Read Nzema 2 Edk 5 Bible Online

2 Edk 5 - Nzema bible

2 Edk 5

¹ Mɔɔ Belemgbunli Sɔlɔmɔn wiele Ɛzonlenlɛ Sua ne anwo gyima biala di la, ɔvale ninyɛne mɔɔ ɔ ze Devidi ɛdu ɛzie ɛkɛ ɛmaa Ɛdɛnkɛma la: dwɛtɛ fufule, ezukoa nvutuke, nee ninyɛne mɔɔ ɛha la amuala ɔhɔziele Ɛzonlenlɛ Sua ne ekpumgbunli ne mɔ mɔɔ bɛfa ninyɛne bɛsie nu la anu.

² Akee Belemgbunli Sɔlɔmɔn dole ɛsalɛ vɛlɛle mbusua ekpunli ekpunli ne mɔ mgbanyinli, Yizilayɛ mgbanyima, mbusua mgbanyinli mɔɔ gyigyi bɛ ze mɔ awuke ti la manle bɛ muala bɛrayiale Gyɛlusalɛm, kɛ bɛkava Ɛdɛnkɛma Ngyekyeleɛ Ɛlɛka ne wɔ Devidi Suakpole zo,[2] Zayɔn bɛ nee ye ara Ɛzonlenlɛ Sua ne anu.

³Menli ne amuala rayiale mekɛ mɔɔ bɛbali Kpɔda Bo Ɛdɛnlanlɛ Ɛvoyia ne la wɔ siane nsuu ne anu.

⁴Mɔɔ mgbanyima ne mɔ amuala wiele yia la, akee Livaema ne hɔmanle Ngyekyeleɛ Ɛlɛka ne zo

⁵na bɛ nee ye rale Ɛzonlenlɛ Sua ne anu. Eza sɛlɛvolɛma ne nee Livaema ne mɔ yeyele Ɛdɛnkɛma Ndanlɛ Sua ne, bɛdudule nwolɛ debie biala na bɛvale bɛraguale Sua ne anu.

⁶Belemgbunli Sɔlɔmɔn nee Yizilayɛma amuala yiale Ngyekyeleɛ Ɛlɛka ne anyunlu ɛkɛ na bɛhunle mboane nee nlankɛ dɔɔnwo kpalɛ mɔɔ bɛngola bɛ tia la bɛbɔle azu.

⁷Akee sɛlɛvolɛma ne vale Ɛdɛnkɛma Ngyekyeleɛ Ɛlɛka ne raziele ɛleka mɔɔ bɛziezie bɛmaa ye wɔ Ɛzonlenlɛ Sua ne anu, wɔ Nwuanzanwuanza Nu Nwuanzaanwu Ɛleka ne, wɔ abɔdeɛ nwiɔ ne mɔɔ lɛ ndɛbalɛ la abo.

⁸Kɛmɔ ɛnee abɔdeɛ nwiɔ ne mɔɔ lɛ ndɛbalɛ la ɛdɛlɛdɛlɛ bɛ ndɛba ne mɔ anu la ati, bɛ ndɛba ne mɔ hedale Ɛlɛka ne nee mbaka mɔɔ bɛvale bɛzoale la amuala azo.

⁹Na mbaka ne mɔ noko wowale, yemɔti saa sonla gyi Ɛzonlenlɛ Sua ne anu na ɔto ɔ nye Nwuanzanwuanza Nu Nwuanzaanwu Ɛleka ne a, ɔnwu mbaka ne mɔ ati. Sonla gyi alie nwo a, ɔnnwu mbaka ne mɔ. (Mbaka ne mɔ tɛbɔ ɛkɛ ne ɛnɛ nee ɛnɛ ala.)

¹⁰ Ɛhwee ɛnle Ɛlɛka ne anu kɛ awolɛ ndɛbandɛba nwiɔ ne mɔɔ Mosisi vale guale nu wɔ Hɔlɛbe la. Hɔlɛbe a Ɛdɛnkɛma nee Yizilayɛma yɛle ngyekyeleɛ ne a, wɔ mekɛ mɔɔ ɔyele bɛ ɔvile Yigyibiti la.

¹¹Sɛlɛvolɛma mɔɔ rale la amuala dule bɛ nwo manle Ɛdɛnkɛma, bɛandwenle bɛ ekpunli ngakyile ne mɔ anwo. Akee Livae edwɛndolɛma mɔɔ le Esafe, Himan, nee Gyɛdutɛn, nee bɛ mbusuafoɔ ne mɔ amuala wulowulale adɛladeɛ fufule. Edwɛndolɛma ɛhye mɔ gyinlanle azukponle ne aduduleɛ afoa nu, bɛdedɛ sɔnwosɔnwo nee getaa, yɛɛ sɛlɛvolɛma ɛya ko abulanwiɔ ɛlɛbɔ aweɛne ndendenle. Aweɛnebɔlɛ ne, sɔnwosɔnwobɔlɛ ne, nee ninyɛne mɔɔ ɛha la nee edwɛndolɛ ne kɔ zolɛ pɛpɛ, na bɛyele Ɛdɛnkɛma ayɛlɛ kɛ, “Bɛye Ɛdɛnkɛma ayɛlɛ, ɔboalekɛ ɔle kpalɛ, yɛɛ ye ɛhulolɛ ɛmbɔ aze ɛlɛ.” Mɔɔ sɛlɛvolɛma ne vi Ɛzonlenlɛ Sua ne anu ɛlɛfinde la, arɛlevilɛ nu ala, amungu nwohyee rayile sua ne na ɔmanle Ɛdɛnkɛma anyunlunyia dale hilele kɛ Ɛdɛnkɛma wɔ ɛkɛ. Na sɛlɛvolɛma ne angola bɛ gyima ne di bieko.