Read Nzema 2 Edk 21 Bible Online

2 Edk 21 - Nzema bible

2 Edk 21

¹Gyɛhɔhyafate hɔle ayile nu na bɛwulale ye mrɛlatɛlɛ nu wɔ ɔ ze mɔ anwo ɛkɛ wɔ Devidi Suakpole zo na ɔ ra nrenya Gyɛhɔlam lile ebia ne.

²Belemgbunli Gyɛhɔhyafate ara Gyɛhɔlam lɛ ɔ mediema mrenya nsia. Bɛmɛ a le Azalaya, Gyɛheɛle, Zɛkalaya, Azalayahu, Maekeɛle, yɛɛ Hyɛfataya.

³Bɛ ze manle bɛ ahyɛlɛ ninyɛne dɔɔnwo, yɛɛ Dwuda azuamgbole mɔɔ bɛbɔ nwolɛ bane la. Noko ɔvale maanle ne ɔmanle Gyɛhɔlam, ɔboalekɛ yemɔ a ɔle ralɛ nrenya kpanyinli a.

⁴Mɔɔ Gyɛhɔlam ralile ɔ ze ebia ne na ɔnyianle gyinlagyakɛ la, ɔmanle bɛhunle ɔ mediema mrenya ne mɔ amuala, nee Yizilayɛ mgbanyima ne bie mɔ.

⁵Gyɛhɔlam lile ɛvolɛ abulasa nee nwiɔ la yɛɛ ɔbɔle ɔ bo kɛ ɔdi belemgbunli a. Ɔdɛnlanle Gyɛlusalɛm ɔlile ebia ne ɛvolɛ mɔtwɛ.

⁶Ɔvale Yizilayɛ arelemgbunli ne mɔ agyakɛ, ɔbɔle Ehabe sua nu amra ɛbɛla ne bie, ɔluakɛ ɛnee ɔgya Ehabe ara raalɛ. Ɔyɛle ɛtane ɔtiale Ɛdɛnkɛma,

⁷ noko Ɛdɛnkɛma ambɔ Devidi sua nu amra abo zo, ɔboalekɛ ɛnee Ɛdɛnkɛma nee Devidi ɛyɛ ngyekyeleɛ, na yebɔ Devidi ɛwɔkɛ kɛ ɔbamaa kɛnlaneɛ ada ye nee ɔ bo zo amra sua nu dahuu.

⁸ Ye mekɛ zo Yidɔmma dele atua kɛ bɛnrɛzonle Dwuda belemgbunli ne bieko, na bɛdabɛ bɛziele bɛ belemgbunli ɛdeɛ.

⁹Yemɔti Gyɛhɔlam vale ye safohyenlema nee ye ɛlɔnema mɔɔ tɛnla ehwili nu ko la na kenle ko nɔɔzo bɛdwazole bɛhɔtetale Yidɔm. Yidɔmma bɛnrale yiale bɛ, noko bɛbɔle mɔdenle bɛwolole bɛ sa abo.

¹⁰Yemɔti ɔvi mekɛ ne toonwo mɔɔ ɛradwu ɛnɛ la, Yidɔmma di bɛ ti anwo. Mekɛ zɔhane ala anu Lebena ɔdaye ɔdele atua kɛ bɛnrɛzonle Dwuda belemgbunli ne bieko, ɔboalekɛ yegyakyi Ɛdɛnkɛma, ɔ ze mɔ Nyamenle ne anzi ɛlilɛ.

¹¹Yeanga ɛhye angome, eza ɔyɛle ɛleka ne mɔ mɔɔ menli mɔɔ ɛnze Nyamenle la sonle la, na ɔmanle Gyɛlusalɛm amuala yɛle ɛtane tiale Ɛdɛnkɛma; ɔminlinle Dwudama bɔkɔɔ.

¹²Nyamenle kpɔmanvolɛ Yilaegya manle bɛvale kɛlata bɛrɛlɛle Belemgbunli Gyɛhɔlam kɛ, “Ɛdɛnkɛma, ɛ ze Devidi Nyamenle ne se, ‘Kɛmɔ wɔanva ɛ ze Gyɛhɔhyafate anzɛɛ Dwuda Belemgbunli Esa agyakɛ,

¹³na wɔva Yizilayɛ arelemgbunli agyakɛ, wɔmaa Dwudama nee Gyɛlusalɛm amra amuala ɛyɛ ɛtane, kɛmɔ Ehabe sua nu amra manle Yizilayɛma yɛle ɛtane la, na wɔhu ɛ mediema mɔɔ ɛ nee bɛ bɛ ze le ko, na bɛle kpalɛ bɛtɛla ɛdawɔ mumua ne la,

¹⁴Ɛdɛnkɛma bamaa ewule nzane aradɔ wɔ menli ne, ɛ mra nee wɔ mraalɛ anwo, na yeazɛkye wɔ agyadeɛ kɔsɔɔti.

¹⁵Ɛdawɔ mumua ne noko ɛbanyia ɛkolɛ ewule mɔɔ babɔ wɔ anwonyane mɔɔ anu bayɛ se alehyenlɛ biala la.’ ”

¹⁶Na Ɛdɛnkɛma manle Filisitiama nee Arelabema bie mɔɔ dɛnlanle ɛleka mɔɔ zua Sudanema la dwazole Gyɛhɔlam anwo zo.

¹⁷Bɛravale Dwuda aze na bɛzoale nuhua ninyɛne kɔsɔɔti mɔɔ bɛ sa hanle bɛ, mɔɔ le belemgbunli sua nu amra ɛdeɛ la bɛhɔle. Bɛhyele ɔ mra mrenya nee ye mraalɛ noko bɛhɔle, na bɛgyakyile ye ralɛ nrenya kazima Ehazaya ala.

¹⁸Ɛhye anzi, Ɛdɛnkɛma manle ɛkolɛ ewule mɔɔ awie ɛngola ye ayile yɛ la dɔle ɔ nwo.

¹⁹Ɔkadwu ɛvolɛ nwiɔ la, ɛnee akee ewule ne ɛdɛla zolɛ. Ɔ ko manle zo na ɔvale abodelɛ kpole ɔwule. Ye menli ne ambɔ sendɔlɔra anzu ye, kɛmɔ bɛyɛle arelemgbunli mɔɔ lumua la.

²⁰Gyɛhɔlam lile ɛvolɛ abulasa nee nwiɔ la yɛɛ ɔbɔle ɔ bo kɛ ɔdi belemgbunli a, na ɔdɛnlanle Gyɛlusalɛm ɔlile ebia ne ɛvolɛ mɔtwɛ. Awie biala anli ye ewule nwo nyane. Bɛziele ye wɔ Devidi Suakpole zo ɛdeɛ, noko bɛanva ye bɛangɔ ɛleka mɔɔ bɛwula arelemgbunli mɔɔ kɛhɔ ayile nu la mrɛlatɛlɛ nu la.