Read Nzema Ɛzl 7 Bible Online

Ɛzl 7 - Nzema bible

Ɛzl 7

¹Ɛvolɛ dɔɔnwo anzi, wɔ Pɛhyea Belemgbunli Atazɛzɛse mekɛ zo, ɛnee nrenya bie wɔ Babelonia, bɛfɛlɛ ye Ɛzela. Ɛzela ɔ ze a le Sɛlaya, Sɛlaya ɔ ze a le Azalaya, Azalaya ɔ ze a le Helekaya,

²Helekaya ɔ ze a le Hyalɛm, Hyalɛm ɔ ze a le Zeedɔko, Zeedɔko ɔ ze a le Ahaetɛbe,

³Ahaetɛbe ɔ ze a le Amalaya, Amalaya ɔ ze a le Azalaya, Azalaya ɔ ze a le Mɛlayo,

⁴Mɛlayo ɔ ze a le Zɛlahaya, Zɛlahaya ɔ ze a le Ɛzae, Ɛzae ɔ ze a le Bɛkae,

⁵Bɛkae ɔ ze a le Abaehyua, Abaehyua ɔ ze a le Fenɛhase, yɛɛ Fenɛhase ɔ ze a le Ɛlieza, Ɛlieza ɔ ze a le Sɛlɛvolɛma Kpanyinli Aalɔn.

⁶Ɛzela le abɔlɔba mɔɔ ze Mɛla ne mɔɔ Ɛdɛnkɛma, Yizilayɛ Nyamenle ne vale manle Mosisi la kpole kpalɛ. Kɛmɔ ɛnee Ɛdɛnkɛma ye Nyamenle ne anye wɔ ɔ nwo zo la ati, belemgbunli ne vale debie biala mɔɔ ɔbizale la ɔmanle ye. Mɔɔ Belemgbunli Atazɛzɛse lile ɛvolɛ nsuu wɔ Pɛhyea ebia ne azo la, Ɛzela nee Yizilayɛma bie mɔ mɔɔ le sɛlɛvolɛma, Livaema, edwɛndolɛma, nee Ɛzonlenlɛ Sua nu sonvolɛma la zile nu vi Babelonia rale Gyɛlusalɛm.

⁸Bɛvi Babelonia bɛdule bɛ bo wɔ siane ne mɔɔ lumua la anu kenle ne mɔɔ lumua la azo, na Nyamenle duma nu nee ye moalɛ zo, bɛradwule Gyɛlusalɛm siane nnu ne anu, ye kenle ne mɔɔ lumua la azo.

¹⁰Ɛzela ɛnee ɛdu ɔ nwo ɛmaa na yeva ye mekɛ kɔsɔɔti yezukoa Ɛdɛnkɛma Mɛla ne mɔɔ yeva yemaa Yizilayɛma la kpalɛ, na yevua kɛ ɔdi zolɛ na yeahilehile Yizilayɛma noko.

¹¹Ɛzela le sɛlɛvolɛ nee kɛlɛhɛlɛvolɛ mɔɔ ɛbe Ɛdɛnkɛma Mɛla ne anu a. Kɛlata mɔɔ Belemgbunli Atazɛzɛse hɛlɛle manle ye la ɛne:

¹²“Medame, Maanle Maanle Belemgbunli Atazɛzɛse a melɛkɛlɛ kɛlata ɛhye meamaa sɛlɛvolɛ Ɛzela mɔɔ le Anwuma Nyamenle ne Mɛla ne kɛlɛhɛlɛvolɛ la a.

¹³“Kɛkala, meyɛ ye mɛla kɛ Yizilayɛnli biala mɔɔ wɔ me maanle ye anu la, sɛlɛvolɛma anzɛɛ Livaema, mɔɔ kulo kɛ ɔsia ɔkɔ Gyɛlusalɛm la nee wɔ ɛhɔ.

¹⁴Belemgbunli nee ye mgbanyima nsuu ne mɔɔ tu ye folɛ la yɛɛ ɛzoa wɔ kɛ ɛhɔ Dwuda nee Gyɛlusalɛm ɛhɔnleɛnlea menli ne ɛbɛlabɔlɛ nu kɛ bɛlɛdi Nyamenle, wɔ Nyamenle ne Mɛla ne mɔɔ ɛlɛ la azo a.

¹⁵Eza fa dwɛtɛ fufule ne nee ezukoa nvutuke ne mɔɔ belemgbunli nee ye mgbanyima mɔɔ tu ye folɛ la ɛyeye bɛ ahonle nu ɛva ɛmaa kɛ bɛva bɛbɔ azu bɛmaa Yizilayɛ Nyamenle ne mɔɔ ye Ɛzonlenlɛ Sua a wɔ Gyɛlusalɛm la noko kɔ.

¹⁶Akee fa ezukoa nvutuke nee dwɛtɛ fufule biala mɔɔ ɛkɛnyia ye wɔ Babelonia nee azubɔdeɛ biala mɔɔ Yizilayɛma nee bɛ sɛlɛvolɛma ne ɛbɔ bɛ Nyamenle ne mɔɔ wɔ Gyɛlusalɛm la Ɛzonlenlɛ Sua ne ati ɛyeye bɛ ahonle nu ɛva ɛmaa la amuala kɔ.

¹⁷“Saa ɛ sa ka ezukoa ɛhye a, nea na fa tɔ nlankɛ nyinli, mboane nyinli, nee mboane mralɛ, abɛlɛ nee nwanye, na fa bɛ muala bɔ azu wɔ Nyamenle ne mɔɔ wɔ Gyɛlusalɛm la Ɛzonlenlɛ Sua ne anu azukponle ne azo.

¹⁸Bɛyɛ ɛhye bɛwie a, akee ɛ nee ɛ mediema Dwuuma ne mɔ bɛyɛ mɔɔ bɛdabɛ bɛnea a ɔle kpalɛ la, kɛmɔ bɛ Nyamenle ne ɛhulolɛdeɛ de la.

¹⁹Ninyɛne mɔɔ le kɛ ahyɛnze mɔɔ bɛva bɛwula ɛ sa nu kɛ bɛva bɛhɔzonle wɔ Ɛzonlenlɛ Sua ne anu la, ye bɛ muala kɔsɔɔti maa Nyamenle ne mɔɔ wɔ Gyɛlusalɛm la.

²⁰Akee debie biala mɔɔ ɛkɛhyia nwolɛ wɔ wɔ Nyamenle ne Ɛzonlenlɛ Sua ne anwo mɔɔ hyia kɛ ɛkɔtɔ la, die ezukoa fi belemgbunli gya ne anu na fa kɔdɔ.

²¹“Akee medame, Belemgbunli Atazɛzɛse, meyɛ mɛla ɛhye na mese me gya sievolɛma mɔɔ wɔ Yufileti Adɔleɛ la amuala kɛ: Debie biala mɔɔ sɛlɛvolɛ Ɛzela, mɔɔ le Nyamenle ne mɔɔ wɔ anwuma la Mɛla kɛlɛhɛlɛvolɛ ne kɛbiza bɛ la, bɛnlea na bɛyɛ ye gyɛlɛɛnye bɛmaa ye.

²²Bɛmaa ye bolɛ ɛdwu dwɛtɛ fufule mɔɔ ye ɛnlomboɛ to tone nu kilo apenle nsa, ɛya nna la, abɛlɛ mɔɔ ɛsuzu a ɔto kilo apenle bulu, nwanye litili apenle nwiɔ, nwole litili apenle nwiɔ, yɛɛ ngyenle dɔɔnwo biala mɔɔ bɛkɛhyia nwolɛ la.

²³Debie biala mɔɔ Anwuma Nyamenle ne kɛhile kɛ bɛyɛ wɔ Ɛzonlenlɛ Sua ne anwo la, bɛnlea bɛmaa bɛyɛ, amaa Nyamenle anva me nee me bo zo amra mɔɔ bali belemgbunli la anwo ɛya.

²⁴Eza bɛnwu ye kɛ ɔnle kɛ bɛdie sɛlɛvolɛma, Livaema, edwɛndolɛma, sinzavolɛma, nee gyimayɛvoma mɔɔ wɔ Nyamenle Sua ne anwo la adwule biala.

²⁵“Na wɔmɔ Ɛzela, dua Nyamenle nrɛlɛbɛ ne mɔɔ yeva yemaa wɔ la azo ye menli mɔɔ ze wɔ Nyamenle ne Mɛla ne la, yɛ bɛ edwɛkɛdivolɛma nee ndɛnebuavolɛma maa bɛnlea bɛmaa pɛlepɛle ɛrɛla menli mɔɔ wɔ Yufileti Adɔleɛ la avinli. Na kilehile bɛdabɛ mɔɔ bɛnze mɛla ne la amuala.

²⁶Awie biala mɔɔ anli wɔ Nyamenle ne mɛla zo anzɛɛ anli belemgbunli ne mɛla zo la, ɔwɔ kɛ bɛbua ye ewule fɔlɛ anzɛɛ bɛtu ye bɛfi maanle ne anu, anzɛɛ bɛsa ye bɛdie ɔ nwo ninyɛne kɔsɔɔti, anzɛɛ bɛto ye efiade.”

²⁷Na Ɛzela zele kɛ, “Ayɛlɛyelɛ ɛha Ɛdɛnkɛma, yɛ nlenya mɔ Nyamenle ne. Yemaa Maanle Maanle Belemgbunli ne ahonle kpalɛ kɛ ɔli Ɛdɛnkɛma Ɛzonlenlɛ Sua ne mɔɔ wɔ Gyɛlusalɛm la eni wɔ adenle zɛhae anu.

²⁸Ɔlua Nyamenle ɛlolɛ zo, menyia me nyunlu wɔ belemgbunli nee ye mgbanyima mɔɔ tu ye folɛ la, yɛɛ ye mbɔlɔba mgbole ne mɔ anyunlu. Ɛdɛnkɛma me Nyamenle ne ɛmaa me anwosesebɛ, na ɔlua zolɛ medame noko menzile ahonle na memboɔboale Yizilayɛ mbusua mgbanyinli ne bie mɔ anloa na me nee bɛ ziale rale.”