Read Nzema Nih 4 Bible Online

Nih 4 - Nzema bible

Nih 4

¹Mɔɔ Sanebalate dele kɛ yɛlɛyɛ bane ne boɛ la, ɔvale ɛya kpole na ɔbɔle ɔ bo kɛ ɔgolo Dwuuma anwo.

²Wɔ ɔ gɔnwo mɔ nee Samɛlea ɛlɔnema anyunlu, ɔzele kɛ, “Duzu a Dwuuma anwo anwunvɔne ɛhye mɔ ɛlɛyɛ a? Na bɛdwenle kɛ bɛkɛhola bɛkɛva kenle ko bɛkɛwie gyima ne yɛ ɔ? Anzɛɛ bɛdwenle kɛ awolɛ ɛhye mɔ mɔɔ ɛyelɛyela ɛyɛ ewula la bɛkɛhola bɛkɛhakyi bɛ awolɛ mɔɔ bɛfa bɛsi sua a ɔyɛ boɛ ɔ?”

³Ɛnee Amɔnonli Tobaya gyi ɔ nwo ɛkɛ. Na ɔdaye noko ɔdole zolɛ kɛ, “Duzu bane bɔbɔ yɛɛ bɛdabɛ bɛkɛhola bɛkɛlie a? Ɛzonlɛ bɔbɔ anwo ka ye mgbane a ɔbabubu yeagua.”

⁴Menzɛlɛle kɛ, “O yɛ Nyamenle, tie kɛ bɛlɛsi yɛ amgbu bie a! Maa bɛ amgbuzilɛ ne ɛbɔ bɛ ti. Debie biala mɔɔ bɛlɛ la, maa bɛyɛ afedeɛ, na maa bɛhye bɛ ɛkpolekɛ zo bɛ nee bɛ ɛhɔ maanle gyɛne nu.

⁵Mmafea bɛ ɛtane ne mɔ azo, yɛɛ mmafa bɛ ɛtane ne mɔ ɛkyɛ bɛ, ɔluakɛ bɛfutu wɔ ahonle wɔ banelielɛma ye anyunlu.”

⁶Yemɔti yɛyɛle bane ne kɔsɔɔti boɛ. Ye anwumahɔlɛ ne noko dwule ye avinli. Ɔluakɛ menli ne anye kpotale gyima ne anwo.

⁷Mɔɔ Sanebalate nee Tobaya nee Arelebiama nee Amɔnoma nee Ahyedɔdoma dele kɛ Gyɛlusalɛm bane ne boɛyɛlɛ ne ɛlɛkɔ zolɛ kpalɛ na ɛleka ne mɔ mɔɔ gologolole la kɔsɔɔti ɛlɛtɔ nuhua la, bɛvale ɛya kpole,

⁸na bɛ kɔsɔɔti bɛkpamonle kɛ bɛba bɛaradoa Gyɛlusalɛmma bɛ nee bɛ aho na bɛava basabasayɛlɛ bɛara suakpole ne azo.

⁹Yɛzɛlɛle yɛ Nyamenle ne na yɛyele sinzavolɛma yɛmanle bɛzinzale sua ne nɔɔzo nee ewiazo.

¹⁰Dwudama lɛ edwɛne bie mɔɔ bɛto a bɛse, “Yɛ ɛnwomenle ɛwie, yɛyɛ gyima yɛvɛ, Ewula ne tɛso kpalɛ; Yɛangola bane ne die ala ɛne.”

¹¹Yɛ kpɔvolɛma ne zele kɛ, “Bɛnrɛde nganeɛ yɛɛ bɛnrɛnwu ye, Kɔkpula kɛ yɛkɛholo bɛ nwo zo, Yɛkɛhu bɛ na banelielɛ ne kɛpeme ɛkpa.”

¹²Dwuuma mɔɔ de bɛ avinli wɔ suakpole ne azo la radinle yɛ aze fane bulu kɛ, “Bɛvi ngameɛngameɛ a bɛbaradoa yɛ bɛ nee yɛ aho a.”

¹³Yemɔti memanle me menli ne konle ninyɛne: dadeɛ, atwɛ nee ɛda mɔ, na mengyɛle bɛ nuhua awuke awuke na memanle bɛhɔdɛle bane ne anzi ɛleka biala mɔɔ bane ne ɛtɛkɔle anwuma la.

¹⁴Na menwunle kɛ menli ne arɛle ɛbɔ. Yemɔti menzele mgbanyima ne mɔ nee mbɔlɔba mgbanyinli nee menli mɔɔ ɛha la kɛ, “Bɛmmasulo yɛ kpɔvolɛma ne mɔ. Bɛhakye kɛ Awulae a le bedevinli a; ɔ nwo yɛ ɛzulolɛ. Bɛho bɛmaa bɛ mediema, bɛ mra mrenya, bɛ mra mraalɛ, bɛ ye mɔ nee bɛ maanle.”

¹⁵Yɛ kpɔvolɛma ne dele kɛ yɛde bɛ adwenle ne mɔɔ bɛvale la anwo bie na Nyamenle ɛmaa bɛ kpɔkɛ mɔɔ bɛbɔle la ɛtulu. Akee yɛ kɔsɔɔti yɛziale yɛhɔzɔle yɛ gyima ne azo.

¹⁶Ɔvi mekɛ zɔhane menli mɔɔ nee me lua la hyɛle bɛ nwo nu nwiɔ; foa ko yɛle banelielɛ gyima ne yɛɛ foa ko noko yɛle sinzavolɛma bɛwulowulale konle mbulalɛ adɛladeɛ, bɛdedɛle atwɛ nee ɛda yɛɛ bɛ sa nu enyinlike. Mgbanyima ne mɔ bɛdabɛ bɛgyinlanle Dwudama

¹⁷mɔɔ ɛlɛyɛ bane ne boɛ la anzi kpundii. Bɛhyehyɛle ye mɔɔ menli mɔɔ ɛlɛyɛ gyima ne nee bɛdabɛ mɔɔ bɛlɛsoɔzoa nwolɛ ninyɛne la ko biala ɛzia ɔ nwo; mɔɔ ɔ sa ko ɛlɛyɛ gyima ne la ɛnee ko lɛ konle dadeɛ ne anu.

¹⁸Menli bɔbɔ mɔɔ ɛnee ɛlɛto bane ne la biala lɛ dadeɛ zia ye foa ko. Sonla ne mɔɔ bɔ aweɛne tendenle ne la gyi me foa ko.

¹⁹Menzele mgbanyima ne mɔ, mbɔlɔba ne mɔ nee menli mɔɔ ɛha la kɛ, “Gyima ne le kpole na ɔtɛlɛ, yɛɛ yɛ avinli tete.

²⁰Yemɔti ɛleka biala mɔɔ bɛkɛde aweɛne tendenle ne ane la, bɛ muala bɛhɔ ɛkɛ. Yɛ Nyamenle ne baho amaa yɛ.”

²¹Yemɔti bɛhɔle gyima ne azo, ɔvi aleɛbahye toonwo ɔkɔkpula aledwolɛ. Menli ne foa ko yɛle gyima ne yɛɛ foa ko zinzale.

²²Akee menzele menli ne kɛ, “Awie biala nee ye sonla ne mɔɔ boa ye la ɛla Gyɛlusalɛm, amaa nɔɔzo yɛazinza suakpole ne na alehyenlɛ nu yɛayɛ gyima ne.”

²³Yemɔti, medame o, anzɛɛ me gɔnwo mɔ o, me sonvolɛma o, anzɛɛ sinzavolɛma o, anzɛɛ sinzavolɛma mɔɔ li me nzi la o, yɛ nuhua biala anye ye tɛladeɛ ne ɛlɛ, yɛɛ yɛangua yɛ konle ninyɛne ne mɔ aze ɛlɛ; yɛ nzule bɔbɔ gyelegyela yɛ.