Read Nzema Nih 6 Bible Online

Nih 6 - Nzema bible

Nih 6

¹Mɔɔ Sanebalate, Tobaya Arelebianli Gihyɛm nee yɛ kpɔvolɛma mɔɔ ɛha la dele kɛ mewie suakpole ne bane ne amuala boɛ yɛ na adenle biala fee ɛnla ye ɛleka biala la, (noko akee ɛnee metɛfale nlenkɛ metɛtuoduale felɛmo ne mɔ anu),

²Sanebalate nee Gihyɛm zoanle manle bɛrazele me kɛ, “Ɛ nee yɛ ɛyia Ono fiene ne anu namule ne mɔ ko azo.” Adwenle mɔɔ ɛnee bɛlɛ la a le kɛ, bɛkpondɛ kɛ bɛyɛ me debie.

³Menvale nrɛlaleɛ mengɔmanle bɛ kɛ, “Melɛyɛ gyima kpole bie, yemɔti menrɛhola ba. Menrɛhola gyima ne gyakyi ba nehane.”

⁴Bɛzoanle menli fane ngoko nna na medame noko membuale bɛ ko ne ala fane nna.

⁵Fane nnu ne azo Sanebalate zoanle ye sonvolɛ manle ɔvale kɛlata mɔɔ ɛnee ɔkpondɛ kɛ nuhua edwɛkɛ ne yɛ baguasee la ɔrɛlɛle me.

⁶Kɛlata ne se, “Gihyɛm ɛmaa mede kɛ, bɛlɛkeha ye huhuhuhu wɔ bɛdabɛ mɔɔ bɛnle Dwuuma la avinli kɛ, ɛdawɔ nee Dwuuma bɛnyia adwenle kɛ bɛte belemgbunli anwo atua, ɛhye ati yɛɛ bɛlɛyɛ suakpole ne bane ne mɔ boɛ a.

⁷Eza ɔse bɛlɛkeha kɛ wɔdu Nyamenle kpɔmanvolɛma kɛ bɛbɔ ye nolo wɔ Gyɛlusalɛm kɛ wɔmɔ a ɛle belemgbunli wɔ Dwuda a. Kɛ ɔkɛyɛ biala la Maanle Maanle Belemgbunli ne bade ɛhye anwo bie. Ɛhye ati mesuzu kɛ ɛ nee me yɛkɛyia na yɛkɛva nwolɛ adwenle.”

⁸Medame noko menzoanle memanle bɛhɔzele ye kɛ, “Edwɛkɛ biala mɔɔ wɔha la ɛnle nɔhalɛ. Ɛdawɔ yɛɛ ɛlɛbɔ ɛ ti anu wɔaha a.”

⁹Ɔluakɛ ɛnee bɛkulo kɛ bɛnwunlonwunla yɛ amaa bɛaze kɛ, “Bɛ sa ɛkpa, bɛangola gyima ne yɛ.” O Nyamenle, kpogya me sa zo ɛ!

¹⁰Mekɛ ɛhye anu ala mengɔle Dɛlaya ara Hyɛmaya mɔɔ le Mɛhɛtabili anlɔnra ne mɔɔ la sua nu na ɔngola finde la sua nu, na ɔzele me kɛ, “Maa yɛhɔvea Nyamenle sua ne anu Ɛleka Nwuanzanwuanza ne na yɛtoto yɛ nwo nlenkɛ nu, ɔluakɛ bɛlɛba ɛnɛ nɔe bɛarahu wɔ.”

¹¹Na menzele ye kɛ, “Ɛnea me a ɛnee sonla le kɛ medame, menriandi meavea? Kɛ ɛdwenle me ɛ? Menriandi mengɔnvea Ɛzonlenlɛ Sua ne anu na bɛangu me? Metua me nzo. Menrɛyɛ ye fee!”

¹²Na mendele ɔ bo kɛ tɛ Nyamenle a zoanle ye a, na ɔdaye a yebɔ ɔ ti anu yerabɔ me munzule ɛhye a, ɔboalekɛ Tobaya nee Sanebalate ɛbɔ ye ɛkpa.

¹³Bɛbɔle ye ɛkpa kɛ ɔraha ɛhye, amaa meazulo na meayɛ ɛhye, meayɛ ɛtane, na meanyia duma ɛtane, me nyunlu agua aze.

¹⁴Na menzele kɛ, “O me Nyamenle, kakye Tobaya nee Sanebalate bɛ nyɛleɛ ɛhye mɔ na tua bɛ nwolɛ kakɛ. Eza kakye Nyamenle kpɔmanvolɛ raalɛ Nowadaya nee Nyamenle kpɔmanvolɛma mɔɔ ɛha la kɔsɔɔti mɔɔ bɛlua bɛ nyɛleɛ zo bɛkpondɛ kɛ bɛka me ɛzulolɛ la noko.”

¹⁵Yemɔti kenle abulanlu nee nwiɔ pɛpɛ, wɔ siane Yilɛle ne anu, ye kenle ne mɔɔ tɔ zolɛ abulanwiɔ nee nnu ne la azo yɛɛ banelielɛ ne wiele bɔkɔɔ a.

¹⁶Mɔɔ yɛ kpɔvolɛma mɔɔ wɔ maanle maanle mɔɔ zuozua yɛ la anu la dele la, bɛ ti zile aze na bɛzulole, ɔluakɛ bɛnwunle ye wienyi kɛ yɛ Nyamenle ne yɛɛ ɛboa yɛ ɛmaa yɛli gyima kpole ɛhye a.

¹⁷Mekɛ ɛhye amuala anu, Dwuu mgbanyima ne nee Tobaya hɛlɛhɛlɛle bɛ nwo ngɛlata.

¹⁸Menli dɔɔnwo mɔɔ wɔ Dwuda maanle nu la wɔ Tobaya anzi, ɔluakɛ Tobaya aye ɔ ze a le Ɛla ara Hyɛkanaya. (Hyɛkanaya le Dwuunli.) Eza Tobaya ara nrenya Gyihoheenan ɛgya Bɛlikaya ara Mɛhyɛlam ara raalɛ.

¹⁹Menli baka ninyɛne kpalɛ mɔɔ Tobaya ɛyɛ la anwo edwɛkɛ kile me na bɛahɔha mɔɔ menwɔha la bɛahile ye. Na ɔhɔle zolɛ ɔhɛlɛhɛlɛle me ngɛlata ɔbɔle me apo.