Read Nzema 2 Edk 36 Bible Online

2 Edk 36 - Nzema bible

2 Edk 36

¹Dwudama vale Dwosaya ara Dwowahaze ziele belemgbunli wɔ Gyɛlusalɛm bɛziele ɔ ze agyakɛ anu.

²Dwowahaze lile ɛvolɛ abulanwiɔ nee nsa la yɛɛ ɔbɔle ɔ bo kɛ ɔdi belemgbunli a. Ɔlile ebia ne siane nsa ala.

³Yigyibiti Belemgbunli Niko rale Gyɛlusalɛm radule ye wɔ ebia ne azo na ɔkpakyele adwule ɔmanle Dwudama nee Gyɛlusalɛmma kɛ bɛdua dwɛtɛ fufule kilo apenle nsa ɛya nna yɛɛ ezukoa nvutuke kilo abulasa nee nna.

⁴ Akee Yigyibiti belemgbunli ne yɛle Dwowahaze adiema Yilayakem Dwuda nee Gyɛlusalɛm belemgbunli, na ɔhakyile ye duma na ɔvɛlɛle ye Gyɛhɔyakem. Niko vale Dwowahaze hɔle Yigyibiti.

⁵ Gyɛhɔyakem lile ɛvolɛ abulanwiɔ nee nnu la yɛɛ ɔbɔle ɔ bo kɛ ɔdi belemgbunli a. Ɔdɛnlanle Gyɛlusalɛm, yɛɛ ɔlile ebia ne ɛvolɛ bulu nee ko. Ɛbɛla mɔɔ ɔbɔle la anzɔ Ɛdɛnkɛma ye Nyamenle ne anye.

⁶ Babelonia Belemgbunli Nɛbukadenɛza rale ɔ nwo zo na ɔhyele ye, ɔguale ye nwɔnzɔnwɔnzɔ na ɔ nee ye hɔle Babelonia.

⁷Nɛbukadenɛza eza sesale ahyɛnze mɔɔ wɔ Ɛdɛnkɛma Ɛzonlenlɛ Sua ne anu la dɔɔnwo hɔle Babelɔn na ɔhɔziele bɛ wɔ ye suakunlu ɛkɛ ne.

⁸Akee Gyɛhɔyakem nyɛleɛ mɔɔ ɛha, ye munzule ɛbɛla mɔɔ ɔbɔle, nee ninyɛndane mɔɔ ɔyɛle la amuala, bɛhɛlɛ bɛ wɔ Dwuda nee Yizilayɛ Arelemgbunli Tetedwɛkɛ Buluku ne anu. Ɔ ra Gyɛhɔyaken lile ebia ne.

⁹Gyɛhɔyakɛn lile ɛvolɛ bulu nee mɔtwɛ la yɛɛ ɔbɔle ɔ bo kɛ ɔdi belemgbunli wɔ Gyɛlusalɛm a. Ɔlile ebia ne siane nsa kenle bulu. Ɔyɛle ɛtane ɔtiale Ɛdɛnkɛma.

¹⁰Ɛvolɛ ne mɔɔ ɔlile ebia ne la ala anu, nyenyensuo mekɛ ne anu, Belemgbunli Nɛbukadenɛza zoanle manle bɛhɔvale ye bɛhɔle Babelonia, na bɛsesale Ɛdɛnkɛma Ɛzonlenlɛ Sua ne anu dwora nee ahyɛnze biala mɔɔ sonle bolɛ la bɛhɔle, na bɛyɛle ɔ diema Zɛdikaya Dwuda nee Gyɛlusalɛm belemgbunli.

¹¹Zɛdikaya lile ɛvolɛ abulanwiɔ nee ko la yɛɛ ɔbɔle ɔ bo kɛ ɔdi belemgbunli wɔ Gyɛlusalɛm a. Ɔlile ɛvolɛ bulu nee ko wɔ ebia ne azo.

¹²Mɔɔ ɔyɛle la anzɔ Ɛdɛnkɛma ye Nyamenle ne anye, Ɛdɛnkɛma luale ye kpɔmanvolɛ Gyɛlɛmaya anwo zo dendɛle hilele ye, noko yeannu ɔ nwo.

¹³Belemgbunli Zɛdikaya dele Belemgbunli Nɛbukadenɛza mɔɔ manle ɔvale Nyamenle ɔhanle ndane la anwo atua. Ɔyɛle anzosesebɛ na ɔzuanle anyetele kɛ ɔnrɛzonle Ɛdɛnkɛma, Yizilayɛ Nyamenle ne.

¹⁴Sɛlɛvolɛma mgbanyinli ne mɔ nee menli kɔsɔɔti bɔle zɔhane ɛbɛla ne bie na bɛzukoale bɛyɛle munzule ninyɛne ne mɔ mɔɔ maanle maanle ne mɔ yɛ la bie. Bɛvale evinli bɛhanle Ɛdɛnkɛma Ɛzonlenlɛ Sua ne mɔɔ wɔ Gyɛlusalɛm, mɔɔ yeyɛ ye nwuanzanwuanza la.

¹⁵Ɛdɛnkɛma, bɛ ze mɔ Nyamenle ne, zoanle menli manle bɛrabɔle bɛ kɔkɔ, ɔboalekɛ ɛnee ɔse ye menli ne nee Ɛzonlenlɛ Sua ne anwunvɔne.

¹⁶Noko bɛhɔle zo bɛzile menli mɔɔ Nyamenle zoanle bɛ la amgbu, bɛkpole kɛ bɛnrɛdie bɛ edwɛkɛ ne, na bɛgolole Nyamenle kpɔmanvolɛma ne anwo toonwo bɛmanle Ɛdɛnkɛma vale ɛya kpole mɔɔ bɛyɛ ye ɛhwee a ɔnyɛ boɛ a.

¹⁷Zɔhane ati ɔmanle Babelonia belemgbunli ne nee ye ɛlɔnema ne rale bɛ nwo zo bɛrahunle Dwuda mgbavolɛ ne mɔ kɔsɔɔti, bɔbɔ bɛdabɛ mɔɔ bɛnriandile bɛhɔveale Ɛzonlenlɛ Sua ne anu la kɔsɔɔti. Bɛanvavi kpavolɛ anzɛɛ bɛlɛra, anzɛɛ sonla koatee ko bɔbɔ. Bɛhunle bɛ muala.

¹⁸Akee bɛhwenle debie biala mɔɔ wɔ Ɛdɛnkɛma Ɛzonlenlɛ Sua ne anu, ngyikyi nee mgbole, nee ezukoa, belemgbunli suakunlu ɛkɛ ne, nee belemgbunli mgbanyima ne mɔ kɔsɔɔti azua nu la bɛhɔle Babelɔn.

¹⁹Bɛdole senle Ɛzonlenlɛ Sua ne anu, na bɛbubule Gyɛlusalɛm bane ne mɔ, na bɛyelale Belemgbunli suakunlu ɛkɛ ne, bɛzɛkyele ye ninyɛne ngɛnlɛma mɔɔ sonle bolɛ la amuala.

²⁰Akee bɛhyele bɛdabɛ mɔɔ bɛangu bɛ la amuala nuokɛ bɛ nee bɛ hɔle nlɔnu wɔ Babelonia, na bɛmanle bɛhɔzonlenle Babelonia belemgbunli ne nee ɔ mra mrenya ne mɔ toonwo ɔhɔdwule kɛ akee Pɛhyea Belemgbunli Maanle ne rale zolɛ la.

²¹Ɛhye manle Ɛdɛnkɛma edwɛkɛ ne mɔɔ ɔluale Gyɛlɛmaya anwo zo ɔhanle la yɛle zɔ. Ɔse, “Azɛlɛ ne bala ɛkɛ ne mgbane toonwo ɛvolɛ abulasuu, yeazie Ɛnwomenlelielɛ Kenle ne mɔ mɔɔ bɛyɛle gyima nu la abo zo.”

²²Mɔɔ bɛvale Saelɛse bɛziele Pɛhyea Maanle Maanle Belemgbunli la, ɛvolɛ ne ala anu, Ɛdɛnkɛma manle ye edwɛkɛ ne mɔɔ ɔluale Gyɛlɛmaya anwo zo ɔhanle la yɛle zɔhane. Ɛdɛnkɛma hanle belemgbunli ne ahonle manle ɔbɔle nolo wɔ ye belemgbunli maanle maanle ne mɔ amuala anu na eza ɔhɛlɛle ɔhɔmanle bɛ kɛ:

²³“Pɛhyea Maanle Maanle Belemgbunli Saelɛse se, ‘Ɛdɛnkɛma Nyamenle ne mɔɔ wɔ anwuma la ɛva maanle maanle mɔɔ wɔ azɛlɛ ye azo la kɔsɔɔti ɛmaa me, na yeze me kɛ menzi ɛzonlenlɛ sua memaa ye wɔ Gyɛlusalɛm, mɔɔ wɔ Dwuda la. Nyamenle menli biala mɔɔ wɔ bɛ avinli la, Ɛdɛnkɛma ye Nyamenle ne nee ye ɛlua. Bɛmaa ye adenle kɛ ɔhɔ.’ ”