Read Nzema 2 Edk 10 Bible Online

2 Edk 10 - Nzema bible

2 Edk 10

¹Rilihɔbowam hɔle Hyikɛm. Ɛkɛ ne a ɛnee Yizilayɛma kɔsɔɔti ɛbɔ gua ɛlɛkendɛ ye azie ye belemgbunli a.

²Ɛnee Nibate ara Gyɛlɔbowam mɔɔ ɛnriandi Belemgbunli Sɔlɔmɔn la wɔ Yigyibiti. Na mɔɔ ɔdele edwɛkɛ ne la ɔvi Yigyibiti ɔziale ɔrale.

³Na sɔlɔ mbusua ekpunli ne mɔ zoanle manle bɛhɔvale ye na ɔ nee bɛ hɔle Rilihɔbowam anwo ɛkɛ bɛhɔzele ye kɛ,

⁴“Ɛ ze Sɔlɔmɔn sisile yɛ kpole kpalɛ na ɔzoale yɛ adesoa ɛnlomboɛ. Yemɔti nea na te mɔɔ ɛ ze kyekyele zoale yɛ la azo maa yɛ nwo ɛdɔ yɛ na yɛkɛzonle wɔ.”

⁵Rilihɔbowam zele bɛ kɛ, “Bɛhɔ na ɔdi kenle nsa a bɛzia bɛradie nwolɛ mualɛ.” Yemɔti menli ne ziale hɔle.

⁶Rilihɔbowam vale edwɛkɛ ne dole ye mgbanyima mɔɔ boale ɔ ze Sɔlɔmɔn wɔ mekɛ mɔɔ ɔde aze la anyunlu na ɔbizale bɛ kɛ, “Duzu folɛ a bɛtu me wɔ ɛhye anwo na meava meabua menli ne a?”

⁷Bɛzele ye kɛ, “Saa ɛkile ahunlunyele ɛmaa menli ne, ɛmaa bɛ nye die, na ɛka ɛdendɛlɛ kpalɛ ɛkile bɛ a, bɛbazonle wɔ dahuu.”

⁸Na Rilihɔbowam anva mgbanyima ne mɔ folɛdulɛ ne na ɔ nee mgbavolɛ mɔɔ anrɛɛ ɔ nee bɛ tu na ɛnɛ bɛyɛ ye folɛdulɛma la vale adwenle.

⁹Ɔbizale bɛ kɛ, “Menli ne se mende bɛ ɛvɛlɛ zo ekyii na kɛ bɛ adwenle se bɛ ɛ? Duzu mualɛ a menva memaa bɛ a?”

¹⁰Bɛbuale ye kɛ, “Ka kile bɛ kɛ, ‘Me sa amozi ɛrɛlɛsɛka ne bɔbɔ le kpole tɛla egya anze.

¹¹Saa egya zoale bɛ adesoa ɛnlomboɛ a, mame, mebazoa bɛ adesoa mɔɔ tɛla egya ɛdeɛ ne. Egya vale nɛnemile a bole bɛ a, na mame, mebava empele mɔɔ anloa yɛ nyane kɛ nyamenleakɛlɛ ɛbɔlɛ la a meabila bɛ a.’ ”

¹²Kenle nsa ne dwule la, Gyɛlɔbowam nee menli ne kɔsɔɔti rayiale Rilihɔbowam, kɛmɔ ɔhanle ɔhilele bɛ ala la.

¹³Na Belemgbunli Rilihɔbowam dendɛle ɛya zo hilele bɛ, ɔkpole mgbanyima ne mɔ folɛdulɛ ne.

¹⁴Belemgbunli Rilihɔbowam dendɛle, kɛmɔ mgbavolɛ ne mɔ zele ye la na ɔhanle kɛ, “Egya zoale bɛ adesoa ɛnlomboɛ, na mame, mebava bie meaboka nwolɛ. Egya vale nɛnemile a bole bɛ a, na mame, mebava empele mɔɔ anloa yɛ nyane kɛ nyamenleakɛlɛ ɛbɔlɛ la a meabila bɛ a.”

¹⁵Yemɔti belemgbunli andie menli ne mɔ edwɛkɛ biala, ɔluakɛ Nyamenle a hyehyɛle manle ɔrale ye zɔhane a, amaa Ɛdɛnkɛma edwɛkɛ ne mɔɔ ɔluale Nyamenle kpɔmanvolɛ Ahaegya mɔɔ vi Hyaelo la anwo zo ɔhanle ɔhilele Nibate ara Gyɛlɔbowam la ayɛ nɔhalɛ.

¹⁶ Mɔɔ Yizilayɛma ne nwunle kɛ belemgbunli ne ɛnrɛdie bɛ edwɛkɛ biala la, bɛhanle bɛhilele ye kɛ, “Duzu kyɛfoa a yɛlɛ ye wɔ Devidi ɛkɛ a? Yɛ nee Gyɛsi ara ɛnli agya. Yizilayɛma, awie biala ɛhɔ ye sua nu. Devidi, fa ɛ nwo!” Yemɔti Yizilayɛma dele atua

¹⁷na Rilihɔbowam lile Yizilayɛma mɔɔ wɔ Dwuda maanle nu la angome anwo zo belemgbunli.

¹⁸Akee belemgbunli ne zoanle Adɔnelam mɔɔ nea maanle gyimayɛlɛ zo la wɔ Yizilayɛ, na menli ne zile ye awolɛ hunle ye. Belemgbunli Rilihɔbowam nwunle ye zɔhane la, ɔhanle ɔ nwo waa ɔvole ye konle ehwili nu ɔnriandile ɔhɔle Gyɛlusalɛm.

¹⁹Yemɔti Yizilayɛma ɛyɛ Devidi abo zo amra ne anwo ɛlɔne toonwo a yeradwu ɛnɛ a.