Read Nzema 2 Edk 15 Bible Online

2 Edk 15 - Nzema bible

2 Edk 15

¹Nyamenle Sunsum ne dwule Nyamenle kpɔmanvolɛ Azalaya anwo zo. Azalaya ɔ ze a le Odɛde.

²Na ɔhɔyiale Belemgbunli Esa na ɔzele ye kɛ, “Wɔmɔ Esa, yɛɛ Dwudama nee Bɛngyamanema amuala, bɛdie me. Ɛdɛnkɛma nee bɛ lua, kɛmɔ bɛ nee ye lua la. Saa bɛkpondɛ ɔ bo zo a, bɛkɛnwu ye, na saa bɛkpo ye a, ɔbakpo bɛ.

³Mekɛ tendenle mɔɔ ɛraze ɛhɔ la ɛnee Yizilayɛma ɛnzonle nɔhalɛ Nyamenle ne. Bɛnlɛ sɛlɛvolɛma mɔɔ kilehile bɛ a, yɛɛ bɛnlɛ mɛla.

⁴Na saa munzule to bɛ a yɛɛ bɛsu bɛfɛlɛ Ɛdɛnkɛma, Yizilayɛ Nyamenle ne, bɛkpondɛ ɔ bo zo na bɛnwu ye a.

⁵Mekɛ zɔhane mɔ anu awie biala annyia anzonudwolɛ angɔ amba. Ɔluakɛ ɛnee ngyegyelɛ dɔɔnwo wɔ bɛdabɛ mɔɔ bɛde maanle maanle ne mɔ anu la anwo zo.

⁶Bɛ nuhua kpakyekpakyele, maanle honle tiale maanle, suakpole honle tiale suakpole, ɔluakɛ ɛnee Nyamenle ɛva ngyegyelɛ ɛrado bɛ avinli.

⁷Na wɔmɔ, si wɔ ahonle! Mmamaa ɛ sa nu to, ɔluakɛ ɛbanyia ahatualɛ wɔ wɔ gyima nwo.”

⁸Mɔɔ Belemgbunli Esa dele Nyamenle kpɔmanvolɛ Azalaya Nyamenle nrɛlaleɛ ne la, ɔzile ahonle na ɔmanle bɛyeyele mmonle mɔɔ wɔ Dwuda nee Bɛngyaman maanzinli ne mɔ anu la amuala, nee azuamgbole mɔɔ yeho yeva bɛ wɔ Yifelaem awoka ne mɔ azo lɔ la amuala azo. Akee ɔyɛle Ɛdɛnkɛma azukponle ne mɔɔ wɔ Ɛdɛnkɛma Ɛzonlenlɛ Sua ne anyunlu ɛkɛ ne la boɛ.

⁹Ɛnee menli dɔɔnwo vi Yifelaem, Manasɛ, nee Semɛyɔn maanzinli ne mɔ anu wɔ Yizilayɛ ɛdu ɛradoa Belemgbunli Esa, ɔluakɛ bɛnwunle kɛ Ɛdɛnkɛma ye Nyamenle ne nee ye lua. Belemgbunli Esa boɔboale bɛ kɔsɔɔti nee Dwudama nee Bɛngyamanema amuala anloa.

¹⁰Ɔmanle bɛyiale nu wɔ Gyɛlusalɛm wɔ mekɛ mɔɔ ɛnee yeli ɛvolɛ bulu nee nnu wɔ ebia ne azo la, ye siane nsa ne azo.

¹¹Kenle ko ne bɛbɔle azu bɛmanle Ɛdɛnkɛma. Ninyɛne mɔɔ bɛnyianle bɛ wɔ bɛ konle ne mɔ anu la, bɛvale nuhua nlankɛ ɛya nsuu nee mboane apenle nsuu bɛbɔle azu ne.

¹²Na bɛyɛle ngyehyɛlɛ kɛ bɛfa bɛ ahonle nee bɛ ɛkɛla muala bɛazonle Ɛdɛnkɛma, bɛ ze mɔ Nyamenle ne.

¹³Bɛkyekyele ɔ bo kɛ awie biala mɔɔ anzonle Yizilayɛ Ɛdɛnkɛma Nyamenle ne la, saa ɔle kakula o, kpanyinli o, raalɛ o, nrenya o, ɔwɔ kɛ bɛku ye.

¹⁴Bɛvale ɛnelɛ kpole bɛdeɛdeanle nu, bɛbɔle aweɛne ndendenle nee ɛweɛne na bɛvale Ɛdɛnkɛma bɛlile amonle,

¹⁵na Dwudama amuala anye liele kpole wɔ ɛhye anwo. Ɔluakɛ bɛvale bɛ ahonle muala a bɛhanle ndane bɛlile amonle ne a. Bɛvale bɛ ɛhulolɛ kɔsɔɔti bɛzonlenle Ɛdɛnkɛma, na Ɛdɛnkɛma liele bɛ dole nu na ɔmanle bɛ nzo nu dwole bɛ wɔ adenle biala anu.

¹⁶Belemgbunli Esa dule ɔ nli Meeyaka ebia zo kɛ ɔnle ɛhyenlema bieko, ɔboalekɛ ɛnee yeyɛ bozonle raalɛ Ahyela bɛkyi ananze ne yezie ɔ nwo ɔsonle ye. Esa bubule bozonle raalɛ Ahyela ananze ne, ɔpele na ɔhɔyelale ye wɔ azudenle Kedelɔn ne anloa.

¹⁷Yeanzɛkye ɛleka ne mɔ mɔɔ menli mɔɔ ɛnze Nyamenle la sonle la, noko Belemgbunli Esa lile nɔhalɛ manle Ɛdɛnkɛma wɔ mekɛ mɔɔ ɔde ngoane nu la.

¹⁸Ɔvale ɔ ze ahyɛlɛ ninyɛne mɔɔ bɛdu bɛzie ɛkɛ bɛmaa Nyamenle la, nee ɔdaye ye ahyɛlɛ ninyɛne ne mɔ amuala, dwɛtɛ fufule, nee ezukoa nvutuke yɛɛ ahyɛnze kɔsɔɔti ɔrale Ɛdɛnkɛma Ɛzonlenlɛ Sua ne anu.

¹⁹Na konle bieko anzi toonwo Belemgbunli Esa lile ɛvolɛ abulasa nee nnu wɔ ebia ne azo.