Read Nzema 2 Edk 4 Bible Online

2 Edk 4 - Nzema bible

2 Edk 4

¹Belemgbunli Sɔlɔmɔn manle bɛyɛle kɔbele azukponle mɔɔ ye tɛtɛlɛ nee ye tendenle sɛ la. Ye tɛbanu ko biala le mita ngɔnla, yɛɛ ye anwumahɔlɛ le mita nna nee foa ko.

²Eza ɔyɛle kɔbele angola kpole ko, ɔ kunlu kuloonwu le mita nwiɔ nee ekyi, ye sinlinyunlu le mita nna nee asɛɛ foa ko, yɛɛ ye bolomolo le mita bulu nee nsa nee ekyi.

³Bɛguale debie bie mɔɔ le kɛ nlankɛ nyinli la dɔɔnwo ɛhonlone nwiɔ wɔ angola ne anloa. Bɛvale bɛ bɛbokale angola ne bɛguale bɛ kokye, yɛɛ ɛhonlone ko wɔ ko azo.

⁴Angola ne gyi kɔbele nlankɛ nyinli bulu nee nwiɔ azo. Nsa anye kɔ sɔlɔ, nsa anye kɔ adɔleɛ, nsa anye kɔ nyiakɛ, yɛɛ nsa anye kɔ aduduleɛ; angola ne keda bɛ nwo zo na bɛ ti nwenle zo.

⁵Angola ne ɛzamo le kɛyɛ mita ngyɛnu nna ɛkpɔ nsa, yɛɛ ɔ nloa le kɛ kɔpo, na bɛbele ye alie nwo bɛmaa yezɔho kɛ aloa ndotolo mɔɔ ekpuke la. Angola ne di nzule litili kɛyɛ apenle ngoko abulasia.

⁶Eza noko bɛyɛle ahyɛnze kuloonwu bulu, na bɛvale bɛ nnu nnu bɛzieziele Ɛzonlenlɛ Sua ne sɔlɔ nee nyiakɛ. Bɛfa ahyɛnze ne mɔ bɛnrinzi nane azubɔdeɛ ne mɔ ɛleka ne mɔ mɔɔ bɛbayela bɛabɔ azu la anwo. Nzule ne mɔɔ wɔ angola ne anu la yɛɛ sɛlɛvolɛma ne fa bia a.

⁷Bɛyɛle ezukoa nvutuke kɛnlaneɛ mbaka bulu, kɛmɔ bɛhilele la, yɛɛ bɛyɛle ɛkponle bulu, na bɛvale bɛzieziele Ɛzonlenlɛ Sua mumua ne anu. Kɛnlaneɛ mbaka nnu nee ɛkponle nnu gyigyi foa ko, yɛɛ eza kɛnlaneɛ mbaka nnu nee ɛkponle nnu gyigyi foa ko. Eza bɛyɛle ezukoa nvutuke dwora ɛya ko.

⁹Bɛyɛle alie nwo ko bɛmanle sɛlɛvolɛma ne angome, wɔ awuke ne akunlu, yɛɛ bɛyɛle kpole kpalɛ ko wɔ awuke wienyi ne anu. Nlenkɛ mɔɔ duodua anuhɔlɛ ne mɔ mɔɔ wɔ alie nwo nwiɔ ne avinli la, bɛholole kɔbele bɛguale nwolɛ.

¹⁰Angola ne gyi Ɛzonlenlɛ Sua ne nyiakɛ aduduleɛ afoa nu.

¹¹Hulam eza yɛle mbuakɛ, sofi nee dwora mɔ. Ninyɛne mɔɔ ɔbɔle Belemgbunli Sɔlɔmɔn ɛwɔkɛ kɛ ɔkɛyɛ wɔ Ɛzonlenlɛ Sua ne anwo la, ɔwiele bɛ muala yɛ. Bɛmɛ a le: Mpila nwiɔ ne Adile nwiɔ ne mɔɔ bɛyɛ bɛ kɛ ahyɛnze bɛduoduale mpila ne mɔ azo la Deɛ nwɔnzɔnwɔnzɔ ne mɔɔ bɛnwonle bɛguale mpila adile ne mɔ azo la Ninyɛne ɛya nna ne mɔɔ le kɛ akutue mɔɔ bɛguale bɛ ɛhonlone nwiɔ nwiɔ wɔ mpila adile ne mɔ azo la Ehwili bulu ne Ahyɛnze akunlu kuloonwu bulu ne Angola ne Nlankɛ nyinli bulu nee nwiɔ ne mɔɔ angola ne gyi zolɛ la Mbuakɛ ne, sofi ne, yɛɛ faka ne mɔ. Hulam mɔɔ le dwinvolɛ mɔɔ di munli la a yɛle ninyɛne ɛhye mɔ amuala a. Ɔvale kɔbele mɔɔ bɛdu nuhua la a ɔyɛle a, kɛmɔ Belemgbunli Sɔlɔmɔn zele kɛ bɛva ninyɛne ɛhye mɔ amuala bɛyɛ gyima wɔ Ɛdɛnkɛma Ɛzonlenlɛ Sua ne anu la.

¹⁷Belemgbunli ne manle bɛyɛle ninyɛne ne mɔ amuala wɔ dwinvolɛma gyima ne mɔɔ wɔ Sɛko nee Zɛlɛda[1] avinli la, wɔ Dwɔdan Bɔnza.

¹⁸Bɛyɛle ninyɛne dɔɔnwo kpalɛ, yemɔti awie angola anzuzu annwu kɔbele dodo mɔɔ bɛvale bɛyɛle la ɛnlomboɛ.

¹⁹Belemgbunli Sɔlɔmɔn eza manle bɛvale ezukoa nvutuke bɛyɛle ninyɛne bɛzieziele Ɛzonlenlɛ Sua ne anu. Bɛmɛ a le azukponle ne nee ɛkponle ne mɔ mɔɔ bɛgua kpanwo ne mɔɔ bɛva bɛbɔ azu bɛmaa Nyamenle la zo la;

²⁰akee kɛnlaneɛ mbaka ne mɔ nee ahɛnlaneɛ ne mɔ mɔɔ bɛva ezukoa nvutuke kpalɛ a bɛyɛ na bɛsɔ wɔ Nwuanzanwuanza Nu Nwuanzaanwu Ɛleka ne, kɛmɔ bɛhilele la,

²¹ndotolo mɔɔ bɛva bɛziezie sua ne anu, ahɛnlaneɛ, mbaka mɔɔ bɛfa bɛsɔ ahɛnlaneɛ,

²²mbaka mɔɔ bɛfa bɛnua ahɛnlaneɛ, ahyɛnze akunlu kuloonwu, ɛyɛba mɔɔ bɛyela ɛyɛlɛ wɔ nu, yɛɛ ahyɛnze mɔɔ bɛfa bɛfula samɛnlankɛ la. Bɛvale ezukoa nvutuke kpalɛ a bɛyɛle ninyɛne ɛhye mɔ a. Ɛzonlenlɛ Sua ne findezo nlenkɛ ne mɔ nee Nwuanzanwuanza Nu Nwuanzaanwu Ɛleka ne anlenkɛ ne, bɛholole ezukoa nvutuke bɛguale nwolɛ.