Read Nzema 2 Edk 29 Bible Online

2 Edk 29 - Nzema bible

2 Edk 29

¹Hɛzikaya lile ɛvolɛ abulanwiɔ nee nnu la yɛɛ ɔbɔle ɔ bo kɛ ɔdi belemgbunli a. Ɔdɛnlanle Gyɛlusalɛm, na ɔlile ebia ne ɛvolɛ abulanwiɔ nee ngɔnla. Ɔ nli a le Zɛkalaya ara raalɛ Abaegya.

²Ɔvale ɔ nlenya Devidi agyakɛ, ɔyɛle mɔɔ sɔ Ɛdɛnkɛma anye la.

³Bɛvale Hɛzikaya bɛziele belemgbunli la, ye siane ne mɔɔ lumua la ala anu, ɔmanle bɛbukele Ɛzonlenlɛ Sua ne na bɛyɛle ye boɛ.

⁴Ɔvale Livaema nee sɛlɛvolɛma ne mɔ ɔrale. Ɔboɔboale bɛ nloa wɔ Ɛzonlenlɛ Sua ne alie wienyi ne mɔɔ wɔ aduduleɛ la anwo,

⁵na ɔzele bɛ kɛ, “Livaema, bɛdie me! Bɛdu bɛ nwo bɛmaa Nyamenle, na bɛnlua Ɛdɛnkɛma, bɛ ze mɔ Nyamenle ne Ɛzonlenlɛ Sua ye, na bɛdu nuhua evinli ne kɔsɔɔti.

⁶Yɛ ze mɔ anli nɔhalɛ, bɛyɛ mɔɔ le ɛtane la bɛtia Ɛdɛnkɛma yɛ Nyamenle ne. Bɛkpo ye na bɛhakyi bɛ nzi bɛzi ɛleka mɔɔ Ɛdɛnkɛma de la.

⁷Bɛtotole Ɛzonlenlɛ Sua ne nlenkɛ ne mɔ anu, bɛnluanle nuhua ahɛnlaneɛ ne mɔ. Bɛamkpu ɛyɛlɛ bɛammaa Ɛdɛnkɛma yɛɛ bɛambɔ ɛyelalɛ azu wɔ ɛleka nwuanzanwuanza ne bɛammaa Yizilayɛ Nyamenle ne.

⁸Ɛhye ati yɛɛ Ɛdɛnkɛma ɛva Dwudama nee Gyɛlusalɛmma anwo ɛya kpole a, kɛmɔ bɛdabɛ bɛ nye dua ye la. Mɔɔ yeva yehile yɛ la ɛmaa awie biala ahonle ɛdu, yeyɛ azibɛnwo na yɛyɛ awie biala kyibadeɛ.

⁹Ɔlua ɛhye ati bɛnlea, yɛ ze mɔ ɛwu konle nu, bɛhye yɛ mra mrenya nee mraalɛ nee yɛ ye mɔ nuokɛ bɛhɔ.

¹⁰“Kɛkala, mebɔ kpɔkɛ kɛ me nee Ɛdɛnkɛma, Yizilayɛ Nyamenle ne yɛyɛ ngyekyeleɛ, amaa yeaye ye ɛya kpole ne yɛ nwo zo.

¹¹Me mra mrenya, bɛmmayɛ kpasaa wɔ ɛhye anwo, ɔluakɛ Ɛdɛnkɛma ɛye bɛ kɛ, bɛmɛ yɛɛ bɛgyinla ɔ nyunlu bɛzonle ye, bɛkpu ɛyɛlɛ bɛmaa ye na bɛli menli ne ati bɛmaa bɛzonle ye a.”

¹²Livaema ɛhye mɔ wɔ ɛkɛ ne bie: Bɛdabɛ mɔɔ bɛvi Kohate abusua nu la a le Ameesae ara Meehate yɛɛ Azalaya ara Dwowɛle. Bɛdabɛ mɔɔ bɛvi Mɛlɛlae abusua nu la a le Abedae ara Kehye yɛɛ Gyɛhalɛle ara Azalaya. Bɛdabɛ mɔɔ bɛvi Gɛhyɔn abusua nu la a le Zemena ara Dwowaa yɛɛ Dwowaa ara Yidɛn. Bɛdabɛ mɔɔ bɛvi Yilaezeefan abusua nu la a le Hyemelae yɛɛ Gyiyayɛle. Bɛdabɛ mɔɔ bɛvi Esafe abusua nu la a le Zɛkalaya yɛɛ Matanaya. Bɛdabɛ mɔɔ bɛvi Himan abusua nu la a le Gyɛhuwɛle yɛɛ Hyemɛyae. Bɛdabɛ mɔɔ bɛvi Gyɛdutɛn abusua nu la a le Hyɛmaya yɛɛ Ɛzeɛle.

¹³

¹⁴

¹⁵Menli ɛhye mɔ boɔboale bɛ sa zo ne mɔ anloa, bɛnluanle bɛ nwo, na kɛmɔ Ɛdɛnkɛma anloa edwɛkɛ ne mɔɔ belemgbunli ne hanle hilele bɛ la se la, bɛhɔle kɛ bɛkanlua Ɛdɛnkɛma Ɛzonlenlɛ Sua ne.

¹⁶Sɛlɛvolɛma ne wolole hɔle Ɛdɛnkɛma Ɛzonlenlɛ Sua ne akunlu lɔ na bɛhɔkpoɔkpoanle ɛkɛ ne bɛyele debie ɛtane biala mɔɔ bɛnwunle ye ɛkɛ ne la bɛvindele alie ne anwo. Na Livaema ne zoale ewula ne amuala hɔguale azudenle Kedelɔn ne anu.

¹⁷Siane ne mɔɔ lumua la kenle ne mɔɔ lumua ala la azo yɛɛ bɛbɔle ɔ bo kɛ bɛkpoɔkpoa Ɛzonlenlɛ Sua ne anu a. Ye kenle mɔtwɛ ne azo akee bɛrale sua mumua ne akunlu, na bɛvale kenle mɔtwɛ bɛzieziele Ɛdɛnkɛma Ɛzonlenlɛ Sua ne akunlu. Yemɔti siane ko ne anu kenle bulu nee nsia ne azo yɛɛ bɛwiele gyima biala yɛ a.

¹⁸Akee bɛhɔle Belemgbunli Hɛzikaya ɛkɛ ne na bɛhɔhanle bɛhilele ye kɛ, “Yɛnlua Ɛzonlenlɛ Sua ne yɛwie, yɛnlua ɛyelalɛ azukponle ne nee nwolɛ ahyɛnze nee dwora ne mɔ amuala, yɛɛ ɛkponle ne mɔɔ bɛfa kpanwo nwuanzanwuanza ne bɛgua zolɛ la nee nwolɛ ahyɛnze ne mɔ amuala.

¹⁹Akee ahyɛnze ne mɔ mɔɔ mekɛ mɔɔ Belemgbunli Ehaze kpole Ɛdɛnkɛma la ɔzɛkyele bɛ la, yɛziezie bɛ na yɛnlua bɛ. Kɛkala, bɛ muala bɛgyigyi Ɛdɛnkɛma azukponle ne anyunlu.”

²⁰Na Belemgbunli Hɛzikaya boɔboale ye mgbanyima mɔɔ wɔ suakpole ne azo la anloa na bɛhɔle Ɛdɛnkɛma Ɛzonlenlɛ Sua ne anu.

²¹Bɛvale nlankɛ nyinli nsuu, mboane nyinli nsuu, mboane mralɛ nsuu, yɛɛ akee mbɔnkye nyinli nsuu kɛ bɛva bɛbɔ ɛtanefakyɛ azu wɔ belemgbunli nee ye awuke nu amra, Dwuda maanle ne amuala, yɛɛ Ɛzonlenlɛ Sua ne ati. Belemgbunli zele sɛlɛvolɛma ne, Aalɔn abo zo amra ne mɔ kɛ bɛbɔ azu ne wɔ Ɛdɛnkɛma azukponle ne azo.

²²Yemɔti bɛhunle nlankɛ nyinli ne mɔ, na sɛlɛvolɛma ne liele mogya ne na bɛdole bɛguale azukponle ne anwo; bɛhunle mboane nyinli ne mɔ, na bɛdole bɛ mogya ne bɛguale azukponle ne anwo; yɛɛ eza bɛhunle mboane mralɛ ne mɔ na bɛdole bɛ mogya ne bɛguale azukponle ne anwo.

²³Akee bɛvale mbɔnkye nyinli ne mɔ mɔɔ bɛfa bɛabɔ ɛtanefakyɛ azu ne la bɛrɛlɛle belemgbunli nee ye mgbanyima ne, na bɛvale bɛ sa bɛguale bɛ nwo zo.

²⁴Na sɛlɛvolɛma ne mɔ hunle mbɔnkye ne mɔ na bɛvale bɛ mogya ne bɛbɔle ɛtanefakyɛ azu wɔ azukponle ne azo, bɛvale bɛkpɔdale Yizilayɛma kɔsɔɔti ati. Ɔluakɛ belemgbunli ne zele kɛ ɔwɔ kɛ bɛbɔ ɛyelalɛ azu ne nee ɛtanefakyɛ azu ne wɔ Yizilayɛma kɔsɔɔti ati.

²⁵Akee ɔvale Livaema ne ɔziele bɛ bo zo ne wɔ Ɛdɛnkɛma Ɛzonlenlɛ Sua ne anu na ɔmanle bɛ sɔnwosɔnwo, yɛɛ getaa mgbole nee ngyikyi, kɛmɔ Belemgbunli Devidi, Gaade mɔɔ ka Nyamenle nrɛlaleɛ ne kile Devidi, nee Nyamenle kpɔmanvolɛ Neetan hyehyɛle dole ɛkɛ ne la, ɔluakɛ Ɛdɛnkɛma yɛɛ luale ye kpɔmanvolɛma anwo zo hyehyɛle a.

²⁶Livaema ne vale bɛ agolebɔlɛ ninyɛne mɔɔ Devidi yɛle la, na sɛlɛvolɛma ne vale bɛ aweɛne ndendenle ne mɔ na bɛhɔgyinlanle bɛ bo zo ne mɔ.

²⁷Akee Belemgbunli Hɛzikaya yɛle kɛ bɛbɔ ɛyelalɛ azu ne wɔ azukponle ne azo. Mɔɔ bɛbɔle ɛyelalɛ azu ne abo la, bɛbɔle Ɛdɛnkɛma ayɛlɛyelɛ edwɛne ɛdolɛ bo, bɛbɔle aweɛne ndendenle ne na bɛbɔle agolebɔlɛ ninyɛne ne mɔ mɔɔ Yizilayɛ Belemgbunli Devidi yɛle manle bɛ la.

²⁸Menli ne amuala yɛle nzɛlɛlɛ ne bie. Edwɛndolɛma ne dole edwɛne, yɛɛ menli mɔɔ bɔ aweɛne ndendenle ne la bɔle. Ɛhye mɔ hɔle zolɛ toonwo ɛyelalɛ azubɔlɛ ne wiele.

²⁹Bɛwiele azu ne bɔ la, belemgbunli ne nee bɛdabɛ mɔɔ bɛwɔ ɛkɛ ne la amuala dule guale na bɛzonlenle Ɛdɛnkɛma.

³⁰Na Belemgbunli Hɛzikaya nee ye mgbanyima ne zele Livaema ne kɛ bɛdo edwɛne ne mɔɔ Belemgbunli Devidi nee Esafe yɛle la bie bɛyeyɛ Ɛdɛnkɛma. Na bɛvale anyelielɛ bɛdole edwɛne, bɛbɔle bɛ ti aze bɛyeyɛle Ɛdɛnkɛma.

³¹Akee Belemgbunli Hɛzikaya zele bɛ kɛ, “Kɛkala, bɛ nwo ɛde ɛmaa Ɛdɛnkɛma, zɔhane ati bɛrɛla, bɛva bɛ azubɔlɛ ninyɛne nee moyɛlɛ azubɔlɛ ninyɛne bɛrɛla Ɛdɛnkɛma Ɛzonlenlɛ Sua ye anu.” Na menli ne mɔɔ rayiale la vale bɛ azubɔlɛ ninyɛne nee moyɛlɛ azubɔlɛ ninyɛne rale, yɛɛ bie mɔ noko yeyele bɛ ahonle nu vale ɛyelalɛ azubɔlɛ ninyɛne rale.

³²Ɛyelalɛ azubɔlɛ ninyɛne mɔɔ menli mɔɔ rayiale ɛkɛ ne la vale manle la le nlankɛ nyinli abulasuu, mboane nyinli ɛya ko, yɛɛ mboane mralɛ ɛya nwiɔ. Ɛhye mɔ amuala le azubɔlɛ ninyɛne mɔɔ bɛyelale bɛbɔle azu bɛmanle Ɛdɛnkɛma a.

³³Ninyɛne noko mɔɔ bɛde nwolɛ kɛ bɛfa bɛabɔ azu la le nlankɛ nyinli ɛya nsia yɛɛ mboane nyinli nee mboane mralɛ apenle nsa.

³⁴Na kɛmɔ sɛlɛvolɛma ne anwo anzo la ati, ɛnee bɛngola ɛyelalɛ azubɔlɛ ninyɛne ne mɔ anwo gyima di. Yemɔti bɛmanle Livaema ne boale bɛ toonwo ɔhɔdwule kɛ gyima ne wiele na sɛlɛvolɛma mɔɔ ɛha la noko nluanle bɛ nwo la; nɔhalɛ, ɛnee Livaema ne ahonle nu te wɔ bɛ nwo ɛnluanlɛ ne anu tɛla sɛlɛvolɛma ne.

³⁵Saa ɛye ɛyelalɛ azubɔlɛ ninyɛne bebelebe ɛhye ɛsie ahane a, sɛlɛvolɛma ne a eza ɔwɔ kɛ yela nane ɛnlome bɔ anzonudwolɛ azu ne, na bɛgua nwanye ne mɔɔ bɛkɛva bɛkɛboka azubɔlɛ ninyɛne ne mɔ bɛkɛra la, bɛye ɛdɛne kolaa na bɛabɔ ɛyelalɛ azu ne a. Yemɔti akee bɛbɔle ɛzonlenlɛ bo wɔ Ɛzonlenlɛ Sua ne anu bieko.

³⁶Na Belemgbunli Hɛzikaya nee menli ne amuala anye liele wɔ mɔɔ Nyamenle ɛyɛ ɛmaa menli ne la anwo, ɔluakɛ gyima zɛhae mɔɔ bɛlile la zenle waa.