Read Nzema 2 Edk 14 Bible Online

2 Edk 14 - Nzema bible

2 Edk 14

¹Belemgbunli Abaegya hɔle ayile nu na bɛwulale ye mrɛlatɛlɛ nu wɔ Devidi Suakpole zo, na ɔ ra Esa lile ebia ne. Wɔ Belemgbunli Esa mekɛ zo maanlema ne anzo nu dwole bɛ ɛvolɛ bulu.

²Esa yɛle mɔɔ le kpalɛ la na ɔzɔle Ɛdɛnkɛma ye Nyamenle ne anye.

³Ɔbubule azukponle gyɛne gyɛne ne mɔ nee ɛleka ne mɔ mɔɔ menli mɔɔ ɛnze Nyamenle la sonle la. Ɔbubule bɛ awozonle mpila sɛkɛlɛneɛ ne mɔ na ɔpɛle bɛ bozonle raalɛ Ahyela sɛkɛlɛneɛ baka ne ɔdole.

⁴Ɔhyehyɛle kɛ Dwudama kɔsɔɔti ɛzonle bɛ ze mɔ Ɛdɛnkɛma Nyamenle ne, na bɛli ye mɛla nee ye ngyehyɛlɛ ne mɔ azo.

⁵Eza ɔbubule ɛleka ne mɔ mɔɔ menli mɔɔ ɛnze Nyamenle la sonle wɔ Dwuda azuamgbole ne mɔ azo la amuala na ɔbubule bɛ azukponle ne mɔ mɔɔ bɛkpu ɛyɛlɛ zolɛ la.

⁶Ɔkyekyele azuamgbole wɔ Dwuda na ɔmanle bɛbɔle nwolɛ bane, ɔluakɛ ɛnee maanle ne lɛ anzonudwolɛ. Yeango konle biala wɔ ɛvolɛ zɔhane mɔ anu, ɔboalekɛ Ɛdɛnkɛma manle ye anzonudwolɛ.

⁷Na ɔzele Dwudama kɛ, “Bɛmaa yɛkyekye azuamgbole ɛhye mɔ na yɛlie nwolɛ bane yɛyia, yɛmaa bɛ nlenkɛ mgbole mɔɔ mbulalɛ gugua bɛ nzi, na yɛsisi tawa mɔɔ bɛgyinla zolɛ bɛsinza la. Azɛlɛ ye tɛde yɛ ɛdeɛ, ɔboalekɛ yɛyɛ mɔɔ Ɛdɛnkɛma yɛ Nyamenle ne kpondɛ la. Yɛyɛ mɔɔ ɔkpondɛ la, yɛɛ ɔdaye noko yemaa yɛ anzonudwolɛ.” Yemɔti bɛkyekyele azuamgbole ne mɔ na bɛkpazile.

⁸Ɛnee Esa lɛ ɛlɔnema apenle ngoko ɛya nsa mɔɔ vi Dwuda a. Bɛlɛ bɛ sa nu enyinlike nee atwɛ, yɛɛ Bɛngyaman maanzinli nu amra apenle ngoko ɛya nwiɔ abulatwɛ mɔɔ bɛdabɛ noko bɛdedɛ atwɛ nee bɛ sa nu enyinlike nee ɛda a. Bɛ muala bɛ ze konle nye zo kpalɛ.

⁹Sudanenli bie mɔɔ bɛfɛlɛ ye Zilaa la vale konle radoale Belemgbunli Esa. Ɔlɛ ɛlɔnema mgbe yɛɛ konle ehwili ɛya nsa, na bɛrale toonwo bɛradwule Malihyaa.

¹⁰Belemgbunli Esa hɔyiale bɛ, na bɛvale konle ne bɛbɔle zo wɔ Zɛfata bɔnza ne mɔɔ wɔ Malihyaa la anu.

¹¹Na Belemgbunli Esa zɛlɛle Ɛdɛnkɛma ye Nyamenle ne kɛ, “O Ɛdɛnkɛma, awie biala ɛnle ɛkɛ mɔɔ kola boa, kɛ ɛdawɔ ala yɛɛ ɛkɛgyinla tumima nee koahweabanema avinli a. Boa yɛ, O Ɛdɛnkɛma yɛ Nyamenle, ɔluakɛ wɔmɔ yɛɛ yɛ rɛle wɔ wɔ nu a, yɛɛ wɔ duma nu a yɛra yɛbadoa menli pemgbenleamgbe ɛhye mɔ yɛ nee bɛ aho a. O Ɛdɛnkɛma, wɔmɔ a ɛle yɛ Nyamenle a. Mmamaa dasanli di ɛ nwo zo konim.”

¹²Yemɔti Ɛdɛnkɛma lile Sudanema anwo zo konim, na ɔmanle bɛ kpɔvolɛma ne guale ndwɛlɛ aze wɔ Belemgbunli Esa nee Dwuda ɛlɔnema anyunlu.

¹³Esa nee ye ɛlɔnema ne voanle bɛ toonwo hɔdwule Gilaa, na bɛhunle Sudanema amuala. Ko bɔbɔ anga, ɔluakɛ Ɛdɛnkɛma nee ye ɛlɔnema lile bɛ nwo zo konim. Dwuda ɛlɔnema ne zoale ninyɛne dɔɔnwo mɔɔ bɛnyianle bɛ wɔ konle ne anu la hɔle.

¹⁴Bɛzɛkyele azuamgbole mɔɔ zuozua Gilaa la amuala, ɔluakɛ ɛnee menli ne ɛzulo Ɛdɛnkɛma kpole kpalɛ. Bɛsesale ninyɛne dɔɔnwo wɔ azuamgbole ɛhye mɔ azo, ɔluakɛ ɛnee ninyɛne wɔ azua ne mɔ azo kpalɛ.

¹⁵Eza bɛhɔyiale mboaneneavolɛma bie, bɛhunle bɛ na bɛzoale bɛ mboane ɛwolaa ne nee bɛ afunlumu ne mɔ bɛhɔle. Akee bɛziale bɛrale Gyɛlusalɛm.