Read Nzema 2 Edk 20 Bible Online

2 Edk 20 - Nzema bible

2 Edk 20

¹Ɛhye anzi Mowabema nee Amɔnoma, nee Mɛyunɛmma[4] bie mɔ rale Gyɛhɔhyafate anwo zo kɛ bɛ nee ye baho.

²Na awie mɔ bie rahanle hilele Gyɛhɔhyafate kɛ, “Ɛlɔnema dɔɔnwo kpalɛ vi Yidɔm nee nyevile ne anzi lɔ ɛlɛba aradoa wɔ nee wɔ aho. Kɛkala bɔbɔ, bɛwɔ Hazazɔn Teemaa.” (Suakpole Ɛngidae duma ko noko ɛne.)

³Ɛzulolɛ hanle Gyɛhɔhyafate na ɔzɛlɛle moalɛ ɔvile Ɛdɛnkɛma ɛkɛ ne, na ɔzele kɛ Dwudama kɔsɔɔti ɛhye ɛhɔne.

⁴Na Dwudama amuala yiale kɛ bɛsɛlɛ Ɛdɛnkɛma moalɛ, menli vi Dwuda azuamgbole ne mɔ amuala azo rale nzɛlɛlɛ ne bie.

⁵Na Gyɛhɔhyafate dwazole gyinlanle Ɛdɛnkɛma Ɛzonlenlɛ Sua ne alie fofolɛ ne mɔɔ bɔ zo mɔɔ bɛyɛ la anwo, wɔ Dwudama nee Gyɛlusalɛmma amuala anyunlu,

⁶na ɔzɛlɛle kɛ, “O Ɛdɛnkɛma, yɛ ze mɔ Nyamenle, wɔmɔ a ɛle Nyamenle mɔɔ ɛwɔ anwuma na ɛsie arelemgbunli maanle maanle kɔsɔɔti mɔɔ wɔ ewiade la a. Wɔmɔ yɛɛ ɛlɛ tumi nee anwosesebɛ mɔɔ awie ɛngola ɛ nyunlu gyinla a.

⁷ O yɛ Nyamenle, ɛdawɔ yɛɛ ɛvoanle menli mɔɔ ɛnee de azɛlɛ ye azo la ɛvile Yizilayɛma anyunlu, na ɛvale azɛlɛ ne ɛmanle ɛ gɔnwo Ebileham abo zo amra bɔkɔɔ a.

⁸Bɛdɛnla zo mekɛ dɔɔnwo na bɛzi ɛleka nwuanzanwuanza bɛmaa wɔ, na bɛzɛlɛ wɔ kɛ,

⁹saa munzule fa yɛ aze: konle, ndeanlɛ, ewule nzane anzɛɛ ɛhɔne ba a, yɛragyinla sua ɛhye anyunlu ɛke, wɔ ɛ nyunlu, kɛmɔ wɔ duma a la sua ye azo la, na yɛlua yɛ nyane ne anu yɛdea yɛvɛlɛ wɔ na ɛkɛdie yɛ.

¹⁰ “Kɛkala, Amɔnoma, Mowabema, nee Yidɔmma ɛva yɛ aze. Mekɛ mɔɔ Yizilayɛma vi Yigyibiti ba la, wɔammaa bɛanva bɛ azɛlɛ ne azo, bɛbule bɛhoanenle bɛ, yemɔti bɛambɔ bɛ bo zo.

¹¹Akee nea, yɛ moyɛlɛ a le kɛ bɛba bɛaravoa yɛ bɛavi azɛlɛ ye mɔɔ wɔva wɔmaa yɛ kɛ yɛdɛnla zo kpɔkpɔ la azo.

¹²O yɛ Nyamenle, tea bɛ maa yɛ. Ɔluakɛ menli ɛwolaa ɛhye mɔɔ ɛlɛba yɛ nwo zo la, yɛnrɛhola bɛ nyunlu gyinla. Yɛnnwu mɔɔ yɛyɛ bɔbɔ a, ɛ nyunlu ala a yɛ nye gyi a.”

¹³Mekɛ ne anu, ɛnee Dwudama amuala nee bɛ mraalɛ nee bɛ mra gyi nzisi wɔ Ɛdɛnkɛma Ɛzonlenlɛ Sua ne anu.

¹⁴Na Ɛdɛnkɛma Sunsum ne dwule Gyaheezeɛle anwo zo wɔ menli ne avinli. Gyaheezeɛle ɔ ze a le Zɛkalaya. Zɛkalaya ɔ ze a le Bɛnaya, Bɛnaya ɔ ze a le Gyiayɛle, Gyiayɛle ɔ ze a le Matanaya, ɔle Livaenli, ɔvi Esafe abusua nu.

¹⁵ Gyaheezeɛle zele kɛ, “Bɛdie, Dwudama amuala nee Gyɛlusalɛmma, yɛɛ Belemgbunli Gyɛhɔhyafate, bɛdie! Ɛdɛnkɛma se, ‘Bɛmmasulo, yɛɛ bɛmmamaa bɛ rɛle bɔ kɛ menli ɛwolaa ɛhye ɛlɛba bɛ nwo zo a. Ɔluakɛ konle ne ɛnle bɛ konle. Ɔle Nyamenle ɔdaye ye konle.

¹⁶Ɛhyema bɛhɔholo bɛ nwo zo. Bɛbava Zeze ademgbole nu a bɛavo bɛara a. Bɛbanwu bɛ wɔ bɔnza ne ati lɔ wɔ Gyɛluwɛle fienemgbole ne aduduleɛ.

¹⁷ Dwudama nee Gyɛlusalɛmma, ɔnrɛhyia kɛ bɛkɛho bɔbɔ wɔ konle ɛhye anu. Bɛmɛ bɛgyinla bɛ bo zo ne, bɛmmatu bɛ bo, na bɛnlea kɛ Ɛdɛnkɛma bazi aho bɛ ti ali konim la.’ Bɛmmasulo, yɛɛ bɛmmamaa bɛ rɛle bɔ. Ɛhyema bɛhɔteta bɛ na Ɛdɛnkɛma nee bɛ bahɔ.”

¹⁸Akee Belemgbunli Gyɛhɔhyafate bɔle ɔ ti aze, ɔvale ɔ nyunlu ɔbutule aze, na Dwudama nee bɛdabɛ mɔɔ bɛwɔ Gyɛlusalɛm la amuala dule guale Ɛdɛnkɛma anyunlu na bɛzonlenle ye.

¹⁹Na Livaema mɔɔ bɔ Kohate nee Kɔla mbusua ne bie la dwazole deɛdeanle nu yele Ɛdɛnkɛma, Yizilayɛ Nyamenle ne ayɛlɛ.

²⁰Bɛdwazole ndɛndɛ wɔ aleɛbahye ne ala na bɛhɔle Tɛkowa fienemgbole ne anu. Mɔɔ bɛkɔ la, Belemgbunli Gyɛhɔhyafate ragyinlanle adenle ne anloa na ɔzele bɛ kɛ, “Dwudama nee Gyɛlusalɛmma, bɛdie me! Bɛlie Ɛdɛnkɛma bɛ Nyamenle ne bɛli, na bɛbali konim. Bɛlie Nyamenle kpɔmanvolɛma ne bɛli, na bɛbaho bɛadɔ zolɛ.”

²¹Akee ɔ nee menli ne bɛhanle bɛ ti bɛkpulale nwolɛ na ɔyele menli mɔɔ ɛwula ɛzonlenlɛ adɛladeɛ ɛli ɛlɔnema ne ati la, na ɔzele bɛ kɛ bɛdo edwɛne bɛmaa Ɛdɛnkɛma na bɛye ye ayɛlɛ bɛze kɛ, “Bɛyɛ Ɛdɛnkɛma mo, ɔluakɛ ye ɛhulolɛ kpundii ne ɛnlɛ awieleɛ.”

²²Mɔɔ bɛbɔle ɔ bo kɛ bɛto edwɛne bɛaye Ɛdɛnkɛma ayɛlɛ la, Ɛdɛnkɛma manle Amɔnoma, Mowabema, nee Yidɔmma mɔɔ ɛra badoa Yizilayɛma nee bɛ aho la anye zo danle bɛ, na bɛhuhunle bɛ nwo.

²³Amɔnoma nee Mowabema bɔle nu hunle Yidɔm ɛlɔnema ne amuala bɔle bɛ bo zo. Bɛwiele Yidɔmma ku la, bɛdabɛ bɛ ngome bɛhakyile bɛ nye bɛbɔle ye zo na bɛpɛle bɛ nwo bɛhuhunle bɛ nwo bɔkɔɔ.

²⁴Dwuda ɛlɔnema ne dwule fienemgbole ne anu tawa ne mɔɔ bɛgyinla zo bɛneɛnlea maanle nu la anwo la, bie mɔ vole zolɛ na bɛnwunle kɛ, menli ɛwolaa ne kɔsɔɔti ɛyɛ avunli na bɛgua azɛlɛ ne anwo. Ko bɔbɔ anvi ɛsalɛ.

²⁵Na Gyɛhɔhyafate nee ye ɛlɔnema ne akee rale kɛ bɛbave bɛ ninyɛne. Bɛnyianle nlankɛ dɔɔnwo kpalɛ, ninyɛne, ndanlɛ, nee ninyɛne mɔɔ sonle bolɛ la. Bɛnyianle ninyɛne dɔɔnwo kpalɛ mɔɔ ɛnee akee bɔbɔ bɛngola bɛ soa a. Ninyɛne ne zonle somaa; bɛvale kenle nsa a bɛhwenle ninyɛne ne a.

²⁶Kenle nna ne azo bɛ muala bɛrayiale “Bɛleeka”[5] Bɔnza, na bɛyele Ɛdɛnkɛma ayɛlɛ. Zɔhane ati, bɔnza zɔhane, ɛnɛ nee ɛnɛ ala bɛfɛlɛ ye Bɛleeka Bɔnza.

²⁷Akee Dwudama o, Gyɛlusalɛmma o, bɛ muala bɛziale bɛrale Gyɛlusalɛm. Belemgbunli Gyɛhɔhyafate lile bɛ ti na bɛvale anyelielɛ bɛziale bɛrale, ɔluakɛ Ɛdɛnkɛma ɛmaa bɛli bɛ kpɔvolɛma ne mɔ anwo zo konim.

²⁸Bɛbɔle getaa mgbole nee ngyikyi nee aweɛne ndendenle toonwo bɛrawolole Ɛdɛnkɛma Ɛzonlenlɛ Sua ne anu.

²⁹Na maanle maanle dɔɔnwo mɔɔ dele kɛ Ɛdɛnkɛma zile liele Yizilayɛma ati honle tiale bɛ kpɔvolɛma la zulole Nyamenle.

³⁰Yemɔti Belemgbunli Gyɛhɔhyafate akee ziele maanle ne anzonudwolɛ nu, ɔluakɛ Nyamenle bɔle ɔ nwo bane.

³¹Gyɛhɔhyafate lile ɛvolɛ abulasa nee nnu la yɛɛ ɔbɔle ɔ bo kɛ ɔdi belemgbunli wɔ Dwuda a. Ɔdɛnlanle Gyɛlusalɛm ɔlile ebia ne ɛvolɛ abulanwiɔ nee nnu. Ɔ nli a le Hyelebae ara raalɛ Azuba.

³²Ɔvale ɔ ze Esa agyakɛ na ɔbɔle ɛbɛla mɔɔ ɔ ze bɔle la bie; yeangakyi ye nyɛleɛ, na ɔyɛle mɔɔ sɔ Ɛdɛnkɛma anye la.

³³Noko yeanzɛkye ɛleka ne mɔ mɔɔ menli mɔɔ ɛnze Nyamenle la sonle la, yɛɛ ɛnee menli ne ɛtɛfale bɛ ahonle muala ɛtɛmanle bɛ ze mɔ Nyamenle ne kɛ yemɔ ala a bɛkɛzonle ye a.

³⁴Akee Gyɛhɔhyafate gyima mɔɔ ɔlile, ɔvi mɔlebɛbo ne mɔɔ kɔdwu awieleɛ ne, mɔɔ ɛnle ɛke la, bɛhɛlɛ bɛ kɔsɔɔti wɔ Haneenae ara Gyihu anwo Tetedwɛkɛ Buluku ne mɔɔ wɔ Yizilayɛ Arelemgbunli Tetedwɛkɛ Buluku ne anu la anu.

³⁵Mekɛ bie Dwuda Belemgbunli Gyɛhɔhyafate vale ɔ nwo bɔnenle Yizilayɛ Belemgbunli Ehazaya, mɔɔ yɛle amumuyɛ kpole la na ɔ nee ye yɛle agɔnwolɛ.

³⁶Ɔ nee Ehazaya bɔle nu bɛbobɔle meli dɔɔnwo wɔ Yizeɔngibɛ kɛ bɛfa bɛahɔ Tahyehye.

³⁷Na Dɔdavahu mɔɔ vi Malihyaa la ara Ɛleyizɛ vale Nyamenle nrɛlaleɛ ne manle Gyɛhɔhyafate kɛ, “Suzuamgba ala mɔɔ wɔva ɛ nwo wɔbɔnle Ehazaya la, Ɛdɛnkɛma bazɛkye mɔɔ wɔyɛ la.” Na meli ne mɔ hɔnlomanle adenle nu, bɛandwu Tahyehye.