Read Nzema 1 Edk 5 Bible Online

1 Edk 5 - Nzema bible

1 Edk 5

¹ Gyekɔbo ara nrenya kpanyinli ne mɔɔ bɛfɛlɛ ye Wulubɛn la abo zo amra ɛne. (Kɛmɔ ɔvale ɔ ze mraalɛ ne mɔ ko la ati, ye awolɛ kpanyinli gyinlabelɛ ne bɔle ye, na bɛvale zɔhane gyinlabelɛ ne bɛmanle Dwosefi.

² Noko Dwuda abo zo amra a yɛle menli mgbole na bɛlile mbusua ekpunli ekpunli ne mɔ kɔsɔɔti belemgbunli a.)

³Gyekɔbo ara kpanyinli Wulubɛn wole mrenya nna: Heenɔko, Paluu, Hɛzelɔn, yɛɛ Kaamae.

⁴ Dwowɛle abo zo amra, ɔvi awolɛndoazo kɔdwu awolɛndoazo la ɛne: Hyɛmaya, Gɔɔgo, Hyemɛyae, Maeka, Riliaya, Beeyale, yɛɛ Biyɛla. Aselea Maanle Maanle Belemgbunli Tegelate Paelizɛ hyele Biyɛla mɔɔ ɛnee gyi Wulubɛn abusua ekpunli ne ati la, na ɔdule ye ɔvile maanle ne anu.

⁷Wulubɛn abusua ekpunli ne ngɛlata kile kɛ menli ɛhye mɔ lile abusua mgbanyinli: Gyiyayɛle a lumuale a, yɛɛ Zɛkalaya,

⁸yɛɛ Biyɛla, mɔɔ le Ezaze ara na ɔle Hyima anlɔnra la. Ɔvi Dwowɛle abusua nu. Abusua ɛhye bɔle ye nzeseɛ wɔ Alowɛ, bɛdɛnlanle ɛkɛ ne bɛhɔle ye sɔlɔ afoa nu toonwo bɛhɔdwule Nibo nee Beeyale Miyɔn.

⁹Ɛnee bɛlɛ nyɛmoa dɔɔnwo wɔ Geleade azɛlɛ zo, yemɔti bɛvale azɛlɛ ne toonwo bɛhɔdwule Azule Yufileti ne anloa mɔɔ di kɔ aduduleɛ afoa nu ɛsɛlɛ ne azo la.

¹⁰Belemgbunli Sɔɔlo mekɛ zo, Wulubɛn abusua ekpunli ne hɔholole Heegama anwo zo, bɛhunle bɛ bɛvale bɛ azɛlɛ ne mɔɔ di kɔ Geleade aduduleɛ la, na bɛdɛnlanle bɛ ndanlɛ azua ne mɔ anu.

¹¹Gaade abusua ekpunli ne anu amra dɛnlanle Wulubɛnema sɔlɔ wɔ azɛlɛ ne mɔɔ bɛfɛlɛ ye Beehyan la azo; bɛdabɛ bɛbɔle ye ɛkɛ ne bɛhɔle ye aduduleɛ toonwo bɛhɔdwule Saleka.

¹²Dwowɛle abusua ne a le abusua titile mɔɔ wɔ ekpunli ɛhye anu a, yɛɛ Hyeefam abusua ne a le abusua titile mɔɔ tɔ zolɛ nwiɔ a. Gyeenae nee Hyeefate a zole mbusua ne mɔɔ ɛha la a.

¹³Menli mɔɔ hale abusua ekpunli ne anu la le mbusua ekpulike nsuu. Bɛmɛ a le Maekeɛle, Mɛhyɛlam, Hyiba, Dwoleeyae, Gyeekan, Zaya, yɛɛ Yibɛ.

¹⁴Bɛ muala bɛle Hulae ara Abeheli abo zo amra; bɛ mgbanyima a le ɛhye mɔ: Abeheli, Hulae, Gyalowa, Geleade, Maekeɛle, Gyɛhyehyae, Gyaado, Bɛɛze,

¹⁵Ehae mɔɔ ɔ ze a le Abedeɛle na ɔle Gunae anlɔnra la a le mbusua ekpulike ne mɔ kpanyinli a.

¹⁶Bɛdɛnlanle Beehyan nee Geleade nee azua mɔɔ wɔ ɛkɛ ne afoa nu la azo, yɛɛ Hyɛlɔn azɛlɛ zo.

¹⁷(Tetedwɛkɛ ɛhye mɔ, bɛboɔboale bɛ nloa, na bɛhɛlɛle wɔ Dwuda Belemgbunli Dwotam nee Yizilayɛ Belemgbunli Gyɛlɔbowam mɔɔ tɔ zolɛ nwiɔ la mekɛ zo.)

¹⁸Wɔ Wulubɛn, Gaade nee Manasɛ Aduduleɛ maanlema anu, ɛlɔnema mɔɔ wɔ nu la le apenle ngoko abulanla nee nna, ɛya nsuu abulasia. Bɛhilehilele bɛ dadeɛ nee ɛda konle nye zo kpalɛ, yɛɛ bɛze kɛ bɛsi bɛfa bɛ sa nu enyinlike bɛwowa bɛ nwo wɔ konle nu la.

¹⁹Bɛ nee Heegama mɔɔ wɔ Gyitɛ, Nɛfehye, yɛɛ Nodabe la nyianle konle.

²⁰Bɛvale bɛ rɛle bɛwulale Nyamenle anu na bɛzɛlɛle ye kɛ ɔboa bɛ. Na Nyamenle diele bɛ nzɛlɛlɛ na ɔmanle bɛlile Heegama nee bɛ boavolɛma anwo zo konim.

²¹Bɛhonle bɛvale bɛ kpɔvolɛma afunlumu apenle ngoko abulanlu, mboane apenle ngoko ɛya nwiɔ abulanlu, asoaso apenle nwiɔ, yɛɛ bɛhyele menli apenle ngoko ɛya nuokɛ.

²²Bɛhunle bɛ kpɔvolɛma ne anu dɔɔnwo, ɔboalekɛ ɛnee konle ne le Nyamenle konle. Na bɛdɛnlanle maanle zɔhane anu toonwo ɔhɔdwule mekɛ mɔɔ bɛhyele Yizilayɛma nuokɛ bɛhɔle nlɔnu la.

²³Menli mɔɔ wɔ Manasɛ Aduduleɛ la dɛnlɛdɛnlanle Beehyan azɛlɛ zo wɔ sɔlɔ afoa nu toonwo bɛ nloa dwule Beeyale Hɛmɔn, Sinɛɛ, yɛɛ Hɛmɔn Boka, na bɛlɔle kpole kpalɛ.

²⁴Bɛ mbusua mgbanyinli ɛne: Yifɛ, Yehyae, Yilayɛle, Azeleɛle, Gyɛlɛmaya, Hodavaya, yɛɛ Gyaadeɛle. Bɛle safohyenlema mɔɔ di munli a, yɛɛ bɛgyigyi bɛ mbusua ne mɔ ati kpundii.

²⁵Noko menli ne anli nɔhalɛ ammaa bɛ nlenya mɔ Nyamenle ne. Bɛkpole ye na bɛzonlenle maanle maanle mɔɔ Nyamenle dule bɛ la awozonle ne mɔ.

²⁶Zɔhane ati Nyamenle manle Aselea Maanle Maanle Belemgbunli Pɛɛle (mɔɔ eza bɛfɛlɛ ye Tegelate Paelizɛ la) lile maanle ne nvunu na ɔhonle ɔvale bɛ. Ɔdule Wulubɛnema, Gaadema, yɛɛ Manasɛ Aduduleɛ amra ɔvile maanle ne anu ɔmanle bɛhɔdɛnlanle Heelaa, Heebɔ, yɛɛ Hɛla, nee Azule Gozaa ne anloa kpɔkpɔ.