Read Nzema Nih 10 Bible Online

Nih 10 - Nzema bible

Nih 10

¹Sonla mɔɔ lumuale vale ɔ sa wulale ngyehyɛlɛ ne abo la a le amɛnlado ne, Hakalaya ara Nihɛmaya. Akee Zɛdikaya ɔdaye ɔvale ɔ sa ɔwulale ɔ bo. Menli ɛhye mɔ noko vale bɛ sa wulale ɔ bo:

²Sɛlɛvolɛma: Sɛlaya, Azalaya, Gyɛlɛmaya, Pahyɛ, Amalaya, Malekaya, Hatɛhye, Hyɛbanaya, Malɛke, Hɛlem, Mɛlɛmo, Obadaya, Daneɛle, Genɛtɔn, Bɛlɛke, Mɛhyɛlam, Abaegya, Maegyamen, Meeyazaya, Belegeeyae, yɛɛ Hyɛmaya.

⁹Livaema: Gyɛhyua, Azanaya ara nrenya ne, Benuwae mɔɔ vi Hɛneedade abusua nu la, Kademeɛle, Hyɛbanaya, Hodaya, Kɛlaeta, Pɛlaya, Heenan, Maeka, Rilihɔbo, Hahyabaya, Zakɛ, Hyɛlibaya, Hyɛbanaya, Hodaya, Beenae yɛɛ Bɛnaenu.

¹⁴Mbusua mgbanyinli: Pɛlɔhye, Peehate Mowabe, Ɛlam, Zatu, Beenae, Bɛnae, Azegade, Bibeeyae, Adonaegya, Begeveeyae, Eden, Etɛ, Hɛzikaya, Azɛ, Hodaya, Hahyɛm, Bizeeyae, Hɛlefe, Anato, Nibeeyae, Magepeahye, Mɛhyɛlam, Hizɛ, Mɛhyɛzabɛle, Zeedɔko, Gyadua, Pɛlataya, Heenan, Anaya, Hohyia, Hananaya, Hahyɛbe, Halohɛhye, Paeleha, Hyobɛke, Rilihɛm, Hahyabena, Meeyasaya, Ahaya, Heenan, Anan, Malɛke, Hɛlem, yɛɛ Beeyana.

²⁸Menli ne yɛle ngyehyɛlɛ ɛhye: Yizilayɛma, sɛlɛvolɛma, Livaema, nlenkɛ mgbole sinzavolɛma, edwɛndolɛma, Ɛzonlenlɛ Sua nu sonvolɛma, yɛɛ bɛdabɛ mɔɔ bɛha mɔɔ ɔlua Nyamenle Mɛla ne azolilɛ ti yɛhwe yɛ nwo yɛvi nyɛvolɛ mɔɔ de maanle ye anu la anwo la, yɛ nee yɛ mraalɛ, yɛ mra mrenya mɔɔ ɛdu zo na bɛlɛ ndelebɛbo la,

²⁹yɛ nee yɛ mgbanyima yɛbɔ nuhua yɛdi amonle, kɛ saa yɛbulu zolɛ a munzule ɛha yɛ, na yɛse kɛ, yɛbali Nyamenle Mɛla ne mɔɔ ɔluale ye sonvolɛ Mosisi anwo zo ɔvale ɔmanle yɛ la azo; yɛbali mɔɔ Ɛdɛnkɛma, yɛ Awulae ne kɛze yɛ biala la, yɛɛ yɛbali mɛla ne nee ngyehyɛlɛ ne mɔ azo.

³⁰ Yɛnrɛva yɛ mra mraalɛ yɛnrɛmaa awie gyɛne biala mɔɔ ɛnle Dwuunli la ara nrenya agyalɛ, yɛɛ yɛnrɛmaa yɛ mra mrenya ɛnrɛgya bɛ mra mraalɛ.

³¹ Saa menli zɔhane mɔ bie fa bɛ ninyɛne adɔne ba gua wɔ Ɛnwomenlelielɛ Kenle ne anzɛɛ kenle nwuanzanwuanza nu a, yɛnrɛdɔ. Ɛvolɛ mɔɔ tɔ zolɛ nsuu la biala yɛnrɛzo ɛya wɔ azɛlɛ ye azo, yɛɛ yɛbapɛ kakɛ biala mɔɔ wɔ ɛkɛ ne la anu.

³² Ɛvolɛ biala yɛ nuhua ko biala ɔwɔ kɛ tua dwɛtɛ fufule tone nu gelamo nnu, amaa bɛava bɛanlea Ɛzonlenlɛ Sua ne.

³³Yɛbava ninyɛne yɛara yɛamaa bɛava bɛayɛ ɛhye mɔ wɔ Ɛzonlenlɛ Sua ne anu bɛamaa Nyamenle: kpanwo nwuanzanwuanza ne, dahuu aleɛ ma azubɔdeɛ ne, nane mɔɔ kenle ko biala bɛbayela bɛabɔ azu la, Ɛnwomenlelielɛ Kenle ne azubɔlɛ ninyɛne, Siane Fofolɛ ɛvoyialilɛ ninyɛne, yɛɛ azubɔlɛ nwuanzanwuanza mɔɔ ɛha la anwo ninyɛne, azubɔlɛ mɔɔ bɛfa bɛanrinzi Yizilayɛma ɛtane ne mɔ la anwo ninyɛne, yɛɛ debie biala mɔɔ bɛhyia nwolɛ wɔ Ɛzonlenlɛ Sua ne anu la.

³⁴Ɛvolɛ biala, yɛdayɛ Yizilayɛma, sɛlɛvolɛma, yɛɛ Livaema, yɛbagua nzeleba yɛanwu mbusua mɔɔ ɔwɔ kɛ fa ɛyɛne ba maa bɛfa bɛyela nyɛmoa mɔɔ bɛfa bɛabɔ azu bɛamaa Ɛdɛnkɛma yɛ Nyamenle ne, kɛmɔ mɛla ne kile la.

³⁵ Ɛvolɛ biala yɛbava abɛlɛ mɔɔ yɛkɛlumua yɛkɛbu nee ma biala mɔɔ yɛkɛlumua yɛkɛde la yɛahɔ Ɛzonlenlɛ Sua ne anu kɛ azubɔdeɛ.

³⁶ Belamunli ralɛ nrenya biala mɔɔ yɛkɛwo ye la, yɛbava ye yɛahɔ Ɛzonlenlɛ Sua ne anu yɛahɔmaa sɛlɛvolɛma ne yɛamaa bɛadu ye bɛamaa Nyamenle, kɛmɔ Mɛla ne kile la. Eza yɛbadu yɛ ɛnlankɛ, boane, yɛɛ abɔnkye ralɛ biala mɔɔ bɛkɛlumua bɛkɛwo ye la yɛamaa Nyamenle.

³⁷ Ɛvolɛ biala yɛbava abɛlɛ mɔɔ bɛkɛlumua bɛkɛbu la ɛdɔkɛ nee nwolɛ ninyɛne mɔɔ le kɛ nwanye, ɔlivi nwole yɛɛ ma ngakyile yɛahɔmaa sɛlɛvolɛma mɔɔ wɔ Ɛzonlenlɛ Sua ne anu la yɛamaa bɛava bɛabɔ azu. Livaema mɔɔ dielie ninyɛne ngyɛnu bulu ɛkpɔ ngoko wɔ namunamu ɛya avule ne mɔ anu la, yɛbava yɛ bɛyɔba ngyɛnu bulu ɛkpɔ ngoko ne mɔ yɛahɔmaa bɛ.

³⁸ Saa bɛlɛdielie ngyɛnu bulu ɛkpɔ ngoko ne mɔ a, ɔwɔ kɛ sɛlɛvolɛma mɔɔ le Aalɔn abo zo amra la nee Livaema dua nwolɛ, yɛɛ ɔwɔ kɛ Livaema fa Ɛzonlenlɛ Sua ne anu ngyɛnu bulu ɛkpɔ ko ne kɔsie Ɛzonlenlɛ sua ne ninyɛnezielɛ ɛleka ne.

³⁹Ɔwɔ kɛ Yizilayɛma nee Livaema fa abɛlɛ, nwanye yɛɛ ɔlivi nwole mɔɔ bɛ nee ye kɛra la kɔ ninyɛnezielɛ ɛleka ne mɔɔ bɛsie Ɛzonlenlɛ Sua ne ahyɛnze ne mɔ nu la nee ɛleka mɔɔ sɛlɛvolɛma mɔɔ wɔ gyima nu, Ɛzonlenlɛ Sua ne sinzavolɛma nee edwɛndolɛma ne mɔ wɔ la. Yɛnrɛbu yɛ nye yɛnrɛgua yɛ Nyamenle Sua ne azo.