Read Nzema Ɛzl 4 Bible Online

Ɛzl 4 - Nzema bible

Ɛzl 4

¹Menli mɔɔ ɛngulo Dwudama nee Bɛngyamanema edwɛkɛ la dele kɛ menli mɔɔ bɛhyele bɛ bɛhɔle nlɔnu la ɛzia ɛra na bɛlɛsi Ɛdɛnkɛma, Yizilayɛ Nyamenle ne Ɛzonlenlɛ Sua ne.

² Zɔhane ati bɛhɔle Zɛlɛbabɛle nee mbusua mgbanyinli ne mɔ anwo ɛkɛ ne na bɛhɔzele bɛ kɛ, “Bɛmaa yɛboka bɛ yɛzi Ɛzonlenlɛ Sua ne, ɔboalekɛ yɛsonle bɛ Nyamenle ne kɛ mɔɔ bɛsonle ye la ala. Eza sumunli kɛ Aselea Maanle Maanle Belemgbunli Yisahadɛn nee yɛ rale ɛke la, mekɛ biala yɛbɔ azu yɛmaa Nyamenle.”

³Na Zɛlɛbabɛle, Dwɔhyua nee Yizilayɛ mbusua mgbanyinli ne mɔ buale bɛ kɛ, “Yɛngyia bɛ moalɛ wɔ yɛ Nyamenle ne Ɛzonlenlɛ Sua ne ɛzilɛ nu gyima biala anwo. Yɛdayɛ yɛbazi Ɛdɛnkɛma, Yizilayɛ Nyamenle ne Ɛzonlenlɛ Sua ne, kɛmɔ Maanle Maanle Belemgbunli Saelɛse ɛze yɛ la.”

⁴Ɛhye ati menli mɔɔ wɔ maanle ne anu la bɔle ɔ bo kɛ bɛsɛkye Dwudama adwenle, na bɛhanle bɛ ɛzulolɛ mɔɔ ɛnee akee bɛkɔ gyima ne anwo bɔbɔ a bɛsulo.

⁵Bɛbɔle menli ɛkpa kɛ bɛdendɛ bɛtia bɛ na bɛzɛkye sua ne ɛzilɛ nwo adwenle ne. Bɛyɛle ɛhye, ɔvi Belemgbunli Saelɛse mekɛ zo toonwo ɔradwule Belemgbunli Dalayɛse mekɛ zo.

⁶ Mɔɔ bɛvale Zɛzɛse bɛziele Pɛhyea Maanle Maanle Belemgbunli la, menli mɔɔ wɔ maanle ne anu mɔɔ ɛngulo Dwudama nee Gyɛlusalɛmma edwɛkɛ la hɛlɛle kɛlata hɔdoanle bɛ.

⁷Eza mɔɔ Belemgbunli Atazɛzɛse ralile ebia ne la, Behyelam, Metelɛdate, Tabiile, nee menli bie mɔɔ bɛ nee bɛ ɛhɔ akpamo la hɛlɛle Yizilayɛma ati kɛlata hɔmanle belemgbunli ne. Bɛhɛlɛle kɛlata ne wɔ Arelam aneɛ nu yɛɛ bɛhilele ɔ bo bɛhilele belemgbunli ne a.

⁸Amɛnlado Rilihɛm nee maanzinli ne anu kɛlɛhɛlɛvolɛ ne, Hyemehyae, bɛdabɛ noko bɛhɛlɛle Gyɛlusalɛm anwo kɛlata ɛhye bɛhɔmanle Atazɛzɛse kɛ:

⁹“Yɛdayɛ, Amɛnlado Rilihɛm, Kɛlɛhɛlɛvolɛ Hyemehyae, nee yɛ gɔnwo mɔ ndɛnebuavolɛma, nee arane mbɔlɔba mgbanyinli mɔɔ vi Yilɛke nee Babelɔn, nee Susa mɔɔ wɔ Yilam la,

¹⁰nee bɛdabɛ mɔɔ Ahyɔbanipa, sonlakpole mɔɔ lɛ duma nee tumi la dule bɛ manle bɛradɛnlanle Samɛlea nee Yufileti afoa nu la a ɛlɛkɛlɛ kɛlata ɛhye a.”

¹¹Edwɛkɛ mɔɔ wɔ kɛlata ne anu la ɛne: “Yɛlɛ yɛkamaa Maanle Maanle Belemgbunli Atazɛzɛse.

¹²“Yɛmaa Belemgbunli Atazɛzɛse ade kɛ Dwuuma mɔɔ vi wɔ maanle ɛhendeɛ ne mɔ anu lɔ rale la ɛhɔdɛnla aze wɔ Gyɛlusalɛm na bɛlɛkyekye suakpole zɔhane bieko. Ɛze kɛ menli mɔɔ wɔ Gyɛlusalɛm la ɛngyɛ na ade atua, yɛɛ bɛ ti yɛ se. Kɛkala, asɛɛ bɛwie ye bane ne mɔ boɛ yɛ yɛɛ bɛlɛyɛ ye adiabo ne mɔ boɛ.

¹³Yɛkulo kɛ belemgbunli te kɛ saa bɛwie suakpole ɛhye kyekye bieko na ye bane ne mɔ tɔ nuhua a, menli mɔɔ wɔ zolɛ la ɛnrɛdua gua nu adwule anzɛɛ adwule biala bieko. Na ɛhye bamaa belemgbunli gya ne adɔ sinli.

¹⁴Kɛmɔ yɛwɔ ɛke yɛmaa belemgbunli na yɛnrɛhulo kɛ ɛhye kɛzi la, yɛlɛ nzuzulɛ ɛhye yɛlɛbɛlɛ wɔ kɛ

¹⁵ɛmaa bɛnleɛnlea wɔ mgbanyinli ngɛlata ne mɔ anu. Wɔ nuhua, ɛbanwu kɛ suakpole ɛhye azo amra ɛngyɛ na ade atua. Bɛ atuadelɛ ne vi tete, na bɛyɛ ngyegyelɛ dɔɔnwo bɛmaa arelemgbunli nee maanzinli zo neavolɛma. Ɛhye ati yɛɛ bɛzɛkyele suakpole ɛhye a.

¹⁶Zɔhane ati Nana, saa ɛmaa adenle ɛmaa bɛkyekye suakpole ɛhye bieko, bɛdie ye bane ne bɛyia a, ɛbalɛ ɛ sa mgbane wɔ Yufileti Adɔleɛ.”

¹⁷Belemgbunli ne vale mualɛ ɛhye hɔmanle bɛ: “Melɛ mekamaa Amɛnlado Rilihɛm, kɛlɛhɛlɛvolɛ Hyemehyae, nee bɛ gɔnwo mɔ mɔɔ wɔ Samɛlea nee Yufileti Adɔleɛ la. Mebiza bɛ ahye.

¹⁸“Me sa ɛha kɛlata ne mɔɔ bɛhɛlɛle me la. Bɛgenga, bɛhile ɔ bo bɛhile me.

¹⁹“Memaa bɛnleɛnlea ngɛlata mɔɔ wɔ ɛke la anu kpalɛ na menwu kɛ Gyɛlusalɛmma lɛ tetedwɛkɛ mɔɔ kile kɛ bɛmbu arelemgbunli a. Bɛngyɛ na bɛade arelemgbunli nwo atua, yɛɛ mekɛ biala bɛgyegye kpalɛ.

²⁰Ɛnee Gyɛlusalɛm lɛ arelemgbunli anwo ɛzulolɛ mɔɔ anwo yɛ se a, na bɛziele maanle maanle mɔɔ wɔ Azule Yufileti Adɔleɛ afoa nu la amuala. Ɔlua zolɛ bɛmanle menli duale adwule manle bɛ.

²¹Zɔhane ati yɛ mɛla maa menli zɔhane mɔ ɛgyakyi gyima ne ndɛndɛ zo, yɛɛ eza ɔnle kɛ bɛkyekye suakpole ne bieko kɔkpula kɛ menwɔli mɛla bieko kɛ bɛkyekye suakpole ne la.

²²Nea boɛ, mmabu ɛ nye ɛgua edwɛkɛ ɛhye azo. Yɛ ye ndɛndɛ na bɛanyɛ bɛanzɛkye debie.”

²³Mɔɔ bɛgengale Belemgbunli Atazɛzɛse kɛlata ne bɛhilele Rilihɛm, Hyemehyae, nee bɛ gɔnwo mɔ ala la, ndɛndɛ ne ala, bɛhɔle Dwuuma mɔɔ wɔ Gyɛlusalɛm la anwo zo na bɛholole bɛ nwo zo bɛmanle bɛgyakyile suakpole ne ɛkyekyelɛ.

²⁴ Ɛhye ati Nyamenle Sua ne mɔɔ wɔ Gyɛlusalɛm la ɛzilɛ hale ɛkɛ ne toonwo ɔhɔdwule kɛ bɛvale Dalayɛse bɛziele Pɛhyea Maanle Maanle belemgbunli na ye ɛvolɛ nwiɔ ne azo.