Read Nzema 2 Edk 30 Bible Online

2 Edk 30 - Nzema bible

2 Edk 30

¹ Kɛmɔ ɛnee sɛlɛvolɛma ne anu dɔɔnwo anwo ɛnde la ati, menli ne angola anli Akpabɛnwo Ɛvoyia ne wɔ ye mekɛ ne anloa pɛpɛ wɔ siane ne mɔɔ lumua la anu. Ɛnee eza menli dɔɔnwo anloa ɛtɛyiale Gyɛlusalɛm. Yemɔti Belemgbunli Hɛzikaya nee ye mgbanyima nee Gyɛlusalɛm amra amuala liele dole nu kɛ ɔwɔ kɛ bɛdi ɛvoyia ne wɔ siane nwiɔ ne anu. Belemgbunli ne noko zoanle menli manle bɛvale nrɛlaleɛ bɛhɔle Yizilayɛ nee Dwuda maanle ne mɔ anu. Eza ɔhɛlɛle Yifelaem nee Manasɛ mbusua ekpunli ekpunli ne mɔ na ɔdole ɛsalɛ ɔvɛlɛle bɛ kɛ bɛrɛla bɛmaa bɛli ɛvoyia ne bɛwula Ɛdɛnkɛma, Yizilayɛ Nyamenle ne anyunlunyia.

⁴Belemgbunli nee ye mgbanyima ne mɔ anye liele ngyehyɛlɛ ne anwo.

⁵Yemɔti bɛyɛle ye mɛla na bɛbɔle ye nolo wɔ Yizilayɛ amuala, ɔvi Biyɛhyiba mɔɔ kɔdwu Dan la, kɛ menli ne ɛrɛla ɛmaa bɛli Akpabɛnwo Ɛvoyia ne wɔ Gyɛlusalɛm, bɛwula Ɛdɛnkɛma, Yizilayɛ Nyamenle ne anyunlunyia. Ɔluakɛ ɛnee bɛtɛbale dɔɔnwo ɛlɛ kɛ bɛbali ɛvoyia ne, kɛmɔ bɛhɛlɛ bɛdo ɛkɛ ne la.

⁶Yemɔti bɛzoanle menli wɔ Yizilayɛ nee Dwuda amuala, bɛvale ngɛlata bɛvile belemgbunli nee ye mgbanyima ne mɔ ɛkɛ ne bɛhɔle. Edwɛkɛ mɔɔ wɔ ngɛlata ne mɔ anu la se: “O Yizilayɛma, bɛzia bɛrɛla Ɛdɛnkɛma, Ebileham, Ayezeke, nee Gyekɔbo bɛ Nyamenle ne ɛkɛ, amaa ɔdaye noko yeahakyi ɔ nye wɔ bɛdabɛ ekyi ne mɔɔ bɛha mɔɔ Aselea arelemgbunli angu bɛ la anwo zo.

⁷Bɛmmayɛ kɛ bɛ ze mɔ nee bɛ mediema ne mɔ, mɔɔ kpole bɛ ze mɔ Ɛdɛnkɛma Nyamenle ne a yemaa bɛyɛ mgbane, kɛmɔ bɛdabɛ bɛ nye dua ye la.

⁸Bɛmmayɛ anzosesebɛ kɛmɔ bɛ ze mɔ yɛle la. Bɛva bɛ nwo bɛmaa Ɛdɛnkɛma na bɛrɛla ye Ɛzonlenlɛ Sua ye mɔɔ yede nwolɛ wɔ melɛ mɔɔ ɛnlɛ awieleɛ la anu, na bɛrazonle Ɛdɛnkɛma bɛ Nyamenle ne, na ye ɛya kpole ne avi bɛ nwo zo.

⁹Ɔluakɛ saa bɛsia bɛba Ɛdɛnkɛma ɛkɛ ne a, menli mɔɔ hyele bɛ mediema nee bɛ mra hɔle la baze bɛ anwunvɔne na bɛamaa bɛazia bɛara sua nu. Ɔluakɛ Ɛdɛnkɛma bɛ Nyamenle ne se anwunvɔne yɛɛ ɔ ti akunlu le kpalɛ. Saa bɛsia bɛba ye ɛkɛ ne a, ɔnrɛhakyi ɔ nzi ɔnrɛzi bɛ.”

¹⁰Menli mɔɔ bɛzoanle bɛ la hɔle suakpole biala azo, bɛluale Yifelaem nee Manasɛ maanzinli ne mɔ anu toonwo bɛhɔdwule Zɛbulɛn maanzinli nu. Na menli ne mɔ zelele bɛdabɛ mɔɔ bɛzoanle bɛ la, na bɛgolole bɛ nwo bɛmanle nyiane bɔbɔ dɔle bɛ nye zo.

¹¹Menli ekyi bie mɔɔ wɔ Ahya, Manasɛ, yɛɛ Zɛbulɛn la yɛɛ nlunle bɛ nwo na bɛrale Gyɛlusalɛm a.

¹²Nyamenle tumi ne noko yɛle gyima wɔ Dwuda manle menli ne amuala yɛle ko, na bɛyɛle debie biala mɔɔ belemgbunli ne nee ye mgbanyima ne mɔ luale Ɛdɛnkɛma duma nu hanle hilele bɛ la.

¹³Menli dɔɔnwo kpalɛ rale Gyɛlusalɛm kɛ bɛbali Angye Ɛvoyia ne wɔ siane nwiɔ ne anu, ɛlɔne mɔɔ rale la le kpole.

¹⁴Bɛkpale bɛguale na bɛdudule azukponle dɔɔnwo ne mɔ mɔɔ wɔ Gyɛlusalɛm mɔɔ bɛyela ɛyɛlɛ zo la amuala na bɛhɔvuandinle bɛ bɛguale Kedelɔn bɔnza ne anu.

¹⁵Akee bɛhunle Akpabɛnwo boane ne wɔ siane nwiɔ ne kenle bulu nee nna ne azo. Nyiane hunle sɛlɛvolɛma nee Livaema ne mɔɔ ɛnee anwo ɛnde la kpole, na ɔlua zolɛ bɛdabɛ noko bɛnluanle bɛ nwo, na bɛvale ɛyelalɛ azubɔlɛ ninyɛne ne mɔ bɛrale Ɛdɛnkɛma Ɛzonlenlɛ Sua ne anu.

¹⁶Akee bɛhɔgyinlanle bɛ bo zo ne mɔ, kɛmɔ Nyamenle sonla Mosisi hyehyɛle dole ɛkɛ ne la. Sɛlɛvolɛma ne kpondenle mogya ne mɔɔ bɛliele bɛvile Livaema ne ɛkɛ la wɔ azukponle ne anwo.

¹⁷Kɛmɔ menli mɔɔ ɛnee anwo ɛnde la zonle somaa la ati, Livaema ne a hunle bɛdabɛ mɔɔ bɛ nwo ɛnde la Akpabɛnwo mboane ne mɔ manle bɛ a, amaa nwolɛ ade wɔ Ɛdɛnkɛma anyunlu.

¹⁸Ɔluakɛ ɛnee menli dɔɔnwo kpalɛ mɔɔ vi Yifelaem, Manasɛ, Yesakaa nee Zɛbulɛn maanzinli ne mɔ anu rale la ɛtɛnuanle bɛ nwo, noko bɛmanle bɛ adenle bɛmanle bɛlile Akpabɛnwo aleɛ ne bie. Ɛhye nee ngyehyɛlɛ mɔɔ wɔ Akpabɛnwo aleɛ ne ɛlilɛ nwo la ɛnle ko, noko bɛmanle bɛ adenle bɛlile bie, ɔboalekɛ Belemgbunli Hɛzikaya ɛnee ɛzɛlɛ kɛ,

¹⁹“Ahunlunyele Ɛdɛnkɛma ɛva awie biala mɔɔ ɛva ye ahonle ɛmaa Nyamenle, bɛ ze mɔ Ɛdɛnkɛma Nyamenle ne, na ɔ nwo ɛnde, kɛmɔ ye ɛzonlenlɛ nu mɛla ne de la ɛtane ɛhyɛ ye.”

²⁰Ɛdɛnkɛma diele ye nzɛlɛlɛ ne, ɔvale bɛ ɛtane ne mɔ ɔhyɛle bɛ, yeanyɛ bɛ ɛhwee.

²¹Yizilayɛma mɔɔ rale Gyɛlusalɛm la vale anyelielɛ lile Angye Ɛvoyia ne kenle nsuu. Mekɛ ne anu, sɛlɛvolɛma ne nee Livaema ne vale bɛ anwosesebɛ kɔsɔɔti dole edwɛne bɔle agole yele Ɛdɛnkɛma ayɛlɛ alehyenlɛ biala.

²²Na Hɛzikaya yele Livaema ne mɔɔ hilele bɛ mɔdenlebɔ wɔ Ɛdɛnkɛma ɛzonlenlɛ ne anu la ayɛlɛ. Menli ne lile Akpabɛnwo Ɛvoyia ne toonwo kenle nsuu, bɛbɔle anzonudwolɛ azu na bɛyɛle Ɛdɛnkɛma, bɛ ze mɔ Nyamenle ne mo.

²³Kenle nsuu ne anzi, eza menli ne liele dole nu kɛ bɛsɔ ɛvoyialilɛ ne azo kenle nsuu bieko. Yemɔti bɛvale anyelielɛ bɛlile ɛvoyia ne kenle nsuu bieko.

²⁴Dwuda Belemgbunli Hɛzikaya manle ɛlɔne ne nlankɛ nyinli apenle ko yɛɛ mboane apenle nsuu kɛ bɛva bɛbɔ azu, yɛɛ mgbanyima ne mɔ noko manle ɛlɔne ne nlankɛ nyinli apenle ko yɛɛ mboane apenle bulu. Na sɛlɛvolɛma ne anu dɔɔnwo kpalɛ akee nluanle bɛ nwo.

²⁵Dwudama amuala, sɛlɛvolɛma nee Livaema ne mɔ, nee ɛlɔne mɔɔ vi Yizilayɛ rale, nyɛvolɛ mɔɔ de Dwuda, yɛɛ nyɛvolɛ mɔɔ vi Yizilayɛ rale la amuala anye liele.

²⁶Anyelielɛ kpole kpalɛ rale Gyɛlusalɛm, ɔluakɛ ɔvi Belemgbunli Sɔlɔmɔn, mɔɔ ɔ ze a le Yizilayɛ Belemgbunli Devidi la mekɛ zo toonwo mɔɔ ɛradwu mekɛ zɔhane la, debie zɛhae, bie ɛtɛsile Gyɛlusalɛm ɛlɛ.

²⁷Akee sɛlɛvolɛma ne nee Livaema ne zɛlɛle Nyamenle nyilalɛ manle menli ne, na bɛ nzɛlɛlɛ dwule Nyamenle anzo nu wɔ anwuma lɔ ɛleka nwuanzanwuanza ne mɔɔ ɔde la.