Read Nzema 2 Edk 32 Bible Online

2 Edk 32 - Nzema bible

2 Edk 32

¹Ɛhye mɔ anzi mɔɔ ɛnee Belemgbunli Hɛzikaya nee Dwudama sonle Nyamenle nɔhalɛ nu la, Aselea Belemgbunli Sɛnakɛlebe nee ye ɛlɔnema ravale Dwuda aze. Bɛyɛle bɛ azokoɛleɛ wɔ azuamgbole ne mɔ kandiba na bɛyɛle kɛ bɛko bɛava azuamgbole ne mɔ.

²Na mɔɔ Hɛzikaya nwunle kɛ Sɛnakɛlebe nee ye ɛlɔnema ɛra badoa ye ɔ nee ye aho wɔ Gyɛlusalɛm la,

³ɔ nee ye mgbanyima ne mɔ nee menli mɔɔ anwo yɛ se la hɔle kɛ bɛkadua nzubula biala mɔɔ wɔ suakpole ne kandiba la, amaa saa Aseleama bikye Gyɛlusalɛm a bɛannyia nzule bɛanno. Mgbanyima ne mɔ lile menli dɔɔnwo kpalɛ ati na bɛhɔsisile nzubula ne mɔ nee azudenle ne mɔɔ wɔ ɛkɛ ne afoa nu la, yemɔti ɛnee nzule vi nzubula ne mɔ nee azudenle ne anu ɛnze, na bɛhanle kɛ, “Ɔnle kɛ Aselea arelemgbunli banwu kɛ nzule dɔɔnwo wɔ ɛke.”

⁵Akee belemgbunli ne manle bɛliele suakpole ne bane ne mɔ mɔɔ ɛha ɛgua la, na bɛsisile tawa wɔ zolɛ; eza ɔmanle bɛmiemianle bane ne mɔɔ bɛlie bɛ wɔ suakpole ne aduduleɛ ɛleka mɔɔ ɛnee kuma kpole ne mɔɔ bɛduale ye la wɔ la anu. Eza ɔmanle bɛyɛle atwɛ nee bɛ sa nu enyinlike dɔɔnwo.

⁶Ɔyeyele safohyenlema mɔɔ nea ɛlɔnema ne mɔ anwo zo la, na ɔmanle bɛrayiale suakpole ne anlenkɛ kpole ne anloa ɛleka kpatawienyi ne na ɔdendɛle ɔmanle bɛ akɛnrazilɛ. Ɔzele bɛ kɛ,

⁷“Bɛgyinla kpundii na bɛyele bɛ nwo. Bɛmmamaa bɛ ahonle tu anzɛɛ bɛmmasulo Aselea belemgbunli ne nee ye ɛlɔnema ne mɔɔ ɔ nee bɛ lua la, ɔluakɛ mɔɔ nee yɛ lua la anwo yɛ ɛzulolɛ tɛla ye.

⁸Yemɔ, ɔ nee menli a lua a, na yɛmɛ, yɛ nee Ɛdɛnkɛma, yɛ Nyamenle ne a lua a; ɔbaboa yɛ na yeaho konle ne yeamaa yɛ.” Na Dwuda Belemgbunli Hɛzikaya ɛdendɛlɛ ne manle menli ne anwosesebɛ.

⁹Ɛhye anzi Aselea Belemgbunli Sɛnakɛlebe, mɔɔ ɛnee ɛva ye ɛlɔnema ɛbɛnra suakpole Leekehye ɛyia la, zoanle menli wɔ Gyɛlusalɛm wɔ Dwuda Belemgbunli Hɛzikaya nee ye menli ne kɔsɔɔti anwo ɛkɛ razele bɛ kɛ,

¹⁰“Medame, Sɛnakɛlebe, Aselea Maanle Maanle Belemgbunli, mebiza bɛ kɛ, duzu anyelazo yɛɛ bɛlɛ ye, mɔɔ yemɔti yɛbɛnra bɛ suakpole Gyɛlusalɛm yɛyia a, ɛnee bɛtɛfea ɛkɛ ne a?

¹¹Bɛnnwu ye kɛ Hɛzikaya ɛlɛbɛlɛbɛla bɛ yeamaa ɛhɔne nee nzuhɔne ngome akee ahu bɛ, yemɔti a ɔlɛka yeahile bɛ kɛ, ‘Ɛdɛnkɛma yɛ Nyamenle ne balie yɛ avi Aselea belemgbunli ne asa anu’ a?

¹²Tɛ Hɛzikaya ɛhye ala a ɛbubu bɛ azukponle nee ɛleka ne mɔ mɔɔ bɛsonle la ɛgua, na yeze bɛdabɛ mɔɔ bɛwɔ Dwuda nee Gyɛlusalɛm amuala la kɛ azukponle kokye ala azo yɛɛ ɔwɔ kɛ bɛbɔ azu na bɛsonle la ɔ?

¹³Anzɛɛ bɛnze mɔɔ medame yɛɛ egya mɔ yɛva yɛyɛ menli mɔɔ wɔ maanle gyɛne gyɛne nu la ɔ? Asoo bɛ nyamenle ne mɔ holale liele maanle maanle zɔhane mɔ vile me sa nu?

¹⁴Awozonle mɔɔ wɔ maanle zɔhane mɔ mɔɔ egya mɔ zɛkyele bɛ la anu la, boni yɛɛ holale liele ye menli ne vile me sa nu a, mɔɔ bɛmɛ bɛ Nyamenle ne kɛhola kɛlie bɛ kɛvi me sa nu a?

¹⁵Zɔhane ati bɛmmamaa Hɛzikaya bɛlɛbɛla bɛ na ɔfa ɛhye ɔta bɛ nye zo. Bɛmmadie ye bɛdi, ɔluakɛ maanle biala anu nyamenle ɛtɛkolale ɛtɛdiele ye menli anzɛɛ ye maanle ɛtɛfile me anzɛɛ egya asa anu. Ɛnee kɛ ɔkɛyɛ na bɛ Nyamenle ne ahola alie bɛ avi me sa nu ɛ?”

¹⁶Na Aselea belemgbunli ne soanvolɛma ne hehanle ɛtane ɛtane kpole mɔɔ tɛla ɛhye la tietiale Ɛdɛnkɛma Nyamenle nee ye sonvolɛ Hɛzikaya.

¹⁷Na ngɛlata mɔɔ Aselea belemgbunli ne hɛlɛhɛlɛle la anu, ɔhehanle ɛtane ɛtane ɔtietiale Ɛdɛnkɛma, Yizilayɛ Nyamenle ne ɔzele kɛ, “Kɛmɔ nyamenle ne mɔ mɔɔ wɔ maanle ɛhendeɛ ne mɔ anu la angola anlie bɛ maanlema la, zɔhane ala yɛɛ Hɛzikaya Nyamenle ne ɛnrɛhola ɛnrɛlie ye menli ne ɛnrɛvi me sa nu a.”

¹⁸Menli mɔɔ Aselea belemgbunli ne zoanle bɛ la deanle nu hanle ɛhye mɔ wɔ Dwuda (Hibulu) aneɛ nu hilele menli mɔɔ ɛnee dede Gyɛlusalɛm bane ne azo la, amaa bɛ ahonle adu na bɛanyia adenle bɛava suakpole ne.

¹⁹Na bɛhanle Gyɛlusalɛm Nyamenle ne anwo edwɛkɛ ɛtane ɛtane, kɛmɔ bɛka wɔ maanle gyɛne gyɛne nu nyamenle ne mɔ mɔɔ le mmonle na menli a nwonle la, anwo la.

²⁰Na Belemgbunli Hɛzikaya nee Emɔzo ara Nyamenle kpɔmanvolɛ Ayezaya zɛlɛle ɛhye anwo, na bɛzunle bɛvɛlɛle Nyamenle.

²¹Na Nyamenle manle ye soanvolɛ rahunle Aseleama safohyenlema nee mgbanyima nee katakyiema kɔsɔɔti mɔɔ wɔ Aseleama azokoɛleɛ ne la. Yemɔti Aselea belemgbunli ne vale nyiane ziale hɔle ye maanle nu. Mɔɔ ɔhɔdwule ye bozonle ne anyunlu la, ɔdaye ɔ kunlu mralɛ mrenya ne bie mɔ rahunle ye.

²²Yemɔti Ɛdɛnkɛma liele Hɛzikaya nee Gyɛlusalɛmma vile Aselea Belemgbunli Sɛnakɛlebe asa anu nee ye kpɔvolɛma amuala asa anu, na ɔmanle bɛnyianle anzonudwolɛ.

²³Menli dɔɔnwo vale ahyɛlɛ ninyɛne rɛlɛle Ɛdɛnkɛma wɔ Gyɛlusalɛm. Eza bɛvale ninyɛne mɔɔ sonle bolɛ la bɛrahyɛle Dwuda Belemgbunli Hɛzikaya. Na ɔvi mekɛ zɔhane mɔɔ kɔ la, ɔnyianle ɔ nyunlu kpole kpalɛ wɔ maanle maanle avinli.

²⁴Mekɛ ne anu Belemgbunli Hɛzikaya anwo dole ye mɔɔ ɔhale ye nee ewule a. Ɔzɛlɛle Ɛdɛnkɛma, na Ɛdɛnkɛma diele ye na ɔmanle ye sɛkɛlɛneɛ.

²⁵Noko kɛmɔ ɛnee mgbanyizonle ɛmaa Hɛzikaya andɛba ɛmemaa zolɛ la ati, yeanyɛ Nyamenle mo wɔ nyele ɛhye anwo. Yemɔti Nyamenle ɛya ne rale ɔdaye, Gyɛlusalɛmma, yɛɛ Dwudama amuala anwo zo.

²⁶Na Hɛzikaya lunle ɔ nwo wɔ ye adubɛnwo ne anwo. Zɔhane ala yɛɛ menli mɔɔ wɔ Gyɛlusalɛm la amuala yɛle a. Yemɔti Ɛdɛnkɛma ɛya ne annyia amba bɛ nwo zo wɔ Hɛzikaya mekɛ zo toonwo ɔhɔle ayile nu.

²⁷Belemgbunli Hɛzikaya nyianle ɔ nwo kpole kpalɛ, yɛɛ eza ɔnyianle ɔ nyunlu. Akee ɔhyehyɛle gya ngakyile mɔɔ ɔfa ye dwɛtɛ fufule, ezukoa nvutuke, nee mgbɔba ɔsiezie nu a, ko biala nee ye gya; akee asolo ninyɛne evuanlɛ sua, bɛ sa nu enyinlike sua, yɛɛ ahyɛnze ngakyile mɔɔ awolɛ yɛ se la sua.

²⁸Eza ɔlɛ azua mɔɔ bɛfa ye abɛlɛ bɛgua nu, nwanye sua, yɛɛ nwole sua; akee nlankɛ nee mboane adunli.

²⁹Eza noko ɔkyekyele azuamgbole mɔɔ le ye ɛdeɛ, na nlankɛ nee mboane ɛdeɛ bɛnga. Nyamenle manle ɔnyianle ɔ nwo kpole kpalɛ.

³⁰Belemgbunli Hɛzikaya ko ye ala a manle bɛzile azule ne mɔɔ wɔ Gaehɔn la sɔlɔ, na ɔmanle bɛhakyile ɔ nye wɔ Devidi Suakpole zo adɔleɛ la. Debie anzɛɛ gyima biala mɔɔ Hɛzikaya vale ɔ sa hanle ye la yɛle kpalɛ.

³¹Yemɔti mɔɔ soanvolɛma mɔɔ Babelɔn mgbanyinli zoanle bɛ la rale kɛ bɛbabiza bɛanwu debie mɔɔ ɛlɛkɔ zolɛ wɔ ye maanle ne anu la, Nyamenle gyakyile debie biala manle ɔdaye, ɔvale ɔzɔle ye ɔnleanle, amaa yeanwu mɔɔ wɔ ye ahonle nu la.

³²Gyima mɔɔ hale mɔɔ Hɛzikaya lile, ye nyɛleɛ kpalɛ nee debie biala mɔɔ ɔyɛle la, bɛhɛlɛ bɛ muala wɔ Nyamenle Kpɔmanvolɛ Ayezaya mɔɔ le Emɔzo ara ne la Ɛnyelɛzodeɛnwunlɛ Buluku ne, yɛɛ Dwuda nee Yizilayɛ Arelemgbunli Buluku ne anu.

³³Belemgbunli Hɛzikaya hɔle ayile nu na bɛwulale ye mrɛlatɛlɛ nu wɔ Devidi amra mrenya ne mɔ sɛka ne mɔ anwuma; Dwudama nee Gyɛlusalɛmma amuala yiale nu wulale ye anyunlunyia bɔle ye azu, na ɔ ra Manasɛ lile ebia ne.