Read Nzema Nih 2 Bible Online

Nih 2 - Nzema bible

Nih 2

¹Wɔ siane Naesan (Siane Ɛnlanle) ne anu, wɔ Belemgbunli Atazɛzɛse ye ɛvolɛ abulanwiɔ ne azo, mekɛ mɔɔ ɛnee ɔlɛkpula ɔ sa la, menvale nwanye mengɔmanle ye. Ɛnee kenle ko bɔbɔ ɔtɛnwunle me kɛ melɛdi nyane ɛlɛ.

²Yemɔti ɔbizale me kɛ, “Ɛ nwo ɛtɛtole wɔ, ɛte kpɔkɛ, na duzu ati yɛɛ ɛ nyunlu ɛyɛ alɔbɔlɛ alɔbɔlɛ zɛhae a? Tɛ ɛhwee ɔ, ɛlɛdi nyane kpole kpalɛ wɔ wɔ ahonle nu.” Ɛzulolɛ hanle me kpole

³ na membuale belemgbunli ne kɛ, “Ɛdɛnkɛma ɛmaa belemgbunli ɛnyi ɛhyɛ. Me nwo ɛyɛ alɔbɔlɛ, ɔluakɛ suakpole ne mɔɔ le nenya mɔ sɛfonle la ɛdɔ mgbane; na ye nlenkɛ mgbole ne mɔ ɛyela.”

⁴Na belemgbunli ne bizale me kɛ, “Duzu a menyɛ memaa wɔ a?” Menzɛlɛle anwuma anwuma Nyamenle ne

⁵na menganle mengilele belemgbunli ne kɛ, “Saa medame, wɔ sonvolɛ anyunlu ɛra anyia wɔ ɛ nyunlu, na eza saa ɔyɛ belemgbunli ɛhulolɛ a, ɛnee soa me wɔ Dwuda, wɔ suakpole ne mɔɔ le nenya mɔ sɛfonle zo la azo, amaa meahɔkyekye suakpole ne bieko.”

⁶Na belemgbunli ne zele me kɛ (ɛnee belemgbunli raalɛ ne de ɔ nwo ɛkɛ ne), “Ɛkɔ a ɛbali kenle nyɛ, yɛɛ kenlenzu fɔɔnwo yɛɛ ɛbazia wɔara a?” Na menwunle kɛ ɔyɛ belemgbunli ahunlundwolɛ kɛ ɔkɛmaa menwɔhɔ; yemɔti mengilele ye mekɛ.

⁷Na menzɛlɛle belemgbunli ne kɛ, “Saa ɔyɛ belemgbunli ahunlundwolɛ a, ɛnee maa bɛhɛlɛ ngɛlata bɛmaa mengɔmaa amɛnladoma mɔɔ sie maanzinli ne mɔ mɔɔ gua Azule Yufileti adɔleɛ la, amaa bɛamaa me adenle bɛamaa meapɛ nuhua bɛ maanzinli ne mɔ anu meahɔ Dwuda.

⁸Eza maa bɛhɛlɛ kɛlata bɛhɔmaa Esafe mɔɔ sinza belemgbunli kpɔkɛmile ne la, amaa yeamaa me mbaka na meakpakyekpakye meayɛ mgbunla meaduodua aranemgbole ne mɔɔ zua Ɛzonlenlɛ Sua ne la nlenkɛ mgbole ne, bane ne nlenkɛ mgbole ne, yɛɛ sua ne mɔɔ mebadɛnla nuhua la nlenkɛ mgbole ne mɔ.” Belemgbunli ne yɛle mɔɔ membizale ye biala la manle me, ɔluakɛ ɛnee me Nyamenle ne nee me lua.

⁹Belemgbunli yele safohyenle mgbanyinli nee menli ekpunli mɔɔ ka mgbɔnwɔ la manle bɛ nee me hɔle. Membale amɛnladoma mɔɔ sie maanzinli ne mɔ mɔɔ gua Azule Yufileti adɔleɛ la ɛkɛ. Menvale belemgbunli ngɛlata ne mɔ memanle bɛ.

¹⁰Na mɔɔ Sanebalate mɔɔ vi Bɛte Hɔlɔn, nee Tobaya, mɔɔ le belemgbunli mbɔlɔba ne mɔ ko, mɔɔ vi Amɔn maanzinli nu la dele kɛ awie ɛra Yizilayɛma boɛyɛlɛ ti la, bɛvale ɛya kpole.

¹¹Yemɔti membale Gyɛlusalɛm membanlile kenle nsa.

¹²Mendwazole nɔe ne na menvale menli ekyi bie menlile me nzi menvindele. Deɛ holɛ ko mɔɔ Nyamenle ɛva ɛwula me kɛ menyɛ memaa Gyɛlusalɛm la, meanga meangile bɛ. Yɛanva ayɛmoa biala yɛangɔ kɛ ayɛmoa ne mɔɔ mendɛnlanle zolɛ la ala.

¹³Menvindele nɔe ne la, menvale Bɔnza Anlenkɛ Kpole ne anu mengɔle Nane anwo ɛzulolɛ ne mɔɔ le kɛ Ɛlɛnrɛne la Nzufeanvea ne anwo na mengɔle Ewula Anlankɛ Kpole ne anloa. Meneɛnleanle Gyɛlusalɛm bane ne mɔ mɔɔ bɛbubu bɛ la nee nlenkɛ mgbole ne mɔ mɔɔ bɛyela bɛ la.

¹⁴Akee mentelele zolɛ mengɔle Nzufeanvea Anlenkɛ Kpole ne anloa na mengɔle Belemgbunli Nzubula ne anwo; na ɛnee akee adenle biala ɛnla ɛkɛ mɔɔ ayɛmoa ne mɔɔ mede zolɛ la dua nu a ɔyɛ boɛ a.

¹⁵Akee menluale bɔnza ne anloa nɔe ne na meneanle bane ne, na menvale Bɔnza Anlenkɛ Kpole ne anloa menziale me nzi.

¹⁶Sua ne azo mgbanyima ne annwu ɛleka mɔɔ mengɔle nee deɛ mɔɔ mengɔnyɛle la, yɛɛ ɛnee eza metɛkanle deɛ mɔɔ yemɔti membale la metɛkilele Dwuuma ne, sɛlɛvolɛma, menli mɔɔ di munli, mgbanyima nee menli mɔɔ ɛha mɔɔ bayɛ gyima ne la.

¹⁷Na nzinlii akee menzele bɛ kɛ, “Bɛdabɛ bɛ nye dua ngyianlɛ mɔɔ yɛwɔ nuhua la. Gyɛlusalɛm ɛyɛ suadu; bɛyela ye nlenkɛ mgbole ne mɔ kɔsɔɔti. Bɛrɛla bɛmaa yɛyɛ Gyɛlusalɛm bane ne mɔ boɛ na yɛye yɛ nwo yɛvi nyiane kpole ɛhye anu.”

¹⁸Menganle mengilele bɛ kɛ me Nyamenle ne li me nzi na menganle edwɛkɛ mɔɔ belemgbunli ne hanle hilele me la mengilele bɛ. Na bɛzele me kɛ, “Bɛmaa yɛdwazo yɛyɛ bane ne mɔ boɛ.” Na bɛboɔboale bɛ nwo kɛ bɛbɔ gyima ne abo.

¹⁹Mɔɔ Sanebalate mɔɔ vi Hɔlɔn, Amɔnonli Tobaya mɔɔ le sonvolɛ nee Arelabenli bie mɔɔ bɛfɛlɛ ye Gihyɛm la dele gyima mɔɔ yɛhyehyɛ kɛ yɛyɛ la, bɛgolole yɛ nwo, bɛzile yɛ amgbu na bɛzele kɛ, “Duzu debie a bɛlɛyɛ a? Ɛnee bɛlɛte belemgbunli ne anwo atua ɔ?”

²⁰Membuale bɛ kɛ, “Anwuma Nyamenle ne bakpogya yɛ sa zo amaa yɛ, ye sonvolɛma, yɛdwazo yɛayɛ bane ne mɔ boɛ. Na bɛmɛ, ɔnyɛ bɛ edwɛkɛ; bɛnlɛ agyadeɛ anzɛɛ sɛfonle biala wɔ Gyɛlusalɛm ɛke.”