Read Nzema 1 Edk 29 Bible Online

1 Edk 29 - Nzema bible

1 Edk 29

¹ Belemgbunli Devidi akee zele ɛlɔne mɔɔ rayiale la kɛ, “Me ra Sɔlɔmɔn yɛɛ Nyamenle ɛnlea nu ɛye ye a, noko ɔtɛde kakula, ɔ ti ɛtɛtinle. Gyima ne mɔɔ gyi ɔ nyunlu la le kpole. Ɔluakɛ suakunlu ne mɔɔ bɛbazi la ɛnle sonla ɛdeɛ. Ɔle Ɛdɛnkɛma Nyamenle ne suakunlu.

²Mebɔ mɔdenle biala mɔɔ menwɔhola la meboɔboa ninyɛne mɔɔ bɛbava bɛazi Ɛzonlenlɛ Sua ne la anloa: ezukoa nvutuke, dwɛtɛ fufule, kɔbele, mbulalɛ, mbaka, awolɛ mɔɔ sonle bolɛ nee mgbɔba ngakyile, awolɛ memeamemea nee mabolo awolɛ.

³Ɛye ɛhye mɔ ɛsie ahane a, medame meva me ti anwo dwɛtɛ fufule nee ezukoa nvutuke mevi me gya nu meboa, ɔboalekɛ mekulo kɛ bɛsi Nyamenle Ɛzonlenlɛ Sua ne.

⁴Meva ezukoa nvutuke tagyee asɛɛ tɔno ɛya nwiɔ abulanla kɛ bɛholo bɛgua Ɛzonlenlɛ Sua ne bane ne mɔ

⁵nee adwinli mɔɔ dwinvolɛma ne bali la amuala anwo. Nwane yɛɛ ɔdaye noko ɛnɛ kenle ye ɔkɛyeye ye ahonle nu na ɔkɛboa, ɔkɛva ɔ nwo ɔkɛbɔ azu ɔkɛmaa Ɛdɛnkɛma a?”

⁶Na mbusua mgbanyinli ne mɔ, awuke nu mgbanyinli, safohyenlema, nee bɛdabɛ mɔɔ bɛbu belemgbunli sua nu amaamuo ne la vale anyelielɛ

⁷sesale ninyɛne ɛhye mɔ manle kɛ bɛva bɛzi Ɛzonlenlɛ Sua ne: ezukoa nvutuke mɔɔ bo tɔno ɛya ko abulasuu, dwɛtɛ fufule mɔɔ bo tɔno ɛya nsa abulanla, kɔbele asɛɛ tɔno ɛya nsia abulanwiɔ, yɛɛ mbulalɛ mɔɔ bo tɔno apenle nsa ɛya nna la.

⁸Bɛdabɛ mɔɔ bɛlɛ mgbɔba la, bɛvale bɛmanle bɛguale Ɛzonlenlɛ Sua ne gya ne anu. Gyɛhayɛle mɔɔ bɔ Gɛhyɔn, mɔɔ vi Livae abusua ekpunli ne anu la abusua ne bie la a nea gya ɛhye azo a.

⁹Menli ne yeyele bɛ ahonle nu vale ninyɛne ne manle Ɛdɛnkɛma na bɛ nye liele kɛ bɛhola bɛyeye ninyɛne dɔɔnwo zɛhae a. Belemgbunli Devidi ɔdaye noko ɔ nye liele kpole kpalɛ.

¹⁰Belemgbunli Devidi yele Nyamenle ayɛlɛ wɔ menli ne kɔsɔɔti anyunlu hanle kɛ, “Yɛ nlenya Gyekɔbo Ɛdɛnkɛma Nyamenle, ayɛlɛyelɛ ɛha wɔ dahuu!

¹¹Ɛle kpole, ɛlɛ tumi, ɛle nwuanzanwuanza, ɛle katakyie, ɛle belemgbunli. Debie biala mɔɔ wɔ anwuma nee aze la le wɔ ɛdeɛ, na ɛdi bɛ kɔsɔɔti bɛ nwo zo belemgbunli.

¹²Anwonyia nee ezukoa kɔsɔɔti vi wɔ ɛkɛ; ɛfa wɔ anwosesebɛ nee tumi ɛsie debie biala. Ɛkola ɛmaa awie nyia anwosesebɛ na ɔyɛ kpole.

¹³Yɛ Nyamenle, yɛyɛ wɔ mo, yɛye wɔ duma nwuanzanwuanza ne ayɛlɛ.

¹⁴“Noko me nee me menli ye, yɛngola yɛmmaa wɔ ɛhwee, ɔboalekɛ debie biala mɔɔ yɛlɛ la le ahyɛlɛdeɛ mɔɔ vi wɔ ɛkɛ ne a. Ɛdawɔ wɔ ɛdeɛ yɛɛ yɛzia yɛva yɛrɛlɛ wɔ a.

¹⁵O Ɛdɛnkɛma, ɛdawɔ ɛze kɛ yɛle nyɛvolɛ wɔ ɛbɛla ɛsɛlɛ ye azo na yɛle kɛ menli mɔɔ ɛra nlɔnu wɔ azɛlɛ ye azo a, kɛmɔ yɛ nlenya mɔ yɛle la. Yɛ mekɛ wɔ azɛlɛ ye azo le kɛ ɛlawolɛ mɔɔ ɛlɛse, ɔngyɛ ɛnee yepɛ nuhua.

¹⁶Ɛdɛnkɛma yɛ Nyamenle, yɛva anwoneɛ ɛhye mɔ kɔsɔɔti yɛra kɛ yɛfa yɛazi Ɛzonlenlɛ Sua yeade wɔ duma nwuanzanwuanza ne anwo, noko ninyɛne ne amuala le wɔ ɛdeɛ, ɛdawɔ yɛɛ ɛvale ɛmanle a.

¹⁷Meze kɛ ɛsɔ awie biala ɛnea na ɛ nye die mɔɔ di nɔhalɛ la anwo. Meyeye me ahonle nu, nɔhalɛ nu yɛɛ meva ɛhye mɔ amuala memaa wɔ a, yɛɛ menwu kɛ me menli ye ɛzi ɛva fɛlɛkolilɛ nee anyelielɛ ɛva ninyɛne ɛrabɔ azu ɛmaa wɔ a.

¹⁸Yɛ nlenya mɔ Ebileham, Ayezeke, nee Gyekɔbo Ɛdɛnkɛma Nyamenle, maa tunwomaa sunsum ye mɔɔ menli ye ɛnyia ye la ɛdɛnla bɛ nu dahuu na ɔnyi, na maa bɛli nɔhalɛ bɛmaa wɔ.

¹⁹Maa me ra Sɔlɔmɔn ahonle kpalɛ maa ɔli debie biala mɔɔ ɛkɛze ye la azo na ɔzi Ɛzonlenlɛ Sua ne mɔɔ yemɔti meboɔboa ninyɛne ɛhye mɔ anloa la.”

²⁰Akee Devidi zele ɛlɔne mɔɔ ɛyia la kɛ, “Bɛye Ɛdɛnkɛma bɛ Nyamenle ne ayɛlɛ.” Na menli ne amuala yeyɛle Ɛdɛnkɛma, bɛ nlenya mɔ Nyamenle ne. Bɛbɔle bɛ ti aze bɛzonlenle Ɛdɛnkɛma na bɛvale enililɛ bɛmanle belemgbunli ne.

²¹Aleɛ hyenle la bɛhunle nane bɛbɔle azu, bɛdule bɛwulale Ɛdɛnkɛma asa anu, na bɛvale bɛmanle menli ne lile. Eza bɛhunle nlankɛ nyinli apenle, mboane nyinli apenle, yɛɛ mboane mralɛ apenle na bɛyelale bɛ bɛbɔle azu bɛmanle Ɛdɛnkɛma wɔ ye azukponle ne azo. Eza bɛvale nwanye bɛbɔle azu.

²²Zɔhane ati kenle ko ne bɛ nye liele na bɛlile, bɛnlonle wɔ Ɛdɛnkɛma anyunlu. Eza bɛzoale Sɔlɔmɔn bieko kɛ ɔle belemgbunli. Bɛkpokpale ye nwole bɛdule ye bɛmanle Ɛdɛnkɛma kɛ ɔle bɛ belemgbunli na bɛyɛle Zeedɔko bɛ sɛlɛvolɛ.

²³ Yemɔti Sɔlɔmɔn lile ɔ ze Devidi agya wɔ belemgbunli ebia ne mɔɔ Ɛdɛnkɛma ɔdaye yehyehyɛ la azo. Ɔyɛle belemgbunli kpole, na Yizilayɛma kɔsɔɔti yɛle tieyɛ manle ye.

²⁴Safohyenlema nee ɛlɔnema ne amuala nee Devidi amra mrenya mɔɔ hale la amuala vuale kɛ bɛkɛli nɔhalɛ bɛkɛmaa Sɔlɔmɔn kɛ ɔle belemgbunli.

²⁵Ɛdɛnkɛma manle Sɔlɔmɔn anwo yɛle maanlema ne kɔsɔɔti ɛzulolɛ, na ɔmanle ɔnyianle ɔ nyunlu ɔdɛlale Yizilayɛ belemgbunli biala.

²⁶Gyɛsi ara Devidi ziele Yizilayɛma kɔsɔɔti

²⁷ ɛvolɛ abulanla. Ɔdɛnlanle Hibulɔn ɔlile ebia ne ɛvolɛ nsuu yɛɛ ɔdɛnlanle Gyɛlusalɛm ɔlile ebia ne ɛvolɛ abulasa nee nsa.

²⁸Ɔyɛle nwosonwoso na yeawu, ɔnyianle ɔ nwo yɛɛ bɛlile ye eni. Ɔ ra Sɔlɔmɔn a lile ye agya a.

²⁹Belemgbunli Devidi anwo edwɛkɛ nee ye nyɛleɛ biala mɔɔ ɔyɛle la, bɛhɛlɛ bɛ wɔ Nyamenle Kpɔmanvolɛma Samoɛle, Neetan, yɛɛ Gaade Mbuluku nsa ne anu.

³⁰Mbuluku ne mɔ kile kɛ ɔzile ɔlile ye belemgbunli ne, tumi mɔɔ ɔnyianle ye, nee debie biala mɔɔ zile ɔ nwo zo, nee mɔɔ zile Yizilayɛma nee maanle maanle mɔɔ zuozua bɛ la anwo zo la.