Read Nzema 1 Edk 22 Bible Online

1 Edk 22 - Nzema bible

1 Edk 22

¹Yemɔti Devidi zele kɛ, “Ɛke yɛɛ Ɛdɛnkɛma Nyamenle ne Ɛzonlenlɛ Sua ne bagyinla a. Ɛke yɛɛ azukponle mɔɔ Yizilayɛma kɔsɔɔti babɔ bɛ ɛyelalɛ azu ne mɔ zolɛ la bagyinla a.”

²Belemgbunli Devidi manle nyɛvolɛ mɔɔ wɔ maanle ne anu la amuala yiale, na ɔmanle bɛyɛle gyima. Bɛ bie mɔ kpukekpukele awolɛ mgbole mɔɔ bɛfa bɛazi Nyamenle Ɛzonlenlɛ Sua ne la.

³Ɔmanle bɛ mbulalɛ dɔɔnwo kɛ bɛva bɛyɛ agbɛlɛko nee nlenkɛ ne mɔ mɔɔ bɛvale ndaboa bɛbobɔle la anzi mbulalɛ mɔɔ bɛfa bɛtoto nu la. Eza ɔmanle bɛ kɔbele dɔɔnwo mɔɔ bɛngola ye suzu a.

⁴Ɔhyehyɛle ɔmanle menli mɔɔ wɔ Taya nee Saedɛn la rɛlɛle ye sida mbaka.

⁵Devidi dwenlenle nwolɛ kɛ, “Ɛzonlenlɛ Sua ne mɔɔ me ra Sɔlɔmɔn bazi la, ɔwɔ kɛ ɔyɛ kpole, ɔyɛ kɛnlɛma mɔɔ awie biala kanvo ye a. Noko Sɔlɔmɔn le kakula, yɛɛ ɔ ti ɛtɛtinle. Yemɔti meboɔboa ninyɛne mɔɔ bɛbava bɛazi la anloa meamaa ye.” Yemɔti Devidi nyianle ninyɛne mɔɔ bɛbava bɛazi sua ne la anu dɔɔnwo kolaa na yeawu.

⁶Akee Devidi manle bɛvɛlɛle ɔ ra Sɔlɔmɔn bɛmanle ye na ɔzele ye kɛ anrɛɛ ɔzi ɛzonlenlɛ sua ɔmaa Ɛdɛnkɛma, Yizilayɛ Nyamenle ne.

⁷ Ɔzele Sɔlɔmɔn kɛ, “Me ra, ɛnee mekulo kɛ mesi ɛzonlenlɛ sua mefa medi Ɛdɛnkɛma me Nyamenle ne eni.

⁸Noko Ɛdɛnkɛma se meho konle dɔɔnwo, na mehu menli dɔɔnwo somaa. Na ɔlua mogya dɔɔnwo ne mɔɔ meha megua la ati, ɔnrɛmaa menrɛzi ɛzonlenlɛ sua menrɛmaa ye.

⁹Na ɔbɔle me ɛwɔkɛ kɛ, ‘Ɛbawo ralɛ nrenya mɔɔ bali ye ebia ne anzonudwolɛ nu a, ɔluakɛ mebamaa ɔ nwo adɔ ye wɔ ye agbɔvolɛ mɔɔ ɛbɔ ɛyia ye la kɔsɔɔti asa anu. Bɛbavɛlɛ ye Sɔlɔmɔn, na ye mekɛ zo, mebamaa Yizilayɛma kɔsɔɔti anzo nu adwo bɛ na bɛ nwo adɔ bɛ.

¹⁰Yemɔ yɛɛ ɔbazi ɛzonlenlɛ sua yeamaa me a. Ɔbayɛ me ra, na meayɛ ɔ ze, na ɔ bo zo amra yɛɛ bali belemgbunli wɔ Yizilayɛ mekɛ biala a.’

¹¹“Zɔhane ati, me ra, Ɛdɛnkɛma nee wɔ ɛdɛnla, amaa wɔahola wɔazi Ɛdɛnkɛma wɔ Nyamenle ne Ɛzonlenlɛ Sua ne wɔawie, kɛmɔ yeha ye wɔ ɛ nwo la.

¹²Ɔdaye Ɛdɛnkɛma ɔmaa wɔ nrɛlɛbɛ nee ndelebɛbo, amaa saa ɔfa Yizilayɛ maanle ne ɔwula ɛ sa nu a wɔali Ɛdɛnkɛma wɔ Nyamenle ne mɛla zo.

¹³ Saa ɛdi mɛla ne mɔɔ Ɛdɛnkɛma luale Mosisi anwo zo vale manle Yizilayɛma la azo kpalɛ a, ɛbakpazi. Sie ɛ ti koonwu, na maa wɔ adwenle ɛgyinla, amaa debie biala andu wɔ ahonle.

¹⁴Mɔɔ fane Ɛzonlenlɛ Sua ne ɛzilɛ nwo, mebɔ mɔdenle mezie ezukoa nvutuke ala mɔɔ ɛsuzu a ɔto tone nu tɔno apenle nsa, ɛya nna, yɛɛ dwɛtɛ fufule tɔno apenle ngoko abulasa nee nna. Ɛye ɛhye ɛsie ahane a, kɔbele nee mbulalɛ dɔɔnwo wɔ ɛkɛ mɔɔ ɛmbangyia bieko anwo a. Melɛ mbaka nee awolɛ, noko ɔwɔ kɛ ɛkpondɛ bie dɔɔnwo ɛboka nwolɛ.

¹⁵Ɛlɛ gyimayɛvoma dɔɔnwo. Ɛlɛ menli mɔɔ bayɛ gyima ɛleka mɔɔ bɛtu awolɛ la, belekyama nee kapentama noko wɔ ɛkɛ, yɛɛ dwinvolɛma dɔɔnwo mɔɔ ze adwinli ngakyile di la wɔ ɛkɛ.

¹⁶Dwinvolɛma ɛhye mɔ kola fa ezukoa nvutuke, dwɛtɛ fufule, kɔbele, yɛɛ mbulalɛ yɛ gyima. Zɔhane ati bɔ gyima ne abo, Ɛdɛnkɛma nee wɔ ɛdɛnla.”

¹⁷Devidi eza zele Yizilayɛ mgbanyima kɔsɔɔti kɛ bɛboa ɔ ra Sɔlɔmɔn.

¹⁸Ɔzele bɛ kɛ, “Ɛdɛnkɛma bɛ Nyamenle ne nee bɛ ɛlua na yemaa bɛ anzonudwolɛ wɔ adenle biala anu. Yemaa meli menli mɔɔ anrɛɛ de azɛlɛ ye azo la amuala anwo zo konim, na kɛkala bɛwɔ bɛdabɛ nee Ɛdɛnkɛma abo.

¹⁹Zɔhane ati bɛva bɛ ahonle nee bɛ ɛkɛla muala bɛzonle Ɛdɛnkɛma bɛ Nyamenle ne. Bɛdwazo bɛzi Ɛdɛnkɛma bɛ Nyamenle ne Ɛzonlenlɛ Sua ne, amaa bɛanyia ɛleka kpalɛ bɛava Ɛdɛnkɛma Ngyekyeleɛ Ɛlɛka ne nee Nyamenle ahyɛnze nwuanzanwuanza ne mɔ mɔɔ bɛfa bɛsonle ye la bɛazie.”