Read Nzema 2 Edk 27 Bible Online

2 Edk 27 - Nzema bible

2 Edk 27

¹Dwotam lile ɛvolɛ abulanwiɔ nee nnu la yɛɛ ɔbɔle ɔ bo kɛ ɔdi belemgbunli a. Ɔlile belemgbunli ɛvolɛ bulu nee nsia, yɛɛ ɔdɛnlanle Gyɛlusalɛm. Ɔ nli a le Zeedɔko ara raalɛ Gyɛhuhyaa.

²Ɔyɛle mɔɔ sɔ Ɛdɛnkɛma anye la. Ɔvale ɔ ze Ɛzaya agyakɛ, noko yemɔ yeanvu nu yeangɔ Ɛdɛnkɛma Ɛzonlenlɛ Sua ne anu ɛlɛ. Na menli ne, bɛmɛ, bɛhɔle zolɛ bɛyɛle bɛ ninyɛndane ne mɔ.

³Ɔzile Ɛdɛnkɛma Ɛzonlenlɛ Sua ne Sɔlɔ Anlenkɛ Kpole ne, na ɔyɛle gyima dɔɔnwo wɔ suakpole ne bane ne mɔɔ bɛfɛlɛ ye Ofɛle la anwo.

⁴Akee ɔkyekyele azuamgbole wɔ Dwuda awoka ne mɔ azo lɔ, na ɔsisile aranemgbole nee tawa wɔ awoka mɔɔ mbaka mgbole wɔ zolɛ la azo.

⁵Ɔ nee Amɔnoma belemgbunli ne honle na ɔlile ɔ nwo zo konim, na ɔmanle Amɔnoma duale adwule manle ye. Ɛvolɛ biala Amɔnoma tua dwɛtɛ fufule kilo apenle nsa ɛya nna, hwiiti tɔno apenle ko, yɛɛ baale tɔno apenle ko.

⁶Dwotam anwo yɛle ɛzulolɛ, ɔboalekɛ ɔdiele Ɛdɛnkɛma ye Nyamenle ne ane.

⁷Dwotam anwo edwɛkɛ mɔɔ hale la, ye gyima mɔɔ ɔlile, ye nyɛleɛ nee ye konle mɔɔ ɔhonle la, bɛhɛlɛ bɛ muala wɔ Yizilayɛ nee Dwuda Arelemgbunli Tetedwɛkɛ Buluku ne anu.

⁸Ɔlile ɛvolɛ abulanwiɔ nee nnu la yɛɛ ɔbɔle ɔ bo kɛ ɔdi belemgbunli a. Ɔdɛnlanle Gyɛlusalɛm, yɛɛ ɔlile ebia ne ɛvolɛ bulu nee nsia.

⁹Belemgbunli Dwotam hɔle ayile nu na bɛwulale ye mrɛlatɛlɛ nu wɔ Devidi Suakpole zo, na ɔ ra Ehaze lile ebia ne.