Read Nzema Nih 5 Bible Online

Nih 5 - Nzema bible

Nih 5

¹Nzinlii menli dɔɔnwo, mrenya nee mraalɛ, dendɛle tiale bɛ mediema Dwuuma.

²Ɔluakɛ bie mɔ zele kɛ, “Yɛ nee yɛ mra mrenya nee mraalɛ, yɛ nwo zonle somaa; bɛmaa yɛhɔkpondɛ aleɛ mɔɔ yɛdi yɛanyia ngoane la.”

³Bie mɔ noko zele kɛ, “Yɛva yɛ ɛya avule ne mɔ, yɛ vanye egyinli ne mɔ nee yɛ azua yɛwula awoba yɛlie abɛlɛ, amaa ɛhɔne ye mɔɔ ɛra la yɛanyia aleɛ yɛali.”

⁴Bie mɔ noko zele kɛ, “Yɛbizale bosea a yɛduale yɛ ɛya avule nee vanye egyinli ne mɔ anwo adwule yɛmanle belemgbunli a.

⁵Yɛdayɛ noko yɛlɛ nwonane kɛ yɛ mediema ne mɔ ala la, yɛɛ yɛ mra ne mɔ le kɛ bɛ mra ne mɔ ala la; noko yɛlɛkye yɛ mra mrenya nee mraalɛ ɛkpolekɛ zo yɛayɛ bɛ ahanra. Bɛ nuhua bie mɔ bɔbɔ ɛhɔ kanrazonlenlɛ nu dɛbadɛba yɛɛ yɛyɛ nwolɛ ɛhwee a ɔnyɛ boɛ, ɔluakɛ yɛ ɛya avule ne mɔ nee yɛ vanye egyinli ne mɔ ɛpɛ ɛli awie mɔ asa anu.”

⁶Mɔɔ mendele bɛ edwɛkɛ ne la menvale ɛya kpole.

⁷ Mendwenlenle nwolɛ na mendeanle mgbanyima ne mɔ nee mbɔlɔba mgbanyinli ne mɔ wɔ nwolɛ. Menzele bɛ kɛ, “Bɛlɛdi bɛ mediema ne mɔ ndunlumi.” Menvɛlɛle maanle ayia na menzele bɛ kɛ,

⁸“Yɛmɛ mɔɔ yɛwɔ maanle zo la yɛlɛbɔ mɔdenle biala mɔɔ ɔkɛyɛ boɛ la, kɛ yɛkɛkpɔne yɛ mediema Dwuuma mɔɔ wɔ kanrazonlenlɛ nu la yɛ nee bɛ kɛra sua nu. Akee bɛmɛ mɔɔ bɛwɔ sua nu la bɛlɛmia bɛ mediema Dwuuma bɛamaa bɛadɔne bɛ nwo bɛamaa bɛ.” Na mgbanyima ne mɔ ko bɔbɔ andɛ ɔ nloa anu.

⁹Yemɔti menzele bɛ kɛ, “Nyɛleɛ mɔɔ bɛlɛyɛ la ɛnle kpalɛ. Ɔwɔ kɛ bɛsulo Nyamenle na bɛbɔ ɛbɛla mɔɔ le fɔɔnwo la, amaa bɛammaa yɛ kpɔvolɛma nee menli mɔɔ ɛnze Nyamenle la adenle bɛanzi yɛ amgbu.

¹⁰Me nee agɔnwolɛma nee me sonvolɛma yɛvɛne menli ne ezukoa nee abɛlɛ. Bɛmaa yɛva debie biala mɔɔ bɛtua yɛ la yɛhyɛ bɛ.

¹¹Ɛnɛ kenle ye, bɛva bɛ ɛya avule ne mɔ, bɛ vanye egyinli ne mɔ, bɛ ɔlivi ɛya ne mɔ, bɛ azua, ezukoa ngyɛnu ɛya ko ɛkpɔ ko ne, bɛ abɛlɛ, bɛ nwanye nee bɛ ɔlivi nwole mɔɔ bɛliele la kɔsɔɔti bɛmaa bɛ.”

¹²Na mgbanyima ne mɔ zele kɛ, “Yɛfa bɛ debie biala yɛamaa bɛ, yɛɛ yɛnrɛbiza bɛ ɛhwee. Yɛbayɛ ye kɛmɔ wɔha la.” Na menvɛlɛle sɛlɛvolɛma ne mɔ na memanle mgbanyima ne mɔ hanle ndane wɔ bɛ nyunlu kɛ bɛkɛli bɛ ɛwɔkɛ ne mɔɔ bɛbɔ la azo.

¹³Akee menyele ɛdanlɛ kodoku ne mɔɔ hye me nze zo la na memkpokpole nuhua na menzele kɛ, “Awie biala mɔɔ yeanli ye ɛwɔkɛ mɔɔ yebɔ la azo la, Nyamenle badu ye avi ye sua nu, alie ye debie biala ɔ sa nu yeamaa yeaha ye kpoholokpo ne ala.” Awie biala mɔɔ wɔ ɛkɛ ne la liele zolɛ, “Amen”, na bɛyele Ɛdɛnkɛma ayɛlɛ. Na mgbanyima ne mɔ noko lile bɛ ɛwɔkɛ ne azo.

¹⁴Ɔvi mekɛ mɔɔ ɛnee Belemgbunli Atazɛzɛse ɛnyia ɛvolɛ abulanwiɔ wɔ Pɛhyea ebia ne azo, toonwo mɔɔ ɔnyianle ɛvolɛ abulasa nee nwiɔ, mɔɔ ɔvale me kɛ menyɛ Dwuda amɛnlado la, medame o, anzɛɛ me sonvolɛma o, yɛ biala anlie ɛkponledolɛ ezukoa ɛlɛ wɔ ɛvolɛ bulu nee nwiɔ ne anu.

¹⁵Amɛnlado biala mɔɔ ɛnee li me nyunlu la yɛle adesoa manle menli ne. Bɛliele aleɛ nee nwanye ezukoa, akee asolo nwolɛ kenle ko dwɛtɛ fufule abulanla ne mɔɔ bɛdie la. Bɛ sonvolɛma bɔbɔ wulule gyinlanle menli ne akɔme zo. Na mame, ɔlua Nyamenle ɛzulolɛ ti meanyɛ zɔhane.

¹⁶Menvale me anwosesebɛ kɔsɔɔti menzɔle suakpole ne bane ne boɛyɛlɛ nu. Meamkpondɛ medame me ti anwo agyadeɛ biala. Me sonvolɛma ne kɔsɔɔti zɔle nuhua manle yɛyɛle bane ne boɛ.

¹⁷Me aleɛ ɛkponle ne, dahuu menli ɛya ko abulanlu a wɔ nwolɛ a, Dwuuma nee mbɔlɔba mgbanyinli, akee asolo menli mɔɔ vi maanle maanle mɔɔ zuozua yɛ la anu kɛra la.

¹⁸Kenle ko biala meku ɛnlankɛ ko, mboane nsia yɛɛ ngɔkɔlɛ, akee kenle bulu biala memaa bɛ nwanye dɔɔnwo. Na kɛmɔ meze ɛvɛlɛ bedevinli mɔɔ menli ne de nwolɛ la ati, meanlie me amɛnlado ɛkponledolɛ ezukoa ne.

¹⁹O me Nyamenle, mesɛlɛ wɔ, kakye boɛ mɔɔ meyɛ memaa menli ɛhye mɔ la na yila me wɔ nwolɛ.