Read Nzema Nih 13 Bible Online

Nih 13 - Nzema bible

Nih 13

¹ Kenle ko ne mɔɔ bɛlɛkenga Mosisi Mɛla ne bɛahile menli ne la, bɛradwule kpɔkɛ bie mɔɔ se ɔnle kɛ bɛmaa Amɔnonli anzɛɛ Mowabenli biala adenle bɛmaa ɔboka Nyamenle menli ne anwo la,

² ɔboalekɛ mekɛ mɔɔ Yizilayɛma vi Yigyibiti ɛlɛba la, Amɔnoma nee Mowabema ammaa bɛ aleɛ na yeayɛ nzule. Mɔɔ bɛyɛle la a le kɛ bɛduale ezukoa bɛmanle Beelam wale Yizilayɛma amonle, na Nyamenle manle amowa ne hakyile nyilalɛ.

³Mɔɔ Yizilayɛma dele Mɛla ɛhye la bɛhwenle bɛ nwo bɛvile menli mɔɔ ɛnle Dwuuma la anwo.

⁴Sɛlɛvolɛ Yilayahyebe mɔɔ ɛnee nea Ɛzonlenlɛ Sua ne ekpumgbunli ne mɔ mɔɔ bɛsie ninyɛne nuhua la azo la nee Tobaya vale ɛdulɛ la ɛhyɛ.

⁵Ɔlua zolɛ ɔmanle Tobaya adenle ɔmanle ɔdɛnlanle ekpumgbunli kpole ko anu. Zɔhane ekpumgbunli ne bɛfa aleɛ mɔɔ bɛfa bɛbɔ azu, ɛyɛlɛ, Ɛzonlenlɛ Sua ne anu ninyɛne, abɛlɛ ngyɛnu bulu ɛkpɔ ko ne, nwanye yɛɛ ɔlivi nwole mɔɔ bɛfa bɛmaa sɛlɛvolɛma la a bɛgua nu a.

⁶Mekɛ mɔɔ ɛhye mɔ ɛlɛkɔ zolɛ la, ɛnee menle Gyɛlusalɛm, ɔboalekɛ mɔɔ Atazɛzɛse[4] lile ɛvolɛ abulasa nee nwiɔ wɔ Babelɔn belemgbunli ebia ne azo la, ɛnee mehɔ mekadu me kolakola meahile ye. Mekɛ guale nu ekyii la menzɛlɛle ye adenle menziale membale Gyɛlusalɛm.

⁷Na ɛkɛ ne yɛɛ menwunle munzule ɛbɛla mɔɔ Tobaya ati, Yilayahyebe ɛbɔ la, kɛ yeziezie Nyamenle Sua ne anu ekpumgbunli ko anu yemaa ye.

⁸Me ahonle futule kpole na menvuandinle Tobaya ninyɛne ne mɔ kɔsɔɔti menguale.

⁹Akee memanle bɛnluanle sua ne anu na bɛvale Ɛzonlenlɛ Sua ne anu ninyɛne ne mɔ, mɔɔ le ahyɛnze, ma azubɔdeɛ, nee ɛyɛlɛ mɔ la bɛrale nuhua.

¹⁰ Eza menwunle kɛ bɛnva aleɛ mɔɔ ɔwɔ kɛ Livaema asa ka ye la bɛmmaa bɛ. Ɔlua zolɛ Livaema nee edwɛndolɛma bie mɔ mɔɔ yɛ gyima ne la ɛzia ɛhɔ bɛ ɛya avule ne mɔ anu.

¹¹Yemɔti mendwile mgbanyima ne mɔ anyunlu kɛ bɛmaa Ɛzonlenlɛ Sua ne ɛdɔ mgbane a. Akee memboɔboale Livaema ne nee edwɛndolɛma ne anloa na me nee bɛ rale Ɛzonlenlɛ Sua ne anu kɛ bɛrayɛ bɛ gyima ne.

¹² Na menli ne kɔsɔɔti bɔle ɔ bo bieko na bɛvale bɛ abɛlɛ, nwanye nee ɔlivi nwole bɛrale Ɛzonlenlɛ Sua ne ninyɛnezielɛ ɛleka ne.

¹³Na menyele menli ɛhye mɔ kɛ bɛnlea zolɛ; Sɛlɛvolɛ Hyɛlimaya, Mɛla Kilehilevolɛ Zeedɔko yɛɛ Pɛdaya mɔɔ le Livaema ne mɔ ko la. Menyɛle Zakɛ ara nrenya Heenan, mɔɔ le Matanaya anlɔnra ne kɛ ɔyɛ bɛ boavolɛ. Ɔluakɛ bɛdi nɔhalɛ yɛɛ medie bɛ medi kɛ bɛbahyɛ ninyɛne ne mɔ sɛsɛ bɛamaa mediema ne mɔ.

¹⁴O me Nyamenle, kakye me wɔ ninyɛne ɛhye mɔ kɔsɔɔti mɔɔ meyɛ memaa wɔ Ɛzonlenlɛ Sua ye nee nuhua ɛzonlenlɛ la ati.

¹⁵ Mekɛ ne anu menwunle Dwudama bie mɔ kɛ bɛlɛyɛ nwanye wɔ Ɛnwomenlelielɛ Kenle ne. Bie mɔ noko ɛlɛsoa abɛlɛ, nwanye, vanye ma, feege, yɛɛ ninyɛne ngakyile akyekye bɛ wɔ bɛ asoaso ne mɔ anzi bɛ nee bɛ ahɔ Gyɛlusalɛm, na membɔle bɛ kɔkɔ ɛsesebɛ kɛ bɛmmatɔne debie biala wɔ Ɛnwomenlelielɛ Kenle ne.

¹⁶Menli bie mɔɔ vi Taya mɔɔ bɛwɔ suakpole ne azo la vale fɛlɛ nee ninyɛne ngakyile dɔɔnwo radɔnenle bɛ wɔ Ɛnwomenlelielɛ kenle ne manle Dwudama nee Gyɛlusalɛmma.

¹⁷Na mendwile mgbanyima ne mɔ anyunlu kɛ, “Duzu munzule ɛbɛla yɛɛ bɛlɛbɔ la? Bɛlɛto Ɛnwomenlelielɛ Kenle ne mɛla ne.

¹⁸Bɛ mgbanyima yɛle ɛhye mɔ la, yɛ Nyamenle ne ɛmaa bɛzɛkye suakpole ye ɛmaa bɛ munzule ɛbɔ bɛ ti. Noko bɛtɛgua zolɛ bɛtɛyɛ, bɛlɛto Ɛnwomenlelielɛ Kenle ne mɛla ne, bɛyɛ bɛahwe ndeanlɛ bɛagua Yizilayɛma ati zo.”

¹⁹Yemɔti menlile mɛla kɛ nɔsolɛ biala mɔɔ le Ɛnwomenlelielɛ Kenle ne abobɔlɛ[5] la, bɛmmatukuedukue Gyɛlusalɛm nlenkɛ mgbole ne mɔ kɔkpula kɛ Ɛnwomenlelielɛ Kenle ne kɛpɛ nu la. Eza memanle me sonvolɛma ne bie mɔ zinzale nlenkɛ mgbole ne mɔ, amaa bɛanva ninyɛne adɔne bɛamba suakpole ne azo Ɛnwomenlelielɛ Kenle ne.

²⁰Akee gualilɛma ne hale Gyɛlusalɛm bane ne anzi lale fane kɛyɛ nwiɔ.

²¹Membɔle bɛ kɔkɔ menzele bɛ kɛ, “Duzu ati yɛɛ bɛda bane ne anzi a? Saa bɛyɛ zɔhane bieko a, mebahwi bɛ ɛza.” Na ɔvi mekɛ zɔhane mɔɔ kɔ la, bɛamba gualilɛ wɔ Ɛnwomenlelielɛ Kenle ne bieko.

²²Na menzele Livaema ne kɛ bɛdu bɛ nwo bɛmaa na bɛrazinza nlenkɛ mgbole ne mɔ bɛmaa bɛzie Ɛnwomenlelielɛ Kenle ne nwuanzanwuanza. O me Nyamenle, kakye me wɔ ɛhye noko ati na die me, kɛmɔ wɔ ɛhulolɛ kpole ne mɔɔ ɛmbɔ aze ɛlɛ la de la.

²³ Mekɛ ko ne ala anu, menwunle kɛ Dwuuma bie mɔ ɛgyigya Ahyedɔdo, Amɔn yɛɛ Mowabe mraalɛ,

²⁴na bɛ mra ne mɔ anu foa ko ka Ahyedɔdo aneɛ ne bie nee aneɛ gyɛne bie mɔ, na bɛngola Dwuda aneɛ ne ka.

²⁵Mendwile bɛ nyunlu na menwale bɛ amonle. Membole bɛ nuhua bie mɔ na mendwewhenle bie mɔ ati enrinli mendudule ye. Memanle bɛhanle ndane kɛ kenle bie maanle nu, “Bɛnrɛva bɛ mra mraalɛ bɛnrɛmaa menli zɔhane mɔ amra mrenya agyalɛ, anzɛɛ bɛnrɛmaa bɛ mra mrenya ɛnrɛgya bɛ mra mraalɛ, yɛɛ bɛdabɛ mumua ne bɛnrɛgya menli zɔhane mɔ bie ɛlɛ.”

²⁶ Menzele bɛ kɛ, “Nyɛvolɛ mraalɛ ɛhye mɔ ati yɛɛ Belemgbunli Sɔlɔmɔn yɛle ɛtane a. Wɔ maanle maanle dɔɔnwo avinli, belemgbunli biala ɛnle ɛkɛ mɔɔ nee ye sɛ a. Ye Nyamenle ne hulole ye na ɔyɛle ye Yizilayɛ maanle ne kɔsɔɔti belemgbunli. Noko akee maanle maanle gyɛne nu mraalɛ ɛgyalɛ manle ɔdaye bɔbɔ ɔyɛle ɛtane.

²⁷Na mebiza bɛ kɛ, yemɔti yɛnlea bɛdabɛ bɛ ɛdeɛ ne mɔɔ bɛlɛyɛ la azo yɛyɛ bie na yɛde yɛ Nyamenle ne anwo atua, yɛgya nyɛvolɛ mraalɛ ɔ?”

²⁸Dwɔyada le Sɛlɛvolɛ Kpanyinli Yilayahyebe ara nrenya. Dwɔyada amra mrenya ne mɔ ko gya Sanebalate mɔɔ vi Bɛte Hɔlɔn la ara raalɛ, yemɔti mendule ye menvile Gyɛlusalɛm.

²⁹O me Nyamenle, kakye bɛ kɛ bɛgua sɛlɛvolɛlilɛ ne nee sɛlɛvolɛma nee Livaema ngyekyeleɛ ne anwo evinli a.

³⁰Akee menuanle menli ne wɔ nyɛleɛ biala mɔɔ ɛnle yɛ maamɛla la anwo, na mengyɛle sɛlɛvolɛma nee Livaema gyima ne memanle bɛ.

³¹Mengyehyɛle mekɛ mɔɔ ɔwɔ kɛ bɛfa bɛyela nyɛmoa bɛbɔ azu la, nee mekɛ mɔɔ ɔwɔ kɛ menli fa abɛlɛ mɔɔ bɛkɛlumua bɛkɛbu nee ma mɔɔ bɛkɛlumua bɛkɛde la ba la. O me Nyamenle, kakye ɛhye mɔ kɔsɔɔti na yila me.