Read Nzema Nih 11 Bible Online

Nih 11 - Nzema bible

Nih 11

¹Dwuu mgbanyima ne mɔ dɛnlanle Gyɛlusalɛm, na menli mɔɔ hale la, bɛguale nzeleba, amaa bɛahyɛ abusua biala anu ekpunli bulu bɛamaa ekpunli ko adɛnla Gyɛlusalɛm suakpole nwuanzanwuanza ne azo, na ekpunli ngɔnla ne noko adɛnlɛdɛnla azua nee namunamu mɔɔ ɛha la azo.

²Na menli ne hanvole menli mɔɔ bɛdabɛ bɛ ahonle nu bɛyele bɛ nwo bɛmanle kɛ bɛmɛ bɛtɛnla Gyɛlusalɛm la.

³ Wɔ azua nee azuamgbole ne mɔ azo, Yizilayɛma, sɛlɛvolɛma, Livaema, Ɛzonlenlɛ Sua nu gyimayɛvoma, yɛɛ Sɔlɔmɔn sonvolɛma abo zo amra ne mɔ dɛnlanle bɛdabɛ bɛ azua nee bɛ azɛlɛ zo. Dwudama nee Bɛngyamanema bie mɔ dɛnlanle Gyɛlusalɛm.

⁴Dwuda abusua ekpunli nu amra: Ɛzaya ara Ataya, ɔle Zɛkalaya anlɔnra. Ye mgbanyima ne bie mɔ a le Amalaya, Hyɛfataya yɛɛ Mahalali. Bɛle Dwuda ara nrenya Pilɛze abo zo amra.

⁵Bɛlɛke ara Meeyasaya, ɔle Kɔlehozi anlɔnra. Ye mgbanyima ne bie mɔ a le Hazaya, Adaya, Dwɔyalebe, yɛɛ Zɛkalaya. Dwuda ara nrenya Hyila abo zo amra ɔ.

⁶Pilɛze abo zo amra ne nuhua ɛya nna abulasia nee mɔtwɛ mɔɔ lɛ gyinlabelɛ kpalɛ la dɛnlanle Gyɛlusalɛm.

⁷Bɛngyaman abusua ekpunli nu amra: Mɛhyɛlam ara Salu, ɔle Dwowabe anlɔnra. Ye mgbanyima ne bie mɔ a le Pɛdaya, Kɔlaya, Meeyasaya, Yeteɛle yɛɛ Gyɛhyaya.

⁸Gabeeyae nee Saleeyae le Salu anwo amra fɔɔnwo. Bɛngyaman abo zo amra mɔɔ dɛnlanle Gyɛlusalɛm la le ɛya ngɔnla abulanwiɔ nee mɔtwɛ.

⁹Zekelae ara Dwowɛle a le bɛ kpanyinli a, yɛɛ Dwuda mɔɔ le Hasɛnua ara nrenya ne la le suakpole ne azo neavolɛ mɔɔ tɔ zolɛ nwiɔ.

¹⁰Sɛlɛvolɛma: Dwɔyalebe ara Gyɛdaya nee Gyeeken.

¹¹Helekaya ara Sɛlaya, ɔle Mɛhyɛlam anlɔnra. Ye mgbanyima ne bie mɔ a le Zeedɔko, Mɛlayo yɛɛ Ahaetɛbe mɔɔ le Sɛlɛvolɛ Kpanyinli ne.

¹²Abusua ɛhye anu amra mɔɔ yɛle Ɛzonlenlɛ Sua ne anu gyima la amuala le ɛya mɔtwɛ abulanwiɔ nee nwiɔ. Gyɛloham ara Adaya, ɔle Pɛlalaya alɔnra. Adaya mgbanyima ne bie mɔ a le Amezae, Zɛkalaya, Pahyɔ yɛɛ Malekaya.

¹³Ɛfa bɛ kɔsɔɔti ɛbɔ nuhua a, menli ɛya nwiɔ nee nwiɔ a wɔ nu mɔɔ le bɛ mbusua mgbanyinli a. Azali ara Amahyesae, ɔle Aheezae anlɔnra. Ye mgbanyima ne bie mɔ a le Mɛhyɛlɛmo nee Yemɛ.

¹⁴Abusua ɛhye anu menli ɛya ko abulanwiɔ nee mɔtwɛ le ɛlɔnema titile. Bɛ kpanyinli a le Zabedeɛle mɔɔ vi abusua titile nu la.[3]

¹⁵Livaema: Hahyɛbe ara Hyɛmaya, ɔle Azelaekam anlɔnra. Ye mgbanyima ne bie mɔ a le Hahyabaya nee Bɛnae.

¹⁶Hyabɛtae nee Dwozabade le Livaema titile. Bɛmɛ a bɛnea gyima mɔɔ bɛyɛ ye wɔ Ɛzonlenlɛ Sua ne anwo la azo a.

¹⁷Maeka ara Matanaya, ɔle Zabedae anlɔnra yɛɛ ɔle Esafe abo zo sonla. Yemɔ yɛɛ ɔlumuale ɔgyinlanle Ɛzonlenlɛ Sua nu edwɛndolɛma ati ɔmanle bɛdole moyɛlɛ nzɛlɛlɛ edwɛne ne a. Bakebukaya a ɛnee le Matanaya boavolɛ a. Hyamua ara Abeda, ɔle Geelale anlɔnra yɛɛ Gyɛdutɛn abo zo sonla ɔ.

¹⁸Ɛka bɛ kɔsɔɔti ɛbɔ nuhua a ɛnee Livaema mɔɔ dɛnlanle Gyɛlusalɛm suakpole nwuanzanwuanza ne azo la le ɛya nwiɔ abulatwɛ nee nna.

¹⁹Ɛzonlenlɛ Sua ne sinzavolɛma: Akɛbe, Talemɔn nee bɛ nwo amra kɔsɔɔti le ɛya ko abulasuu nee nwiɔ.

²⁰Yizilayɛma, sɛlɛvolɛma, yɛɛ Livaema mɔɔ hale la dɛnlanle bɛdabɛ bɛ azua nee bɛ azuamgbole zo wɔ Dwuda maanle nu.

²¹Ɛzonlenlɛ Sua ne gyimayɛvoma ne dɛnlanle Gyɛlusalɛm awɔdenle ne mɔɔ bɛfɛlɛ ye Ofɛle la azo. Zaeha nee Gehyepa a nleanle bɛ nwo zo a.

²²Sonla mɔɔ nleanle Livaema mɔɔ dɛnlanle Gyɛlusalɛm la anwo zo la a le Beenae ara Ɛzae, ɔle Hahyabaya anlɔnra. Ye mgbanyima ne bie mɔ a le Matanaya nee Maeka. Ɔbɔ Esafe abusua ekpulike ne bie; bɛmɛ a Ɛzonlenlɛ Sua ne anu edwɛndolɛ nwo ngyehyɛlɛ wɔ bɛ sa nu a.

²³Ɔluakɛ belemgbunli yɛle ngyehyɛlɛ mɔɔ kile kɛ mbusua ekpulike ne mɔ ɛrado edwɛne bɛ ti bɛ ti ɛboa ɛzonlenlɛ. Mekɛ biala mɔɔ bɛyɛ nzɛlɛlɛ la ɔwɔ kɛ abusua ekpulike ko bato edwɛne boa.

²⁴Pɛtahaya, Mɛhyɛzabɛle ara ne mɔɔ vi Zila abusua ekpulike nu na ɔbɔ Dwuda abusua ekpunli ne bie la a gyinlanle Yizilayɛma agyakɛ anu wɔ Pɛhyea Maanle Maanle Belemgbunli ne suakunlu ɛkɛ a.

²⁵Menli ne mɔ dɔɔnwo dɛnlanle ɛleka mɔɔ bɛ egyinli wɔ la. Bɛdabɛ mɔɔ bɛvi Dwuda abusua nu la dɛnlanle Keleate Aaba, Daebɔn, yɛɛ Gyɛkabezile nee namunamu mɔɔ zuozua bɛ la azo.

²⁶Eza bie mɔ dɛnlanle azuamgbole Gyɛhyua, Moleeda, Bɛtepilɛte,

²⁷yɛɛ Heezahyuale nee Biyɛhyiba nee namunamu mɔɔ zuozua bɛ la azo.

²⁸Bie mɔ dɛnlanle suakpole Zekelage, mɔɔ wɔ Mɛkona nee namunamu mɔɔ zuozua ye la azo.

²⁹Bie mɔ eza dɛnlanle Ɛnlemɔn, Zola, yɛɛ Gyaamutu,

³⁰Zanowa, Adɛlam nee namunamu mɔɔ zuozua bɛ la azo. Akee bie mɔ noko dɛnlanle Leekehye nee bɛ egyinli ne mɔ mɔɔ zuozua ye la anu, yɛɛ Azika nee ye namunamu ne mɔ anu. Ɛhye kile kɛ Dwudama dɛnlanle azɛlɛ ne mɔɔ la Biyɛhyiba, wɔ nyiakɛ afoa nu nee Henɔm Bɔnza, wɔ sɔlɔ afoa nu avinli la azo.

³¹Bɛngyaman abusua ekpunli ne anu amra dɛnlanle Giba, Mekemahye, Eyae, Bɛtɛle nee namunamu mɔɔ zuozua bɛ la azo;

³²Anato, Nɔbo, Ananaya,

³³Heezɔ, Releema, Geteeyem,

³⁴Heedede, Zɛboyem, Nɛbalate,

³⁵Lɔɔdo, yɛɛ Ono nee Dwinvolɛma Bɔnza ne anu.

³⁶Bɛmanle Livaema ekpunli ekpunli bie mɔɔ anrɛɛ de Dwuda maanle nu la nee Bɛngyaman asa azo ne bie mɔ dɛnlanle.