Read Nzema 2 Edk 13 Bible Online

2 Edk 13 - Nzema bible

2 Edk 13

¹Belemgbunli Gyɛlɔbowam lile ɛvolɛ bulu nee mɔtwɛ wɔ Yizilayɛ ebia ne azo la yɛɛ Abaegya bɔle ɔ bo kɛ ɔdi belemgbunli wɔ Dwuda a.

²Ɔdɛnlanle Gyɛlusalɛm a ɔlile ebia ne a, yɛɛ ɔlile ebia ne ɛvolɛ nsa. Ɔ nli a le Yulayɛle mɔɔ vi Gebɛya la ara raalɛ Maekaya. Konle zile Abaegya nee Gyɛlɔbowam avinli.

³Abaegya vale ɛlɔnema mɔɔ ze ko la apenle ngoko ɛya nna, na Gyɛlɔbowam vale ɛlɔnema apenle ngoko ɛya mɔtwɛ mɔɔ ze ko la rayiale ye.

⁴Abaegya gyinlanle Zɛmaleeyem Boka, wɔ Yifelaem awoka ne mɔ azo na ɔzele kɛ, “Gyɛlɔbowam nee Yizilayɛma amuala bɛdie me!

⁵Bɛdabɛ bɛze ye wienyi kɛ Yizilayɛ Ɛdɛnkɛma Nyamenle ne vale Yizilayɛ belemgbunlililɛ ne manle Devidi nee ɔ bo zo amra, na ɔ nee ye yɛle ngyekyeleɛ kɛ bɛbali ebia ne wɔ mekɛ mɔɔ ɛnlɛ awieleɛ la.

⁶Noko Nibate ara Gyɛlɔbowam, mɔɔ le Devidi ara Sɔlɔmɔn sonvolɛ la, dwazole ɔ nwo zo na ɔdele ɔ menle anwo atua.

⁷Menli agbamgbanvolɛ bie bɛdabɛ noko bɛhɔlile ɔ nzi na bɛkpole Sɔlɔmɔn ara Rilihɔbowam wɔ mekɛ mɔɔ Rilihɔbowam le kakula na ye adwenle ɛtɛtinle na yeahola yeagyinla bɛ nloa la.

⁸Kɛkala, bɛyɛ bɛ adwenle kɛ kɛmɔ bɛ nwo zonle na bɛdedɛ bɛ ezukoa nvutuke nlankɛ ananze ne mɔ mɔɔ Gyɛlɔbowam ɛyɛ ɛmaa bɛ kɛ bɛ nyamenle la ati, bɛ nee Devidi abo zo amra ne mɔɔ Ɛdɛnkɛma belemgbunli maanle ne wɔ bɛ sa nu la baho.

⁹Bɛvoa Ɛdɛnkɛma sɛlɛvolɛma ne mɔ mɔɔ le Aalɔn abo zo amra la, nee Livaema kɔsɔɔti na bɛdabɛ bɛye bɛ sɛlɛvolɛma kɛ maanle gyɛne gyɛne ne mɔ yɛ ye la. Awie biala mɔɔ kɛhola kɛva ɛnlankɛ nyinli ekyi ko anzɛɛ mboane nyinli ngyikyi nsuu kɛrabia ɔ nwo la ɛnee bɛyɛ ye sɛlɛvolɛ mɔɔ ɔko bɛ nyamenle ne mɔ mɔɔ ɛnzɔho ɛhwee la anyunlu a.

¹⁰“Na yɛmɛ, Ɛdɛnkɛma a le yɛ Nyamenle a, yɛɛ yɛtɛkpole ye. Yɛlɛ sɛlɛvolɛma mɔɔ kɔ Ɛdɛnkɛma anyunlu maa yɛ na bɛle Aalɔn abo zo amra a, yɛɛ yɛlɛ Livaema mɔɔ boa bɛ a.

¹¹Bɛbɔ ɛyelalɛ azu bɛmaa Ɛdɛnkɛma nwonlomɔ nee nɔsolɛ biala na bɛkpu ɛyɛlɛ evuanlɛ, bɛfa kpanwo nwuanzanwuanza ne bɛgua ezukoa nvutuke ɛkponle ne azo, bɛnea ezukoa nvutuke kɛnlaneɛ mbaka ne mɔ azo, amaa ahɛnlaneɛ mɔɔ gyigyi zo la ada nɔsolɛ biala. Ɔluakɛ yɛyɛ mɔɔ Ɛdɛnkɛma yɛ Nyamenle ne ɛze yɛ la, na bɛmɛ, bɛkpo ye.

¹²Bɛnlea o, na Nyamenle nee yɛ a lua a, yɛɛ yemɔ yɛɛ li yɛ ti a. Ye sɛlɛvolɛma ne babɔ bɛ aweɛne ndendenle ne mɔ anu bɛamaa konle ne atia bɛ. O Yizilayɛma, bɛ nee bɛ ze mɔ Ɛdɛnkɛma Nyamenle ne mmako, ɔluakɛ bɛnrɛhola ɔ nyunlu gyinla.”

¹³Mekɛ ne anu ɛnee Gyɛlɔbowam ɛzoa ɛlɔnema ɛmaa bɛbu Dwuda ɛlɔnema ne anzi, ɛhye ati ɛnee Dwuda ɛlɔnema ne ɛha avinli, Yizilayɛma wɔ bɛ nyunlu nee bɛ nzi.

¹⁴Na mɔɔ Dwudama nwunle kɛ konle ne ɛzi bɛ nyunlu nee bɛ nzi la, bɛzunle bɛvɛlɛle Ɛdɛnkɛma, na sɛlɛvolɛma ne mɔ bɔle bɛ aweɛne ndendenle ne mɔ anu.

¹⁵Akee Dwudama bɔle bubu na Nyamenle manle Gyɛlɔbowam nee Yizilayɛ ɛlɔnema ne lile akoatɔ wɔ Abaegya nee Dwuda ɛlɔnema anyunlu.

¹⁶Yizilayɛ ɛlɔnema ne guale ɛbɔ nu, na Nyamenle yele bɛ manle Dwudama.

¹⁷Abaegya nee ye ɛlɔnema ne hunle Yizilayɛma dɔɔnwo kpalɛ; kenle ko ne Yizilayɛma mɔɔ dɔle la le menli apenle ngoko ɛya nnu mɔɔ ze konle nye zo kpalɛ la.

¹⁸Yemɔti Dwuda lile Yizilayɛma anwo zo konim kenle ko ne, ɔboalekɛ bɛvale bɛ rɛle bɛwulale Ɛdɛnkɛma, bɛ ze mɔ Nyamenle ne anu.

¹⁹Abaegya voanle Gyɛlɔbowam na ɔhonle ɔvale azuamgbole: Bɛtɛle nee ye namunamu, Gyɛhyeena nee ye namunamu, yɛɛ Yifolɔn nee ye namunamu boka nwolɛ.

²⁰Gyɛlɔbowam amkpazi bieko ɛlɛ wɔ mekɛ mɔɔ Abaegya de aze la, na Ɛdɛnkɛma manle anwonyane bɔle ye na ɔwule.

²¹Abaegya tumi ne akee yɛle kpole. Ɔgyale mraalɛ bulu nee nna na ɔwole mralɛ mrenya abulanwiɔ nee nwiɔ yɛɛ mralɛ mraalɛ bulu nee nsia.

²²Abaegya gyima mɔɔ hale la, ye nyɛleɛ nee ɔ nloa edwɛkɛ, bɛhɛlɛ bɛ muala wɔ Nyamenle Kpɔmanvolɛ Yedo Tetedwɛkɛ Buluku ne anu.