Read Nzema Nih 3 Bible Online

Nih 3 - Nzema bible

Nih 3

¹Adenle mɔɔ bɛluale nu bɛliele Gyɛlusalɛm bane ne mɔ la ɛne: Sɛlɛvolɛ Kpanyinli Yilayahyebe nee ɔ mediema sɛlɛvolɛma ne mɔ zile Mboane Anlenkɛ Kpole ne. Bɛvale ɛbonle ne mɔ bɛduoduale bɛ, na bɛdule bɛwulale Nyamenle asa anu. Bɛyɛle ye zɔhane toonwo bɛrale Tawa Ɛya ne anwo na bɛdwule Hananile Tawa ne anwo noko.

²Gyɛleko amra yɛle bane ne mɔɔ zɔ zolɛ la boɛ. Yemelae ara Zakɛ yɛle mɔɔ doa ye la boɛ.

³Hasɛnaya sua nu amra zile Fɛlɛ Anlenkɛ Kpole ne. Bɛzile felɛmo ne, bɛduale anlenkɛ ne kɔlɔkɔlɔ, na bɛvale mbulalɛ bɛguale ɔ nzi.

⁴Yulaya ara Mɛlɛmo, mɔɔ le Hakɔzo anlɔnra ne yɛle mɔɔ doa ye la boɛ. Bɛlikaya ara Mɛhyɛlam, mɔɔ le Mɛhyɛzabili anlɔnra ne yɛle mɔɔ doa ye la boɛ. Beeyana ara Zeedɔko yɛle mɔɔ doa ye la boɛ.

⁵Tɛkowa sua nu amra yɛle mɔɔ zɔ zolɛ la boɛ, noko Tɛkowa ezuavolɛ mgbanyima ne anva bɛ sa anga gyima ne mɔɔ bɛ menle mɔ vale wulale bɛ sa nu la.

⁶Pasia ara Gyɛhɔyada nee Bisodaya ara Mɛhyɛlam a yɛle Gyɛhyana Anlenkɛ Kpole ne boɛ a. Bɛzile felɛmo ne, bɛduale ye ɛbonle, bɛvale kɔlɔkɔlɔ bɛduale ye, na bɛvale mbulalɛ bɛguale ɔ nzi.

⁷Mɛlataya mɔɔ vi Gebɛyɔn, Gyeedɔn mɔɔ vi Mɛlono, yɛɛ Gebɛyɔnoma nee Mezepama mɔɔ wɔ amɛnlado ne mɔɔ sie maanle ne mɔɔ wɔ Azule Yufileti anzi nehane la abo la, yɛle bane ne mɔɔ zɔ zolɛ la boɛ.

⁸Haahaya ara nrenya sukoadwinli ne mɔɔ bɛfɛlɛ ye Ɛzeɛle la, yɛle mɔɔ zɔ zolɛ la boɛ. Hananaya, mɔɔ yɛ anatele nee sakyeɛ evuanlɛ gyima la, yɛle mɔɔ zɔ zolɛ la boɛ toonwo ɔhɔdwule Bane Tɛtɛlɛ ne anwo.

⁹Huule ara Relɛfaya, mɔɔ sie Gyɛlusalɛm maanzinli ne foa ko la, yɛle mɔɔ zɔ zolɛ la boɛ.

¹⁰Halumafe ara Gyɛdaya, yɛle mɔɔ nee ye sua ne anye bɔ zolɛ la boɛ. Hahyabeenaya ara Hatɛhye, yɛle mɔɔ zua Gyɛdaya ɛdeɛ ne la boɛ.

¹¹Hɛlem ara Malekaegya nee Hahyɛbe, mɔɔ le Peehate Mowabe ara nrenya ne, yɛle mɔɔ zɔ zolɛ la boɛ na bɛzile Fonlomo Tawa ne.

¹²Halohɛhye ara Hyalɛm, mɔɔ sie Gyɛlusalɛm maanzinli ne foa ko la nee ɔ mra mraalɛ yɛle mɔɔ zɔ zolɛ la boɛ.

¹³Heenɛn nee suakpole Zanowa ezuavolɛ ne yɛle Bɔnza Anlenkɛ Kpole ne boɛ. Bɛliele bane ne mita ɛya nna abulanla bɛhɔdwule Ewula Anlenkɛ Kpole ne anwo. Bɛduoduale nlenkɛ ne mɔ ɛbonle nee kɔlɔkɔlɔ na bɛvale mbulalɛ bɛguale bɛ nzi.

¹⁴Malekaegya mɔɔ ɔ ze a le Rilikabe, na ɔsie Bɛte Hakɛlɛm Maanzinli ne la, yɛle Ewula Anlenkɛ Kpole ne boɛ. Ɔzile ye fofolɛ, ɔduale anlenkɛ ne ɛbonle nee kɔlɔkɔlɔ na ɔvale mbulalɛ ɔguale ɔ nzi.

¹⁵Kɔlehozi ara Hyalɛm, mɔɔ sie Mezepa Maanzinli ne la, yɛle Nzufeanvea Anlenkɛ Kpole ne boɛ. Ɔbobɔle ɛbonle fofolɛ ɔduale ye, ɔduale ye kɔlɔkɔlɔ, na ɔvale mbulalɛ ɔguale ɔ nzi. Akee ɔyɛle bane ne mɔɔ vi Hyila Nzubula ne mɔɔ zua belemgbunli ne tola ne la boɛ, toonwo ɔhɔkpulale kpolike ne mɔɔ tolo kɔ Devidi suakpole ne azo la.

¹⁶Mɔɔ doa ye ɛdeɛ ne la, Azebɛke ara Nihɛmaya, mɔɔ sie Bɛtezɛ Maanzinli ne foa ko la, yɛle bane ne boɛ, toonwo ɔhɔkpulale ɛleka mɔɔ nee Devidi sɛka ne anye bɔ zolɛ, wɔ nzubula ne nee ɛlɔnema azua ne mɔ anwo la.

¹⁷Livaema mɔɔ yɛle bane ne mɔ dɔɔnwo boɛ zɔle zolɛ la ɛne: Rilihɛm mɔɔ le Beenae ara ne yɛle bane ne mɔɔ zɔ zolɛ la boɛ. Hahyabaya, mɔɔ sie Kiyaela Maanzinli ne foa ko la, gyinlanle ye menli ne agyakɛ anu yɛle mɔɔ zɔ zolɛ la boɛ.

¹⁸Hɛneedade ara Beeveeyae, mɔɔ sie Kiyaela maanzinli ne foa ko la, yɛle mɔɔ zɔ zolɛ la boɛ.

¹⁹Gyɛhyua ara Yizɛ, mɔɔ sie Mezepa la, eza yɛle mɔɔ doa ye la boɛ zɔle zolɛ, ɔvi aduzielɛ ɛleka ne, toonwo ɔhɔle bane ne muleɛ zo.

²⁰Bɛlɛke mɔɔ le Zabeeyae ara ne, yɛle bane ne mɔɔ doa ye la boɛ zɔle zolɛ hɔdwule Sɛlɛvolɛ Kpanyinli Yilayahyebe sua ne anuhɔlɛ.

²¹Yulaya ara Mɛlɛmo, mɔɔ le Heekɔzo anlɔnra la, yɛle bane ne mɔɔ doa ye la boɛ, ɔvi Yilayahyebe sua ne anuhɔlɛ ɔhɔdwule sua ne ati.

²²Sɛlɛvolɛma mɔɔ yɛle bane ne bie boɛ la a le ɛhye mɔ: Sɛlɛvolɛma mɔɔ zuozua Gyɛlusalɛm la yɛle bie zɔle zolɛ.

²³Bɛngyaman nee Hahyɛbe yɛle bane ne mɔɔ nee bɛ sua ne anye bɔ zolɛ la boɛ zɔle zolɛ. Meeyasaya ara Azalaya, mɔɔ le Ananaya anlɔnra ne, ɔdaye ɔyɛle mɔɔ wɔ ye sua ne anyunlu la boɛ zɔle zolɛ.

²⁴Hɛneedade ara Benuwae yɛle bane ne mɔɔ vi Azalaya sua ne anwo kɔdwu bane ne muleɛ zo la boɛ zɔle zolɛ.

²⁵Peelale mɔɔ ɔ ze a le Yuzae la yɛle bane ne bie boɛ zɔle zolɛ vi ye muleɛ zo. Bane ne muleɛ zo nee belemgbunli suakunlu ɛkɛ ne tawa ne anye bɔ zolɛ. Tawa ne zua sinzavolɛma sua ne.

²⁶Pɛlɔhye ara Pɛdaya yɛle bane ne bie boɛ zɔle zolɛ, wɔ aduduleɛ afoa nu mɔɔ bikye Nzule Anlenkɛ Kpole ne nee tawa ne mɔɔ bɛgyinla zolɛ bɛsinza Ɛzonlenlɛ Sua ne la. (Ɛhye bikye suakpole ne awɔdenle ne mɔɔ bɛfɛlɛ ye Ofɛle la. Ɛke yɛɛ Ɛzonlenlɛ Sua ne sonvolɛma ne de a.)

²⁷Tɛkowama eza yɛle bane ne ɛleka mɔɔ nee tawa kpole ne mɔɔ gyi Ɛzonlenlɛ Sua ne azo la anye bɔ zolɛ la boɛ, toonwo bɛhɔdwule Ofɛle bane ne anwo.

²⁸Sɛlɛvolɛma bie yɛle bane ne bie boɛ zɔle zolɛ; bɛvale ye Ɛkpɔnwɔ Anlenkɛ Kpole ne anwo bɛhɔle ye anwuma. Awie biala yɛle ye sua nyunlu bane ɛdeɛ ne boɛ.

²⁹Yemɛ ara Zeedɔko noko yɛle mɔɔ nee ye sua ne anye bɔ zolɛ la boɛ zɔle zolɛ.

³⁰Hyɛlimaya ara Hananaya nee Zeelafe awoba nsia ne mɔɔ bɛfɛlɛ ye Heenɛn la, yɛle bane ne mɔɔ doa ye la boɛ; bɛ fane nwiɔ mɔɔ bɛyɛ bane ne bie boɛ la ɛne. Bɛlikaya ara Mɛhyɛlam yɛle bane ne mɔɔ wɔ ye sua ne anyunlu la boɛ.

³¹Sukoadwinli Malekaya yɛle bie zɔle zolɛ hɔdwule sua ne mɔɔ Ɛzonlenlɛ Sua sonvolɛma nee gualilɛma ne mɔ wɔ nu, mɔɔ nee Mefekade[1] Anlenkɛ Kpole ne anye bɔ zolɛ, na ɔzua ekpumgbunli ne mɔɔ wɔ bane ne aduduleɛ sɔlɔ muleɛ ne azo anwuma la anwo.

³²Sukoadwinlima nee gualilɛma yɛle mɔɔ li awieleɛ bɔkɔɔ la boɛ, ɔvi ekpumgbunli ne mɔɔ wɔ muleɛ ne azo anwuma la anwo bɛhɔzɔle Mboane Anlenkɛ Kpole ne.