Read Nzema 2 Edk 22 Bible Online

2 Edk 22 - Nzema bible

2 Edk 22

¹Gyɛlusalɛm amra vale Gyɛhɔlam ara nrenya kazima Ehazaya lile ye agya na bɛziele ye belemgbunli. Bɛyɛle ye zɔhane, ɔboalekɛ Arelabema mɔɔ vale ɛlɔnema ravale Dwuda maanle ne aze la hyele belemgbunli ne amra mrenya ne mɔ kɔsɔɔti hɔhunle bɛ manle ɔhale Ehazaya angomekye.

²Ehazaya lile ɛvolɛ abulanwiɔ nee nwiɔ[6] la yɛɛ ɔbɔle ɔ bo kɛ ɔdi belemgbunli a. Ɔdɛnlanle Gyɛlusalɛm yɛɛ ɔlile ebia ne ɛvolɛ ko. Ɔ nli a le Belemgbunli Ɔmelae anlɔnra raalɛ Atalaya.

³Ɔdaye noko ɔbɔle Ehabe sua nu amra ɛbɛla ne bie, ɔluakɛ ɛnee ɔ nli si ye adua maa ɔdi ɛtane.

⁴Ɔyɛle ɛtane ɔtiale Ɛdɛnkɛma, kɛmɔ Ehabe nee ye sua nu amra yɛle la. Ɔluakɛ ɔ ze wule la ɛnee Belemgbunli Ehabe sua nu amra a tu ye folɛ a.

⁵Ɔlile menli zɔhane mɔ folɛdulɛ zo na ɔ nee Yizilayɛ Belemgbunli Dwɔlam bɔle nu hɔhonle tiale Selea Belemgbunli Hazeeyɛle wɔ Releemɔto mɔɔ wɔ Geleade la. Seleama ne bodale Dwɔlam,

⁶na ɔziale ɔrale Gyɛzɛlii kɛ ɔbayɛ ɔ nwo ayile, na Dwuda belemgbunli ne hɔle kɛ ɔkakpɔla ye.

⁷Na ɛnee Nyamenle ɛhyehyɛ kɛ wɔ Dwɔlam ɛkpɔlalɛ nu yɛɛ Ehazaya balua ayia munzule a. Mɔɔ Ehazaya dwule Dwɔlam anwo ɛkɛ wɔ Gyɛzɛlii la, ɔ nee ye bɛ mu nwiɔ bɛhɔle kɛ bɛkayia Nemehyae ara Gyihu mɔɔ ɛnee Ɛdɛnkɛma ɛmaa bɛkpokpa ye nwole kɛ ɔbɔ Ehabe sua nu amra abo zo la adenle.

⁸Mɔɔ Gyihu bɔ Ehabe sua nu amra abo zo la, ɔyiale Dwuda mgbanyima nee Ehazaya amediema mrenya mɔɔ rale bakpɔla Dwɔlam la na ɔhunle bɛ muala.

⁹Ɔmanle bɛkpondɛle Ehazaya ɔdaye mumua ne toonwo bɛhɔnwunle ye kɛ ɔvea Samɛlea, na bɛhyele ye bɛrɛlɛle Gyihu na bɛhunle ye. Ɔ nlenya Gyɛhɔhyafate, mɔɔ vale ye ahonle muala zonlenle Ɛdɛnkɛma la ati, bɛziele ye. Na ɛnee akee awie biala ɛnle Ehazaya sua nu mɔɔ sie Dwuda maanle ne a.

¹⁰Mɔɔ Ehazaya ɔ nli Atalaya dele kɛ ɔ ra ne ɛwu la, ɔmanle bɛhunle Dwuda dehelɛ abusua ne anu amra amuala.

¹¹Na Belemgbunli Ehazaya adiema raalɛ mɔɔ bɛ nli ɛnle ko la wuale Ehazaya amra mrenya ne mɔ ko mɔɔ bɛfɛlɛ ye Dwowahye la, na ɔvale ye nee ye bafiavolɛ ne ɔveale sua bie akunlu. Bɛfɛlɛ raalɛ ne Gyihohyiba. Ɔ ze a le Belemgbunli Gyɛhɔlam yɛɛ ɔ hu a le sɛlɛvolɛ Gyɛhɔyada. Ɔyɛle ye zɔhane, ɔboalekɛ ɔ diema nrenya a le Belemgbunli Ehazaya, na ɔvale kakula ne ɔveale Atalaya. Yemɔti ɔ sa anga Dwowahye yeangu ye.

¹²Kakula ne nee bɛ dɛnlanle ɛvolɛ nsia, bɛvale ye bɛveale Nyamenle Ɛzonlenlɛ Sua ne anu. Mekɛ ɛhye anu ɛnee Atalaya a di belemgbunli wɔ Dwuda a.