Read Nzema 1 Edk 20 Bible Online

1 Edk 20 - Nzema bible

1 Edk 20

¹ Nyenyensuo mekɛ ne, mɔɔ le ɛvolɛ biala anu mekɛ mɔɔ arelemgbunli fa kɔ konle la dwule bieko la, Dwowabe vale ye ɛlɔnema ne hɔle Amɔnoma anwo zo arɛlevilɛ nu. Belemgbunli Devidi ɛnee wɔ Gyɛlusalɛm; yeangɔ bie. Bɛbɛnrale bɛyiale suakpole Relaba, bɛvale konle bɛdoale bɛ, na bɛbɔle sua ne tɔɔ.

²Amɔnoma amonle ne mɔɔ bɛfɛlɛ ye Molɛke la lɛ ye ezukoa nvutuke belemgbunli kyɛlɛ mɔɔ ɛto ye tone nu a ye ɛnlomboɛ le kilo abulasa nee nna a. Kpɔba bie vea kyɛlɛ ne anu, na Devidi dule wulale ɔdaye ye belemgbunli kyɛlɛ ɛdeɛ ne anu. Eza ɔvale ninyɛne dɔɔnwo ɔvile sua ne azo ɔhɔle.

³Ɔhyele menli ɔvile suakpole ne azo ɔhɔle na ɔvale selada, koanlɛ mɔɔ bɛva mbulalɛ bɛbɔ la, yɛɛ akuma ɔwulale bɛ sa nu ɔmanle bɛyɛle gyima. Menli mɔɔ ɔhyele bɛ wɔ Amɔn azua mɔɔ hale la azo la, zɔhane ala a ɔyɛle bɛ a. Akee ɔ nee ye menli ne ziale rale Gyɛlusalɛm.

⁴Nzinlii konle zile Yizilayɛma nee Filisitiama avinli wɔ Gizɛ. Konle ɛhye anu a Sebɛkae mɔɔ vi Huhya la hunle nrenya kakanyinli bie mɔɔ bɛfɛlɛ ye Sepueeyae la, na bɛlile Filisitiama anwo zo konim.

⁵Bɛ nee Filisitiama eza nyianle konle bieko, na Gyeeyɛɛ ara Ɛleheenan hunle Golayate mɔɔ vi Gate la adiema Laamae. Ye atwɛ ne mɔɔ ɛnee ɔlɛ la baka ne kpole le kɛ mgbunla.

⁶Konle bieko zile Gate. Nrenya kakanyinli bie mɔɔ vindele ɛkɛ ne la, ɔ sa mrɛlɛsɛka le nsia nsia yɛɛ ɔ gyakɛ mrɛlɛsɛka noko le nsia nsia. Mɔmoane menli kakanyinli ne mɔ abo zo amra ne bie ɔ.

⁷Ɔhehanle mgbole ɔtietiale Yizilayɛma na Devidi adiema Hyama ara Dwɔnatan hunle ye.

⁸Menli kakanyinli nsa ɛhye mɔ mɔɔ Devidi nee ye menli ne hunle bɛ la le Gate kakanyinlima ne mɔ abo zo amra.