Read Nzema 1 Edk 21 Bible Online

1 Edk 21 - Nzema bible

1 Edk 21

¹Akee Seetan dwazole kɛ ɔfa ngyegyelɛ yeara Yizilayɛ, na ɔlile Devidi adwenle kɛ ɔdia Yizilayɛma amuala.

²Devidi noko zele Dwowabe nee ye safohyenlema mɔɔ ɛha la kɛ, “Bɛhɔ maanle ye anu kɔsɔɔti, bɛbɔ ye Biyɛhyiba bɛhɔdwu Dan, na bɛdia Yizilayɛma amuala. Mekpondɛ kɛ menwu bɛ dodo.”

³Dwowabe buale kɛ, “Yɛsɛlɛ kɛ Ɛdɛnkɛma ɛmaa ye menli ne ɛzo ɛyɛ mɔnwo fane ɛya ɛdɛla kɛmɔ ɛnɛ bɛde la. Nana, menli ne kɔsɔɔti le wɔ menli. Duzu ati yɛɛ ɛkulo kɛ ɛmaa bɛtia bɛ na yɛfa ndeanlɛ yɛba yɛ nwo zo ɛ?”

⁴Noko Belemgbunli Devidi amkponle. Ɔmanle Dwowabe lile mɔɔ ɔhanle la azo. Dwowabe hɔle Yizilayɛ maanle ne anu amuala, ɔdianle menli ne na ɔziale ɔrale Gyɛlusalɛm.

⁵Ɔrahanle mɔɔ ɔnyianle la ɔhilele Devidi. Menli mɔɔ anwo yɛ se mɔɔ kola kɔ konle mɔɔ wɔ Yizilayɛ la le mgbe ko, apenle ngoko ɛya, yɛɛ menli apenle ngoko ɛya nna abulasuu wɔ Dwuda.

⁶Kɛmɔ ɛnee Dwowabe ɛngulo belemgbunli ne adwenle ne la ati, yeandia Livae nee Bɛngyaman mbusua ekpunli ne mɔ anu amra.

⁷Nyamenle anye anlie deɛ ɛhye anwo, yemɔti ɔdeanle Yizilayɛma.

⁸Na Devidi zɛlɛle Nyamenle kɛ, “Meyɛ ɛtane kpole kɛ meyɛ ɛhye a. Mesɛlɛ wɔ, fa kyɛ me na meandwenle nwolɛ.”

⁹Na Ɛdɛnkɛma zele Gaade, Devidi ɔdaye ye Nyamenle kpɔmanvolɛ ne mɔɔ sinza ye la kɛ,

¹⁰“Kɔze Devidi kɛ, ‘Medame Ɛdɛnkɛma, mese, memaa ye ninyɛne nsa na ɔnlea nuhua ɔye ko ɔmaa menyɛ memaa ye.’ ”

¹¹Gaade hɔhanle mɔɔ Ɛdɛnkɛma vale zoanle ye la hilele Devidi na ɔzele ye kɛ, “Ɛdɛnkɛma se ɛnlea nu ɛva ninyɛne nsa ɛhye anu ko:

¹²‘Ɛvolɛ nsa ɛhɔne, anzɛɛ wɔ kpɔvolɛma mɔɔ foa wɔ nee wɔ ɛlɔnema agua ɛbɔ nu ahu bɛ bie mɔ dedee siane nsa, anzɛɛ Ɛdɛnkɛma ndeanlɛ kenle nsa, mɔɔ ye soanvolɛ fa munzule, nyane, abodelɛ, nee ewule arado maanle ye anu ɛleka biala la, nuhua boni yɛɛ ɛkulo a?’ Nea nuhua fa ko maa mengɔnga mengile Ɛdɛnkɛma.”

¹³Devidi zele Gaade kɛ, “Edwɛkɛ ɛdo me, mennwu mɔɔ meka a. Noko mmamaa sonla sa ka me. Maa Ɛdɛnkɛma ɔdaye ɔdea me, ɔluakɛ yemɔ, ye anwunvɔnezelɛ le kpole.”

¹⁴Yemɔti Ɛdɛnkɛma manle ewule nzane rale Yizilayɛ, na menli apenle ngoko abulasuu wule.

¹⁵Akee Nyamenle manle ye soanvolɛ hɔle kɛ ɔhɔzɛkye Gyɛlusalɛm. Na mɔɔ soanvolɛ ne dwule Gyɛlusalɛm la, Ɛdɛnkɛma akunlu hwenle na ɔzele ye kɛ, “Yeyɛ boɛ, gyakyi!” Mekɛ ne anu ɛnee Nyamenle soanvolɛ ne wɔ Gyibɛsenli bie mɔɔ bɛfɛlɛ ye Alɔna la ɛleka mɔɔ ɔwozo ye awule la.

¹⁶Devidi manle ɔ nye zo la, ɔnwunle Ɛdɛnkɛma soanvolɛ ne kɛ ɔgyi anwomanyunlu, na yehwe dadeɛ wɔ Gyɛlusalɛm anwo zo. Na Devidi nee ye mgbanyima ne mɔ kɔsɔɔti mɔɔ ɛnee wula ɛrele adɛladeɛ la butubutule bɛ nye aze.

¹⁷Na Devidi zɛlɛle zɛhae, “O Nyamenle, medame a medi fɔlɛ a. Medame a menganle kɛ bɛhɔdia menli ne a. Na menli ɛhye mɔ, bɛtɛyɛle ɛhwee. Ɛdɛnkɛma, me Nyamenle, tea me nee egya sua nu amra, na gyakyi wɔ menli ne mɔ.”

¹⁸Ɛdɛnkɛma soanvolɛ ne zele Gaade kɛ ɔha ɔhile Devidi kɛ ɔhɔzi azukponle ɔmaa Ɛdɛnkɛma wɔ ɛleka mɔɔ Alɔna wozo ye hwiiti ne la.

¹⁹Devidi yɛle kɛmɔ Ɛdɛnkɛma luale Gaade anwo zo hanle la.

²⁰Ɛnee Alɔna nee ɔ mra ne mɔ wɔ ɛleka mɔɔ ɔwozo ye hwiiti la na bɛlɛwozo hwiiti. Bɛmanle bɛ nye zo na bɛnwunle Nyamenle soanvolɛ ne la, ɔ mra nna ne nriandile hɔveale.

²¹Mɔɔ Alɔna nwunle kɛ Devidi ɛlɛba ɛleka mɔɔ ɔwɔ la, ɔvindele ɔrabutule ɔ nyunlu ɛkɛ na ɔvale ɔ nye ɔbutule aze.

²²Devidi zele ye kɛ, “Fa wɔ ɛleka ye mɔɔ ɛwozo wɔ hwiiti ne la maa menzi azukponle memaa Ɛdɛnkɛma. Metɔ meadua ye kakɛ. Menva ye mgbane, amaa ewulenzane mɔɔ ɛradɔ yɛ nwo la azi aze.”

²³Alɔna zele kɛ, “Nana, fa yɛ mɔɔ ɛdawɔ ɛkulo la. Mmatua ye kakɛ. Fa ɛnlankɛ ɛhye mɔ yela bɛ bɔ azu wɔ azukponle ne azo, na fa ndaboa mɔɔ yɛfa yɛwozo hwiiti ne la yɛ ɛyɛne. Eza yɛlɛ hwiiti wɔ ɛkɛ mɔɔ ɛkola ɛfa ɛyɛ ma azubɔdeɛ a. Mefa bɛ muala memaa wɔ.”

²⁴Na Belemgbunli Devidi zele ye kɛ, “Meyɛ wɔ mo, noko akee mekulo kɛ metɔ metua ye kakɛ. Menrɛva debie mɔɔ le wɔ ɛdeɛ la mgbane menrɛmaa Ɛdɛnkɛma, na yeayɛ ɛyelalɛ azubɔdeɛ mɔɔ meandua ɛhwee la.”

²⁵Yemɔti Devidi duale ezukoa nvutuke ngukuluba ɛya nsia manle Alɔna na ɔliele ma ɛwozolɛ ɛleka ne.

²⁶Ɔzile azukponle ɔmanle Ɛdɛnkɛma wɔ ɛkɛ na ɔyelale nane ɔbɔle azu nee anzonudwolɛ azu wɔ zolɛ. Ɔzɛlɛle Ɛdɛnkɛma na Ɛdɛnkɛma diele ye na ɔmanle senle vi anwuma radɔle ɛyelalɛ azubɔdeɛ ne anu wɔ azukponle ne azo.

²⁷Akee Ɛdɛnkɛma manle ye soanvolɛ ne vale ye dadeɛ ne wulale ye boa ne anu.

²⁸Na Devidi luale ɛhye azo nwunle kɛ Ɛdɛnkɛma akunlu ɛdwo na yedie ye nzɛlɛlɛ ne mɔɔ ɔyɛle wɔ Alɔna hwiiti ɛwozolɛ ɛleka ne la. Ɛhye ati ɔbɔle ye azu ne mɔ wɔ ɛkɛ.

²⁹Ɔluakɛ ɛnee Ɛdɛnkɛma Ndanlɛ Sua ne mɔɔ Mosisi zile, nee ɛyelalɛ azubɔdeɛ ɛkponle ne ɛha moa moa wɔ Gebɛyɔn fienemgbole nu,

³⁰yɛɛ Devidi angola lɔ kɔ kɔsonle Nyamenle, ɔboalekɛ ɛnee ɔsulo Ɛdɛnkɛma soanvolɛ ne dadeɛ ne.