Read Nzema Ɛzl 10 Bible Online

Ɛzl 10 - Nzema bible

Ɛzl 10

¹Mekɛ mɔɔ Ɛzela ɛlɛyɛ nzɛlɛlɛ ne na ɔlɛ ɛzunlɛ ɔlɛka ɛtane mɔɔ bɛyɛ, ɔweweɛ ɔ nwo aze wɔ Nyamenle Ɛzonlenlɛ Sua ne anyunlu ɛkɛ ne la, Yizilayɛma dɔɔnwo kpalɛ, mraalɛ nee mrenya, nee ngakula, rabɔle yiale ye, na bɛdabɛ noko bɛzunle bɛmanle ɔyɛle alɔbɔlɛ.

²Na Gyɛhayɛle mɔɔ le Yilam asa azo ne mɔ ko la ara Hyɛkanaya zele Ɛzela kɛ, “Yɛyɛ ɛtane yɛtia Nyamenle kɛ yɛgya nyɛvolɛ anzɛɛ azɛlɛ ye azo mraalɛ ne bie mɔ a, noko Yizilayɛma lɛ anyelazo.

³Zɔhane ati bɛmaa yɛvua yɛhile yɛ Nyamenle ne na yɛbɔ mraalɛ ɛhye mɔ ewole na yɛvoa bɛ mra ne mɔ, na yɛlua Nyamenle mɛla ne azo yɛyɛ mɔɔ ɛdawɔ nee menli mɔɔ sulo yɛ Nyamenle ne la kɛha la.

⁴Dwazo na gyima ne le wɔ gyima. Yɛgyi ɛ nzi, yemɔti si wɔ ahonle yɛ.”

⁵Na Ɛzela dwazole na ɔmanle sɛlɛvolɛ mgbanyima, Livaema, nee Yizilayɛma ne mɔ hanle ndane kɛ bɛkɛyɛ mɔɔ Hyɛkanaya ɛzuzu la.

⁶Akee Ɛzela vile Ɛzonlenlɛ Sua ne anyunlu na ɔhɔle Yilayahyebe ara Gyihoheenan sua nu. Ɔlale ɛkɛ ne kenle ko ne nɔe ne, noko yeanli debie yɛɛ yeanno nzule. Ɔluakɛ ɛnee ɔlɛdi nyane wɔ nyɛleɛ ɛtane ne mɔ mɔɔ bɛdabɛ mɔɔ bɛhyele bɛ nuokɛ bɛhɔle nlɔnu la yɛle la anwo.

⁷Bɛbɔle nolo wɔ Dwuda maanle ne anu amuala nee Gyɛlusalɛm kɛ mgbanyima ne mɔ ɛmaa bɛdabɛ mɔɔ bɛhyele bɛ nuokɛ bɛhɔle nlɔnu mɔɔ bɛzia bɛra la kenle nsa kɛ bɛrayia Gyɛlusalɛm. Awie biala mɔɔ kenle nsa ne azo yeamba la, mgbanyima ne mɔ ɛmaa bɛza ye bɛlie ɔ nwo ninyɛne kɔsɔɔti, na bɛdua ye wɔ maanlema avinli.

⁹Na bɛdabɛ mɔɔ bɛwɔ Dwuda nee Bɛngyaman maanzinli ne mɔ anu la amuala rayiale Gyɛlusalɛm kenle nsa ne azo. Kenle ne le siane ngɔnla ne ye kenle mɔɔ tɔ zolɛ abulanwiɔ la. Na menli ne amuala dɛnlanle aze wɔ ɛleka kpatawienyi ne mɔɔ wɔ Nyamenle Sua ne anyunlu la. Edwɛkɛ ne anwo ahunlundetelɛ nee ezule mɔɔ ɛnee ɛlɛtɔ kpole la manle bɛ nwo wozole bɛ.

¹⁰Na sɛlɛvolɛ Ɛzela dwazole na ɔzele bɛ kɛ, “Bɛdo mɛla kɛ bɛgya nyɛvolɛ mraalɛ a. Bɛmaa Yizilayɛma fɔlɛlilɛ ne akee ɛyɛ kpole kpalɛ.

¹¹Zɔhane ati bɛha bɛ ɛtane ne mɔ bɛhile Ɛdɛnkɛma, bɛ ze mɔ Nyamenle ne, na bɛyɛ mɔɔ ɔkpondɛ kɛ bɛyɛ la. Bɛhwe bɛ nwo bɛvi menli mɔɔ wɔ azɛlɛ ɛhye azo la anwo na bɛgyakyi bɛ nyɛvolɛ mraalɛ ne mɔ mɔɔ bɛgyigya bɛ la.”

¹²Na menli mɔɔ wɔ ɛkɛ ne la amuala deanle nuhua kɛ, “ Ɔle zɔhane; ɔwɔ kɛ yɛyɛ mɔɔ wɔha la.

¹³Noko menli ne zonle, yɛɛ ezule ne ɛlɛtɔ kpole. Yɛnrɛhola nuhua gyinla zɛhae. Eza noko ɔnle kenle ko anzɛɛ kenle nwiɔ gyima. Ɔluakɛ yɛvo kpole kpalɛ.

¹⁴Bɛye mgbanyima bɛzie Gyɛlusalɛm ɛke bɛmaa bɛgyinla menli ne kɔsɔɔti agyakɛ anu na bɛhile kenle bɛmaa bɛdabɛ mɔɔ bɛgya nyɛvolɛ mraalɛ la ɛrɛla ɛranwu bɛ wɔ mekɛ mɔɔ bɛkɛhile la anu. Mekɛ mɔɔ bɛkɛhile sua biala azo amra la, saa bɛlɛba a ɔwɔ kɛ bɛ nee sua ne azo mgbanyima nee ndɛnebuavolɛma a ba a. Na bɛyɛ ye zɔhane kɔkpula kɛ Nyamenle ɛya kpole ne mɔɔ yeva wɔ ɛhye anwo la kɛha aze la.”

¹⁵Asahɛle ara Dwɔnatan nee Tɛkeva ara Gyɛzaya ala yɛɛ tiale nzuzulɛ ɛhye a, yɛɛ Mɛhyɛlam nee Livaenli Hyabɛtae vuale bɛ nzi.

¹⁶Akee bɛdabɛ mɔɔ bɛhyele bɛ nuokɛ bɛhɔle nlɔnu na bɛzia bɛra la yɛle mɔɔ bɛha la. Sɛlɛvolɛ Ɛzela yele mbusua mgbanyinli vale bɛ zieziele bɛ ze mɔ awuke ne mɔ ati na bɛhɛlɛhɛlɛle bɛ aluma. Siane bulu ne anu kenle ne mɔɔ lumua la azo, bɛdɛnlanle aze kɛ bɛneɛnlea edwɛkɛ ne anu.

¹⁷Na ɔkadwu siane nsa ne azo la ɛnee bɛwie edwɛkɛ biala mɔɔ fane bɛdabɛ mɔɔ bɛgya nyɛvolɛ mraalɛ la anwo la ka.

¹⁸Bɛdabɛ mɔɔ ɛnee bɛgya nyɛvolɛ mraalɛ la ɛne: Sɛlɛvolɛma mbusua ne: Dwɔhyua nee ɔ mediema ne mɔ abusua nu amra mɔɔ le Gyɛhozadake asa azo: Meeyasaya, Ɛleyizɛ, Gyɛlebe, yɛɛ Gɛdalaya.

¹⁹Bɛbɔle ɛwɔkɛ kɛ bɛbɔ bɛ mraalɛ ne mɔ ewole, na bɛvale boane nyinli ko kɛ bɛva bɛbɔ bɛ ɛtane ne mɔ anwo azu.

²⁰Yemɛ abusua nu amra: Haneenae yɛɛ Zɛbadaya

²¹Hɛlem abusua nu amra: Meeyasaya, Yilaegya, Hyɛmaya, Gyɛhayɛle, yɛɛ Ɛzaya

²²Pahyɔ abusua nu amra: Ɛleyoyinae, Meeyasaya, Yehyemeeyɛle, Nɛtanile, Dwozabade, yɛɛ Ɛleesa

²³Livaema: Dwozabade, Hyemɛyae, Kɛlaya (mɔɔ eza bɛfɛlɛ ye Kɛlaeta la), Pɛtahaya, Dwuda, yɛɛ Ɛleyizɛ

²⁴Edwɛndolɛma: Yilayahyebe Ɛzonlenlɛ Sua sinzavolɛma: Hyalɛm, Tilɛm, yɛɛ Yulae

²⁵Menli mɔɔ ɛha la: Pɛlɔhye abusua nu amra: Relamaya, Yezaya, Malekaya, Megyamem, Ɛlieza, Malekaegya, yɛɛ Bɛnaya

²⁶Yilam abusua nu amra: Matanaya, Zɛkalaya, Gyɛhayɛle, Abedae, Gyɛlɛmo, yɛɛ Yilaegya

²⁷Zatu abusua nu amra: Ɛleyoyinae, Yilayahyebe, Matanaya, Gyɛlɛmo, Zeebade, yɛɛ Azaeza

²⁸Bibeyae abusua nu amra: Gyihoheenan, Hananaya, Zabeeyae, yɛɛ Ateleeyae

²⁹Beenae abusua nu amra: Mɛhyɛlam. Malɛke, Adaya, Gyahyɛbe, Hyiale, yɛɛ Gyɛlɛmo

³⁰Peehate Mowabe abusua nu amra: Adena, Kilale, Bɛnaya, Meeyasaya, Matanaya, Bɛzalile, Benuwae, yɛɛ Manasɛ

³¹Hɛlem abusua nu amra: Ɛleyizɛ, Yehyaegya, Malekaegya, Hyɛmaya, Hyemɛyɔn, Bɛngyaman, Malɛke, yɛɛ Hyɛmalaya

³³Hahyɛm abusua nu amra: Matinae, Matata, Zeebade, Yilefɛlɛte, Gyɛlimae, Manasɛ, yɛɛ Hyemɛyae

³⁴Beenae abusua nu amra: Meeyadeeyae, Amelam, Yuwɛle, Bɛnaya, Bɛdaya, Kɛluhae, Vanaya, Mɛlɛmo, Yilayahyebe, Matanaya, Matinae, yɛɛ Gyeeyasu.

³⁸Benuwae abusua nu amra: Hyemɛyae, Hyɛlimaya, Neetan, Adaya, Makenadɛbae, Hyahyae, Hyɛleeyae, Azalile, Hyɛlimaya, Hyɛmalaya, Hyalɛm, Amalaya, yɛɛ Dwosefi

⁴³Nibo abusua nu amra: Gyiyayɛle, Matetaya, Zeebade, Zɛbaena, Gyeedae, Dwowɛle, yɛɛ Bɛnaya

⁴⁴Menli ɛhye mɔ amuala ɛnee gya nyɛvolɛ mraalɛ. Bɛbɔle bɛ ewole na bɛmanle bɛ nee bɛ mra ziale hɔle.