Read Nzema 2 Edk 11 Bible Online

2 Edk 11 - Nzema bible

2 Edk 11

¹Mɔɔ Rilihɔbowam dwule Gyɛlusalɛm la, ɔboɔboale Dwuda nee Bɛngyaman mbusua ekpunli ekpunli ne anu amra ɛlɔnema apenle ngoko abulatwɛ anloa kɛ bɛ nee Yizilayɛma kaho, na bɛamaa Rilihɔbowam ali maanle ne amuala azo belemgbunli.

²Na Ɛdɛnkɛma zele Nyamenle sonla Hyɛmaya kɛ,

³“Ka kile Sɔlɔmɔn ara Rilihɔbowam mɔɔ sie Dwuda nee Yizilayɛ kɔsɔɔti mɔɔ wɔ Dwuda nee Bɛngyaman maanzinli ne mɔ anu la kɛ, Ɛdɛnkɛma se,

⁴‘Bɛmmakɔ bɛ nee bɛ mediema ne mɔ kɔko. Awie biala ɛzia ɛhɔ ye sua zo, ɔluakɛ medame a meyɛ ɛhye a.’ ” Yemɔti bɛdiele Ɛdɛnkɛma ane, na bɛ nee Gyɛlɔbowam angɔngo.

⁵Rilihɔbowam dɛnlanle Gyɛlusalɛm na ɔkyekyele azuamgbole ɛhye mɔ ɔbɔle nwolɛ bane wɔ Dwuda.

⁶Ɔkyekyele Bɛtelɛhɛm, Yitam, Tɛkowa,

⁷Bɛtezɛ, Soko, Adɛlam,

⁸Gate, Malihyaa, Zefe,

⁹Adoleeyem, Leekehye, Azika,

¹⁰Zɔla, Ayegyalɔn, yɛɛ Hibulɔn. Azuamgbole ɛhye mɔ a bɛbɔle nwolɛ bane wɔ Dwuda nee Bɛngyaman maanzinli ne mɔ anu a.

¹¹Ɔmanle bɛbɔle aranemgbole ne mɔ anwo bane kpalɛ na ɔyele menli mɔɔ nea zolɛ a, na ɔvale aleɛ, nwole, nee nwanye ɔhɔziele ɛkɛ ne.

¹²Ɔvale atwɛ nee bɛ sa nu enyinlike ɔhɔle azuamgbole ɛhye mɔ biala azo, amaa bɛ nwo ayɛ se. Na ɔlile ye belemgbunli ne wɔ Dwuda nee Bɛngyaman maanzinli ne mɔ anu ala.

¹³Sɛlɛvolɛma nee Livaema mɔɔ wɔ Yizilayɛ la amuala vi ɛleka ne mɔ mɔɔ bɛdede la rale Belemgbunli Rilihɔbowam anwo ɛkɛ wɔ Dwuda.

¹⁴Livaema vile ɛleka mɔɔ bɛdede la na bɛgyakyile bɛ nwo ninyɛne bɛrale Dwuda nee Gyɛlusalɛm, ɔboalekɛ Yizilayɛ Belemgbunli Gyɛlɔbowam nee ɔ bo zo amra yele bɛ gyima nu kɛ bɛnle Ɛdɛnkɛma sɛlɛvolɛma bieko.

¹⁵ Gyɛlɔbowam ɔdaye ɔyele ye sɛlɛvolɛma mɔɔ nea ɛleka ne mɔ mɔɔ bɛyɛ bɛ mbɔnsam ninyɛne ne mɔ nee ɛleka mɔɔ bɛsɔ bɛ nlankɛ ananze mmonle mɔɔ ɔdaye yeyɛ la.

¹⁶Na bɛdabɛ mɔɔ ɛnee bɛyeye bɛ ahonle nu kɛ bɛsonle Yizilayɛ Ɛdɛnkɛma Nyamenle ne la vi Yizilayɛ mbusua ekpunli ekpunli ne mɔ anu hɔle Gyɛlusalɛm hɔbɔle azu manle Ɛdɛnkɛma, bɛ ze mɔ Nyamenle ne.

¹⁷Bɛmanle Dwuda maanle ne gyinlanle na bɛmanle Sɔlɔmɔn ara Rilihɔbowam nyianle gyinlagyakɛ ɛvolɛ nsa, ɔluakɛ wɔ ɛvolɛ nsa ne anu, bɛvale Devidi nee Sɔlɔmɔn agyakɛ na bɛyɛle mɔɔ Devidi nee Sɔlɔmɔn yɛle la bie.

¹⁸Rilihɔbowam gyale Meehalate. Devidi ara nrenya Gyɛlemo ara raalɛ ɔ. Ɔ nli a le Yilayabe ara raalɛ Abeheeli yɛɛ ɔle Gyɛsi anlɔnra.

¹⁹Rilihɔbowam nee ye wole mralɛ mrenya nsa, Gyiyɛhye, Hyamaleeya, yɛɛ Zeeham.

²⁰Nzinlii ɔgyale Abesalɛm ara Meeyaka na ɔ nee ye wole Abaegya, Ateeyae, Zaeza, yɛɛ Hyɛlomete.

²¹Ɛnee Rilihɔbowam kulo Meeyaka tɛla ye mraalɛ ne mɔ nee ye mgbɔnla ne mɔ amuala. Ɔgyale mraalɛ bulu nee mɔtwɛ yɛɛ ɔvale mgbɔnla abulasia. Ɔwole mralɛ mrenya abulanwiɔ nee mɔtwɛ yɛɛ mralɛ mraalɛ abulasia.

²²Rilihɔbowam hulole ɔ nee ɔ ye Meeyaka ara Abaegya dɛlale ɔ mra mrenya ne mɔ amuala na ɔyɛle kɛ yemɔ yɛɛ anrɛɛ ɛli ye agya a, na ɔyɛle ye adwenle kɛ ɔsie ye belemgbunli.

²³Ɔvale nrɛlɛbɛ ɔmanle ɔ mra mrenya ne mɔ gyima wɔ Dwuda nee Bɛngyaman maanzinli ne mɔ anu, na ɔkpondenle bɛ wɔ azuamgbole ne mɔ mɔɔ bɛbɔ nwolɛ bane la azo. Ɔmanle bɛ debie biala mɔɔ ɔwɔ kɛ bɛ sa ka ye la na ɔgyigyale mraalɛ ɔmanle bɛ.