zuozua ye la ɔvile bɛ sa nu.

²Eza ɔlile Mowabema anwo zo konim na ɔmanle bɛyɛle ye ngɛkɛlɛ na bɛduale adwule bɛmanle ye.

³Akee Belemgbunli Devidi hɔtetale Belemgbunli Hadadizɛ mɔɔ sie Selea maanle ne mɔɔ bɛfɛlɛ ye Zoba, mɔɔ zua Heemate maanzinli ne la, ɔboalekɛ ɛnee Hadadizɛ ɛlɛbɔ mɔdenle araze Yufileti sɔlɔ ahɔva ɛkɛ ne azɛlɛ ne.

⁴Devidi zale ye liele ye konle ehwili ne mɔ anu apenle ko, ɔhyele ye ɛlɔnema mɔɔ tɛnla mgbɔnwɔ zo ko la apenle nsuu, yɛɛ ɛlɔnema mɔɔ dua aze la apenle ngoko abulanwiɔ. Ɔvale mgbɔnwɔ mɔɔ sa konle ehwili ɛya ko twe la na ɔbubule mɔɔ hale la ndwɛlɛ.

⁵Seleama mɔɔ wɔ Dɛmasekɛse la manle ɛlɔnema hɔle kɛ bɛhɔboa Belemgbunli Hadadizɛ, na Devidi nee bɛ bɔle ye zo na ɔhunle nuhua apenle ngoko abulanwiɔ nee nwiɔ.

⁶Akee ɔvale ɛlɔnema ɔhɔguale bɛ azɛlɛ ne azo ɔmanle menli ne yɛle ye ngɛkɛlɛ na bɛduale adwule bɛmanle ye. Ɛdɛnkɛma manle Devidi lile konim wɔ konle biala anu.

⁷Devidi honle liele ezukoa nvutuke enyinlike ne mɔ mɔɔ Hadadizɛ safohyenlema ne mɔ dedɛ la na ɔvale bɛ muala ɔrale Gyɛlusalɛm.

⁸Eza ɔvale kɔbele dɔɔnwo bie ɔvile azuamgbole Tebeha nee Kɛn ɔhɔle. Hadadizɛ a sie azuamgbole ɛhye mɔ a. (Nzinlii Sɔlɔmɔn vale kɔbele ɛhye mɔ yɛle angola, mpila ne mɔ nee ahyɛnze ne mɔ mɔɔ wɔ Ɛzonlenlɛ Sua ne anu la.)

⁹Belemgbunli Toyi mɔɔ wɔ Heemate la dele kɛ Devidi ɛbo Hadadizɛ nee ye ɛlɔnema ne amuala.

¹⁰Yemɔti ɔzoanle ɔ ra Dwolam kɛ ɔhɔbiza Belemgbunli Devidi ahye na ɔyɛ ye mo kɛ yeli Hadadizɛ anwo zo konim a. Toyi nee Hadadizɛ ɛho fane dɔɔnwo. Dwolam vale ezukoa nvutuke, dwɛtɛ fufule nee kɔbele ahyɛlɛ ninyɛne rɛlɛle Devidi.

¹¹Belemgbunli Devidi dule ninyɛne ɛhye mɔ ziele ahane kɛ bɛva bɛboka ezukoa nvutuke nee dwɛtɛ fufule mɔɔ ɔzale maanle maanle mɔɔ ɔlile bɛ nwo zo konim la ɔliele la anwo bɛva bɛzonle Nyamenle. Ɔliele ezukoa nvutuke ne nee dwɛtɛ fufule ne mɔ ɔvile maanle maanle ɛhye mɔ ɛkɛ: Yidɔm, Mowabe, Amɔn, Filisitia, yɛɛ Amalɛke.

¹²Abehyae mɔɔ ɔ nli a le Zɛluaya la nee Yidɔmma honle wɔ Ngyenle Bɔnza ne anu na ɔhunle bɛ nuhua apenle ngoko bulu nee mɔtwɛ.

¹³Ɔyɛle ye ɛlɔnema azokoɛleɛ dɔɔnwo wɔ Yidɔm amuala, na ɔmanle menli mɔɔ wɔ maanle ne anu la yɛle Belemgbunli Devidi ngɛkɛlɛ. Ɛdɛnkɛma manle Devidi lile konim wɔ ɛleka biala.

¹⁴Devidi ziele Yizilayɛma amuala na ɔnleanle ɔmanle awie biala akunlu dwole ɔ nwo mɔɔ bɛnsisi bɛ nuhua biala a.

¹⁵Abehyae adiema Dwowabe a le ɛlɔnema ne safohyenlema kpanyinli a. Ahaelɛde ara Gyɛhɔhyafate le kɛlɛhɛlɛvolɛ, ɔnea ɛlɔnema ne ninyɛne zo.

¹⁶Ahaetɛbe ara Zeedɔko nee Abayata ara Ahemɛlɛke le sɛlɛvolɛma. Sɛlaya le kɔɔto kɛlɛhɛlɛvolɛ;

¹⁷Gyɛhɔyada ara Bɛnaya a nea Devidi sinzavolɛma anwo zo a; yɛɛ Belemgbunli Devidi amra mrenya ne mɔ dedɛ gyima nu gyinlabelɛ mgbole.